KANTHOUNA 15

Dunpune Abram'nung Tlou Mardingrilkur

1Heihillouri Umpune Abram'nung yongkar'anyerbi kanre-kandangni loushunpikur, “Chimaklo, Abram; Keiri neiyei raalsouna chungme, heirou neiyei klahman tangni marshikbini leilei.” 2Heirou Abram'ne loukyun, “Pu DUNPU, keiyei chanaokhi pukmakurya mubini, Nangni keinungei kouya pirou touneiyo? Heirou keiyei cheem-kei lukrou thimiri Damascus'rei Eliezer nimakeiko?” 3Abram'ne heisi yenkyun, “Thilak, keinungei Nangni chanao pimakurari, keicheemrei puklhakkur thimi khatni keiyei cheemluk thimi hoirou tomngeiya.” 4#Kan 17.16,21; 18.10; 21.2. Heirou thilak, Umpuei tloulhangni anungei asitoubi yunpilei, “Ahakpane neiyei cheem-kei lukrou cha'mranglam nimakme, heiya neiyei shullam hakparei pukrou kyou cha'mranglam heihakpani neiyei cheem-kei lukthung thimi hoirou.” 5#Rom 4.18; Heb 11.12. Heirou Umpune ayari daangra urthutloubini shun, “Asinungri nangni nungthoura mangalthilaka, heitoubi sorwa rapya mshing sherthilaka; nangni heirapya mshing sherchichanganungri, neiyei yu-cha rapkhi heisibil chungyerpirou,” toubi Umpune anungei shunpikur. 6#Rom 4.3,9,22,23; Gal 3.6. Heirou ani Umpuya malungamkur; heitounei ngamrou Umpune Abramya tharmu chim thimi khat khoini yapikur.

7Heirou Ane Abram'nung shun, “Chaldea rapbei ram Ur heirouwei ran ram khatya phayernanungei neiya ruithutloukur Umpu heiri Keime.” 8Heirou ani loukyun, “Pu DUNPU, keine ram heiya pharoume touri koutoubi muserouwo?” 9Heirou Umpune anungei shun, “Kum khyumyei halshun khatle, kum khyumyei tlangshun kalla khatle, heirou kum khyumyei yaopa khatle, heirou ram'mathru khatle heirou cheem'mathru khatle loubini nangni Keinungei makatlaka.” 10Heirouri Abram'ne shunpikur makatput namma marshikthutbi heirapya lhang khni'khni thukni bailhaangbini, heitoubi heirapya mai holthutrilyerbi lingshaang khni thukni fneikur, heiya ani mathru rapyari bailhangmakni khoukur. 11Heirou malaang rapne makatbi tlathutbi khoukur anchum rapbei doura yuchuyei kaalnung Abram'ne yaya louhultraikur.

12Heirou kinnine yongchipkur heirouri, Abramkhi ipknine douchangmakura; heirouri thilak, chi'knayei kmehni aya mkhubphopkur. 13#Pao 7.6,7. Heirouri Ane Abram'nung shun, “Nangni kanre-kandangni mulaka, touri neiyei chanao rapne yaiyei ram nimaknara ram taangbini leirou, heitoubi yani bi heirouwei thimi rapbei shok khoini lhoutoubi leirou; heirou yani kum macha-phali yaya marhotbini khoupirou. 14Heiya yani shok khoini watlhou toupibi klei lim heiyari Keine pichar tourou; heitoubi hillouri yani lalthum marthumni urlouheibi ram heirouwei shaalthutrou. 15Heirou nangni tlani pulchikhoubi, heitoubi kyingni neiyei roshukni tambi hirouwa. 16Heiya yani neiyu-neicha rapbei chaan-phali hungtlungeinung bi heirouwei kallengthutrou; ngamri Amoria rapne yaidoura marhotrou kyou heiri watleihui.”

17Heirouri asitoubi hungthukkura, touri kinnine yongchipkur hillouri yenmehwura, heirouri thilak, meikhu thuk phuwan khatle, meithlan chok meishar khat heiri lhang-khni'khni bailhangbini khoukur anchum rapbei tlakra yentraichakur. 18#Kan 17.2,7,9-14,21. Heiyei tlaini heihakrou Umpune Abram'nung tlou kantomkril khat khoubini kyun, “Neiyei yu-cha rapnungei Keine ram awaya, Egypt kung'rouweini Kungtang, touri Euphrate waphani piwurla. 19Heirou Kenia rapbei, heirou Kenizzia rapbei ramkhi, heirou Kadmonia rapbei ramkhi; 20heirou Hittia raple, Perizzia rapbei ramkhi; heirou Rephaim rapbei ramkhi; 21heirou Amoria rapbei, Canaania rapbei, heirou Girgashia'le heirou Jebusia rapbei ramkhi piwurla.”

Currently Selected:

KANTHOUNA 15: MARIBSI

Highlight

Copy