JOHAN 13

Jesuq Raq Ajaqshisetiim Hok Hekuqto

1Arka Tiichhii Wan Poi ka anap she miraq angu wa bom. Jesuq raq apaiq ka ara mangjong hiq ara baiqthü raüta, Awe phana wawan aningthoi ranaiq akhing ka saü wato she nguta asap. Apaiq raq mangjong hiq na siti asengi thun ka pinthum lungwiito. Tsangshiq ka apaiq rii dongdii. Apaiq raq tsangshiq ka atiisup ranaiq na saüli lungwiito.

2Jesuq nai ajaqshisetiim ka raji dungsea adam na artam nga wishe. Kra akhing na, Tha raq Simon Iskariot se Judas tsan ka, Jesuq shaphaq miitu arap baiq kun she. 3Awe raq apaiq ma phanrap tang wan miitu ningkun ka akekun she nguta apaiq raq asap. Kiimaq apaiq ka Shiikeawe pha wa aki, kiimaq apaiq ka Shiikeawe pha na hali wawan nong nguta, Jesuq raq wiita asap. 4Kriikha miishe, apaiq ka dungsea chang chamrii tho wa tiido raüta, adü wa akhea thum ka chhutto. Raüta thüto. Raüta, han tatke chang khea ashi ka, achhü na minsaq samto. 5Raüta, apaiq raq winpin jong ashi na kham ka thiito. Raüta, kham maq ajaqshisetiim hok ka, weshishi maq hekuqto. Raüta, achhü na aminsam hantatke chang khea kiimaq, tsangshiq hokphi kra tiiwe tatkuq wan wan raüta, tsangshiq wiita tiikham heikuqto. 6Raüta apaiq ka Simon Petar tho niishe saüto. Kiijiishe, “Tatiwe, ümniiraq i hokphi ka jamkho mihehaü?” nguta Simon raq apaiq ka tiiwinto.

7Kiijiishe, “Ngi raq ümchaü jamlai jaq wa sham kuq tiikang, arka ümniiraq ümchaü ka takmaü mirhaü. Shatmaq, jai miishetiq misap haü,” nguta Jesuq raq apaiq bom ka treto.

8Kiijiishe, “Ümniiraq i hokphi heke ka maimak dongdii. Arka ümra ranaiq jiimin maimak!” nguta Petar raq, jaqkhaü jinaü raütiishe Jesuq ka tiiwinto.

Kiijiishe, “Ngi raq ümhok phi ka hekuq mang riiha jiila, ümniika i jaqshise nguta tiingo lot maü mirhaü,” nguta Jesuq raq apaiq bom ka treto.

9Kiijiishe, “Tatiwe, ikhla i hokphi lamlam li ka riimak! I jaq nai i khupo armin hekuq laq!” ngutiishe Simon Petar raq nguto.

10Kiijiishe, “Jurwa ajü ahewi she, kriiti khum ka asii she. Akhum lotli henong ka ra mak she. Ahokphi kli she he chang. Namshiq tarü ka asii siisaq she. Shatmaq, weshi kiitiina siimak,” nguta Jesuq raq Petar ma chongto. 11Jesuq raq apaiq shaphaqti we ka asapwi she kha maq, “Namshiq tarü ka asii siisaq she. Shatmaq, weshi kiitiina siimak,” nguta bomtaq ara.

12Jesuq raq tsangshiq hokphi kra hekuq lot raütiishe, akhea thum ka sam nongto. Raüta, chamrii tho niishe hali apaiq ngachang niishe nga nongto. Raüta, “Ümchaü ngi raq namshiq ma jamlai jaqsham wa tiichhi kuqkang, kra saptlan sha?” nguta tsangshiq ma waito. 13“Namshiq raq ngi ka Shrinketi we kiimaq Tatiwe nguta hea tlan. Kriika riikhaqli thukto. Ngi ka namshiq raq akha shreng chang dea. Ara jamkhano chongtiikang ngukla, ngi ka kriidea. 14Ngi ka namshiq Tatiwe, kiimaq namshiq ma Shrinketi we raq ümchaü namshiq hokphi ka jamkho hetse kuq kang, kiikhiisii hali namshiq liipan niimin, weshi raq weshi hok ka hekuq lili rong laq. 15Ngi raq namshiq ma ara jaqsham maq tlang kuq wan tiikang arka, namshiq riimin akhiisii hali misham laq, nguta tiichhikuq tiikang. 16Ngi raq chongtiikang arka tengteng: Dise ka atijong we thaq na ajong riimak. Kiimaq tsasoqti we ka, apaiq thaüti we thaq na ajong riimak. 17Riita, ümchaü sanha, namshiq raq ara chongkuq tiikang tengteng bomtsi arka sap lan she. Jurwa ara bomtsi ara lang lanta mishong nga han, kriiti ka pinthum khoqriiq shishiiq miishe misi han!

18“Shatmaq tiina, ngi raq ara chong tiikang arka wiitarü ma wanghap niika riimak. Ngi raq namshiq ka jamkhiinok maiqsetiim wa tsea wan kang, kriika ngi raq asap ha. Asii bomtsi na, ‘Ngi rai dung pinshi na sia wan damti we raq ngi ka shaphaqto’ nguta chong tlaq kriika tiiku wan chang dongdii. 19Riita, ngi raq ara ümchaü namshiq ma mra ara mipin shaq niili bomtsi ka chongkuq tiikang arka, ümra akhing niishe wa, ara bomchong arshe kuwan jiiq, kra ranaiq na namshiq raq, arka apaiq irdea nguta sap lanta mikam wan han. 20Ngi raq chongtiikang arka tengteng: Jurwa i tsasoqti ka tao wan tlaq, kriika ngi tao wan tlo. Kiimaq jurwa ngi tao wan tlaq, kriika ngi tiikaiti we kriimin tao wan tlo.”

Jesuq Raq Apaiq Shaphaq Kra Tiithaito

(Mot 26.20-25; Mak 14.17-21; Luk 22.21-23)

21Jesuq raq arthun traho bomtsi ara chongke lot ri li she, atsan mong na wekii maq athot ikha tsihea she tsi wanto. Kra ningkhan, apaiq raq kholam kholiiq she, “Ngi raq chongtiikang arka tengteng: Namtsam phong wa maiq weshi raq, ngi ara mishaphaq han,” nguta tiithaito.

22Kra taiwi raütiishe, ajaqshisetiim ka ju nang wa tiithai tla ahiq nguta tiima raüta, awang rai rang rang rara riito. 23Jaqshisetiim phong wa, Jesuq raq kai lungwii hea we jaqshi se kriika, Jesuq tiinap na nga raü riito. 24Simon Petar raq kriiwe ma atsise maq, “Kra tiithai tlaq we kriika juwa ahiq?” nguta bom ka tiitsang waito.

25Krai mren, ajaqshi se ka Jesuq tiinap na tiisot saq raüta, “Tatiwe kriiwe ka ümriiti wa?” nguta bom ka waito.

26Kiijiishe, “Ngi raq winsii phu ka weashaü tai pin na tsam lata, ümriiti mo kuq tiikang, kriiwe ka miraq,” nguta Jesuq raq apaiq bom ka treto. Krai mren, apaiq raq winsii phu ashi ka, weashaü tai pin na tsam raüta Simon Iskariot se Judas ma kuqto. 27Krai mren, Judas raq kra winsii phu ka phaq ri li she, Soitan ka apaiq khum niishe shang wanto. Kiimaq, “Ümniiraq jamlai phan klo chang wa, kriika jaqlolo klo tlo laq!” nguta Jesuq raq apaiq ka thaüto. 28Jesuq raq Judas ma ara jaram wa chongta kriika, dungsea nga damti kongtibi ahinti riika jurmin tak mak dea riito. 29Ajaqshisetiim phong wa maiq wiijamti raq tiima ka, Judas ka kampho khiiq witi we kha maq, Jesuq raq Poi na lang chang hup asam rikai nang chong tlo sham ngutli tiimato. Riimak la, miitsan miijan maiqse ma phanshi ra khrum kuq laq nguta thaütlo sham ngutli tiimato.

30Judas raq winsii phu ka jaüphaqto. Raüta, apaiq ka tiidopot kinphai niishe kihoto. Kra akhing ka ranyaq hea she riito.

Aming Anye

31Judas ka kaiho jai she, Jesuq raq tsangshiq ma bom ka akha chongkuqto, “Ümchaü akhing na Maiq Se khushü jong kriika tiichhi kuqto she. Ümchaü Shiikeawe khushü jong kiimin Maiq Se lümaq tiichhi kuqto she. 32Riita, Shiikeawe khushü jong kriika apaiq pum lümiishe tiichhikuq tlaq jiika, Shiikeawe raq Maiq Se khushü jong kriika, Shiikeawe apaiq pum niishe mitiichhi kuq. Arka ümchaü jaqlo liipan niili she mitiichhikuq wan. 33I setiim lei, ngi ka namshiq rai alu ka simang she. Namshiq raq ngi mirit han. Ngi raq Jehudinok welabi ma jamkho chongkuq kang kiikha, ümchaü namshiq miimin ara bomtsi ara chongkuq tiipha ara, ‘Ngi ümbano wawan tiikang, kiijiika namshiq ka wawan lot man mirhan.’ 34Riita ümchaü min ngi raq namshiq ma aming anye she kuq tiipha ara: Namshiq ka riimang riichan maq shongnga ronglaq. Ngi raq namshiq ka jamkho lungwii kang, kiikhiisii hali, namshiq liipan niimin, riilung riiwii maq sirong laq. 35Namshiq liipan na, riimang riichan maq singa wan lili riihan jiila, nanok tarü raq, namshiq ka i jaqshisetiim dea nguta misap.”

Petar Raq Jesuq Mitiishaü

(Mot 26.31-35; Mak 14.27-31; Luk 22.31-34)

36“Tatiwe ümniika ümba na wawan wa?” nguta Simon Petar raq Jesuq ma waito.

“Ngi ümbano wawan tiikang, kiijaq ümchaü ümniika wawan lot maü. Shatmaq, jai miishetiq i jai miphan wanlot haü,” nguta Jesuq raq Petar bom ka treto.

37Kiijiishe, “Tatiwe, ngi raq ümchaü ümjai phan phan jamkhii riito walot mang miraq? Ngi ka ümniimiitu, atsai santla mikham ha!” nguta Petar raq Jesuq bom ka treto.

38Kiijiishe, Jesuq raq, “Ümniiriisha ngi miitu atsai mikham haü ngu kai? Ngi chongpha. Arka tengteng: Athi rawa li wupongwe ka miwa shaq liipan niili, ümniiraq ngi ka juwa sapmang nguta jangtsam mitiishaü baiq haü!” nguta Jesuq raq Petar bom ka treto.

Currently Selected:

JOHAN 13: TANGSBSI

Highlight

Copy