KANTHOUNA 27

Isaac'ne Jacob'ya Phor Pikur

1Heirouri asitoubi hungthukkura, touri kheen heirou Isaac beimakni tarwura, heitoubi aiyei mitlungkhi yenmehwura; heingammei ari mit mumakkura; heirouri ani aiyei chanapawa upawa Esauya ungloubi heitoubi anungei shun, “Keicha samranwa,” tounarou Esaune, “Kouweiyo pawa, keiri bi arou leileime” toubi loumallangkur. 2Heirouri Isaacne shun, “Thilak, asinungri keiri tarwura, heineri keiri kouninung hirouwo touri yunchangmakura. 3Heineri asinung keine neinungei shunkniri, nangni neiyei hutsu rapya touri neiyei malaa'chei heirou mala'taakya urlouheibi ramhangra chabini keinungei yaa bei chanmanpilaklo. 4Heitoubi keiyei maikni yaa'an heiya tuini thungmarshikbini, heitoubi keinungei bei pimailaklo. Heiyanungri keine hibongnung neinungei phor pikhouroume.”

5 # Kan 12.3; Msh 24.9. Heirou Isaac'ne aiyei chanapawa Esau'nung tlou shunmtuyeinung Rebecah'ni mayekthungkur. Heirou Esaune ramhangra yaa chanrou chakur hillouri; 6Rebecahni aiyei chanapawa Jacob'ya unglhakbini shunmtukur, “Thilak, neiyei pawani neiyei tei Esau'nungei tlou shunkur heiri keine mayekthungurla; heitoubi ani, 7‘Keinungei yaa yenmanheibi, heitoubi yaa'an tuini thungpilaklo, heiyanungri keine yaa'an heiya maibini, kei hibongnang Umpuei maibongra keine neinungei phor pikhourou,’ toubi kyun. 8Heine asinungri nangni keiyei shunya ninglhakbi louchanthunglak. 9Asinunghak halshangra wachangbini, tlangshun marnam khintam keileinara yenmanthutbini hatlaka; heirapya keine tuini thungbini, neipawaei maikni anya marshikpiyeise. 10Heitoubi nangni anchum heiya neiyei pawanungei yenlhakpibi, ani loumairou; heitoubi ani hibongnang neinungei phor pikhourou.” 11Heirou Jacobne aiyei puiwi Rebecah'nung loukyun, “Thilak, keitei Esauri hakra khmul puk'thimi, heiya keiri hakchik knal thimi. 12Heineri pawani keiyei sharungya loumyemthilanungri, aya mallakna marburou; heirouri keine phor phaya shunmakhi, keitamya mancho pharou.” 13Heitounei puiwini anungei loushun, “Neiya mancho heiri keidoura dalaksu, keiyei chanapawa, keiyei shunyatom louchanthunglak, heirou khrangtoubi keinungei tlangshun rapya yenmanheilaka.” 14Heitounei ani wathukkurbi, heirou tlangshun rapya aiyei puiwinung yenmanpikur, heitoubi aiyei puiwini heirapya sheembini aiyei pawaei maikni anya tuini thungpikur. 15Heitoubi Rebecah'ne aiyei chanapawa samran Esau'wei cheemrei loukhoupi phirul rapya louthutpibi, heirou aiyei chanapawa Jacob'nungei mansam'baangpikur. 16Heitoubi Jacobei hutbang khintamrakhi heirou aiyei ngakkhung ka'tlungni tlangshunyei un rapya ani nabaangpikur. 17Heitoubi aiyei khrim muiknamni thungminkur anchum heiya mumtolle kalhonni aiyei chanapawa Jacobei hutra malanpikur.

18Heirouri ani hungchangbini aiyei pawanung, “Pawa,” toubine hung'ungkur. Heirouri aiyei pawani loumallangbi, “Kouweiyo? Nangya huwo, keichawa?” toubine loukngai. 19Heirouri Jacob'ne aiyei pawanung loushun, “Keiri neiyei chanapawa upawame. Nangni keiya watyilkur hilthungni yaa yenmanheilame; kanthoubi ka'ommalo, heitoubi keiyei yaa'an tuiya kamailaklo; heitoubi neimalung khrahni keinungei phor pikhoulaklo.” 20Heirouri Isaacne aiyei chawanung loushun, “Keichawa, nangya koutoubi yaa heinak khrangni kmanno?” Heirouri ani loumallang, “Neiyei Umpu, Dunpune keinungei loutlathutpinei ngammei keine mankurme.” 21Heirouri Isaac'ne Jacob'nung shun, “Keichawa, keipongra hungkarnaklak, heirou tanghakpani nangri keiyei chanapawa Esauko, nimanung deiko toubine munanungei keine neiya myemthiyeise!” 22Heitounei ngammei Jacob'ne aiyei pawa Isaacyei pongra hungkarnakkur; heirouri ani loumayemthibini kyun, “Aiyei hourari Jacobei hounaklei, heiya hutbangrari Esauwei hutbang hoithulei!” 23Heisi tounarouri Isaacne aya manrechangmakura, ngamri aiyei hutbangrap heiri aiyei 'tei Esau'naksini khmul puk; heisi toubine ani Jacobya phor piwurkhou. 24Heirou ani hanuikhi loungaithithu, “Nangya tanghakpani keicha'napawa Esauko?” Heirou ani loumallangkur, “Moi, keihakme.” 25Heirouri ani loukyun, “Keipongra yenlhaklak, heirou keicha'napawayei yaa'an heiya keine mairouwa; heitoubi keiyei malungpilni neinungei phor pirouwa.” Heisitoubi Jacobne yaa'an heiya aiyei pongra yenlhakpikur, heirouri Isaacne loumaikur; heitoubi ani darkha yuikhi yenmalanpibi, heikhi Isaacne mongloukur. 26Heirouri aiyei pawa Isaacne anungei shun, “Asinungri keicha napawa, nangni keipongra hungchangbini, keiya machuppilak.” 27Heirouri ani hungchangbini aya machuppikur, heirouri ani Jacobya phor piwurbini shun, “Thilak, keicha napawaei khrim heiri tanghakpani Umpune anungei piwurkhou phoryei ram'khrim heirime. 28Heineri Dunpune neinungei nungthourei rdai dayerpilaksu, heitoubi tlaipangpallei lalkhi marthumni dunyerlaksu, heirou trunwai lungkhi, heirou darkha heikhi chungni lukyerlaksu. 29Thimi rapne watlhou toupilaksu, heirou Limrap nammani neiyei maibongra khrumlaksu, heitoubi neiyei teinao rapbei doura pu hoilaksu, heirou neipuiyei chanao rapne neiyei maibongra khrumlaksu, heitoubi neiya manchokur thimi kantangni mancho phakur hoiniyasu; heirou neiya phorpi thimi kantangni phorpha hoiniyasu.”

30Heisitoubi Isaacne Jacob'ya phor picheibi, heirou Jacobne aiyei pawa Isaac'yei bom'rouwei chimama wathukkurle tallengni, aiyei tei Esaukhi yaa chanrou chanarei yenkallengbi hungchangkur. 31Heitoubi anikhi yaa-an thungmarshikbi aiyei pawanungei yenpikur, heitoubi aiyei pawanung hungshun, “Keiyei pawani kanthoubi, neicha napawa keiyei yaa chanmankur anya kamailakalo, heitoubi pawani keinungei phor pilakalo.” 32Heirouri aiyei pawa Isaacne anungei loukngai, “Nangya huwo?” Heirouri ani loumallangbi, “Keiri neiyei chanapawa, neicha samranwa Esaume,” toubine loukyun. 33Heirouri Isaac'ne kalthi malungkhawurbi leoleo kanchunkur, heitoubi ani kyun, “Heiyanungri haallei hungchangkur heiwari huwo? A heiri kourangawo? Ane yaa chanbini, keinungei yaa-an yenpinarouri, keinekhi an heiwaya neiyei hungchangbongnang namma mailouheila, heitoubi anungei phorkhi loupiwurla. Moi, chim, phor heiri anungei pibomthuk.” 34Heirouri Esaune aiyei pawaei tlouya mayekbi ani kalthi malungdouni ungraothutbi chapkur, heitoubi ani aiyei pawanung shun, “O keiyei pawa, keinungkhi phor pithulaklo.” 35Heitounei Isaacne loushun, “Neiyei naowani neishak kansabini hungchangbi, neiyei phorya ani louheilame.” 36Heirou Esaune kyun, “A heiwari shuimakni Jacob hoimakrouko? Ane keiyei shakrungya kansabini keinungei mandalpikur heiri awane khnui tlungura; haalnungkhi keiyei Pipa bomkhi lunglouheikur; heirou thilak, angtukhi ani keiyei phorya namthatbini louheithula.” Heirouri ani, “Keinungei phor khatchatomkhi khoupimakurako?” toubi shunchakur. 37Heirou Isaacne mallangbi Esaunung loushun, “Thilak, ayari keine neiyei pu hoiyerwurla, heirou aiyei teinaorap namyakhi aiyei shok hoiyerwurla; heitoubi trunwai, heirou darkha heikhi marthumni luknanungei keine anungei phor piwurlame; heineri asinungri keine kouya toupiserouwo, keicha samranwa?” 38Heirouri Esaune aiyei pawanung loukyun, “Keiyei pawa, neiyei phorya khatchatomkhi makkurako? Keiyakhi hanuidikcha phor pithulaklo, O keiyei pawa!” Heisi yunbi Esaune hou chouni ungraobi chapkur.

39Heirouri aiyei pawa Isaacne loumallangbi anungei shun, “Thilak, tlaipangpallei thleiphu ramya nangni truncha-trunmai'khoumakrou, heitoubi nungthourei rdaikhi neinungei karshuknamakrou. 40Heiya nangni neiyei raalshonya shinbini ringrou da, heitoubi neiyei naowaei shok hoirouwa; heirou kounakpi nangni manibi kulchal maniyanungri, neiyei ngakhungra urbi klei shok hoinei putpu heiri toudeekkur kya.”

Isaacne Jacobya Haranra Malhetkur

41Heirou asinungri aiyei pawani Jacobnungei phor piwurnei ngamrou, Esaune Jacobya horthibi machinwura; heirou Esaune aiyei ukningra ningchakur, “Kai pawaei khi kanrilnei kheenri tlamakura, kheen heirouri keine keiyei naowa Jacobya hatrou dawa.” 42Heirouri aiyei chanapawa samranwa Esauwei kyun tlourap heiri Rebecahnung mayekyerwurla; heitounei ani aiyei chanapawa Jacobya ungyerbini, anungei shunmatupikur, “Thilak, neiyei tei Esaune neiyari hatnanungei rangurame. 43Ngam heini asinungri, keichawa, nangri keishunya louninglak, nangni kanthoubi, Haranra keiyei trahwa Labanyei leinara trukwurlaka. 44Heitoubi nangni neiteiyei malungkhakur heiwa trimbongyenri aiyei leinara waleiyuriyalo. 45Heirou neiteini neiya malungkhakur hei trimmanungri, nangni anungei toupiwurkhou lhou rapya ani malumurlanungri, keine thimi heimalhetbi, neiya bi heirouwei walouyerrou; kouya tounanungei keine nakhunta teinao'rekya nungkhatnuirou hirilyerbi keiyei lhawai lahyerrouwo?”

46Heirouri Rebecahni Iassacnung shun, “Hittia rapbei cha'nangaka rapya mou hoinanungei yentrukpibi hungchangleiko toubi ningchanarou keiri lhawai lahwurrame; kounakpi Jacobne ram arouwei Hittia rapbei cha'nyul raprei khatya yenloulhakbi hungchanganungri, keiri keichaan arou ringbini kouya tounaeirouwo?”

Currently Selected:

KANTHOUNA 27: MARIBSI

Highlight

Copy