LUKAQ 24

Jesuq Ka Amaa Wa Dong Wanto

(Mot 28.1-10; Mak 16.1-8; Joh 20.1-10)

1Chepat ranap, ranap chu maq, jechakre ka tsangshiq raq atiije süse tapan ikhiinok nai homseng ka lamho raüta ma lapkho na kito. 2Tsangshiq raq makho longsha kilü ka atiikü lin baiq rea wishe chhihoto. 3Krai mren, tsangshiq ka longsha mong na nyap wa raüta liito. Shatmaq, tsangshiq raq Tati Jesuq ma ka kiijaq chhi mak dea, ahü riito. 4Tsangshiq ka kiijaq chap raüta, jamkho jaki tiinya nguta, awang rai liipan niili, tiidong chhaq maq, maiq wenai ka khealü achhai anyii miirii samraqraq raüta, kiijaq tsangshiq rai chap raqraq she chhito. 5Ahaisi wa lam maq nai akii anyii rai lam maq, jechak nyungtiim ka hiq na kurang she riito. Kra maiqwe nai raq tsangshiq ma akha chongto, “Namshiq ka maiq atrati ka amati phong na jam nguto rit tlan? 6Apaiq ka ajaq ahü she. Apaiq ka ama wa tiidong wanto she. Apaiq raq namshiq ma Gelili maq: 7‘Maiq Se kriika ngarai maiqse jaqkhon mong na kebaiq wan chang dongdii. Raüta, pumsongkham na mitübaiq wan. Kiimaq ranaiqtsam ngojai niishe, apaiq ka atra she mitiidong wan nong’ nguta chongkuqtaq ira tsan na tiitsang shat khata.”

8Kiijiishe, jechakre tsan mong na, apaiq bomchong ka tiido wanto. 9Raüta, malapkho maq jam niishe jang wan nongto. Raüta, arthun tsütsa ara ajaqshisetiim roqshi ri weshi kiima nai nanok ahinti miishe chongkuq wanto. 10Kra chong tiikai jechakre thun ka Makdalen hiqti nyung Meriq, Joana, kiimaq Jakob nyung Meriq riito. Kiimaq, tsangshiq rai jechakre ahinti min asi riito. Tsangshiq raq arthun tsütsa arka kiimwebi miishe chong wanto. 11Shatmaq, kiimwebi raq jechakre bomchong kriika hiqtili ikhiili tiimato. Kiimaq tsangshiq riika kamwan mak dea riito. 12Shatmaq, Petar ka tiidopot raüta, malapkho kra liikai tlat chhat juto. Apaiq ka hiq na bum raüta liito. Raüta, Jesuq maa thop chang khea nin thum kli chhito. Laihin ka, jam min ahü she riito. Kra liilot raütiishe, apaiq ka jam na jang wan nongto. Kiimaq makho shaqmii kra chhiki raüta, kai awang raili she riiwanto.

Emaus Hiq Na Walam Na

(Mak 16.12-13)

13Kra ranaiq sii hali, Jesuq jaqshisetiim phong wa wenai ka, Jerusalem maq Emaus hiqshong nü na wa, lam na awarai riito. 14Tsangnai ka akhum lam maq, matdong mra pin wantaq thun kra, riiphan chan bomshbom lam maq wawanto. 15Tsangnai ka kra riiphan chan rai liipan niili, Jesuq raq tsangnai ka lam na lowanto. Raüta, tsangnai rai kongshkong she wawan damto. 16Tsangnai raq apaiq ka chhito. Shatmaq, tsangnai raq apaiq ka juwa tiitsang mak dea riito. 17Kiijiishe, Jesuq raq, “Nonai namnai ka akhum lam maq, jamlai man wa riiphan chan rai tlan?” nguta tsangnai ma waito.

Kra tai raütiishe, tsangnai ka achap riikito. Tsangnai theaphi niika tsanbi wa tiichhi shat riito. 18Tsangnai wenai wa, weshi mang ka Kleopas. Kleopas raq, “Jerusalem na kaiti maiq phong wa, ümnap ümji bala mra jonghea pin wantaq kra tsütsa sapmakti ka ümnaq arli sham na?” nguta apaiq ma waito.

19Kiijiishe, “Jamlai mra thun wiita?” nguta Jesuq raq apaiq ma waito.

“Najareth hiqti we Jesuq ma mra pintaq thun kra chongla,” nguta tsangnai raq treto. “Arwe ka shammi jong we riito. Apaiq raq ümtinkhan wa awang chang jaqshamto. Kiimaq bom chongkuq wanto. Kiimahali, apaiq ka Shiikeawe raq ashong nguta tiisapshat riito. Kiimaq mungmaiqse tarü raq, apaiq ka tingting maiqse dea nguta lang wanto. 20Shatmaq, nashiq nok ramwe jongbi nai rung welabi raq, apaiq ka atsea riibaiq laq nguta Roman wanghupti we jaq na kuqbaiqto. Kiimaq apaiq ka pumsongkham na tübaiqto. 21Kiimaq, Israil mung ka maiqjaq khon mong wa, apaiq raq mida wan sham nguta naishiq raq, apaiq ma pinthum riichopi siq wan kai wa. Shatmaq, tsiim jü chang bom jonghea ka ara. Ümchaü ranaiqtsam she, ara matdong mra pinjai maq. 22Shatmaq, naishiq phong wa jechakre wiijamti raq, naishiq ma awang chang tsütsa poshi chongto: Tsangshiq ka, ümnap ranap chu maq, malapkho na kito. 23Shatmaq, apaiq ma ka humki mak dea. Tsangshiq ka kiimaq jang wan nong raütiishe, naishiq ma rasetiim chhi kai nguta chongto. Kiimaq tsangshiq ma, rasetiim raq apaiq ka atra nguta chongto nguta naishiq ma tsütsa ka tiitaito. 24Naishiq kongtibi wiijamti raq makho ka liiki kiitiimin, jechakre raq jamkho chongtaq, kiikhiisii dea chhikito. Shatmaq, apaiq ka chhiki mak dea.”

25Kiijiishe, Jesuq raq tsangnai ma chongto, “O angi we nai le! Shammibi raq achongthü bomtsi kiima kamwan tsii man nya! Atinkhan langlang dea tiinan shan rai tlan nya! 26Riita, Khristo riika, arthun chamchao walü mong maq lun wan chang dongdii miraq ngutiika sapphaq man dea sha: Raüta, apaiq ka apaiq chhainyii ajong rilung kra lap wan chang dongdii nguta sap man sha riilan?” 27Kra ngu raütiishe, Jesuq raq tsangnai ma, apaiq miitu, Asii bomtsi na Mosheq raq awaiq thü lakdap thun kiimaq pha wan raüta, shammibi raq awaiq lakdap thun na chong tlaq thun kra wiita phanchan kuqto.

28Tsangshiq ka tsangnai wachang hiqshong chiiphai niishe saü wanto. Kiijiishe, Jesuq raq apaiq ka leaphok alea wan ikhiishe manto. 29Shatmaq, tsangnai raq, “Nainai raili jap wan laq. Rashe ka ümchaü acha she. Kiimaq ümchaü ka ranyaq she” nguta apaiq ka tiiwinto. Krai mren, apaiq ka tsangnai rai adam jap wan dam nguta dü wan damto. 30Apaiq ka tsangnai rai dungsea dam ngutiishe ngato. Raüta, winsii phu ka ajaq na shamto. Raüta, aram riito. Raütiishe, apaiq raq winsii phu ka tiiphan raüta, tsangnai ma kuqto. 31Kiijiishetiq, tsangnai mak ka piiqto. Kiimaq tsangnai raq apaiq sham ka tiitsangto. Shatmaq, apaiq ka tsangnai makki kiiwa, mokisaq li she mokito. 32Kiijiishe, “Apaiq raq awa lam na, lam maq nanai ma, Asii bomtsi tru phanchan kuqtaq akhing na, nanai tsan mong na chochisi wali nai tsan chhii wa li hunhun dea riito!” nguta tsangnai ka riibomto.

33Krai mren she, tsangnai ka kiiwa tiidopot raüta, Jerusalem niishe jangho nongto. Kiimaq, ajaqshisetiim roqshi ri weshi ka, nanok ahinti rai adam na riitam nga raqraq lohoto. 34Kiimaq, tsangshiq raq, “Tengto, Tatiwe ka ama wa dong wanto she dea! Apaiq ka Simon phana min tiichhikito!” nguta tsangnai ma chongto.

35Kiijiishe, tsangnai we nai raq, tsangshiq ma tsangnai ma awa lam maq, lam na jamkho riihumkitaq, kiimaq tsangnai raq Tatiwe ka winsii tiiphan kuqtaq akhing na jamkho tiitsang chhitaq, kra tsütsa kriishe tsangshiq ma phanchan kuqto.

Jesuq Ka Ajaqshisetiim Phana Dongkito

(Mot 28.16-20; Mak 16.14-18; Joh 20.19-23; Kiim 1.6-8)

36Tsangnai wenai raq kra tsütsa ka chong rea bala niili, tiidong chhaq miili, Tatiwe apaiq ka tsangshiq phong na chap saq she saükito. Kiimaq, tsangshiq rai, “Khusang maq sirong laq!” nguta bom damto.

37Kra chhi raüta, tsangshiq riika maji chhi tiikai sham nguta tiima raüta, phiip raq tsaito. 38Kiijiishe, apaiq raq tsangshiq ma, “Namshiq ka jam nguta hairai wa? Tsankam tsanko ka jamkho sitlan? 39Namshiq raq maiqmii mak maq, i jaqphi ara lii rong liina. Kiimaq i hokphi ara liirong liina. Lanta, arka ngi dea ahata nguta sap rong liina. I khum arjaq namshiq maiqmii jaq maq chum rong liina. Lanta, namshiq raq arka ngi dea nguta misap han. Ara i khum arka, tiijai han-ngam khum dea ahata nguta misap han. Maji khum niika, arok arii nai tiijai han-ngam ka ahü.”

40Apaiq raq tsangshiq ma ara chongkuq raütiishe, ahokphi nai ajaqphi kra tsangshiq ma tiichhi kuqto. 41Kra chongkuq kiimin, tsangshiq ka samhea ka tsangrii makli shatshat riito. Kiimaq tsangshiq ka awang athang rai li she riito. Kiimaq tsanko miika kai chochi, arka arot sha, ngohea dea wa chhi tiikai nya nguta rangra raiwito. Kra chhi raütiishe, “Riita, namshiq jaq na phanshi ra aphaq asea chang asi sha?” nguta apaiq raq tsangshiq ma waito. 42Kiijiishe, tsangshiq raq apaiq ma ngiq ja phuse ashi kuqto. 43Apaiq raq kra jaü raüta, tsangshiq makki na ngiq ja phuse kra siqto.

44Kra raütiishe, apaiq raq tsangshiq ma, “Arthun ara ngi kongkhuji na namshiq rai siji na, chongkuq pha ihata. Ngi miitu, Mosheq Thungtri na kiimaq, shammibi lak na, kiimaq Tiitsam shi lak na awaiq thü bomtsi thun kriika, kunkun she kupi wan chang dongdii miraq nguta chongkuq pha ihata,” nguta bom ka tsangshiq ma chongkuqto.

45Kra tru chongkuq raütiishe, Asii Bomtsi kra takwan miitu, apaiq raq tsangshiq khutsai kra tiikhang kuqto. 46Raütiishe, apaiq raq tsangshiq ma bom ka akha chongkuqto, “Asii Bomtsi na akha waiqto: Khristo ka tsai chang dongdii miraq. Raüta, ranaiqtsam jai maq, apaiq ka ama wa dong wan chang dongdii miraq. 47Kiimaq, apaiq mang na ngarai tiidii wan tsütsa nai ngarai diike wan tsütsa kra, Jerusalem maq phaho raüta, mangjong hiq tlotli na chongke wan chang miraq. 48Riita namshiq ka arthun hongtha wantaq ara chhi tai wanti saqse hakhibi kong sitlan. Kriikha maq ara tsütsa ara michong kuq han. 49Kiimaq, i We raq namshiq ma mikuq kang nguta, kongphiq raü akha kuq Asii Wenyi kra, ngi raq namshiq khum na siwan miitu she mitiikiha. Shatmaq tiina, ra wa ningkun ajong Asii Wenyi kra namshiq khum na misaüho shaq wiiwii, namshiq riika Jerusalem miili kheshat khe chang miraq,” nguta Jesuq raq tsangshiq ma tsii ka chongkuqto.

Jesuq Ka Ramungtan Na Wawanto

(Mak 16.19-20; Kiim 1.9-11)

50Ara lot jai she, Jesuq raq ajaqshisetiim ka Jerusalem maq riita, Bethani hiqshong tho na saüli she shea hoto. Kiijaq saüki raütiishe, apaiq raq ajaq ka ra na do raüta, tsangshiq ma achu jaü kuqto. 51Apaiq raq tsangshiq ma ramram kerea lam miili she, apaiq ka ramungtan niishe shea wan nongto. 52Tsangshiq raq apaiq ka shomnoqto. Raüta tsangshiq ka, chojong chise miishe, Jerusalem na hali jang wan nongto. 53Raüta, tsangshiq akhing tlotli ka Shomjam na Shiikeawe ma kechutum raüta siwanto.

Currently Selected:

LUKAQ 24: TANGSBSI

Highlight

Copy