MARK 13
13
Bek-inn Sukset sik Jesu’n Ahri
(Mt 24.1–2; Lk 21.5–6)
1Jesu’n Bek-inn aheidahlon jo pha, asonle inkhat in ahnenga ati, “Enroh, Oja! Hlunghei leh innhei hi heituk a a’nlak jo hei mo!”
2Jesu’n amasôn, “Innpui kalen insak hei hi nahmu mo? Hlunghei hi inkhatbek um an-omna et a indahlon mak hei ning; hihei hi inkhat et hlon mathlâk sik hei kae.”
Inrengna leh Suk manrimna hei
(Mt 24.3–14; Lk 21.7–19)
3Bek-inn rekhat ting Jesu kha Olive Tlâng chunga le’n ong, khava pha Peter, James, John khana Andrew hei ahlop binga kahong hei. 4“Hivahi heitik leh mo akasōk sik amanthei roh, khana hiseng hongsōkna sik pha kha hong katlung jo ti manhmuna sik heimo ahong kasōk sik amanthei roh,” anvati.
5Jesu’n anhnenga ati, “Insing thei ruh, tûte’n anhōn mathlâk makna sik chei tlo ruh. 6Mi katamtak he’n kei sik a ṭongkahri ung kae antia kahong sik hei khana, ‘Kei ama eng kae!’ anti sik, khana mi katamtak anhōn mathlâk sik hei. 7Re intuk rasa kahnaitek a leh kahlatak a nanthei pha ṭimak ruh. Khavakha ahong kasōk nger sik kae, tâk khahei khan a’nchaina lachang mak. 8Ramhei inkhat leh inkhat indōi sik hei, khana rengram inkhat leh inkhat inbuhlu sik hei. Hmun rakip a lingnu innok sik, sâk katâng sik hei. Khahei kha naiha kaphu nat inphutna kapōhrep hei kae.
9“Nangni nanbinga a’nsingthei nger sik chei kae. Nangni ansur sik chei khana ṭong tanna hmun a ankeisō sik chei. Khana intûpna innpui heia anvōk sik chei, kei sik a ṭong kaṭha nanva hripekna heia vaikarônhei leh renghei hmaikunga kangir sik chei.#Mt 10.17-20; Lk 12.11-12 10Tâk a’nchaina kha ajōng tlung mak hma ṭong kaṭha hi mi rakip hneng a’nhri nger sik kae. 11Khana nangni ansur cheia khana ṭongtan hmun a anṭhōi chei pha, heimo hri sik tia ahma inkeia nanmalung mandong mak ruh; apha kha ahong tlung shunga ṭong a’npe chei kha hri ruh. Ajârchu nangni tahri sik ṭong kha nangnia changmak, Rathla Inthenga inphut ajōng kasōk sik kae. 12Mihe’n ansōpui khet hei kha that sik a anpek sōt sik hei, khana pa he’n ansahei kha khanga antlo sik hei. Sahe’n annu anpa an-inrepui sik hei khana anthat sik hei. 13Kei jâra mi rakip in nangni anhōt sik chei. Tâk atorna katlunga akadehrat kha huksōt akachang sik a kae.”#Mt 10.22
Inrimna Ṭit Ka-om tak
(Mt 24.15–28; Lk 21.20–24)
14 #
Dn 9.27; 11.31; 12.11 “‘Ṭit-inpir ka-om tak’ kha, a-om makna sik hmun a ahong ngir sōt kha nanhmu sik.” (Akatei hnenga ṭongmanthei: hiva tina hi manhret nger roh!). Khava pha Judea ram a ka-om hei kha tlâng ting akatlânsōt nger sik hei kae. 15A-inn phuchunga ka-om mi tu inkhat khan innshunga aneinâk kalo sik a pha manhmang mak rasoh.#Lk 17.31 16Khan chu hleia ka-om mi khan apōn kalo sik a a-inna ahe’nle mak sik kae. 17Khava kani heia khan nai kavonhei leh naidông netui kavei hei sik a heituk ṭitpek aka-om sik mo! 18Hihei hi phebi lai achang makna sik Pathen hneng der ruh! 19Ajârchu khava kani heia inrimna hei kha, Pathen in vânhnōi asyem manphut bia inphut tûn katlunga mihringhei tamanhret inrimna hei seng kanek a akakhôk chet sik kae.#Dn 12.1; Ṭph 7.14 20Tâk Rōngpu’n khava kanihei kha amantôi hei; amantôimak inchu, tûte hringmak hei ning. Hei-achang inum ami kadeisōt hei sik jâra kanihei kha amantôi jo kae.
21“Khava pha tu mo inkhat in, ‘Enruh, Messiah kha hin ka-om!’ a-emak leh, ‘Enruh, son ama ka-om,’ antia achang inum taksen mak ruh. 22Ajârchu Messiah kadikmak leh sânkathem kadikmak hong kasōk sik hei. Ṭōn-inlak leh det-hlana antlo sik, a-ethei inchu kadeisōt mihei kapha hōn mathlâkna sik antlo sik. 23Insing theitak a om ruh! Apha kha ahong tlung mak hma heirakip kamanthei chei kae.
Mihring Sapa Jōngna sik
(Mt 24.29–31; Lk 21.25–28)
24“Khōdeng theina a’nchaisō pha kani hong inthim sik, thla vârmak jo ning,#Is 13.10; Jl 2.10,31; 3.15; Ṭph 6.12; Is 13.10; Eze 32.7 25ârsihei marvâna inphut katla sik hei, khana bōirōk a ratha hratna hei kha anhlam hroa inphut hnongsōt kachang sik hei.#Is 34.4; Ṭph 6.13; Jl 2.10 26Khava sōa Mihring Sapa kha jōng inlâr sik, alûrna aratha hratna leh inṭhōia sumtuk chunga kajōng sik.#Dn 7.13; Ṭph 1.7 27Ralei hmor chaina inphut Pathen in kadeisōt mihei kachom intûp sik a ngevahei rakir manlia ajōngtir sik hei.
Theichang kunga inphut Insena
(Mt 24.32–35; Lk 21.29–33)
28“Theichangkung in inchuna kha mannei chei rasoh. Theichangbâk hei ajîk ahong in-êma adôn ahongchera khana abōther ahongsôn jo’nchu, khōlum pha kahnai jo ti nanmanhret. 29Kha leh in-angtlinga hiva omchenhei hi anhongsōk nanhmu jo’nchu, pha kahnai jo, ama jōngna sik a intluk jo ti hi manhret ruh. 30Tûna akahring mihei hi anthisō pet mak hma omchen rakip hei hi akasōk sik hei kae ti hi mandonsōt ruh. 31Marvân leh ralei chu inhmang sik, tâk kei ṭong chu inhmang hêrmak ning.
Akani leh Apha kha Tûte’n Manhret mak
(Mt 24.36–44)
32“Achang ravâng akahong sik kani leh pha kha tûte’n manhret mak hei, marvân ngevahei leh Sapa’num manhret mak hei; Pa rōk in amanhret kae.#Mt 24.36 33Kasingthei tak a inrin ṭhak ruh, ajârchu apha kha heitik ajōng tlung sik manhret mak chei. 34Hivahi mi inkhat in asōk-hei anṭōn tlo et sik asempek heia, akot kahngâkpa hneng a-en rave ṭhakna sik ṭong apeksō leh a-inna inphut khōhmea akasesōt a asōk-hei ṭōn amanngan hei kapō kha kae.#Lk 12.36-38 35Khava jâra inrin ṭhak ruh, ajârchu inn kapupa kha heitik akajōng sik manhret mak chei, khōhlei a-emak leh ṭhangṭim a-emak leh jîngkâr a-emak leh kani sōk a kachang thei. 36Manhret manloa ama ajōng tlung jo’nchu, nalei kaje kha hmuhêr mak che rasoh. 37Khana nanhnenga kahri hi mi rakip hnenga kahri jo kae: Inrin ruh!”
Currently Selected:
MARK 13: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
