LUKE 17
17
Setna
(Mt 18.6–7,21–22; Mk 9.42)
1Jesu’n asonlehei hneng ati, “Mihringhei set-tlâkna sik omchen akasōk sik a ka-om, tâk khava omchen insō mi sik a khan heituk a ṭitpek aka-om jo mo! 2Ama’n hiva naipang kasinhei setna amathlâk sik hei kanek a chakri hlung kalentak inkhat arînga makheia tui-ôngpuia hlon manhlut kha ama sik kaṭha jôk. 3Khava jâra nantatlo kha en kaṭha ruh!#Mt 18.15
“Nansōpui in setna atlo jo’nchu, manse ruh, khana ama’n amalung athleng inchu rangei mandam ruh. 4Ama’n ni khat shunga nanchunga setna vōi 7 atloa, atlo akaia amalung athlenga nanhnenga, ‘Insir eng’ ahong ti’nchu, nanta rangei mandam nger sik kae.”
Taksen
5Sonle he’n Rōngpu hneng anleihri, “Kantaksenna amankhang pek roh.”
6Rōngpu’n amasôn hei, “Nangni’n anṭamhmu rehrep taksenna nannei inchu, hiva thingkung hi, arajunga inlirsōt inna tui-ôngpui shunga va’nling roh, nanti’num nanṭong ajui sik kae.
Sōk Inkhat Ṭōn
7“Nangni kâra mi inkhat in hlei kakhōi a-emak leh kemōng kakhem sōk inkhat aneia kae. Sōkpa kha hleia inphut inna ahong tlung pha, inrangtak a bu asâkna sik nanta manthei sik mo? 8Timak tin chei, khava kanek a nangni’n ahnenga, ‘Kabu sâk sik mantluk roh, nakhōn khit ina, kasâk ka-in hi ahngâk hi roh; khava sō leh nang in nasâk na-inthei sik,’ timak tin chei mo? 9Sōk khan ṭongpek kha ajui jâra manpâk sik sōk mak, akasōk mo? 10Kha leh nangni in-anghrep chei; tlo sik a manthei seng kha nantlosō leh, ‘Eini hi angaia sōk-hrep loi me kha kae; tlo sik hrep kha nitlosōt kae,’ ti ruh.”
Jesu’n Kaphâr Karôn 10 Amandam
11Jesu’n Jerusalem kajōna asena Galilee leh Samaria ramri ting aleihroa kae. 12Khana khō inkhat a ahlut-lai kaphâr karôn mi 10 leh intō hei. Anmani kahlajap a kangir heia 13rasa inhnaktak a ka-ông hei, “Oja, Jesu! keini alungset roh,” anti.
14Jesu’n ahmu hei pha anhnenga aleiti, “Se una thempuhei hneng nangni nanbinga va’nlâr ruh,” ati.#Lev 14.1-32
Anmani hlam a anselai le’ntheng jo hei. 15Ankâra mi inkhat in, ama a’ntheng jo kha ahmu pha, akahnung inlehrek nôk a, rasa inhnaktak a Pathen achoi ka-ân jo. 16Khana ama Jesu ke hma inkuna amanpâk a kae. Ama kha Samaria mi inkhat leikachang. 17Jesu’n ati, “Mi 10 a’ntheng hei changmak mo? Mi 9 hei kha khon mo aka-om jo hei? 18Heisa mo hiva khōhmepa rōk hin ahong inlea Pathen manpâkna ahongnei?” 19Khana ama hneng ati, “Thōi inna na-inna se jo roh, nataksen in amandam jo che” ati.
Rengram Ajōng Katlung sik
(Mt 24.23–28,37–41)
20Pharisee ṭhahrep in Jesu hneng Pathen Rengram kha heitik mo ajōng katlung sik anleider. Ama masônna kha, “Pathen Rengram kha hmit a hmutheia ajōng katlung sik changmak. 21Heijâra mo niti’nchu Pathen Rengram kha tûte’n ‘Enruh, hin ka-om, son ka-om,’ ati mak sik kae; ajârchu, Pathen Rengram hi nankâra aka-om kae.”
22Khava sōa ama’n asonlehei hneng ati, “Nangni’n Mihring Sapa kanikhō inkhat kha nanhmu hnōmna pha hong ka-om sik, tâk hmutor mak tin chei. 23Khana mihe’n nanhnenga, ‘Enruh, son ka-om, a-emak leh, enruh, hin ka-om,’ anti sik. Tâk-kha semak ruh, va-en mak ruh. 24Ajârchu khō a’nphe pha marvân rakir inkhat tinga inphut inkhat katlunga avâr in ara-âng mathlung kapōa, Mihring Sapa kani ning khan khanga kati sik a kae. 25Achang ravâng ahma inkeia inrengna katamtak alade nger sik, khana tûnlaia mihe’n antahnōm mak sik kae. 26Noah kanikhō laia kapōa, Mihring Sapa kani kha’m kati sik.#Aph 6.5-8 27Noah rakōnga ahlutmak kârseng mihe’n ansâk, an-ina, nuhmei-pase lu anhonga kae, khana tuishâng ahonglen pha, ankhenga athat jo hei.#Aph 7.6-24 28Khava kapōhrep a Lot kanikhō lai kha’num, anmani’n ansâk an-ina anrachôk a, anjōra, anlinga, innhei ansak a leika-om hei.#Aph 18.20—19.25 29Tâk-kha Lot in Sodom khōa inphut asesōt ning khan hmei leh kât marvâna inphut jōng insun inthla a ankhenga athatsō jo hei. 30Khava kapōa Mihring Sapa ajo’nlâr ning khanga akachang sik kae.
31“Khava ning khan a-inn chunga ka-om mi khan innshunga aneinâk kalo sik a ṭummak rasoh; khava kapōa hleia ka-om mi kha inna he’nle mak rasoh.#Mt 24.17-18; Mk 13.15-16 32Lot nuhmei kha mandonsōt ruh!#Aph 19.26 33Tu enum ahringkhō kahuk sik karei mi khan amanhmang sik, tâk tu enum ahringkhō inhmang mi khan ahuk manhring sik.#Mt 10.39; 16.25; Mk 8.35; Lk 9.24; Jn 12.25 34Ke’n kahri pek chei kae, khava ning jân khan, jekhum inkhat chunga mi 2 kaje sik hei, inkhat inlo sik, inkhat indahlon sik. 35Nuhmei 2 sâng ansuksap sik, inkhat inlo sik, inkhat indahlon sik.” 36Nuhmei 2 hleia ṭōn anleitlo sik: inkhat inlo sik, inkhat indahlon sik.
37Sonle he’n ander, “Rōngpu khonting mo?”
Jesu’n amasôn hei, “Kathi kalōng omna hmun a hmuthong intûp sik hei.”
Currently Selected:
LUKE 17: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
