MATTHEW 8

Jesu’n Mi inkhat Amandam

(Mk 1.40–45; Lk 5.12–16)

1Tlânga inphut Jesu ajōng ṭum pha, mipui katamtak he’n akahnung anleijui. 2Khava kahnunga ṭit ka-om tak vunnatna karôn inkhat kahonga ahma a inkuna ahri, “Apu, nang in ka’ntheng sik namadu’n chu, namantheng tor eng”, ati.

3Jesu’n akut azera asit a, “Ke’n kamadu, intheng roh,” ati. Khava phatak a khan anatna kha intheng jo. 4Jesu’n ama hneng, “Rangei roh! Tûte hneng hrimak roh, tâk thempu hneng intlunhrek a se roh, en che rasoh, khana na’ntheng kha mi rakip hneng a’nchênna sik Moses ṭongpek dungjuia tōkna vanei roh,” ati.#Lev 14.1-32

Jesu’n Roman Ṭōnpui karônpa Sōk Amandam

(Lk 7.1–10)

5Jesu Capernaum ahlut pha, Roman ṭōnpui karônpa inkhat ahnenga kahonga inthōpuina sik aleingek a: 6“Apu, kasōk damloa inna rakhum chunga ka-om, inhling theiloa khōdeng katheitak a ka-om,” ati.

7Jesu’n ati, “Kei kase sik enga kha kavamandam sik.”

8“Oh changmak, Apu,” Ṭōnpui karônpa khan ati. “Ka-inna nahong sik hi karahōi sōk mak. ṭong rōk kha pek roh, kasōkpa kadam sik. 9Kei um kachunga ṭōnpui karônhei ratha neina thōia aka-om inkhat eng kae, khana kei thōia sepei ka-om hei. Ke’n inkhat hneng ‘Se roh!’ kati leh ama kase; khava inkhat hneng, ‘Hong roh!’ kati leh kahong; khana kasōk hnenga ṭong kapek a, ‘Hi tlo roh,’ kati leh ama’n atloa kae,” ati.

10Jesu’n athei pha inlak asak joa akahnung kajui mipuihei hneng, “Kahri pek chei kae, hinghrep a taksenna kanei Israel kâra inkhatbek um lahmu mak eng. 11Inchêna kahri pek chei kae nisō leh tlaitlâk tinga inphut mi katamtak kahong sik hei, khana Abraham, Isaac khana Jacob leh marvân rengram a revei sâkna in-ongsap sik hei.#Lk 13.29 12Tâk Rengram a aka-om sik mihei kha inthimna shunga anhlonsōt sik hei, khana khan kaṭap sik hei khana anha ankarôt sik jo,” ati.#Mt 22.13; 25.30; Lk 13.28 13Khava sōa Jesu’n ṭōnpui karônpa hneng khan, “Inna se jo roh, nataksenna khan atlopek sik che,” ati.

Khana ṭōnpui karônpa sōkpa kha khava phatak a khan kadam jo.

Jesu’n Mi katamtak Amandam hei

(Mk 1.29–34; Lk 4.38–41)

14Jesu kha Peter inna leikase, khana khan Peter terpi hritluna akana a jekhuma akaje kha avahmu. 15Ama’n akut kha aleisit pek; hritlun khan amasō jo, khana amanu kha kathōia razen aphut jo.

16Khōhlei achang jo pha, mipui he’n Jesu hneng ramṭai karôn katamtak ahnenga anheiṭhōi hei. Jesu’n rathla kaṭhamak-hei kha ṭong inkhat vâng aleihnongsōt hei, khana akana rakip aleimandam hei. 17Hivahi Isaiah sânkathem taleihri, “Ama khet in ninatna rakip aloa khana hri rakip arônsō jo,” ti kha huitlungna sik a atlo kae.#Is 53.4

Jesu Kahnung Kajui sik hei

(Lk 7.1–10)

18Jesu’n akimvea mipui anka-om kha amanhret pha, asonlehei kha dîr rekhat ting ansena sik ṭong apek jo hei. 19Dân oja inkhat ahnenga kahonga. “Oja, nasena hmun rakip a jui sik chea intlukdek a akahong eng kae,” ati.

20Jesu’n amasôn, “Ram-ui he’n khurhei annei, khana vahe’n rabuhei annei, tâk Mihring Sapa khan lu manhngatna leh châmhngatna hmun neimak,” atipek.

21Asonle kachang mihlop inkhat in, “Apu, ahma inkeia inle hi rong, kapa vavûm hi rong,” ati.

22Jesu’n amasôn, “Ajui roh, akathi he’n ankathi kha vûm hei rasoh.”

Jesu’n Thlipui Amandai

(Mk 4.35–41; Lk 8.22–25)

23Jesu rakōng inkhat a leikahlut a, asonle he’n anle’nṭhōi pui. 24Manhret manloa dîr kha thlipui inhnaktak in avōk jo, rakōng kha tlâksuk rong ati jo. Tâk Jesu chu kajea leika-om. 25Sonlehei ahnenga kase heia anva mathō, “Apu, ahuk roh! Keini kathi sik jo ung,” anti.

26Jesu’n amasôn hei, “Heisa mo hingtuk a nantaṭit. Heituk a taksenna katlôm chei mo!” Khava sōa ama kathōia, thli leh tui in-nông kha adaina sik a arakôk jo, khan chu kadairip jo.

27Mi rakip in inlak anleisak jo. Anmani’n, “Khong khova mi jo mo? Thlipui leh tui in-nông kapha’n aṭong antajui hi,” anti.

Jesu’n Ṭai karôn Mi Inhni Amandam hei

(Mk 5.1–20; Lk 8.26–39)

28Dîrpang khat ting Gadara ramṭhen a Jesu ahong pha, thlânkhura inphut ahei kasōk ṭai karôn 2 he’n anlei intōpui. Khava mihei kha ṭai anleirôn khana ṭit ka-om tak anchang jâra khava hlamting tûte inlônmak hei. 29Khava laitak khan ka-ông heia, “Eh Pathen Sapa, heimo manlo sik namadu ung? Pha atluk mak hma karâkna kankapek sik a akajōng jo che mo?” anti.

30Inkârrei loa thlai kasâk a ka-om vok katamtak leika-om hei. 31Ṭaihei khan Jesu hneng anngek a, “Nang in nahnong sōt sik ung achang inchu, vok rup-hei kâra son atir roh,” anti.

32Jesu’n anhnenga, “Se ruh” ati hei; khana anmani kasōk heia vok-hei shunga kahlut jo hei. Vok rup pumpui hei kha karepang inhrâp a katlânsuk heia dîr shunga katla inhlut jo hei khana kathisō jo hei.

33Ankakhemhei katlân heia khōpuia kahlut jo hei. Khana khan thuhming rakip, ṭai karônpa chunga omchen kasōk kha anvahri jo. 34Khava jâra khōpui shunga mi rakip Jesu inhmupui sik heikasōk hei; khana anmani’n ama anhmu pha anramṭhen kha adahlona sik anngek jo.

Currently Selected:

MATTHEW 8: KOMRBSI

Highlight

Copy