LUKE 6

Châmhngat kani Chungchânga Ṭongder

(Mt 12.1–8; Mk 2.23–28)

1Châmhngat kani ning inkhat a Jesu sabi hlei laia ahroa leikase. Asonle he’n savui anmajuia ankut a ankahnura asai kha ansâk a kae.#Dân 23.25 2Pharisee ṭhahrep in “Nidân in Châmhngat kania tlomak sik ati kha nangni’n heisa mo nantatlo?” anti.

3Jesu’n amasôn hei, “David in ami a’nṭhōipui hei leh anvon aṭâm pha anta leitlo kha teimak chei mo? 4Ama Pathen inna kahlut a, Pathen hnenga a’ntōk buhlom kha aloa asâk a, ami he’m aleipek heia kae. Khavakha thempuhei teilo tu inkhat in asâk inchu nidân kadōi kae.”#Lev 24.9 #1 Sa 21.1-6

5Khana Jesu’n achaina ahria, “Mihring sapa kha Châmhngat kani Rōngpu kha kae,” ati.

Kut Kangōi Mi Inkhat

(Mt 12.9–14; Mk 3.1–6)

6Châmhngat kani ning inkhat a intûpna innpuia Jesu kahlut a amanthei hei. Khava hmun a khan akut changting akangōi mi inkhat leika-om. 7Dân ojahei leh Phariseehei ṭhahrep in Jesu ṭōntlo ṭhena chunga maset pek theina sik ajâr ṭhahrep anleimadua; anmani’n Châmhngat kania mi tu achang inum Jesu’n amandam sik kha anlei en mathlip a anleihlōa ka-om hei. 8Tâk-kha Jesu’n anmani malung mandon kha amanhret a kut kangōipa hneng, “Nang ngir inna hiva hmating hin hong roh,” ati. Mipa kha kathōisōt a anhma vakangira kae. 9Khava pha Jesu’n anhnenga ahri, “Châmhngat kani ning nidân in heimo tlo sik ahnōm pek me? Mi manrim sik mo, a-emak leh mi inthōpui sik mo? Mi inkhat hringkhō hukmanhring sik mo a-emak leh manhmang sik mo?” 10Ama’n anmani a-en manve bit heia, mipa hneng khan, “Nakut razit roh,” ati. Ama’n akut arazit a akut kha kadam jo.

11Tâk-kha anmani anhnuk kana hêr joa, Jesu chunga heimo antatlo tor sik tia anmani anbinga inbek jo hei.

Jesu’n Sonle 12 Akadei

(Mt 10.1–4; Mk 3.13–19)

12Khava phatak a khan Jesu derna kanei sik a tlâng inkhat a kase jo, khava hmun a khan jânsôt Pathen hneng aleidera kae. 13Khō ahong vâr pha ama’n asonlehei ahnenga abek heia 12 akadeisōt jo hei, khana anrahming sonle tia aphō jo hei, khahei khachu; 14Simon (ama’n Peter tia arahming aphō); khana anaipa Andrew; Jacob leh John, Philip leh Bartholomew, 15Matthew, leh Thomas, Alphaeus sapa James leh Simon (Aram inlungsetpa tia’m anbek) 16James sapa Judah leh Judah Iscariot, akajōrpa hei hi kae.

Jesu’n Amanthei leh Amandam hei

(Mt 4.23–25)

17Tlânga inphut anmani leh jōng inṭhōisuk heia, hmun incham inkhat a asonle katamtak hei leh Jesu kangirsap heia kae. Khava hmun a khan Judea ram pumpuia mi katamtak, ti chu Jerusalema inphut Tyre leh Sidon tuipang kimvea, khōpui heia inphut mipui katamtak, 18aṭong hri inngei sik leh annatna amandam sik a kahong heia kae. Rathla kaṭhamak in khōdeng amanthei hei kha’m kahong heia amandam hei. 19Ankhenga amandam sik hei anmadua mi rakip in ama sitnger sik a anmandon et a kae.

Hōina leh Inrengna

(Mt 5.1–12)

20Jesu’n asonlehei a-en heia ahri:

“Sara kachang nangni nanmahâm kaṭha;

Pathen rengram kha nanta kae!

21“Tuna von kaṭâm nangni nanmahâm kaṭha;

nangni alakakhop sik chei kae!

Tuna akaṭap nangni nanmahâm kaṭha;

nangni nantala manui sik kae!

22“Mihring sapa sik jâra, nangni mi’n anhōt cheia, anhnōm mak cheia, inzak anpek chei pha, khana mikaṭhamak anti chei pha, nanmahâm kaṭha!#1 Pe 4.14 23Khang’khan antlo chei pha, inpâk a lâm ruh, ajârchu inpâkman kalentak nangni sik a marvâna dapek jo chei kae. Ajârchu anpusōn he’num khava kapōhrep a sânkathemhei kha anleitlo heia kae.#2 Th 36.16; Ṭōn 7.52

24“Tâk-kha tuna akahao nangni sik a heituk ṭitpek ka-om chei mo;

nangni’n hringkhō kahōi nanlei hmang joa kae!

25“Tuna von kakhop nangni heituk ṭitpek ka-om chei mo;

nanvon alakaṭâm sik kae!

Tûnlaia a’nnui nangni heituk ṭitpek ka-om chei mo;

alakaṭap cheia ṭajai nantalasui sik kae!

26“Nangni mi rakip in anhri manṭhat chei pha, heituk ṭitpek ka-om chei mo; anpusōn he’num akadik mak sânkathemhei kha khanga anta leihri manṭhat hei kae.

Indōipuihei Lungset sik

(Mt 5.38–48; 7.12a)

27“Tâk-kha kaṭong kathei nangni kamanthei chei kae: nangni’n nanka-en inda hei lungset hei ruh, nankahōt hei anṭhatna sik tlopek hei ruh. 28Nankahâksêr hei mahâmṭhat pek hei ruh; akanimak a nankatlo hei derpek hei ruh. 29Mi inkhat in nangambe inkhat ting akaben inchu, lang khat ting um madopek roh; mi inkhat in nazakkō kalen akasut che’nchu, nazakkō ate kha’m peksa roh. 30Tu enum nahnenga heikhat ader che kha pe roh, naneinâk hei kha achoi jo’nchu dermale mak roh. 31Nang sik a mihei namantlo hnōm kha mihei sik a’m khanga tlo roh.#Mt 7.12

32“Nangni’n nan-inlungset hei rōk kha nanlungset inchu, heisik a mo mahâmṭhatna kha nantachen sik? Mikaset he’num ani’nlungset hei kha anlungset heia kae. 33Nang hnenga ṭhatna katlohei rōk hneng nangni’n ṭhatna nantlo’nchu, heisik a mo mahâmṭhatna kha nanta rahlâng sik? Mikasehei kha’num khachu antatlo kae. 34Nankapek inletor sik mi rōk hei kha nanneinâk heikhat nanmanpûk he’nchu, heimo nantahnempui sik aka-om? Mikasehei kha’num ankapek inletor sik hei kha anneinâk anmanpûk heia kae. 35Kha changmak! Nanka-en inda hei kha lungset hei ruh, khana anṭhatna sik tlo ruh, khan chu anhnenga inphut hmu nôkna sik a mandon loa nanneinâk manpûk hei ruh. Kha achang inchu nangni’n vâng kalentak nanchen sik, khana A’nshângpen Pathen sa kachang sik chei. Ajârchu ama kha mikaṭhamak-hei leh mi kanimak hei sik a akaṭha kae. 36Nanpa lungset kathem achang kapōa nangni lungset them ruh.

Milak chunga Ṭongtan

(Mt 7.1–5)

37“Milak ṭong tanmak ruh, nanṭong Pathen in tanmak ning; mi masetmak ruh, Pathen in masetmak chei ning, mi rangei mandam ruh, Pathen in arangei mandam sik chei. 38Milak-hei pe hei ruh, nangni Pathen in apek sik chei. Akasip phet, pek hnōmtak a inthōpuina, nankut inhlei leoa abunpek sik chei. Milak sik a natena kha nang sik a Pathen tahmang sik tena kha kae,” ati.”

39Khana Jesu’n hiva tekâk hi aleihri pek hei, “Hmitkacho inkhat in hmitkacho inkhat hlam keithei mak; akei inchu, an-inhnia khur kōk a katla inhlut sik hei.#Mt 15.14 40Lekha inchu naipang kha a-oja kanek a akalen jôk changmak; tâk a’nthemchûk kha achai jo pha a-oja kapōa hongkachang sik.#Mt 10.24-25; Jn 13.16; 15.20

41“Nahmit a innim inkamre ka-om chu donlo chea, nasōpui hmit a innim kasintek ka-om kha heijâra mo na-en? 42Nahmit a innim inkamre ka-om kha hmutorlo chea heikhong mo nasōpui hneng, ‘Sōpui, nahmit a innim kasintek kha losōtpek che rong,’ nati tor sik? Mi inṭhat hlemsak! Hmakakeia nahmit a innim inkamre kha losōt hi roh, khava sō leh nasōpui hmit a innim kasintek kha nahmu tor sik a kae.

Thingkung Inkhat leh Akara

(Mt 7.16–20; 12.33–35)

43“Thingkung kaṭha inkhat a kara kaṭhamak inra phungmak, a-emak leh thingkung kaṭhamak a kara kaṭha inra phungmak. 44Thingkung rakip akara vâng inhret; rahlingbuk a inphut a theichang kara ṭhōtphung mak chei.#Mt 12.33 45Mikaṭha khan akaṭha manbukna malunga inphut akaṭha amasō; mikaṭhamak khan akaṭhamak manbukna malunga inphut akaṭhamak amasō. Ajârchu malunga akasip phet kha bei in ahrisōt kae.#Mt 12.34

Inn Kasak Mi Inhnihei

(Mt 7.24–27)

46“Kahri khachu tlolo cheia, heisa mo ‘Rōngpu, Rōngpu,’ nantati eng? 47Tu enum kahnenga kahonga, kaṭong katheia, akajui mi kha, tu leh mo a’n-ang ti kha ke’n manhmu chei rong. 48Ama khachu a-inn asak pha, innhmun inthûktak a kacho, hlungpui chunga kadeng mi kha kae. Tuidung pang tui inlet inthla jo, tui mathlung in inn kha avasuk jo, tâk manhling tor mak, ajârchu inn kha kaṭhatak a asak kae. 49Tâk-kha kaṭong katheia, akajuimak mi khachu hmun dengloa raleia inn kasak mi inkhat kapō kae; inn kha tuikalen in asuk pha inrangtak a katluk jo; atlûk kha heituk a inhnak jo mo!”

Currently Selected:

LUKE 6: KOMRBSI

Highlight

Copy