MIJAHEI 9
9
Rakan Kût Inhnina
1Israel mihe’n Egypt anhei dahlonsō kum hni tlukna thla hma inkeipena Rōngpu’n Moses hneng Sinai nêrdiram a ṭong ajōng hri jo. Ama’n ati,#Sōk 12.1-13 2-3“Hiva thla shunga ni 14 tluk ning, kani tlâk a inphut, Israel he’n sedân chôndân rakip dungjuia Rakan Kût rehōi antanit sik jo kae.” 4Khava jâra Moses’n Rakan Kût antanit sik a mi amanthei jo hei, 5khana thla hma inkeia ni 14 tluk ning khōhleia Sinai nêrdiram a khanga anleihmang joa kae. Rōngpu’n Moses aleimanthei kapōa heirakip anleitlo jo.
6Tâk-kha mi ṭhahrep chu mi kathi kalōng anlei tôn jâra kabōk jo hei, khana khava ninga Rakan Kût kha leihmang tor mak jo hei. Anmani Moses leh Aaron hneng kase heia, 7hinga anvahri, “Keini intheng mak jo ung, ajârchu kathi kalōng kanlei tôn jo, tâk keini’n heisa mo Israelhei kâra Rōngpu hneng nei tōkna a’nvei theimak sik ung?”
8Moses’n amasôn hei, “Rōngpua inphut mansena katheimak kârseng khō rangei chot hi ruh.”
9 Rōngpu’n Moses hneng amanthei 10Israelhei hnenga hri sik khachu, “Nangni leh nansōnhei tu inkhat in kathi kalōng tôn jâra a’nthengmak jo pha a-emak leh khōhme kahlatak a akasesōt an-oma anmani’n Rakan Kût anhmang hnōm inchu, 11thla khat sō leh nantahmang sik jôk a hnōmpek chei kae, thla hni changna ni 14 ninga khōhleia. Che philo buhlom leh thingbō kakha hei sâk una nit ruh. 12Thlai heikhat ajîng kania jîngkâr katlung inda mak ruh khana ran inthat hei kha aru suthlek mak hei ruh. Chôndân rakip dungjuia Rakan Kût kha nit ruh.#Sōk 12.46; Jn 19.36 13Tâk-kha tu mo inkhat chu beklanga a’ntheng, khōhme’m se lo, khana Rakan Kût chu nit lo mi kha kami inkhat a lomak sik kae, ajârchu kei hneng kutchoi kha aphahrep a leitōk mak joa kae. Asetna kara kha athōk sik kae.
14“Ramlak mi nankâra aka-om he’n Rakan Kût kha anit hnōm inchu, sedân chôndân rakip dungjuia antanit sik kae. Ramlak mi leh aram shunga mi rakip chunga hiva dân hi a’nhmang sik kae.”
Hmei Sumtuk
(Sōk 40.34–38)
15-16 Rōngpu omna Pōn-inn kha matungsōt ning, sumtuk hlom inkhat he’ntôra akatōm jo. Jân leh sumtuk kha hmei kapōa inhmu. 17Chungting a’nhliksōt pha, Israel sahe’n anrephōr anthon ri, sumtuk ajōng ṭum sukna hmun a khan rephōr anmatungsōt nôk ria kae. 18Rōngpu ṭongpek dungjuia mipui he’n rephōr kha anṭhet ri, khana ama ṭongpek dungjuia rephōr kha ansyemsōt nôk ria kae. Pōn-inn chunga sumtuk khan a-omlai seng rephōr mama a khan ka-om ri hei. 19Sumtuk kha a-omsôt lai seng Rōngpu ṭong kha anjuia inthonsōt mak ri hei. 20Pha khat leh chu sumtuk kha Pōn-inn chunga kanikhō ṭhahrep rōk ka-om ri, hei-achang inum, Rōngpu ṭongpek dungjuia rephōra khan ka-om hei a-emak leh inthon hei. 21Kâklak leh chu sumtuk kha khōhleia inphut jîngkâr katlung rōk inkhang ri, sumtuk khan asesōt lim leh anmani’m inthonsōt ri heia kae. Sumtuk in a’nthonsōt akaia anmani’m kasesōt hei. 22Sumtuk kha Pōn-inn chunga, ni 2, thla khat, kum khat khan chu akasôtdet a-omlai seng inthonsōt mak hei; khavakha a’nhliksōt pha anmani’m inthon ri hei. 23Rōngpu’n Moses hneng ṭong ajōng pek kha juina anrephōr kha anmatungsōt, khana anthonsōt ria kae.
Currently Selected:
MIJAHEI 9: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
