MARK 11
11
Jesu Kalûrtak a Jerusalem Ahlut
(Mt 21.1–11; Lk 19.28–40; Jn 12.12–19)
1Anmani Jerusalem anhei sora, Bethphage leh Bethany khōpui hnenga, Olive Tlânga kahong jo hei. Jesu’n asonle 2 anhma atir hei, 2hinga mansena aleinei hei, “Nanhma khōa son se ruh, son nantlung lim bât leh shakōrtung atere tûte talachōng phungmak inkhat antakhit nanhmu sik. Khavakha heisōt una hin heikei ruh. 3Khana tu mo inkhat in, ‘Heisa mo kha nantatlo?’ ati chei inchu, ‘Rōngpu’n hmang hnōmna anei, aheithak male bât sik ti ruh,” ati hei.
4Khana anmani kase heia hlam a shakōrtung atere inkhat anta leikhit anvahmu. Anmani’n anvasōt lai, 5khava hmun a akangir ṭhahrep he’n anhnenga, “Heimo nantatlo, shakōrtung tere nantasōt mo?” anti hei.
6Anmani’n Jesu tamanthei hei kapōa khan anmasôn hei khana aleikangir hei khan anmanṭhōi jo hei. 7Anmani’n shakōrtung tere kha Jesu hneng anṭhōia, achunga khan anpōnhei anpha a, khan Jesu kachōng jo. 8Khana mi katamtak in hlam a anpōn anpha a, alak he’n hlei rajeia thingbō anvatuk a khana hlam a anphapek a kae. 9Khana ahma kase hei leh akahnung kajui mihei khan an-ôna, “Hosanna! Pathen manpâk ruh!, Rōngpu rahminga akajōng ama kha amahâm kaṭha!#Hl 118.25-26 10Akajōng sik nipa Reng David rengram kha Pathen in mahâmṭhat pek rasoh. Pathen manpâk ruh.
11Jesu Jerusalema kasea, Bek-inn shunga kahlut a, khana ama’n heirakip a-en manve bit a kae. Tâk khōhlei ahongtluk jo jâra asonle 12 hei leh Bethany a kase jo hei.
Jesu’n Theichangkung Ahâksêr
(Mt 21.18–19)
12Ajîng kania, anmani Bethany a inphut anhong inle pha, Jesu avon leikaṭâm jo. 13Kahlatak a inphut theichangkung a’nbō hlep-hlup inkhat aleihmu, akara heikhat ka-om sik mo tia aka-en vakase. Tâk ahmun atlung pha, abō rōk avahmu jo, ajârchu theichanghei inra pha leichang mak a kae. 14Jesu’n theichangkung hneng khan ati, “Nakara tûte’n sâk nôk hêrmak jo hei rasoh!”
Asonle he’n aṭong hri kha antheia kae.
Jesu Bek-inna Akase
(Mt 21.12–17; Lk 19.45–48; Jn 2.13–22)
15Anmani Jerusalem antlung pha, Jesu Bek-inna kasea, Bek-inna neinâk kajōr leh a’nchohei seng kha ahnong sōt jo hei. Ama’n sêr kathlenghei dokhâng leh pherva kajōrhei in-ongna hei kha amaletpek jo hei, 16khana bek-inn telaia khan neinâk karôn tûte inkhatbek leimanhlut mak hei. 17Jesu’n khava sōa mihei hneng amanthei hei, “Ṭong inthenga hivahi inzet khachu Pathen in ati, ‘Ka-inn hi jât rakip hei kamukna inn anti sik kae.’ Tâk nangni’n inruhei inthupna nanmanchang joa kae,” ati.#Is 56.7; Jer 7.11
18Thempu kalenhei leh Dân oja he’n khavakha anthei jo, achang jâra ama thatna sik a hlam anjong manphut jo. Anmani’n ama kha anṭit, ajârchu mipuihei khan aman theina kha inlak anleisak a kae.
19Khōhlei ahong tlung jo pha, Jesu leh asonle he’n khōpui kha andahlon jo.
Theichang kunga inphut Insena
(Mt 21.20–22)
20Abân jîngkâr hmatak, anmani hlam a anselai, theichangkung kha anhmua kae. Khavakha arajung katlunga leikachâr jo. 21Peer in omchen kasōk kha amandonsōt a ahnenga, “Oja, enroh, nahâksêr theichangkung so kachâr jo!” ati.
22Jesu’n amasôn hei, “Pathen taksenna nei ruh. 23Ke’n kadiktak a kahri pek chei kae, tu achang inum hiva hmebung hi a’nlirsōt a tui-ôngpui laia abinga a’nhlon inthlana sik ṭong apek a khana amalunga inkei-chiona neilo, tâk ahrina chunga kasōk sik tia akataksen mi kha a’ntlo pek sik kae.#Mt 17.20; 1 Cor 13.2 24Hiva jâra kamanthei chei kae: nangni’n nander pha khana hei-inkhat nanngek pha, kanhmu jo tia taksen ruh, nantader rakip kha a’npe sik chei kae. 25Khana nangni’n nanngira nander pha, marvâna ka-om nanpa khan nantlo ṭhena rakip arangei mandamna sik chei, tu mo inkhat chunga malung hōimakna nantanei rakip kha rangei mandam hei ruh.” 26Milak-hei nanrangei mandam mak he’nchu, marvâna ka-om nanpa khan nantlo ṭhena kha rangei mandam mak chei ning.
Jesu Ratha Neina Chungchânga Ṭongder
(Mt 21.23–27; Lk 20.1–8)
27Anmani Jerusalema ave nôk a hong katlung hei. Khana Jesu Bek-inn shunga alônlelai, thempu kalenhei, Dân ojahei khana upahei ahnenga kahong hei, 28khana ander, “Hivahei seng tlosōtna sik a heiratha mo nanei? Hiva ratha hi tu tapek che mo?”
29Jesu’n amasôn hei, “Ke’n ṭong inkhat rōk der chei rong, khana nangni’n khavakha nanmasôn eng inchu, ke’n heiratha neina vânga mo hihei hi katlosōt kamanthei sik chei. 30John in tui manhlutna ratha anei kha khona inphut mo, ahri pek ruh: Pathena inphut mo a-emak leh mihringa inphut mo?”
31Anbinga inkhe inphut jo hei: “Heimo niti sik? ‘Pathena inphut kae,’ niti’n leh kha ama’n, ‘Kha achang inchu heisa mo John kha nanta taksen mak? ati sik. 32Khana ‘Mihringa inphut kae,’ niti’n leh kha heikhong sik.’” (Anmani’n mipuihei anleiṭit hei, ajârchu mi rakip in John kha sânkathem kae tia anlo.) 33Achang jâra anmani ṭong masôn khachu, “Keini manhret mak ung.”
Jesu’n anhnenga ati, “Kha achang inchu, ṭōnhei hi heiratha neina vânga mo katlo ti manthei mak jo chei ning.”
Currently Selected:
MARK 11: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
