MALACHI 1
1
1Israelhei hnenga manthei sik a Malachi hneng Rōngpu ṭonghri kha hi kae.
Israelhei sik a Rōngpu lungsetna
2 #
Ro 9.13
#Is 34.5-17; 63.1-6; Jer 49.7-22; Eze 25.12-14; 35.1-15; Am 1.11-12; Ob 1-14Rōngpu’n amihei hneng ati, “Ke’n nangni pha rakip a kalungset ṭhak chei.”
Tâk-kha anmani’n anmasôn, “Keini nalungsetna kha heikhonga mo namalâr?”
Rōngpu’n amasôn hei, “Esau leh Jacob kha u-naihei kae tâk ke’n Jacob khana asōn apârhei kalungset hei, 3khana Esau leh asōn apârhei kahōt hei. Esau tlângram kha kaman hmangsō khana ram kha ram-uihei sik a kamandahlon hei.”
4Edom mi, Esau sōn he’n anti, “Kankhōpuihei suk manhmanga ka-om jo hei, kha’num kanlasak manther nôk sik,” khava pha Rōngpu’n amasôn sik hei, “Anmani’n sak nôk hei rasoh, ke’n kasukset nôk sik hei. Mihe’n, ‘Ram kaṭhamak’ leh ‘Rōngpu’n ahei tik a ahnuk anatsan jât-hei’ anti sik hei.”
5Israel he’n anhmit khet a hivahi anhmu sik, khana anmani’n, “Israel ramri kakhe katlunga Rōngpu chu ratha anei!” anti sik.
Rōngpu’n Thempuhei Arasei
6Chunghnung Rōngpu’n thempuhei hneng ati, “Sapa’n apa kajana apek, khana sōk in akapu kajana apek. Kei nanpa eng kae, heijâra mo kajana nantapek mak eng? Kei nankapu eng kae, heisa mo nantakaja mak eng! Nangni’n adonmak chei, kha’num nander eng, ‘Heikhonga mo kantadon mak che?’ nanti. 7Hinga adonmak chei – kamaichâma heite kahnemmak thlai nanhei tōk. Khana nangni’n, ‘Heikhonga mo kajana kantanei mak che?’ nanti. Ke’n kamanthei sik chei – kamaichâm heitea nantatei mak kha kae. 8Nangni’n kei hnenga tōk sik a hmitkacho, akadam mak, ke katlek ranhring nanheichoi hei, khana khan akadik mak om mak nanti tor mo? Ram vaikarôn inkhat hneng khang khavakha vapek ruh. Ama kha nangni chunga amalung katlaia heikhat ahei pek sik chei mo?”#Dân 15.21
9Tûnchu, thempuhei, Pathen kha nihnenga aṭhatna sik der ruh. Nanderna kha ama’n masôn mak ning, khavakha nangnihei ṭhena kae. 10Akahratpen Rōngpu’n ati, “Nankâra mi inkhat in Bek-inn kot-hei akhâra heite akahnem mak hmei kha nangni’n kamaichâm chunga nanmansûk mak jo’nchu tia kamandon jo. Kei nanchunga tlaimak eng; kahnenga nantaheichoi tōkna kha rahlâng mak ning. 11Raleichung inchaina inkhat a inphut inkhat katlunga mihe’n kajana annei eng. Hmun rakip a bero anro mankhut a khana rahlângthei sik inthoina antōk eng. Ankhenga kei ankaja eng. 12Tâk-kha nangni’nchu kamaichâm kha heite hnemmak nantia khana heikaemak thlai nantōk a, kajana apek mak chei. 13Nangni’n nanti, ‘Hihei seng sik a heituk a akachâm jo ung mo!’ khan chu nanhnâr nansânthlōn enga kae. Kahnenga tōkna sik a marûk ranhring achangmak leh ake inkhôi leh akadam mak hei nanheichoia kae. Khavakha nangnia inphut karahlâng sik tia nanmandon mo? 14Ankemōng rup kâra akaṭha inkhat kapek sik che tia ṭong intepna annei pha, akahnem mak ranhring inthoina kanei, anikahōn mi khan hâksêr chen rasoh! Ajârchu kei rengkalen eng kae khana jât rakip a mihe’n anṭit enga kae.”
Currently Selected:
MALACHI 1: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
