KIIMWEBI JAQSHAM 7

Stephen Raq Trahoto

1Kiijiishe, Ramwe Ajong Pinthum we raq, “Riita, ümniima ara kha nyan tlaq arka ngohea dea sha ngulaü?” nguta Stephen ma waito. 2Kiijiishe, Stephen raq akhiishe trehoto, “I phu i notiim nai i nyung i wetiim lei, ngi raq chongpha tai ronglaq! Nati Abraham ka Haran hiq na milaühoshaq na Mesapotamia mung na siji na, achhai anyii Shiikeawe ka apaiq phana kito. 3Raüta, Shiikeawe raq, ‘Ümta ümwii nai ümhiq shong ümrahai ka miimthü laq. Laüta, ngi raq ümniirii mung ashi mitiichhi kuq kang, kra mung na laüho laq,’ nguta thaüto. 4Krai mren, apaiq ka maiqmii hiqshong hiqchü rachü kra miimbaiq thü raüta, Haran hiqshong niishe laühoto. Kiimaq Abraham we ka tsaikai jai she, Shiikeawe raq apaiq ka ümchaü nashiq sitiikai ara namung arjaq she laüho miitu hali thaü nongto. 5Shatmaq, kra akhing na, Shiikeawe raq nati Abraham ma, ara mung arwa hiq ka phushi min, apaiq rii kuq mak dea. Shatmaq, Shiikeawe raq ara hiq arka, Abraham nai apaiq saü asetiim ma mikuqha nguta kiqkham kuqto. Shiikeawe raq apaiq ma, ara kiqkham kuqtaq akhing niika, apaiq ka laihü lahü shaqli riito. 6Kriipat na, Shiikeawe raq apaiq ma akha nguta chongkuqto, ‘Ümsaü ümse pat na tsangshiq ka pongmung na misi. Kra mungti raq tsangshiq ka di ma mitiija. Raüta, tsangshiq ka rawii shiblai pinthum mitiichamchao. 7Shatmaq, ngi raq tsangshiq ka di ma tiija raüta, jamshati mung kha ka apho mirkuqha. Ngi raq kra mungti kha ka phoke wan jai shetiq, ümsengi ka kra mung wa alaü mirwan. Raüta, ara ümchaü ümnaq sitlaü hiqshong arjaq chap raütiishe, tsangshiq raq ngi ka mishom noq,’ nguta Shiikeawe raq kiqkham kuqto. 8Kra raütiishe, Shiikeawe raq Abraham ma athohan poi klo arang kuqto. Kra athohan poi ka Shiikeawe nai Abraham liipan na, tongshong ramram tiipha riito. Krai mren, Abraham raq ase Isak ka rawii chhi jai maq, chepat shi siraüta athohan kuqto. Kiimaq, Isak riimin ase Jakob ma atho ka hankuqto. Kiimaq Jakob raq asetiim weroqshi ri wenai kiimiimin atho hankuqto. Natitiim roqshi ri wenai kra tsangshiq pat na, ajong ala siisaq, tsangshiq mangchong jong kriika ra tsa hiq tsa ikha siwanto.

9“Jakob setiim raq, tsangno Joseph ka kai shuliito. Kriikha maq, aphutiim raq tsangno ka maiq ma shaphaqto. Maiq riishe hali, apaiq ka Ejip mung na, maiqdi ma shaphaq baiq nongto. Shatmaq, Shiikeawe ka apaiq rai asi riito. 10Krai mren, Shiikeawe raq Joseph ka phanrap chamchao mong wa khup wong kuqshat maq tiichhan chhi wanto. Akhing saüto angu na, Joseph ka Ejip mung hokham we man na chapto. Kra akhing na, Shiikeawe raq Joseph ma athuk atsom rong arai nai taksu phaqchi kuqto. Krai mren, hokham we raq Joseph ka, Ejip mung thaq na nai hokham jamkun thaq na wanghupti we ma shongto. 11Kra jai miishe, Ejip mung tlotli na nai Kanan mung hamli na, henghea ram dongto. Kra ramdong raq, mungmaiqse ka pinthum waqkhü kham nyangli chamchao riihumto. Natitiim min ram raq kai chamchaoto. Tsangshiq ma ramrit khumkai chang maiqhiq min ahü she riito. 12Kiijiishe, nati Jakob raq Ejip mung niika, ramrit kai chang tsam asi nguwa nguta tsütsa ka tairaütiishe, asetiim ka Ejip mung na ramrit kai tiikito. Kra kitaq kriika natitiim ma kaipha shaqshaq riito. 13Kiimaq, tsangshiq ka Ejip mung na thongnai kai akhing niishe, Joseph raq aphutiim ma apaiq nai apaiq she tiichongto. Kiijiishetiq aphutiim raq apaiq ka tsangno dea nguta sapto. Kiimaq, Ejip mung wa hokham we riimin, Joseph kaü arü tsütsa kriishe sapto. 14Krai mren, Joseph raq awe Jakob ma tsangta ka wiita tam maq, maiq roqmiishi ri biingi ka wiita Ejip mung na laüho ronglaq nguta bom tiichong wanto. 15Krai mren, Jakob ka Ejip mung na laühoto. Kiijiishe Jakob nai asetiim ka tsangshiq pat sung raüta tsaito. 16Tsangshiq maa thun ka Abraham raq Hamor weraü jaq wa kampho maq ari hiqphu bashi Shekhem hiqshong na asi, kiijaq lapto.

17“Kra jai maq, Shiikeawe raq Abraham ma kiqkham kuqtaq kra tiiku wan akhing she saüto. Kra akhing na, nashiq nok ka Ejip mung maq apu rai, maiq ka pahea she riito. 18Kra jai miishe, Ejip mung na hokham weshi dongto. Apaiq raq Joseph manphan ka sapmak. 19Kra hokham we raq naphan namaq ka tiimin miitu thiikho bihea thuto. Raüta, apaiq ka pinthum naphan ma ransu ranchang kloto. Apaiq raq naphan ka ningkun ningkaq maq tsangse noshii chii tlaq thun kriika rum na tiibaiqki raü raüta, tiitsat baiqto. 20Kra akhing niishe, Mosheq raq rawü chhito. Mosheq ka pinthum maiqlung ngamwii se, shamhea sham jü se riito. Anyung raq apaiq ka jam maq jipi lü tsam na saüli apaü raüta püto. 21Kra miishe, apaiq ka ümtiikiiwa anyung raq rum na thü kitaq, kiiwa hokham we se jechakse raq hum raütiishe, ase shaq ma mang raüta tiichhan chhito. 22Apaiq raq Ejip mungti anyan phaqchi kunli saptsin raüta, kai ongto. Raüta, apaiq ka Ejip mung na tsüwe tsitwe ashi kiimaq phanrap jaqsham na achi-achet ajong pinthum she jawanto.

23“Mosheq ka wiiroqblai maiq angu niishe, apaiq raq aphan amaq Israilnok ka Ejip mungti raq jamkho tiisinga tlaq, kra sap miitu sisin liito. 24Ranaiq shi, apaiq raq Ejipnok weshi raq, Israilnok weshi ka atiichamchao haihii rea chhito. Kra chhi raütiishe, apaiq raq aphuno we kra tiiwongke nguta Ejip mungti we ka tsatbaiqto. 25(Apaiq raq tiima wan ka, Shiikeawe raq apaiq lümaq, tsangmung ka mitiichhii kuq wan nguta misap ahiq nguta tiimato. Shatmaq, tsangshiq raq kriika sap mak dea.) 26Kiimaq napjai ranaiq she hali, apaiq raq Israilnok wenai ka artso rai chhito. Kra chhi raüta, apaiq raq tsangnai tatso chhiike lam maq, ‘Phuno we nai, namnai ka phanshi maqshi Israilnok sii! Namnai liipan na jawa riitsotlan?,’ nguta tatso chhiike bomto. 27Shatmaq juwa ajiq we kriiraq Mosheq ka siimko nü na liiqbaiq saq riito. Raüta, ‘Ümniika naishiq khuthaq na wela ma nai phowe ma juro shongta? 28Ümji ranaiq ümniiraq Ejip mungti we jamkho tsatbaiq laü ikha, ngi armin atsea baiq sha tantlaü?’ nguta Mosheq ma waito. 29Mosheq raq kra bom ka tairaütiishe, apaiq ka Ejip mung wa Midian wang na tiipaü juto. Kra wang na shongji niishe, apaiq raq ase ka anai humto.

30“Mosheq ka kra wang na, rawii wiiroqblai sijai niishe, ranaiqshi kumtsaiphii na Sinai pum ji maq, rase ashi ka rumrü mong na walü ma ja raüta, Mosheq phana kito. 31Mosheq raq kra chhi raüta kai amao riito. Kiimaq walü tu ka samhea aje lin maq liila nguta, apaiq ka walü rai tlaq rumtam tho na tiisotto. Kiijiishe, apaiq raq Tatiwe bom ka akha taito: 32‘Ngi ahata ümtitiim Shiikeawe, Abraham Shiikeawe, Isak Shiikeawe, kiimaq Jakob Shiikeawe.’ Kra bom ka ta raüta, Mosheq ka akiinyii ahai, atiikhai rokshrok riito. Apaiq raq kra liikham mak riito. 33Kiijiishe, Tatiwe raq apaiq ma chongto, ‘Ümhok pa ka chhut tlo laq. Ara ümnaq chap tlaü hiq ba arka asii hiq ba. 34Ngi raq I saü I setiim Ejip mung na riitsi tsaitsiiq chamchao tlaq kra chhi kang she. Ngi raq tsangshiq hosii trang kra tai kang she. Kiimaq, ngi ka ümchaü tsangshiq ka shumraü kharü mong wa dokdaa kai kikang. Wara, ümchaü Ngi raq ümniika Ejip mung na tiikipha.’

35“Israilnok raq Mosheq ka, ‘Ümniika naishiq thaq na wela ma nai phowe ma juro shongta?’ nguta shipoqto. Shatmaq, Shiikeawe raq Mosheq ka tsangshiq nok rüm wan miitu wela ma, kiimaq tsangshiq ka kharü mong wa daa wan miitu, srea we ma ashong wan. Kra jaqsham ajong kriika Mosheq ma rumtam mong na walü ma jaraüta rase kitaq kra jaqkhong maq midaa wan nguta chongkuqto. 36Krai mren, Mosheq raq mungmaiqse ka Ejip mung wa tsuq wanto. Raüta, Khamshii Kham jong rai ka jin wanto. Raüta, kumtsaiphii lam maq, wiiroqblai mungmaiqse ka shea wanto. Apaiq raq tsangshiq ka awang chang nai amao chang jaqsham pahea sham raüta, kra lümaq tiichhii kuq wan raüta shunshea wanto. 37Kiimahali, Israilnok ma, ‘Shiikeawe raq ngi ka namshiq phana jamkho tiikitaq kiikha, apaiq raq namshiq phana, shammi weshi hali mitiiki nong. Kiimaq apaiq ka namshiqnok phan wa mishong,’ nguta tsii chongke wantiwe ka Mosheq riito. 38Apaiq ka Israilnok rai kumtsaiphii na adam maq thungtii wan damto. Kiimaq, Sinai Pum maq Shiikeawe rase ka apaiq rai riibom damto. Kra akhing na apaiq ka natitiim rai adam riito. Kiimaq, apaiq raq Shiikeawe bomtsi atra tsütsa ka jaü raüta, nashiq ma kuqto.

39“Kiitin khan taü maq dongdii min, natitiim raq Mosheq raq achongkuq tsütsa bomtsi ka lang mak shiipheng baiqto. Tsangshiq raq apaiq bom chong ka no na tsuqbaiq raüta, tsangshiq tsan ka Ejip mung na jangkai nong roli siwanto. 40Kriikha miitiina, tsangshiq raq Aron ma, ‘Naishiq shunshea wanti phra sumla wiijam hailaq. Ejip mung wa naishiq shea wanti we Mosheq arkla, jamkhii she wa jasha kita naishiq ri sapmai,’ nguta shiitepto. 41Krai mren, tsangshiq raq minsaü pongwe sumla phraji ka haito. Raüta, tsangshiq maiqmii jaq maq haitaq phra kra shomnoqto. Kiimaq thatsang poi ajong ashi kloto. 42Kriikha miishe, Shiikeawe raq tsangshiq ka jainong miishe shung baiqto. Raüta, ra na diimtlaq raiqsaiq jipi thun kra shomnoq wan ngarai tsantsii thiikho niishe tiidea baiqto. Shammibi lak na akha waiqto:

‘Israilnok lei! namshiq raq wiiroqblai,

kumtsaiphii maq ngamsaü ngiqse,

honglu na ta wan lan irka,

ngi rii ka riimak.

43Namshiq raq pi wan lan irka,

Molekh phra noq chang tiip pi wan lan.

Kiimaq Rephan raiqsaiq phra noq wan lan.

Arthun arka sumla phra

namshiq jaq maq ahai hun han.

Lanta shomnoq lan.

Arthun ngarai tang wan lan kha na,

ngi raq namshiq ka Bebilon na,

munglu wansha di ma mitiija wan pha.’

44“Riita, natitiim pat na Shiikeawe Sichang Tiip ka tsangshiq rai nongshnong, kumtsaiphii binjü maq, bashi na chan wan wan raüta siwanto. Kra Shiikeawe Sichang Tiip kriika, Shiikeawe raq Mosheq ma jamkho tiichhi kuqtaq kra phanphan haito. 45Kra jai miishe, natitiim raq kra tombutiip ka, tsangtitiim jaq wa lap wanto. Kiimaq tsangshiq ka Joshua rai wawantaq akhing na, kra tiip ka tsangshiq rai nongshnong pi wan raüta wawanto. Kiimaq Shiikeawe ningkun ma tsangshiq raq kra mung na siti maiqhiq shong thun kra, hiqshi shiq maq long wan raüta, jiibaiqto. Krai mren, kra tiip kiimin tsangshiq raq piwan raüta nongshnong wawanto. Krai mren, kra tiip ka Dawit hokham pat na saüli sito. 46Dawit raq Shiikeawe tsan ka tiiheali jaqshamto. Kriikha maq, Dawit raq Shiikeawe jaq wa, Jakob Shiikeawe kra siwan ma jam ashi haipha nguta aming jaüto. 47Shatmaq, Shiikeawe jam ka Solomon riitiq haito.

48“Shatmaq, Ratsan Ramong Nyang na siti Shiikeawe ka, maiqse raq jaq maq ahai jam thun niika simak. Shammi weshi raq akha waiqthüto:

49Tati raq ngutlo, ‘Ramungtan ka i ngachang hokham ngacho.

Kiimaq mangjong hiq ka i hok tiida chang hüda.

Ümniiraq ngi ma jamkhiinok jam wa mihai kuq haü?

ngi sichang jam ka ümbano?

50Arthun arka i jaq maq atiiq ha siisaq riimak sha?’

51Krai mren, Stephen raq tsangshiq ma, “Riita ara chongtiikai arai mren, namshiq tsantsii ka pinthum wanshakshak! Namtsantsii ka thatsang maiqse tsantsii ikha thü tlan. Shiikeawe bomchong ka tai man phan! Namtitiim pat na jamkhiiwa lanlaqlaq siwantaq, kiikha ümchaü namshiq min lanlaqlaq sitlan. Namshiq riimin Asii Wenyi bomchong ka khiilataq maq khü tlan! 52Riita, namtitiim raq, shammibi ka wiitarü tiichamchao wan je siisaq riito. Shiikeawe raq apaiq kechu Kolise tiikitlaq kra tsütsa chongke miitu, man na rathup rapha ji niiphü, apaiq tsütsa chongke wanti shammibi ümchuwa tiikitaq thun kriika, tsangshiq raq wiita tsatbaiq wanto. Krai mren, ümchaü namshiq riimin, apaiq luqkhapse ka tiishaü baiq lan. Lanta, apaiq ka tsatbaiq lan. 53Shiikeawe tri raütu ka namshiq ma rasetiim raq kuqkito. Kiitinkhan Shiikeawe tri raü araa ariq phan bomtsi ka namshiq raq lang man!” nguta trahokuqto.

Stephen Ka Long Maq Thong Raüta Tsatto

54Stephen raq traho bom chongke kra tai raütiishe, Rung na ngati welabi thun ka, tsangshiq tsankhiq trang ka, walü tlaq ikhiishe amok dungdung khiqtrangto. Kiimaq, tsangshiq tsankhiq tsi ma, tsangwi tiitsan watrang liishe riito. 55Shatmaq, Stephen ka Asii Wenyi raq ama rom wanto. Krai mren, apaiq raq ra nü na liito. Raüta, Shiikeawe khushü ngao chhainyii liliim kra chhito. Kiimaq Jesuq Khristo ka Shiikeawe ma jaqtsi nü na achap raü chhito. 56Krai mren, “Liirong laq! Ngi raq ramungtan kilü ka atiidi raü chhi tiikang. Kiimaq Maiq Se ka Shiikeawe ma jaqtsi nü na chap raü chhi tiikang!” nguta Stephen raq chongto.

57Kra ngo ka tai raütiishe, Rung na ngati welabi thun ka hong raüta, agiwa trang liishe, tsangshiq nipu ka maiqmii jaq maq sukrang riito. Raüta, tsangshiq ka apaiq phana phong rang she, apaiq ka bok wantlii riito. 58Raüta, apaiq ka Jerusalem chela chiiphai na hitho raüta, long maq tiiqbaiqto. Apaiq tsea baiq damti hakhibi thun raq, tsangshiq samtongjong thun ka, Saul nguta jero we ashi kiima tiikhe thüto. 59Tsangshiq raq apaiq ka long maq thong tlaq liipan na, Stephen raq Tatiwe jaq wa, “Tati Jesuq Khristo lei, i tsai ji ara ümniiraq tao laq!” nguta achu jaüto. 60Raüta, apaiq ka kaütsrong na bumsaq raüta, “Tatiwe lei, tsangshiq ngarai kra ümniiraq tsan na naq tiitsangkiq!” nguta tiihong raüta siito. Apaiq raq ara ngu raüta alang ka pitto.

Currently Selected:

KIIMWEBI JAQSHAM 7: TANGSBSI

Highlight

Copy