RAPHA HIQWA LAK 30

1Shatmaq Rechel riika Jakob ma ase ashi ra min humkuq mak dea riito. Kra ningkhan na apaiq ka anyi nyung ma amak she shukito. Kra ningkhan apaiq raq Jakob ma akha nguto, “Ngi ma isetiim kuqlaq. Riimakla ngi ka atsai li mirha.”

2Kiimaq Jakob ka Rechel ma atsan she khiqto. Raüta akha nguto, “Ngi ka Shiikeawe ri riimang. Apaiq riikhata ümniima ümsetiim tiihum kuq mak shiikhing hola.”

3Kiimaq Rechel raq nguto, “Ikhla arjaq ara idi nyung Bilha. Apaiq rai hainga laq. Kiimaq apaiq raq ngi ma ise mihum kuqlaq. Akha ngi ka anyung ma mijaha.” 4Krai mren, apaiq raq adi nyung Bilha ka awese Jakob miishe kuqto. Kiimaq apaiq ka adi nyung rai haingato. 5Kiimaq Bilha ka wiihan she riito. Kiimaq Jakob ma ase ashi hum kuqto. 6Kiijiishe Rechel raq nguto, “Shiikeawe raq ngi khrum na kha ka phokuqto. Apaiq raq ngi achu jaü ka treto. Kiimaq ngi ma ise maiqwe se ashi kuqto.” Krai mren apaiq raq no ka Dan nguta mangto. 7Kiimahali Bilha ka wiihan she hali riito. Raüta Jakob ma ase maiqwe se anai she hum kuqto. 8Kiimaq Rechel raq akha nguto, “Ngi ka inyi rai kai riilong kang. Lata ngi raq tangkang.” Krai mren apaiq raq no ka Naphtali nguta mangto.

9Riita kiijiishe Lea raq apaiq riika asetiim hum mak she tsaqkito nguta sapto. Kra ningkhan she apaiq raq adi nyung Jilpa ka Jakob ma kuqto. 10Kiimaq Jilpa raq Jakob ma ase maiq wese ashi hum kuqto. 11Kiimaq Lea raq nguto, “Ngi ka wiikiim she.” Krai mren apaiq raq no ka Gad nguta mangto. 12Kiimaq Jilpa raq Jakob ma ase maiqwe se ashi hali humkuq nongto. 13Kiimaq Lea raq nguto, “Ngi ka kai khoqriiq tiikang! Ümchaü jechakre raq ngi ka chochi hea nyung ngutiishe mingu.” Krai mren apaiq raq no ka Asher nguta mangto.

14Bunwong hanchoji na Reuben ka wak ram na kito. Raüta juni pe tsairai pü thun ka lam wanto. Raüta anyung Lea ma lam kuq wanto. Kiijiishe Rechel raq Lea ma nguto, “Mangchan laüta ümse raq alam wan juni pe tsairai pü thun kra ngi ma phanshi ra kuqlaq.”

15Kiijiishe Lea raq treto, “Riita ümniiraq iwese nyeaho laü kra riimin hongmak shea? Kriithaq na hali ümchaü ümniiriika ise raq alam wan juni pe mandrek thun kriimin nyeaho dan tlaü nya.”

Kiijiishe Rechel raq nguto, “Ümniiraq ümse raq alam wan tsairai pü kra ngi ma kuq haü jiika, athi rawa ka Jakob namnai kon mimai na.”

16Kiimaq kra raji Jakob ka wak maq jam niishe saüwa kiita, Lea ka apaiq humkai kito. Raüta akha nguto, “Athi rawa ka ümniika ngi rai kon chang. Jamkhano ngukla ngi raq ümniika ise raq alam wan juni pe tsairai pü maq rikang.” Kiimaq kra rawa ka tsangnai konto.

17Shiikeawe raq Lea achu jaü ka treto. Krai mren apaiq ka wiihan she riito. Kiimaq Jakob ma ase webiingi ngoja kriishe hum kuqto. 18Kiimaq Lea raq nguto, “Shiikeawe raq ngi ma poksi kuqto. Jamkhano ngukla ngi raq idi nyung ka ijamtiwe ma romkuq kang.” Kra ningkhan apaiq raq ase ka Isakar nguta mangto. 19Kiimahali Lea ka wiihan she hali riito. Raüta Jakob ma ase wetrok ngoja kriishe hum kuqto. 20Kiimaq apaiq raq nguto, “Shiikeawe raq ngi ma ahea wiq kongphiq ashi kuqto. Ümchaü kla iwese riimin ngi ka mitao she. Jamkhano ngukla ngi raq apaiq ma asetiim maiqwesere siisaq wetrok she humkuq kang.” Kra ningkhan apaiq raq no ka Jebulun nguta mangto. 21Kra jai miishe apaiq raq jechakse ashi humto. Apaiq raq ase ka Dina nguta mangto.

22Kra jaimiishe Shiikeawe raq Rechel ka atsan na thüto. Apaiq raq Rechel achu jaü ka treto. Raüta Rechel ma asetiim she tiihum kuqto. 23Apaiq ka wiihan she riito. Raüta maiqwe se ashi humto. Kiimaq apaiq raq akha nguto, “Shiikeawe raq ngi ma ise maiqwe se ashi kuq raüta, ikhakam wa jeasi bu ka alam she riibaiqto. 24Tatiwe raq ngi ma ise weshi ri tiq hali mikuq nonglaq.” Kra ningkhan apaiq raq no ka Joseph nguta mangto.

Jakob Raq Laban Rai Riitoqtanto

25Joseph rawiichhi jai she Jakob raq Laban ma nguto, “Ngi ka akai she riipha. Lata ijam niishe jangho pha. 26Ngi raq ümniima jaqsham kuq lata ichak nyungnai kiimaq isetiim lap kang kra ngi miishe kuqlaq. Lata ngi ka akai she riihopha. Ngi raq ümniika pinthum athuk atsom shiikumpan kang kra ümniiraq ri asap haü.”

27Kiijiishe Laban raq apaiq ma nguto, “Ikhla ngi chongpha: Ngi raq lang lii lata sap kang she, ümnaq asi ningkhan na Tatiwe raq ngi ma kai shiimanto. 28Riita ümjaq maq thun ka ümchuwa miraq kra chong liina, ngi raq mikuq kang.”

29Kiijiishe Jakob raq treto, “Ngi raq ümnaq miitu ümtinkhan wa hunniiwan kang kriika ümniiraq asap haü. Kiimaq i wokhong maq ümnyamse kong ka pinthum she puchi wanto. 30Ngi misaü shaq na ümjaq niika ralangseli riito. Shatmaq ngi saüjaishe kriithun ka awealot mai she puchi wanto. Kiimaq ngi ümriibano kitiikang kiijaq Tatiwe ümniika shiiman kuqto. Riita ümchaü ka ngi raq ngi maiqmii miitu she tiima chang akhing she saüto.”

31“Riita ngi raq ümjaq maq ka jamlai kechang she wa miraq?” nguta Laban raq waito.

Kiijiishe Jakob raq treto, “Ngi ma ranaiq ningchang ka raa mak. Ngi raq lamlu ashi tiima tiikang ara ümniinga ahea ngu haüla, ngi raq ümnyamse kong ka rümkuq ruq li mirümkuq kang: 32Ngi ka ümchaü ranaiq ümnyamse kong phong kra liiki pha. Lata sku anyaq nyaqti nai adü na awaiq waiqtam setiim asi siti kra riimakla chhechhi aran setiim waiqdiim setiim asiti loweatek kra pong na rai thüpha. Ngi ma ningchang jaq maq ka kriili miraq. 33Rawiichii ji na ümniiraq ngi raq jaq ka tingting miidea shea shamtiikang kra, sap saqli misap haü. Krai mren ümtiikiiwa ümniiraq ijaq maq kra konchon kai kitlaü akhing na, ümniiraq ijaq na chhechhi awaiq ahü, riimakla waiqtam setiim ahü, kiimaq skuse kong phong wa anyaq riimakti kra chhi haüla, kriika ahuk riito nguta ümniiraq misap haü.”

34Laban raq treto, “Ahea. Ümniiraq chongtlaü kra phan phan dea miklo i.” 35Shatmaq kra ranaiq liipan niili Laban raq chhepong pong thun awaiq tlam raq raq riimakla waiqtam setiim twaiq raq raq thun kra kiimaq akaütiim awaiq asiti thun kra kiimaq waiqtam setiim twaiq raq raq thun kra riimakla akhum na alü maq twaiq raqraq kaütiim thun kra wiita pong na lam baiqto. Kiimaq apaiq raq sku kong anyaq nyaq thun kiimin wiita lam baiqto. Raüta kriithun ka asetiim miishe trümto. 36Kra raütiishe apaiq ka Jakob tho wa hiq ahin na aluwiq na ranaiq tsam lam niishe ara anyamse kong kra tsuq wanto. Kiimaq Jakob raq Laban nyamse kong abung tiichongtaq thun kriishe rümto.

37Jakob raq waichatchat samkhü chong kü thun nai Almon pe kü thun kra kiimaq pechong ajaq nyeadang dang thun kra lamto. Raüta akhü wiijam ka akoq rii baiqto. Krai mren kra pekü thun kriika alü maq tlam raq raq she twaiq kito. 38Raüta apaiq raq ara pekü thun arka nyamse kong ma kham tiinyang chang longpin khü thaq niishe phongto. Apaiq raq pekü thun longpin khü thaq na phongtaq kriika nyamse kong ka kham nyang kai kitlaq akhing na kiijaq ala haitlo. 39Krai mren chhechhi kong ka kra pekü phongtlaq kiijaq ala hai raüla, asetiim alü waiq lam setiim maq twaiq raq raq riimakla waiqdiim setiim twaiq raq raq, kiimaq waiqtam setiim maq twaiq raq raq she nyungto.

40Jakob raq sku kong ka chhechhi kong phong wa pong na rai thüto. Raüta Laban rii nyamse kong aluwiq alü maq tlam raq raq twaiq tlaq nai anyaq kong kra khaki na tiihaito. Akha rüm raüta Jakob raq apaiq rii nyamse kong kra tiipu dungto. Raüta Laban rii nyamse kong kriika pong na rai raüta rümto.

41Kiimaq ümtiikiiwa phintsaq tsaq nyamse kong ka ala hai tlaq, kra akhing na Jakob raq kra pekü thun kriika nyamse kong miki na kham nyang chang longpin khü thun na phongtlo. Krai mren nyamse kong ka kra pekü thun riiphong tlaq kiijaq ala haitlo. 42Shatmaq apaiq raq kra pekü thun kriika ahan ajom jomti nyamse kong miki niika phong kuq mak. Krai mren she, Laban rii nyamse kong ka arii kiimaq ahan ajom kong siisaq she dongto. Kiimaq Jakob rii nyamse kong ka ahan aphin siisaq she dongto. 43Akha Jakob ka kai chiithe jong she jawanto. Apaiq jaq niika nyamse kong, dise kong, kumtsong kong, kiimaq kumtoq kong ka pahea she pu wanto raüta chiithe jong pinthum she riito.

Currently Selected:

RAPHA HIQWA LAK 30: TANGSBSI

Highlight

Copy