MATTHEW 11

Tui Inhlutpa John Ṭongkarônhei

(Lk 7.18–35)

1Jesu’n sonle 12 hei kha khanga amansesō hei pha, khava hmun kha adahlona mi’nthei sik leh ṭong kahrile sik a khava hnenga khōpuia kase jo.

2John in hlungkura a-omna inphut Christa ṭōntlohei kha atheia, asonle ṭhahrep aleitir hei. 3“John in akajōng sik atipa kha nang che mo, a-emak leh milak inkhat kantalahngâk sik mo, amanthei roh?” tia anmani’n Jesu hneng anleider.

4Jesu’n amasôn hei, “Se una nantahmu leh nantathei hei hi John hneng vahri ruh: 5#Is 35.5,6; Is 61.1hmitkacho’n khō ahmu, ke inkhōi ke achoi, kaphâr karôn intheng, kōr kaset athei, akathi kathōi khana sara inrenghei hneng Ṭong kaṭha inhrile. 6Kei chunga malung inkei-chiona kaneimak mi kha heituk a vâng kaṭha mo!” ati.

7John sonlehei ansesō pha, Jesu’n mipuihei hneng John ṭong kha ahria: “Nêrdi ramhânga John hneng nanse pha heimo va-en sik a’ntluk chei? Thli tasêm phihei kha mo? 8Hei ka-en sik a mo akase chei? Pōn innem neng kasi mi inkhat ka-en chei mo? Khanga ret kaṭha kasi hei khachu reng-innpuia ka-om hei! 9Amanthei ruh, hei ka-ena mo akasesōt chei? Sânkathem inkhat mo? Kadik, tâk sânkathem inkhat kanek a akalen chet nanva hmua kae. 10#Mic 3.1Ajârchu ṭong intheng in hinga ahri kha John chungchânga kae: ‘Pathen in ati, kaṭong karôn nahma katir sik, ama’n nahma hlam amahlang sik.’ 11Kaman chênpek chei kae ti chu mihring rakip hei kanek a Tui Inhlutpa John hi akalenpen kae. Tâk marvân rengram a akasinpen kha John kanek a kalen jôk a kae. 12#Lk 16.16Tui Inhlutpa John in aṭong ahrilea inphut tuning katlung marvân Rengram kha rumhrat a buhluna aratō ṭhak a kae. khana rumhrat mihe’n sur sik a anrei. 13John pha katlunga sânkathem leh Moses Dân khan Rengram chungchânga ṭong kha antahri kae; 14#Mic 4.5; Mt 17.10-13; Mk 9.11-13khana nangni’n anṭong kha nanrahlâng hnōm inchu, John hi akajōng sik inti Elijah kha kae. 15Khava jâra, kōr nannei inchu rangei ruh!

16“Tûnchu, tûnlai khang mihei hi, hei leh mo katekâk sik? Anmani hi keithe tlânga naipang in-ong hei kapō kae. Rup khat in rup hlop inkhat hneng an-ôna, 17‘Keini’n hmōiṭhōina bunglir kantumpek chei, tâk nangni lâmmak chei! Ṭajai suina kansakpek chei, nangni ṭap mak chei!’ inti hei. 18John kha busâk lo, tui inloa ajōng pha mihe’n, ‘Ama rathla kadikmak karôn mi kae,’ anti. 19Mihring sapa kajōnga bu asâk a tui a-in pha, khan chu mi rakip in, ‘Enruh! mi kalôp, ju ka-in, ramsêrṭhei kakhôm ṭōn katlohei leh mikasehei ṭhōnpa kae!’ anti. Hei-hei achang inum, Pathen singna khachu aṭōn tlosōt kara’n amalâra kae,” ati.

Taksenna Kaneimak Khōpuihei

(Lk 10.13–15)

20Jesu’n ṭōn-inlak katamtak atlona khōpui heia khan mi’n anmalung anthleng mak jâra, aleirasei hei. 21#Is 23.1-18; Eze 26.1—28.26; Jl 3.4-8; Am 1.9,10; Zec 9.2-4“Eh Chorazin! Heituk ṭitpek aka-om che mo! Eh Bethsaida! Nang sik um heituk ṭitpek aka-om che mo! Nangnihei hneng ṭōn-inlak ale’ntlo hei kha Tyre leh Sidona ale’ntlo achang inchu, anmalung thleng malârna borapōn ansi sik, khana ravut ale’nno sik jo hei kae. 22Kahri manchên pek chei kae Ṭongtan Ning Pathen in nangnihei kanek a Tyre leh Sidon mipuihei chunga lungsetna aneichet sik! 23#Is 14.13-15; Aph 19.24-28Khana Capernaum nang sik a chu! Marvân katlung a’nchoi inshâng hnōm che mo? Kathirama hlon manhlut sik che kae! Nang hnenga ṭōn-inlak ale’ntlo hei kha Sodoma ale’ntlo achang inchu, tuning katlung aleika-om hi sik kae! 24#Mt 10.15; Lk 10.12Nanmanhret manchênthei khachu Ṭongtan Ning Pathen in nang kanek a Sodom chunga lungset amalârchet sik kae!”

Kahnenga Hong ruh Châm Inhnga ruh

(Lk 10.21–22)

25Khava pha khan Jesu’n, “Apa, marvân leh ralei Rōngpu, kamanpâk che, ajârchu mikasing leh mikathemhei hneng naleithup kha akathemmak hei hneng namalâr jo. 26Kadik, Apa, akasōk sik a namadu kha hi leikae.

27“Heirakip Kapa’n kei apek jo eng. Pa teilo tûte’n Sapa kha manhret mak, khana Sapa tei loa tûte’n Pa kha manhret mak, khana Sapa khan malârpek sik a akadei hei tei loa tûte’n Pa kha manhret mak.#Jn 3.35; Jn 1.18; 10.15

28“Phur kahrik karôna akachâm hei, nankhenga kahnenga hong ruh, ke’n châm manhngat chei rong. 29#Jer 6.16Karîngke inlo una inrôn ruh, khana keia inphut inchu ruh, ajârchu kei kamalung innem khana kadai eng; khana châmhngatna nanhmu sik. 30Ajârchu kapek sik chei rîngke hi rôn kahōi, khana kamanrôn sik chei phur hi rôn kayânga kae.”

Currently Selected:

MATTHEW 11: KOMRBSI

Highlight

Copy