KANTHOUNA 21

Isaac Pukkur

1 Umpune Aiyei shunpikur hilthungni Sarah'ya yongmurilkur; heitoubi Umpune kantompikur tlou hilthungni Sarahnungei Ane tlungyerkur. 2Heirouri Sarah nao urwura, heitoubi Abraham'nung Dunpuei shunthutpikhou heinakrimni, aiyei taryei kaalnung Sarah'ne chanapawa khat hungpukkur. 3Heirouri Abraham'ne anungei Sarah'yei pukkur aiyei chanapawa heiyei min Isaac toubi thulpikur. 4#Pao 7.8. Heirou Abraham'ne Dunpuei chay hilthungni, aiyei chanapawa Isaacya puk'hil tlaini chotni tlungkur heirouri aiyei sermur'un danpikur. 5Abrahamri aiyei chanapawa Isaac'ya pukyei kaalnungri ai'mshaei kum machakhat tlungura. 6Heirouri Sarah'ne kyun, “Dunpune keiya nungkngaini laoyerpila; tloubom awaya mayekkur thimi kantangni keile laomalnarou.” 7Heirou Sarah'ne asitoubikhi kyun, “Sarah'ne Abraham'nungei cha pukbi nao pomheiroume touri huni ningmukhouweirou? Heisiya hoiyanungkhi ani tarkuryei kheenrou keine anungei chanapawa khat pukkurla.” 8Heitoubi nao heiri nungkhatnuiniyei tangbaangurbi, nu khailum katphawura; heirou nao heichaya nu khainirou, Abraham'ne chak'khang tang khat markhulkur.

Hagar'le Ishmael'ya Thulthutpikur

9Egyptrei napuiya Hagar'ne Abraham'nung pukpikur chanapawa heini aiyei chanapawa Isaacle marekbi laonapibi klei heiwaya Sarah'ne muthungkur. 10#Gal 4.30. Heitounei ngamrou ani Abraham'nung shun, “Shok napuiya heiwile aiyei chanapawa yakhuya hulthutlaka; ngamri neishok heiwiyei chanapawale keiyei chanapawa Isaacle neicheem arou pipa hoikanthrinri yamakrou, heirou ani hoibomkhi thukmak.” 11Heirouri Abraham'ne aiyei chanapawaei ngamrou khalthibi aiyei malung dammakura. 12#Rom 9.7; Heb 11.18. Heiya Dunpune Abraham'nung shun, “Neiyei chanapawa heinung'tlim heirou neiyei shok-napuiya heinung'tlimkhi neilhawai khallahmak; Sarah'ne neinungei koukouya yunlanungkhi, heihilthungni nangni loutoulaka; ngamri Isaac'yei shullamrei neiyei yu-charap yenraanyerrou. 13Heitoubi neiyei shok-napuiya heiwiyei chanapawa heirouweikhi Keine limkhat thukyerrou, ngamri a heikhi neiyei chanapawa khat.” 14Heisi toubi Abraham'ne ningshun manma kanthoubi, mumtol marshikbini, heirou an'un bonra yuiding haalbini, heitoubi Hagar'yei khlabangra yarbaangpibi, heirou aiyei chanapawa heichale kalhonni aicheemrouei hilthutkur. Heirouri Hagar'ne shaalthutdurbi, Beer-sheba'yei shitnrui phaikara karwaichakur.

15Heirouri an'un bonrei yuidingya monglouchikur hillouri, ani aiyei naochaya heengnbur kalle khatra fneiwurkhou. 16Heitoubi ani bi heirouwei pochutdurbi mala kabphana'atmal tlatnara ombini, nao heichaya hillhangra khoubini, heitoubi ani kyun, “Keiyei naochaei khi heiri keimitni thichangmakura.” Heisitoubi ani nao lhangra mai kallekthutbi ombi leiyeinung, nao heichani hou chouni ungraobi chapkur. 17Heirouri Dunpune napawa douwachaei chapkur houya loumayekkur heirouri, Dunpuei Thangringni Thangwanrei Hagarya ungbini heirou anungei yukshun, “Chimakalo, ngamri neiyei naochaei ungraochanei hou heiri aiyei leinabi heirouwei Dunpune loumayekurla. 18Kanthouwalo, heitoubi naochaya neihutni khulloubi pomlaka; ngamri airouwei Keine lim tangkhat thukyerrou.” 19Heirouri Dunpune aiyei mitlung waaryerkur, heirouri ani bi heirouwei yuiphumcha khat mulhakkur; heirouri ani wachangbini aiyei an'un yuibonra yui haalthimloubini naochanung hungpimongkur. 20Heitoubi nao heichari Dunpune kalhonpibi nungkhatniniyei hou-hou kattangkur; heirou ani ramthingra paalbini mala kapkhei thimi khat hoikur. 21Ane Paranyei Ramthingra paalkhou, heirou aiyei puiwini anungei Egyptrei nu khat loubaangpikur.

Abraham'le Abimelech Yasiyei Tlakra Ya'kril

22Kheen heirouri Abimelech'ne, aiyei raallui upa Phicol'le kalhonni wathukbini Abraham'nung wa'kyun, “Dunpune neiyei lhou touna kantangrou kalhonpilei. 23Heineri asinunghak Dunpuei mintlangbini, keinungle, keiyei chanao rapnungei, heirou hillei hungrou kyou keiyei yu-cha rapnungkhi minampi'makroume toubi nangni keiyei maibongra tlou kantompilak. Heirou keine neinungei malungamkna kyaei lhou toupikur heinaksini, nangnikhi keinungei heirou neiyei ramtaangbi yukleina bi anungeikhi malungamknani lhou toupilak.” 24Heirou Abraham'ne loumallang, “Keine tlou kantomrou.”

25Abimelech'yei shok rapne rkalbi namni lungloukur yuiphum khatdei ngamrou Abraham'ne Abimelechnung tlou makatbi washunyei kheenrou; 26Abimelech'ne loukyun, “Lhou heiri huni toukurro touri kei mumakhui; nangnikhi keinungei yunpikhoumak; heina'douroukhi tloubom heiyei ngamrou keiri angtutom mayektirkhui.” 27Heingamei Abraham'ne yao thale, heirou hal thakhi loubini Abimelech'nung pilhakkur; heitoubi yasini kantlangni yarilbi tlou kantomrilkur. 28Heirou Abraham'ne yao kalla enitam yaorul hangrei hulkarkhaibi khoukur. 29Heirouri Abimelech'ne Abraham'nung loukngai, “Nangni yao kalla enitamya yaorullouei hulkarkhaikur heiri koungameiyo?” 30Heirou Abraham'ne loukyun, “Nangni yao kalla enitam arapya keirouwei loulaka; ngamri awane tloumayung hoinabi yuiphum achari keine utkurme touri nangnikhi murou da.” 31#Kan 26.33. Heitounei ngammei bi heiwaya “Beer-sheba”#21.31: Tlou kantomrilna yuiphum enitam. toubine minthulbi ungkur; ngamri bi heitamrou yasini tlou kantomrilwurkhou. 32Heisitoubi yani Beer-sheba'ra tlou kantomril khat khoukur. Heiyei hillouri Abimelech'le aiyei raallui upa Phicol yakhuntani kanthoubi yairam Philistia'ra yenkallengkur. 33Abraham'ne Beer-shebara heengtrung khat lingpukkhou, heirou ani bi heitamrou klui naimak Umpu Dunpuei minya ungbini khrumchakur. 34Heisitoubi Abraham'ne Philistia ramra kum tlani ramtaangbi paalwurkhou.

Currently Selected:

KANTHOUNA 21: MARIBSI

Highlight

Copy