JOHAN 10

Sku Rümti Shiiton

1Jesuq raq chongto, “Ngi raq chongtiikang arka tengteng: Maiq ümriiti riiwa sku khok mong na kilü maq wamak, shatmaq rukthaq maq jin raüta, watlaq, kriiti ka ahuk kiimaq thiimeaq. 2Shatmaq, juwa khok mong na kilü maq watlaq, kriiti ka riikhaq li sku rümti. 3Kriiti miika kilü kheti raq, kilü ka adi riikuq tlo. Kiimaq, apaiq raq asku kong ka, ashi shi maq, amang chong raüta hea tlo. Skukong riimin, apaiq bom ka tai tlo. Raüta apaiq raq skukong ka arümkai kinphai na sheaho tlo. 4Apaiq raq skukong ka kinphai na tiidong lot jai she rum na arüm kai she sheaho tlo. Apaiq ka skukong khaki na lamshea kitlo. Kiimaq apaiq bom ka tai raüta, ajai phan phan skukong ka atsam phaq haisiq tlo. Arka, skukong raq tsangshiq rümti we bom asap kha maq haisiq tlo. 5Shatmaq, skukong riika maiqtili jai ka phan mak. Maiqtili riika, tsangshiq rüm wa nguta wa raü la, tsangshiq ka aju, apin ajin khoti miraq. Jamkhano akha mipin rai ngukla, tsangshiq raq maiqtili bom ka sap mak.”

6Jesuq raq tsangshiq ma ara bom shiiton ara chongkuqto. Shatmaq, tsangshiq raq ara shiiton liichum ka taklot mak dea riito.

Jesuq Ka Maiqshaq Sku Rümti

7Kriikha miishe, Jesuq raq tsangshiq ma akha chongkuqto, “Ngi raq chongtiikang arka tengteng: Ngi ahata skukhok kilamchong. 8Ngi ma kongkhu na maiq ümchuwa sku rümti khü maq tiihong raüta kitaq, kra thun kriika ahuk nai thiimeaq jati kong siisaq. Kriikha maq, skukong raq tsangshiq jai ka phan mak. 9Ngi ahata skukhok kilamchong. Juwa ngi lümaq khok mong na watlaq, kriika khup wong kuqshat mirüm kom wan. Apaiq ka dongki dong wa mihaisiq. Apaiq dung chang nyiimrü ka tlung tiiwii mihum phaq. 10Shatmaq, ahuk skukhok na nyap wa tlaq kriika, skukong kra huk wa, atsea wa, kiimaq ashthen baiq wa ngutli watlo. Shatmaq, ngi saükikang arka, namshiq raq aliim ale rilung kra milap laq nguta kikang.

11“Ngi ahata maiqshaq sku rümti we. Skukong khupi ma atsai khamti we. 12Maiq amaq kham miitu sku rümti kriika, skukong tati ka riimak. Kriikha maq, apaiq raq ümtiikiiwa she kaü ka skukong kaq wa, awarai chhi jiiq, kra chhi raüla, apaiq ka ahai sitsi ma, skukong kra jai na miimbaiq thü raüta, aju rai miraq. Krai mren, she kaü ka wa raüta skukong ka tiipin miijin jo raüta, wiita mikaq phaq wan. 13Amaq kham na skukong rümti ka asea awea kra skukong kaq wa chhi raü la, apaiq ka skukong baiqthü raüta, aju riihotlo. Apaiq ka amaq kham jaqshamti, atati we riimak kha maq, skukong ma apaiq mangchan ka tsimak. Kriikha maq jurai tlo. 14-15Shatmaq, ngi ka amakshaq sku rümtiwe. I We raq itsan i tsii ka jamkho sap tlaq, kiikhiisii hali, ngi riimin, i We tsantsii ka asap ha. Kiikhiisii hali, ngi raq i skuse kong tsantsii kiimin asap ha. Kiimaq i skuse kong riimin ngi ka asap. Krai mren, ngi ka tsangshiq khupi miitu atsai kham tiikang. 16I skukong ka arli ka riimak. Konghin min asi. Kra kong thun kiimin, ngi raq ashea wan chang sitlo. Tsangshiq raq i bom ka mitai. Raüta, tsangshiq tarü ka arüm wanti weshi jaqkhong niishe, kongshi miishe mija wan.

17“I We raq ngi ka pinthum lungwiitlo. Arka ngi raq i miisaq arka, i tsiitsii maq honglu na kuqbaiq tiikang arkha maq lungwiitlo. Lata, ngi raq hali, i miisaq ka mipai wan nong ha. 18Maiq raq jurmin i lang ka tiipit lot mak. Shatmaq, ngi raq i tsiitsii maq, i miisaq ka kiinong kuq baiq tiikang. I miisaq ka tan wan miitu arang ka ngi raq hotiikang. Kiimaq, i miisaq ara tiijang wan nong miitu arang kiimin, ngi raq holata sitiikang. Ara aming arka, i We raq ngi ma akuq.”

19Jesuq raq arthun traho bomtsi chongkuqtaq kra tai raüta, Jehudinok liipan na arkhii she riiho nongto. 20Maiq apako raq, “Arwe ara tha raq rom wanto! Apaiq ara aru she riikito. Akhnok bom arka jaram wa mitaisiq rong i?” nguta riikhii trangto.

21Shatmaq, maiq wiijamti riika, “Notsam, arka abi winji raq arom wan we bomchong ka riimak! Abi winji riika, makchuk we mak ka jamkho mitiipiiq kuqlot?” nguta riikhiito.

Nokmaiqse Raq Jesuq Ka Shipoq Baiqto

22Kra akhing ka diwin ji she riito. Kra bala ka Jerusalem Shomjam Jamwa Poi akhing lang wan rahiq bala riito. 23Shomjam tro ruk wangmong na, jolitiip setiim min asi. Tiip ashi mang ka Solomon Jolitiip. Jesuq ka kra Solomon Jolitiip rinkea na ahai sia khumshkhum riito. 24Kra chhi raüta, kiiwa Jehudinok maiq pahea ka, apaiq tro niishe riitam wanto. Raüta tsangshiq raq Jesuq ma, “Ümniiraq naishiq ara jaram she wa trang ra holaü? Bom ka riikhaqli chongkuq laq. Riita, ümniika Khristo dea sha?” nguta apaiq ma waito.

25Jesuq raq treto, “Ngi raq namshiq ma bom ka achongke kun she. Shatmaq, namshiq raq i bom chong arma kam man. I We aming maq ngi raq ümchuwa jaqsham tiikang, kra riili she, ngi arka juwa kra namshiq ma chong kuq tlo. 26Shatmaq, namshiq riiri i bom ma kam man. Namshiq ka i skuse kong riiman kha maq, kam man riitlan. 27I skukong riika i bom tai tlo. Ngi riimin, tsangshiq ka loweatek asap ha. Krai mren, tsangshiq raq i jai phan tlo. 28Krai mren, ngi raq tsangshiq ma pattup pat-sa rilung kuq tiikang. Krai mren, tsangshiq ka tsai mak she miraq. Tsangshiq ka i wokhong wa jurmin khotwa lot mak she. 29I We raq ngi ma jamlai wa kuq taq kriika, wiita thaq na ajong pinthum kuq wanto. Kiimaq tsangshiq ka i We wokhong na sitlo. I We wokhong wiika jurmin nyea wa lot mak. 30I We nainai ka ashi li.”

31Kra tai nong raütiishe hali, Jehudinok raq apaiq ka long maq tiiq baiq nong danto. 32Kiijiishe, “I We raq thaü tlaq krai mren, ngi raq namshiq makki na, ümtinkhan wa shamhea kaiwa awang chang shamkuq tiikang. Riita, arthun jaqsham kang arphong wa, ümriiti jaqsham na seng lanto, namshiq raq ngi ka long maq tiiq baiq chang nguta tankhan tlan?” nguta Jesuq raq tsangshiq ma waito.

33Tsangshiq raq treto, “Naishiq raq ümnaq atsea baiq tankhan tiikai arka, ümjaq sham ahea awa phan sham laüta riimak. Shatmaq, ümniiraq ümniika Shiikeawe rai riingea riingea siwan tiikang nguta, riikhiq pinthum kiqshut bom bom tlaü kriikha na, tsea baiq tan tiikai,” nguta tsangshiq raq apaiq bom ka treto.

34Jesuq raq treto, “Riita, i ja, namshiq Thungtri na waiqthüje asi. Kiijaq Shiikeawe raq, ‘Nam- shiq kiimin Shiikeawe ikha’ nguta chongtlo. 35Nashiq raq asap i, Asii bomtsi na jamlai wa chong tlaq kriika, tengteng. Kra bomtsi ka ümtiikiimin klaiki mak phan. Kiimaq Shiikeawe raq apaiq asii bomtsi ka ümriiti mo chongkuqtaq, kriiti thun ka Shiikeawe shamsham ikha miraq nguta chong tlo. 36Riita ngi arka I We raq dadüdü atsea riiwan raüta mangjong hiq na tiikito. Kriikha maq, ngi ka Shiikeawe Se nguta tiichong tiikang. Ara tiichong tiikang arkha na, namshiq raq ngi ma riikhiq apii ashut bom tlaü nguta kha ka jamkho nyan tlan? 37Riita, ija, ngi ma i We raq, ara jaq sham laq nguta achong kuq kra sham mang sitiikang jiika, namshiq raq ngi ma kam chang ka ahü miraq. 38Shatmaq, ngi raq, i We raq achongkuq jaqsham kriidea sham tiikang jiika, namshiq raq ngi ma kamwan romanli jiimin, i jaqsham arma kamwan rong liina. Kra kamwan han jiika, namshiq raq ngi ka i We rai, kiimaq i We ka ngi rai pumshi hanshi miidea sitiikai nguta pattup miitu she misap wan han.”

39Tsangshiq raq Jesuq ka jangshi ri hali alap riilai nguta tanto. Shatmaq, apaiq ka tsangshiq jaq mong wa, jaqhea jiwea miili lat ho nongto.

40Kra jai miishe, Jesuq ka Jordan raire na, kongkhu ji maq Khamlamketi we Johan raq, nokmaiqse ma kham lamke wan chang hiqba binjü kiiniishe kiho nong raüta sikito. 41Mungmaiqse pahea ka kiijaq apaiq phana kito. Raüta, “Johan raq awang chang jaqsham ka sham mak dea. Shatmaq, apaiq raq arwe miitu bom ümchuwa chongtaq irka, ümchaü sanha arwe khum niishe teng wanto,” nguta riibomto. 42Krai mren, maiq pahea apaiq phana kaiti raq Jesuq miishe kam wanto.

Currently Selected:

JOHAN 10: TANGSBSI

Highlight

Copy