LUKE 8

Jesu Inṭhōipui Nuhmeihei

1Pha chomkhat sō leh Jesu’n khōpuihei leh khōte heia kalôna Pathen Rengram Ṭong Kaṭha ahrilea kae. Sonle 12 he’n ama anleisepui. 2Khang’khan nuhmei ṭhahrep anshunga rathla kaṭhamak leh annat amandam hei kha’num anleijuia kae: Mary (Magdalene inti) ashunga rathla kaṭhamak 7 ahnong sōt peknu,#Mt 27.55-56; Mk 15.40-41; Lk 23.49 3Herod ṭongtana hmun a ṭōnkatlo Khuza nuhmei Joanna, khana Susanna leh nuhmei ralak katamtak hei, Jesu leh sonlehei chunga inthōpuina aleikapek hei seng kha kae.

Hmuchi Kavorpa Tekâk

(Mt 13.1–9; Mk 4.1–9)

4Mihei kha khōpui inkhat a inphut inkhat a Jesu hneng kahong heia, mipui anho’ntûp pha, Jesu’n hiva tekâk hi ahri pek hei:

5“Pha khat a mi inkhat hmuchi kavor kasesōt, ama’n hleia hmuchi kha avora, ṭhahrep khat chu mi hrona hlamdunga katla, vahe’n anhrut a ansâk jo. 6Ṭhahrep hlung kâra katla, khava hmuchi kha ahong keksōt pha aralei a’ndapmak jâra invōia kachâr jo. 7Ṭhahrep rahling chap kâra katla, rahling kha leh kakeksap heia akabuksi jo. 8Khana ṭhahrep chu ralei ṭhatna katla a hmuchi kha kakek a, kakhanga akara 100 et inra a kae.”

Khana Jesu’n achaina, “Kōr kanei in rangei ruh!” ati.

Tekâk hei Manhmuna

(Mt 13.10–17; Mk 4.10–12)

9Asonlehei khan ṭong tekâk kha heitina mo tia andera, 10Jesu’n amasôn hei, “Pathen Rengram in-ip manhretna kha nangni inpek jo chei; tâk milak-hei hneng chu ṭong tekâk a a’nhri kae, khava jâra anmani’n an-en inum hmumak hei ning, anrangei inum theimak hei ning.”#Is 6.9-10

Jesu’n Hmuchi Kavorpa Tekâk Ahri Manchên

(Mt 13.18–23; Mk 4.13–20)

11“Hivahi tekâk kha kae: hmuchi kha Pathen ṭong kae. 12Hlamdunga akatla hmuchihei khachu ṭong inhri katheihei kha kae; tâk anmalunga antaksenna sik leh anhringna sik a a’npek ṭong kha Seitan kahonga alosōt pek jo hei. 13Hlung kâra akatla hmuchihei khachu, ṭong inhri katheia inpâk a akalo hei kha kae. Tâk-kha anshunga inritak a rajung aṭhōmak jâra, anmani’n pha bongkhat chu antaksen, tâk enmansinna ahong pha leh anmani katlu ri jo hei. 14Rahling kâra katla hmuchihei khachu aṭong katheihei kae; tâk raleichung hringkhō inrengna, haona leh hōina’n akatōm heia akabuksi hei, khana ankara kha ahei tik a hmintor mak hei. 15Ralei thaiṭhatna akatla hmuchihei khachu aṭong kathei, akaṭha malung karôn, aṭong kajui khana an-inramak kârseng takkatlo hei kha kae.

Hrai Thōia Thaihmei Inkhat

(Mk 4.21–25)

16“Tute’num thaihmei vâr inkhat hrai thōia det phungmak. Khava kanek a mihei anheihlut pha vâr kha anhmuna sik thaihmei matungna chunga anmatunga kae.#Mt 5.15; Lk 11.33

17Hei-achang inum a’nthup kha vânga malârsōt sik kae, khana hei-achang inum makhu khuma aka-om kha a’nhmusōt ngerna sik khōvâra malârsōt sik kae.#Mt 10.26; Lk 12.2

18“Khava jâra heikhong mo nanta rangei insing thei ruh; ajârchu heikhat akanei kha inpeksa sik hei, tâk heite akaneimak kha ajingte anei tia amandon kapha losōtpek sik hei kae.”#Mt 25.29; Lk 19.26

Jesu Nu leh Asōpuihei

(Mt 12.46–50; Mk 3.31–35)

19Jesu nu leh asōpuihei ahnenga kahong hei, tâk mipui antam jâra ahnenga hlut tor mak hei. 20Mi inkhat in Jesu hneng, “Nanu leh nasōpui he’n anhmuhnōm chea vânga kangir hei,” ati.

21Jesu’n ankhenga hnenga, “Pathen ṭong inngeia, akajuihei kha kanu leh kasōpuihei kha kae,” ati.

Jesu’n Thlipui Kahrâng Amandai

(Mt 8.23–27; Mk 4.35–41)

22Ni khat Jesu asonlehei leh rakōng inkhat a kachōng heia anhnenga, “Eini’n dîr hi rakan me sona rekhat ting son se rih,” ati hei. Khang’khan anmani intôr jo hei. 23Khang’khan anmani an-intôrlai, Jesu leikaje jo. Thlipui inhnaktak inkhat dîrting khan jōng kahrângsuk a rakōng shunga tui siprong ati jo, ankhenga khōdeng kathei sik a ka-om jo hei. 24Sonlehei kha Jesu hneng kahong heia anmathōia, ahnenga, “Apu, Apu! Keini thirung kanti jo,” anhongtia kae.

Jesu kathōia thlipui kahrâng hnenga leh tui in-nông hnenga khan ṭong apek a, thlipui kahrâng leh tui in-nông kha kabâng jo hei, kadai hnger joa kae. 25Khava pha ama’n sonlehei hneng, “Khomo nantaksenna?” ati hei.

Tâk-kha anmani’n anmandon-hla a kaṭi jo hei, khana anmani khat leh khat in, “Hiva mi hi tu mo? Ama’n thli leh tui in-nông ṭong apek heia, aṭong anjuia kae!” anti.

Jesu’n Ṭai Karôn Mi Inkhat Amandam

(Mt 8.28–34; Mk 5.1–20)

26Galilee dîra inphut anmani’n Gerasa ramri ting intôr inthlung jo hei. 27Jesu tuipang ahei sōk pha, khōpuia inphut, ṭai karôn mi inkhat in a’ntōpuia kae. Mipa kha pha kasôttak pōnsi derkei loa inn kadahlona, thlânlôna khurshung rōk a leika-om. 28Ama’n Jesu ahmu pha rasa inhnaktak a ka-ônga, ahmai kunga inkuna: “Eh A’nshângpen Pathen Sapa Jesu, kei heimo namanlo sik eng? Khōdeng theina apek mak roh,” tia angêk. 29Ama’n hinga ati hi rathla kaṭhamak kha ama inphut asesōtna sik Jesu’n ṭong aleipek jo jâra kae. Hmun katamtak a rathla kaṭhamak khan aleisur ri, khana thirhrui vâng ankhit a, rake antukkhum ravâng amaher thlek a ṭai khan nêrdiram thōia aṭhōi ria kae.

30Jesu’n ama hneng, “Narahming heimo?” tia ader.

Ama’n amasôn, “Karahming ‘Ajâm’ kae.” Ajârchu ṭai katamtak ashunga kahlut heia kae. 31Ṭaihei khan adongna kase dôpkhura atir makna sik hei Jesu hneng anleingêk.

32Hmebung panga khan vok katamtak anleikhem hei. Ṭaihei khan vok-hei hneng anhlutna sik Jesu hneng ander pha aleimanhlut jo hei. 33Khava jâra mipa inphut kasōk heia vok-hei hneng kase jo hei. Vok rup-hei seng kha karehrâpting katlânsuk heia dîr shunga kahlut hlon jo hei.

34Vok kakhemhei khan omchen kasōk anhmu pha, katlân heia khōpui shunga leh hleipuk heia anvahri manthang joa kae. 35Mihei kha omchen ka-en sik a heikasōk hei, Jesu hneng anhong pha, ṭai sōksōtna mipa kha pōn a’nsia malung kahlim senga Jesu ke kunga an-ong kha anhmu pha anmani ankhenga kaṭi jo hei. 36Khava aleikahmu hei khan heikhonga amandam mo ti kha mihei anleihri pek hei. 37Mipuihei kha ankhenga kaṭirei jo heia khava ram a inphut Jesu asesōtna sik anngek a kae. Khava jâra Jesu rakōnga kahlut a adahlon jo hei. 38Ṭaihei sōksōtna mipa khan Jesu hneng, “Ke’m hongrong,” ati.

Tâk-kha Jesu’n ahri pek a, 39“Na-inna inle roh, Pathen in heimo atlopek che kha vahri roh.”

Mipa kha khōpui shunga kalôna Jesu’n aleitlo pek kha avahri jo.

Jairus Sanu leh Jesu Pōnhmor Kasit Nuhmei

(Mt 10.5–15; Mk 6.7–13)

40Jesu dîr rekhat ting ahe’nle pha, mipui in anleiratō, ajârchu anmani’n anleihngâk ṭhak a kae. 41Khava sōa khō khat a intûpna innpuia ṭōnkarôn mi inkhat arahming Jairus inti kahonga, Jesu ke kunga hong-inkuna a-inna ahongpekna sik a avangek. 42Ajârchu kum 12 katluk jo sanu inkhat rōk anei kha akathi sik a ka-om jo.

Jesu’n khang’khan aselai, mipui in ama ankatōmbit a kae. 43Ankâra kum 12 inhnaktak a thi kajung nuhmei inkhat leika-om: thempuhei hneng anei rakip aleimanhlut sō jo tâk tûte’n leimandam tor mak hei. 44Amanu kha mipui kâra Jesu kahnungting apōnhmor avasit a, khava laitak athi jung kha kabâng jo. 45Jesu’n ader hei, “Tu mo ani kasit?”

Mi rakip in changmak ung anti pha, Peter in, “Oja, mipui in inhneng che-chea ankatōm chea kae,” ati.

46Tâk-kha Jesu’n, “Mi inkhat in asit eng, ajârchu keia inphut ratha hratna asōksōt kha kamanhret a kae,” ati. 47Nuhmei khan ani manhret sōt jo ti inhret a, ratha innok pum a kahonga, Jesu ke hma hong-inkun jo. Khana khan mi rakip hma khan, ama’n heisik a mo asit khachu khava laitak heikhonga mo akadam jo ti kha ahri jo. 48Jesu’n amanu hneng, “Sanu nataksen in amandam jo che, kamōnga se jo roh,” ati.

49Jesu’n hi ahrilai, ṭōnkarônpa inna inphut tirle inkhat kahonga, “Nasanu kha kathi jo, oja kha manbōi mak jo roh” tia Jairus hneng ahong manthei.

50Tâk-kha Jesu’n kha atheia Jairus hneng, “Ṭimak roh, taksen rōk taksen roh, kadam sik,” ati.

51Ama an-inn kha atlung pha, naipangnu apa leh anu khana Peter, Jacob leh John teilo tûte inna kahlut sik leiphemak. 52Khana ka-om rakip naipang sik jâra leikaṭap hei. Jesu’n, “Ṭap mak ruh, naipang hi thimak, akaje hnâm kae,” ati.

53Anmani rakip in anleimanuisō, ajârchu amanu thi kha anleimanhret joa kae. 54Tâk-kha Jesu’n naipangnu kut amatua abek a, “Naipang, thōi roh!” ati. 55Hongkahring malea inrangtak a hongkathōi jo, khana heikhat mansâkna sik Jesu’n ṭong apek hei. 56Anu leh apa’n anmandon-hla hêr jo, tâk tûte hneng omchen kha anhrisōt makna sik Jesu’n ṭong aleipek hei.

Currently Selected:

LUKE 8: KOMRBSI

Highlight

Copy