KIIMWEBI JAQSHAM 2

Asii Wenyi Saükai Akhing

1Raroq Biingi Poi akhing saü ranaiq na, kamasham maiqsetiim ka wiita adam maq jamshi na, riitam ngashat riito. 2Tiihanghiiq miili, tsangshiq raq ra nü na rahai henghea hai trang ikha taito. Kra rahai ka tsangshiq nga tlaq khok na wiita hai wanto. 3Kiijiishe tsangshiq raq walü lapsetiim ikha, tsangshiq kiijaq maiq ümchuwa ngatlaqti thun loweatek khupo thaq na, wa achaq ikha anyairai kra chhito. 4Krai mren she, tsangshiq tarü ka, Asii Wenyi raq ama she rom wanto. Kiimaq, tsangshiq ka Asii Wenyi raq ama rom wantaq krai mren, maiq pongnok pongta phan bom miishe bomtrang hoto.

5Kiijaq Jehudinok ka Jerusalem chela na pahea asi riito. Tsangshiq ka Shiikeawe shomnoq wanti. Tsangshiq ka mung ahin na siti akirai. 6Tsangshiq raq kra trang ka tai raüta, maiq kong pahea kiijaq riitam wanto. Tsangshiq tarü ka tsanchhii hunhun riito, Jamkhano ngukla tsangshiq loweatek raq kamasham maiqsetiim ka, tsangshiq maiqmiimii nok bom maq bom trang taito. 7Tsangshiq ka kai awang rai lam miili, tsangshiq nai tsangshiq liipan na, “Riita, notsam ara bomrai tlaq maiq thun arka, Gelili wangti siisaq li ahata! 8Shatmaq, tsangshiq raq nashiq nok bom maq, jamkho bomrai tla? Nashiq tarü raq, tsangshiq ka nashiqnok maiqmiimii phan ümchuwa sitiikai kra bom maq, bomtlo tai tiikai ahata? 9Nashiq ka Parthia, Media, kiimaq Elam mung wa awa hai ahata. Kiimaq Mesapotamia, Judia kiimaq Kapadosia; kiimaq Pontas, kiimaq Asia mung wa aki hai ahata. 10Kiimaq, Phrigia nai Pamphilia mung wa, kiimaq Ejip mung nai Libia mung na Sairini chela binjü wa awa hai ahata. Nashiq wiijamti ka Rom chela wa aki hai ahata. 11Nashiq ka Jehudinok phan nai Pongnok phan maiqse wa, Jehudinok Shiikeawe lamphanti ma aja wanhai ahata. Kiimaq nashiq wiijamti thun arka, Kret mung nai Arabia mung na siti ahata. Shatmaq, nashiq wiitarü raq tsangshiq raq, nashiq nok maiqmiimii phan bom maq, Shiikeawe raq awang chang jaqsham jonghea sham wantaq kra tsütsa riichong rai tlaq kra tai tiikai ahata!” 12Krai mren, tsangshiq ka kai awing wang rai nai arang ara rai lam maq, “Riita, arthun arka jamlai liichum wiinya?” nguta tsangshiq nai tsangshiq liipan na bom ka riiwaisoto.

13Shatmaq, maiq wiijamti riika, kamasham maiqsetiim kriika shummii laqpii lam maq, “Tsangshiq arka cherop kong ahata!” ngutli shipoqto.

Petar Raq Mungmaiqse Ma Trahoto

14Kiijiishe, Petar ka akongti kiimwebi roqshi ri weshi krai chap raüta, kiimaq tiihong raüta mungmaiqse riiphong tlaq kiima akha trashe hokuqhoto: “I nok i hiq Jehudinok mung maiqsetiim nai Jerusalem na sitibi lei, i bom ara tai ronglaq, kiimaq ngi raq namshiq ma ara jamlai liichum wa kra namshiq ma chongkuq pha. 15Namshiq raq arkong arka, chephe she nguta tiima tlan. Kriika riimak. Ümchaü ka ranap nari tiikaü shaqli. 16Arka Shammi we Joel raq riisham bom maq achong thü kra bomtsi kriishe ku wanto. Joel raq riisham bom maq akha chong thüto:

17‘Shiikeawe raq akha chongtlo,

Ngi raq phangthum wan akhing na akha mirha:

Ngi raq i Wenyi ka pheanyin pheanyi kaütak rishi,

maiq loweatek ma asho awo miraü kuq ha.

Namsetiim jechak aja maiqwe aja wiitarü raq,

rinkinku maq changriim chiiriim,

i tsütsa ara michong kuq wan.

Namsetiim jerobi ka shammibi ma mija.

Kiimaq nyungwere raq ra wa ma ka,

machha khaqkhaq mima.

18Ara chongtiikang arka tengteng,

Phangthum akhing na,

ngi raq i disetiim jechak aja maiqwe aja wiitarü ma,

Asii Wenyi ka pheanyin pheanyi kaütak rishi,

asho awo miraü kuq ha.

Krai mren tsangshiq wiitarü raq,

rinkinku maq changriim chiiriim,

i tsütsa michong kuq wan.

19Ngi raq rawang win na nai mangjong hiq na,

awang chang nai amao chang jaq misham ha.

Kiijaq tiijai raü wan, walü nyai wan,

kiimaq wakhuk mong wan trang li she miraq.

Kiimaq, ranyaq tangtang li she miraq.

20Rashe kaü kiimin anyaq she mirwan.

Kiimaq jipi kaü kiimin

tiijai ikha shiiroro mishiiki.

Arthun ra nai hiq brak wan akhing saü wan arka,

Tatiwe Ranaiq saüho miishe mibrak pha wan.

21Kiimaq, kra akhing na,

jurwa Tati jaq wa achu jaü tlaq,

kriiti kli she mitiichhii wan.’

22“I nok i hiq Israilnok lei, ara chong tiikang bomtsi ara, samhea tiitsang tai ronglaq! Najareth hiqti Jesuq ka, Shiikeawe raq apaiq jaqsham ma ashong wan maiqse dea nguta, namshiq makki na apaiq pum lümaq, ümtinkhan wa awang chang nai amao chang jaqsham pahea shamkuq wan raüta, namshiq ma khangriri hea tiichhikuq wanto. Arka namshiq tarü raq asap han siisaq. Arthun jaqsham wantaq arka, namshiq man na sham wanto. 23Arka Shiikeawe apaiq raq kongkhu miiphü tiihong wanje she dongdii. Apaiq raq tiihong wantaq kra phanphan, Jesuq ka namshiq jaqkhon mong na tiishaü kuqto. Kiimaq, namshiq riishe, apaiq ka ngarai maiqsetiim ma kiinong kuq lantiishe, pumsongkham na tiitü baiq lanta tiitsat baiq lan. 24Shatmaq, Shiikeawe raq apaiq ka amaa wa tiidong wanto. Shiikeawe raq apaiq ka atsai ningkun kharü mong wiishe daa wanto. Ara jamkhano chongtiikang ngukla, atsai ningkun kharü raq, Jesuq ka ümkhiiriita jiimin kha lot mak. 25Arka Dawit raq Jesuq miitu, bom ka jamkho chong thütaq, kra phanphan she ku wanto. Dawit raq akha chongthüto:

‘Ngi raq Tatiwe ka i khaki na wranaiqshe chhi wan kang.

Apaiq ka ngi rai asi;

Ngi ka maiq raq tiitsü ngii wan lot mak.

26Kriikha maq,

ngi ka khoqriiq shishiiq miili sitiikang.

Abom anai wali i thea ashe maq sitiikang.

Ngi ka mangjong hiqda ashi li siwan kang jiimin,

Shiikeawe kiqkham jaqkhaq raü na riiwiiq lata misi wan ha.

27Shiikeawe ümniiraq

ngi ka wulum mung na tiinam baiq maü.

Ümjaqshise maiqshaq ashi ka,

maakho niili ka triim baiq maü.

28Ümniiraq ngi ma rilung lam ka tiichhikuq laü she,

kiimaq ümniika ngi rai asi,

krai mren,

ngi ka kai chochi tiikang.’

29“Phunainotiim lei, ngi raq namshiq ma pharangrang maq, nati ajong pinthum Hokham we Dawit manphan ka chongkuq pha. Apaiq ka tsaikito she. Apaiq maakho ka ümchaü niitaq, arjaq nashiq makki na asi. 30Apaiq ka Shiikeawe shammi. Krai mren, Shiikeawe raq apaiq ma kiqkham kongphiq raü khakuq wantaq kriika wiita asap. Shiikeawe raq Dawit ma, Dawit apaiq lai ala phan wa, maiq weshi ka, rawiichii pat na, Dawit apaiq kiikha, Hokham ma mishong wan ha nguta kiqkham kuqto. 31Shiikeawe raq rawiichii ji na Khristo ka amaa wa mitiidong wan nguta, Dawit raq riisham mak maq chhi wanto. Kriikha miitiina, Dawit raq ara riisham bom maq tiithai chong thütaq. Apaiq raq akha chongto,

‘Apaiq ka wulum mung na miimbaiq mak dea.

Apaiq maa ka

maakho mong na tiinam baiq mak dea.’

32Riita, ija, ümchaü ka ara Jesuq arka amaa wa, Shiikeawe raq tiidong wanto she dea nguta, naishiq tarü raq asap hai kha maq, hakhi kuq tiikai. 33Awe Shiikeawe raq, Jesuq ka apaiq ma jaqtsi nü niishe tiinga wanto. Kiimaq Awe raq kongkhuji na, apaiq miika Asii Wenyi mikuq nguta kiq khamtaq kriishe kuq wanto. Riita, ümchaü namshiq raq arjaq jamlai wa chhi tlan arka, Jesuq apaiq raq, Asii Wenyi ka naishiq khum na phong tsoktsok akuq kriishe chhi tlan. 34Ara jamkhano chongtiikai ngukla, Dawit apaiq ka Jesuq jamkho wawantaq, kiikha ra niika wawan mak dea. Shatmaq, Dawit raq akha ngutli waiq thüto,

‘Shiikeawe raq i Tatiwe ma chongto:

Ümniika ngi ma jaqtsi nü na ngalaq,

35ümjaqti thun ngi raq,

ümhok da ma ümji chong na,

hüda ma mitiija ha shaq wiiwii.’

36“Riita, ija, ümchaü sanha namshiq Israilnok phan angu tlotli raq, namshiq raq pumsongkham na tübaiq lan we Jesuq kriika, Shiikeawe raq Tatiwe miishe, kiimaq Khristo miishe dea shong wanto nguta, riikhaqli maq sap wan chang ahata!”

37Mungmaiqse raq Petar traho bom chongke kra tai raütiishe, tsangshiq tsan na piq maq ashuk ikhiishe tsi wanto. Krai mren she, tsangshiq raq Petar nai kiimwebi ahinti kriima, “Riita, ikhiijiika, phunainotiim lei, ümchaü naishiq riika jamlai phan riichang she wa?” nguta waito.

38Kiijiishe, Petar raq tsangshiq bom ka akha treto, “Namshiq maiq loweatek raq, maiqmii ngarai ka tiidii wan raa tlo. Lanta, Jesuq Khristo mang na kham lam wan raa tlo. Kra riihan jiitiq, Shiikeawe raq namshiq ngarai kra midii kuq. Kiimaq, Shiikeawe raq akuq kongphiq Asii Wenyi kra namshiq raq milap han. 39Ara jamkhano chong tiikang ngukla, Shiikeawe raq ara kiqkham raüpot khakuq wantaq arka namshiq miitu. Kiimaq, namsaü namsetiim miitu. Kiimaq ara kiqkham arka, maiqse angu alulang na ümchuwa sitlaq kriiti thun ka, nashiq Tati Shiikeawe raq, apaiq rii she nguta hea wantiiti thun kra kunli miitu.”

40Petar raq akha tri bomtsi atsin maq trap tru raüta, tsangshiq ma chongkuqto. Kiimaq, arthaq niimin chat raüta, apaiq raq tsangshiq ma, bomtsi ahin miimin, tran tiitsii chongkuqto. Apaiq raq tsangshiq ma akha chong kuqto, “Riita, ümchaü min, Shiikeawe raq Jesuq tsea baiq wanti, ara ngarai maiqsetiim, ara mung na siti khu thaq na, chamchao jonghea tiisaü tlaq kriiwa, namshiq ka tiichhii wan tlo ronglaq!” 41Krai mren, Petar traho bomchong kra tai raüta, maiq pahea raq, Jesuq ma kamto. Kiimaq, tsangshiq ma kham lamkuqto. Krai mren, kra ranaiq liipan niili phungtu na maiqnye ka hingtsam tiitsuq shang wanto. 42Kiimaq, tsangshiq ka kiimwebi wokhong na siraüta, kiimwebi raq Shiikeawe bomtsi shrinkuq tlaq kra, tsan tiitsi raüta tlang wanto. Kiimaq, tsangshiq ka Phungtu rintii ashi maq siwan damto. Kiimaq takshi pinshi maq, phaqsiq raüta sito. Kiimaq, tiima tsantsii ashi maq achu jaü raüta sito.

Phungmaiqsetiim Rilung Singa

43Kiimwebi jaqsham lümaq, awang chang nai amao chang jaqsham ka pahea shamto. Kra chhi raüta, mungmaiqse thun ka tarü kai amao riito. 44Kamasham maiqsetiim thun wiitarü ka phungtu na riitushat maq sito. Kiimaq, tsangshiq jaq na jamlai phan wa sitlaq, kra tsangshiq maiqmii liipan na riiphea riinyin raüta sito. 45Tsangshiq raq maiqmii hupchong samchong thun kra shata raüta, kra sha kampho ka, tsangshiq phungtuti liipan na, maiq loweatek ma, jamlai phan niiwa thümlit tlaq, kra tiiphan phan riiphea riinyin raüta sito. 46Wranaiqtek, tsangshiq ka adam na riitushat maq, Shomjam na Shiikeawe shomnoq riitam nga tlo. Kiimaq, jamshi na riitam hoho raüta, takshi pinshi maq chojong chise, kiimaq riiphea riinyin phaqsiq wan lili raüta sito. 47Tsangshiq ka akha Shiikeawe tiitsam kamwan li she shongnga wanto. Kiimaq phungtuti shongnga rilung kra chhi raüta, mungmaiqse riimin tsangshiq ka kai lungwiito. Kiimaq, krai mren, Tatiwe raq maiq anye ka wranaiqtek tsangshiq phung na tiitsuq wan wan maq, maiq ka tiipa kuq wan ruq li riito.

Currently Selected:

KIIMWEBI JAQSHAM 2: TANGSBSI

Highlight

Copy