HOYOUNA 32

Sina Halshun Lha

1 # Pao 7.40,41. Asinungri Moses'ne Lhungdourei yenkallengmakni leikur heiwaya thimi rapni munarouri, yani Aaronyei pongra lokpa wakartilkur, heitoubi yanungei shun, “Kanthouwalo, heitoubi kaya lam ruipinanungei thraipu khat kanungei sheempilaklo; kouweiyo toulanungri, kaya Egypt ram'rouwei ruithutpikur Pu Mosesnung kouya thukkurawo touri kani mumanmakura.” 2Heirouri Aaron'ne yanungei loushunkur, “Nane nainaiyei hutshi raple, nai nu rapbei, nai chanao rapbei, heirou nai chanapuiya rapbei khnarei nabi klei sina parrap namma lhukbini heitoubi keinungei heipilhaklak.” 3Heisi tounarouri thimirap nammani yaiyaiyei khnarei sinapar rapya lhukbini, heitoubi heirapya Aaron'nung heipilhakur. 4Heirouri ani yai hutrouwei putchei rapya louloulhakbini heitoubi shekni heirapya namma umkhromkur, heitoubi halshun lha khat sheemthutkur; heitoubi ani shun, “Areisuei, O Israelrap! Naya Egypt'rouwei ruithutpikur thrairi ariyame!” 5Heirouri Aaron'ne hal'lha heiwaya mubini, ani heiyei maibonga khrahpal khat sabangkur; heitoubi ani hou chouni khulpaobi kyun, “Ningari Umpunungei khulluk khangnei Kneitang khat markhulloume.” 6#1 Co 10.7. Heisi toubine thangei tlaini'rouri yani ningshun manma kanthoubini heitoubi malan khrumnaput hongbi makatle kalhonni borh kuknei khrumna putkhi makatkur; heitoubi thimi rapni omkarhungbini chamaimalnabi houklumni marekmalnakur.

7Heirouri Umpune Moses'nung shun, “Khrangtoubi yongchumlaka, ngamri nangni Egyptrei ruithutloukur neiyei thimi rapni yaitamya toumarmokurlame. 8Keine yanungei shunmatupikur chaytlourap hilthungni yani chamakurame; yani yaitam halshun lha khat sheemthutbini heiwaya khrumbini, malan put rapkhi hongbini makatdurla, heitoubi yani kyun, ‘Areisuei, O Israel'rap! Naya Egypt'rouwei ruithutpikur thrairi awariyame!’ ” 9#Hoy 32.31-35; Msh 14.11-25. Heitounei Umpune Moses'nung shun, “Anaksi thimi rapyari Keine muwurla, thilak, yari shun ningmak thimi rapme. 10Ngam heineri asinungri Keitamyei kningya tourouwa, heiyanungri Keiyei meithukkei malungkhakur awane yayari kaangtlumyerouwa; heitoubi Keine yaya maangyerouwa; heitoubi neiyei yu-cha rapyari tang limkhat khoini Keine kathukyerouwa.”

Mosesne Umpunung Shunchakur:

11Heirouri Mosesne aiyei Dunpu Umpunung shunchakur, “O Umpu, Nangni Egypt ram'rouwei Neiyei thang'alle, mane-mantrangei hutni churbi ruithutloukur Neithimi rapbei doura Nangni meithukni malungkhapikur heiwaya koutouneiyo? 12Kounungei Egyptrei thimi rapya ‘Khril lhangaimak ukningle kalhonni Umpune yaya ruithutloubini Lhungdoura hatdurbi, heitoubi yaya tlaipangpal arouwei mangyerrou waiyoukurame’ toubi yunbini laonayerrouwo? Neiyei malungkhanarei ukning toutombini, Neiyei thimi rapya klah dayerrou younarei Neiukning holthutlaklo. 13Neiyei shikrui Abraham, Isaac heirou Jacob yarapya ningthutpilaklo touri Neimshahakni yanungei chrungknani kantombini shunpikhou touri, ‘Keine naiyei chanao rapya nungthourei sorwa naksini mshing chungyerpirou, heirou Keine piroume toubi kantompikur ram heiwakhi naiyei yu-cha rapbei chaanrou Keine yanungei klui naimakni thrungnanungei piheirouhui.’ ” 14Heisitoubi Umpune Aiyei thimi rapbei doura khal'malungkhawurbi yaidoura klah dayernanungei ningchakhounarei hanui hilkallengni khaldongkur.

15Heirouri Mosesne mai khreithutdurbi, heirou aihutra Mardingrilnei Tloulam thlungpak rapya shinlouheibi Lhungdou'rouwei yongchumkur; thlungpakrap heiri mnak khintamrekra mayelhakbi, thlungpak khintamrekpa heiri khatnaksidik mayelhakur. 16Heirou thlungpak rapya sheemthutkur heiri Dunpuei lhouthil; heitoubi thlungpakrei mayenei lhou heiwakhi Dunpune yemkhakbi mayekur tlouthil. 17Kheen heirouri Joshua'ne thimi rapbei ungraochanei houya mayeknarouri ani Mosesnung shun, “Krungkulla raalsonei hou khat mayekleime.” 18Heiya ani loukyun, “Heiwari raal maninei hou nimakme, heitoubi raal manimakurbi kanrilnei chapkur houkhi nimakleime; heiya keiyei loumayekri laa shanei houleime.”

Moses Malungkhakur:

19Heirouri Moses'ne rungbomra hungtlungkurle tallengni, halshun lha khatle heirou nuymalamchabi louklei heiwaya hungmulhakurla; heirouri Mosesri meithukni malungkhawura; heitounarouri aiyei hutrei yenshinkhei thlungpakrap heiwari thleira khingsundawurbi, lhungsora khingchalkur. 20Heirouri yani sheembi loukhoukur halshun lha heiwaya loubini meiwaira khinglhakbi hongkur; heitoubi rahui thukni manuichalwurbi yuira chailhakur; heitoubi Israel thimi rapya heiyei machum yuiya mongyerkur.

21Heirouri Moses'ne Aaron'ya shunkur, “Thimi rapni neinungei kou shunnarou nangni yaidoura heinak tangei borh lhouya touyerkurro?” 22Heirouri Aaron'ne loukyun, “Keinaowa, heinakbil meithukni malungkharimakhui, thimirap heine kounakbil borh lhouya toukniyo touri neiyei kmu heiwariya! 23#Pao 7.40. Koungameiyo toulanungri, yani keiya shun, ‘Kaya maibong lhangra lam ruipinanungei thrai khat sheempilaklo; kouweiyo toulanungri, kaya Egypt ram'rouwei ruithutpikur pu Moses'nung kou thukkurawo touri kani muchangmakura.’ 24Heitounei ngamrou keine yanungei louyunkur, ‘Naihangra huhuni sina klei yaowanungei lhukbini keinungei heipilhaklak.’ Heisi tounarouri yani sina rapya keinungei heipilhakur, heitoubi keine heirapya meiwaira khinglhakbini iksoukur, heitoubi halshun lha heiwaya sheempikurme.”

25Kheen heirouri Moses'ne thimirap heiri kulchal manimakurame touri muwurla, (kouweiyo toulanungri, Aaron'ne yaya kul chalmakurnei ngamrou yaya yeekna thimi rapbei maibongrakhi yari koukhi karshukmakni hangwalni rikrai phawurla). 26Heirouri Moses'ne rungbomyei palshung shumtrumra mayungbini kyun, “Huhuni Umpuei lhangra mayungbi klei yaowanungri, keinungei hungthukalo!” Heisi tounarouri Leviyei chanaorap nammani aiyei pongra hungkar'umbini kartilkur. 27Heirouri yani yanungei shun, “Israel rapbei Dunpu Umpune asitoubi shunpilei: ‘Thimi kantangni ai'aiyei raalshon shinbini, heitoubi rungbomyei shumtrum kantangra chanlhakbi, heitoubi ai'aiyei palui-teinao rapya, heitoubi ai'aiyei cheemlhun-keilhunyei thimi rapya ai'aiyei mani shat'hatlaksu.’ ” 28Heisitoubi Levi'yei chanao rapni Moses'yei shunmatupikur hilthungni lhou toubine hatkur, heisitoubi heiyei tlainirou thimi napawathil lishing khyumeimal hatkur. 29Heirouri Moses'ne shunkur, “Angtutou tlainirou Ane nanungei phor pinanungei nani aiai'mshani Umpuei watlhouya tounanungei makatbini marthingnalak; koungameiyo toulanungri, na thimi napung kantangni ai'aiyei chanao rapya heirou ai'aiyei teinao rapya karhani lhou touwurlame.”

30Heirou thangei tlainirou Mosesne thimi rapnung shun, “Nane naitam borh tangni touwurlame, heirou asinungri keine Umpuei bira wachangbini, naiyei borh touwurkhou heinung'tlim keine ukning hungbini shunchapi manikurkhi kya.” 31Heirouri Moses'ne Umpunung katkallengbi shunchakur, “Ulleiyo, kousi tourouweiyo! Thimi rapni thuithikur borhyei lhouya touwurlame; heirou yani yaiyei thrai hoinanungei sinayei halshun lha khatkhi sheemthutdurlame. 32#Kre 3.5. Heiya asinungri Nangni yaiyei borhya kukpilako, nimanungri, Neiyei mayelhakhou lailik'rouwei keiyari louthutdurpilaklo!” 33Heirouri Umpune Moses'nung loushunkur, “Keiya karhani borh toukur thimi hukounak heiyari, Keiyei lailik'rouwei ayari louthutrou. 34Heiya asinungri nangri shallaka, heitoubi Keine neinungei shunpikhouna bi heirou ruilaka. Thilak, Keiyei Thangringni nai maibongra lam ruipirou; heiya hoiyanungkhi, Keine yaidoura mit'thrilninangri, yaiyei borhnung'tlim yaidoura tanti touheirouhui.”

35Heisitoubi Aaron'ne ruibi thimi rapni sinayei halshun lha khat sheemthutdurnei ngamrou, Umpune yaidoura phar nayerbi shar dayerkur.

Currently Selected:

HOYOUNA 32: MARIBSI

Highlight

Copy