ZECHARIAH 14
14
Jerusalem leh Jât-hei
1 Rōngpu’n ṭongtan hmun a a’n-ongna sik pha jōng kahnai jo. Khava sōa Jerusalem chomsōt a ka-om sik, antachom hei kha nanhmai kunga insem sik hei. 2Rōngpu’n phung tin jâttin rakip Jerusalem dōina re tlona sik a amantûp sik hei. Khōpui kha anhlō sik, innshunghei anchom sik hei, nuhmeihei kha ansetpui sik hei. Mipui harkhat rehringa ankei sik hei, khana a’nhleiseng chu khōpuia inphut keisōt mak hei ning. 3Khava sōa Rōngpu kasesōt sik a kha tenlaia aretuk kapōa, khava jât-hei chunga re atuk sik jo. 4Khava pha Rōngpu’n Jerusalem nisō langa Olive Tlânga khan jōng kangir sik. Khava sōa Olive Tlâng kha phaicham kalentak hnenga, nisōa inphut tlaitlâk katlunga aher hnia inṭhen sik. Tlâng aṭim inkhat kha sak ting inhnengsōt sik khana ahar inkhat khan thlang ting inhnengsōt sik. 5Hiva tlânga her hnia akaṭhensōt phaicham shunga hin nangni akatlânsōt sik chei kae. Judah Reng Uzziah phalaia lingnu innoklai nanpu sōnhei leitlânsōt kapōa nangni akatlânsōt sik chei kae. Rōngpu ka-Pathen kha, ngeva rakip aheiṭhōi heia kajōng sik.
6Khava pha kha ajōng pha, kadai leh kavur om mak jo ning, 7inthim um om mak jo ning. sûn rōk kachang sik jo. Khana khan jân pha katlunga kani kavâr ṭhak sik jo. Hiva asōk sik pha hi Rōngpu rōk in amanhret a kae.
8Khava kani kha ajōng tlung pha, Jerusalema inphut tui insim kapût sik, khava tui aṭimkhat kha Tuipui Kathi dîra kalōng sik, khana aṭim inkhat in Mediterranean tuipuia kahlut sik. Kum katlung bit a, sûrkhō leh ṭhekhōa khō kasûr injôn sik.#Eze 47.1; Jn 7.38; Ṭph 22.1 9Khava sōa Rōngpu kha raleichung pumpuia reng kachang sik jo; mi rakip in ama kha Pathen kapōa ankamuk sik jo, khana rahming inkhat rōk a manhretna annei sik jo.
10Sak tinga Geba inphut thlang tinga Rimmon katlung bit a, ramkei akhenga phaichama syem sik kae. Akimvea ka-om ramhei kanek a Jerusalem inn inshângpen sik; khōpui hin Benjamin Kekot a inphut hmalaia kekot leiomna Arakir Kekot kha aphâk sik, khana Hananel Ber a inphut reng innshunghei theitui epna hmun katlung kachang sik. 11#Ṭph 22.3Khana khan mihei kha huksōt a ka-om sik hei, insuksetna jâra ṭitna neimak jo hei ning.
12Jerusalem chunga re katlo jât rakip hei chunga Rōngpu’n ṭit ka-om tak natse amasō pek sik hei. Anhring chunga antak ravōi kaṭopsō sik hei; khana anhmit leh anmalei kaṭop pek sik hei.
13Khava pha khan Rōngpu’n mihei inhmakna apek sik hei khana ṭitna anneia mi rakip in anhnenga mihei kha ansura anthat sik hei. 14Jerusalem huksōtna sik a Judah mihe’n re ande sik. Jât-hlop hei karōi–sana, dangka khana pōnsi derkei katamtak anchomsōt sik.
15Indōipuihei rekur shunga aka-om ranhringhei– shakorhei, shakor kasinhei, sharîngsei hei leh shakōrtung hei chunga’m ṭit ka-om tak hrise kachu sik.
16Khava pha, Jerusalem chunga re aleikatlo jât-hei alakahring seng he’n kumtin a khana khan Rōngpu kamukna sik leh Rabuk Kût nitna sik a kase sik hei.#Lev 23.39-43 17Tu inkhat jât in se sik a ahnōm mak a Chunghnung Rōngpu kha reng inkhat a ankamuk hnōm mak inchu, anram shunga khō sûrmak ning. 18Egypt mihe’n Rabuk Kût annit hnōm mak a enchu, khanga akase hnōm mak jât rakip chunga Rōngpu’n hrise aleimathlâk kapōa anchunga amathlâk sik. 19Egypt leh jât ralak rakip Rabuk Kût annit hnōm mak inchu, hiva karâkna hi a’npek sik hei kae.
20Khava pha kha leh Shakor ratlong chung katlunga “Rōngpu hnenga tōksōt,” tia a’nzet sik kae. Bek-inn shunga hme an sōngna be leh bûr rakip maichâm hma a ka-om kōklei kapōa intheng et sik hei. 21Jerusalem leh Judah shunga ka-om be leh bûr rakip Chunghnung Rōngpu kamukna hmangchâk sik a ṭhensōt sik hei kae. Inthoina tōkna katlohei khan inthoina hme sōngna sik a antahmang sik hei kae. Khava pha kha ahong pha, Chunghnung Rōngpu Bek-inn shunga invei katlo om mak jo hei ning.
Currently Selected:
ZECHARIAH 14: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
