LUKE 1
1
Ṭonghlamsât
1Lungset Theophilus:
Nikâra akasōk omchen rakip ṭong mazet sik a mi katamtak in antor chen a antlo jo. 2A’nphutbia inphut omchen rakip akahmu leh aṭong kahri inthangle he’n keini antamanthei ung kha anmani’n antamazet kae. 3Khava jâra Eh Theophilus! nang sik a, anphutbia inphut omchen kasōk rakip abân bâna kaṭhatak a ke’n kajongsuia kaheimazet sik che hi kaṭha sik tia kamandon. 4Nang kalei manthei che omchen pui katluk dikna rakip hei kha namanhret theina sik a hi katlo kae.
Tui Inhlutpa John Intet sik A’nhrisōt
5Judea ram a Herod reng changlai hiva omchen kasōk rakip hi ale’nphut kae. Abijah thempu sōa abân bâna thempu kachang arahming Zechariah inti inkhat leika-om. Alômnu rahming, Elizabeth inti; amanu hi’m thempu innshunga mi inkhat kae.#1 Th 24.10 6Anmani 2 Pathen hmit-hmua mikaṭhahei kae, khana Rōngpu ṭongpek leh dân rakip pui katluk a kajuihei kae. 7Elizabeth akaching achang jâra anmani’n nai neimak hei. Khana ansanghrama kater hêr jo hei.
8Zechariah thempu inkhat achang dungjuia, ni khat ama pha chen ning kani leikasōk joa Pathen hmaikunga aṭōn aleitloa kae. 9Ti chu thempuhei ngai dungjuia maichâm chunga marim katui akaro inkhut sik kadeina vâng an-en pha, ama chunga katla a anleikadei jo. Khava jâra Rōngpu Bek-inn shunga ama kahlut a, 10marim kahōi maichâma avarolai, mipuihei kha vânga derna anneia leika-om hei.
11Marim katui ro mankhutna maichâm changting panga khan Rōngpu ngeva inkhat ahnenga jōng inlâra kangira ka-om. 12Zechariah’n ama kha ahmu pha amalung inrima kaṭi jo. 13Tâk-kha ngeva khan ahnenga ati, “Zechariah, ṭimak roh! Naderna kha Pathen in athei pek jo che; nalômnu Elizabeth in sapa inkhat amatet pek sik che. Nang in arahming, John nati sik kae. 14Ama a’ntet pha nang leh milak katamtak ama jâra heituk nanning akaṭha a a’npâk sik jo chei mo! 15Ama kha Rōngpu hmit-hmua akalen inkhat akachang sik kae. Ama’n vomhrui ju leh kahu inhnak inmak ning. Ama anu shunga ajōng intet sōlima inphut Rathla Intheng akasip sik kae.#Mic 6.3 16Ama’n Israel mi katamtak Rōngpu an-Pathen hneng aheiṭhōi male sik hei. 17Sânkathem Elijah kapōa ratha kaneitak leh kangar tak a Rōngpu hma akase sik kae. Ama’n pahei leh sahei aṭhōi manchun nôk sik hei; ṭong inngeimak mihei khan, dikna hlam anmandonna sik aṭhōi male sik hei; khana Rōngpu mihei kha Rōngpu sik a ama’n amantluk sik hei kae.”#Mal 4.5-6
18Zechariah khan ngeva hnenga, “Kei leh kater jo enga, khana kanuhmei um kater joa, achang inchu ke’n heikhong mo kamanhret sik?” ati.
19Ngeva khan amasôn, “Kei Pathen hmaikunga akangir Gabriel eng kae, hiva ṭong kaṭha hi akahri pek sik a ajōngtir eng kae.#Dn 8.16; 9.21 20Tâk hiva kaṭongrôn aphahrep a ajōng katlung sik hi taksen mak che. Nang in khavakha nataksenmak jâra akaṭong theimak sik jo che kae; ka ṭongtep hi kadik a ajōng tlung mak kârseng akaṭongsōt theimak sik jo che kae.”
21Khava pha mipuihei khan Zechariah kha Bek-inn shunga kasôttak a-om jo jâra anmalung kadonga vânga khan anhngâk a leika-om hei. 22Khana ama ahei sōk pha ṭongsōt theimak jo, khana ama’n Bek-inn shunga hmangtalâr inkhat ahmu kachang sik ti hi anmani’n anmanhret jo. Ama aṭongsōt theimak jo jâra akut vâng a’nbekpui jo hei.
23Bek-inn shunga asepa razen kha a’nchai jo pha, Zechariah a-innting inle jo. 24Anuhmei Elizabeth kha pha bongkhat sōa achung hong kahrik jo, khana amanu’n thla 5 vâng sōkloa inna leika-om. 25Elizabeth in ahri, “Tûn hnungreng tōa Rōngpu’n kei a’nthōpui enga, hing’hin sa neiloa mipui kâra kalei inzakna kha alosōt pek jo eng.”
Jesu Intet sik Hrisōtna
26Elizabeth chunghrikna thla 6 sōa Galilee ram a Nazareth inti khōpui inkhat a Pathen in ngeva Gabriel kha ajōng tira kae. 27Reng David sōna pase inkhat arahming Joseph intipa nuhmei sik a ṭong intep nuhngâk intheng hneng ngeva khan ṭong inkhat ajōng rôn pek. Amanu rahming kha Mary inti.#Mt 1.18 28Ngeva khan Mary hneng kajōnga ahri, “Namalung mōng rasoh! Rōngpu’n nang a-ompui che khana mahâmṭhat kalentak a apek che!”
29Ngeva ṭongrôn khan Mary kha amalung inrim hêr jo, khana heitina jo mo tia adet-hla jo. 30Ngeva khan ahnenga ati, “Mary, ṭimak roh! Ajârchu Pathen in amarit che. 31Nang nachung hong kahrik sik chea kha sapa inkhat namatet sik, khana arahming Jesu nati sik kae.#Mt 1.21 32Ama hong kalen sik khana A’nshângpen Pathen Sapa a’nti sik kae. Rōngpu Pathen in ama apusōn David kapōa reng inkhat amanchang sik,#2 Sa 7.12,13; 16; Is 9.7 33khana ahei tik a Jacob sōnhei reng akachang sik kae, arengram kha inhmangtik omak ning.”
34Mary in ngeva hneng, “Kei nuhngâk intheng inkhat eng kae. Heikhong mo kha akachang thei sik?” ati.
35Ngeva khan amasôn, “Rathla Intheng nachunga kajōng sik khana Pathen ratha hratna nachunga jōng inhnga sik a kae. 36Nasōpuinu Elizabeth mandon roh. Amanu sa kaneimak ale’nti kae; tâk tûn ater joa achang inum, nai avona thla 6 katluk jo. 37Ajârchu Pathen tatlohla heite om mak.”#Aph 18.14
38Khana Mary in, “Kei Rōngpu sōknu eng kae, nahri kapōa kachunga chang jo rasoh,” ati. Khana ngeva khan adahlon jo.
Mary in Elizabeth Avaphâk
39Khava sō bât a Mary kha Judea ram a tlâng khōpui inkhat a sik a intluk a inhnottak a kase jo. 40Ama Zechariah inna kasea Elizabeth chibei avatloa kae. 41Chibei atlo kha Elizabeth in athei pha ashunga nai kha inhlinga kae. Elizabeth kha Rathla a akasip achang jâra, 42rasa inhnaktak a ahrisōt, “Nuhmei kâra mahâm kaṭhanu! Nanei sik nai kha amahâm kaṭha! 43Ka-Rōngpu nu’n kei ajōng phâk eng, heisik a mo hiva akalentak omchen hi kei hneng akasōk sik? 44Ajârchu nachibei rasa kathei lim leh, kashunga naite hi inpâk a inthok a kae. 45Nachunga Rōngpu ṭong kha hui katlung sik tia akataksen nang, heituk-hrep a mahâm kaṭha jo che mo!”
Mary Choi ka-ânna Hla
46Mary in ahri;#1 Sa 2.1-10
“Rōngpu kha kamalung in achoi ka-ân,
47kakahuk inhring Pathen jâra karathla inpâk,
48ajârchu ama’n asōk thōi katla pennu amandonsōt enga kae!#1 Sa 1.11
Khan chu tuna inphut mi rakip in mahâm kaṭhanu anti sik jo eng,
49Akahratpen Pathen in ṭōn kalentak atlopek eng jâra.
Ama rahming chu intheng;
50khang inkhat a inphut khang inkhat katlunga,
ama kajana kanei rakip hneng alungsetna amalâra kae.
51Ama’n mi inlensak-hei leh anṭōn mantluk heirakip vor kachekna sik a,
abân ratha kahrat kha ahmanga kae.
52Ama’n reng kalenhei kha anlen in-ongna inphut akei mathlâk hei,#Jb 5.11; 12.19
khana a’nhnemhei kha akadom manshâng heia kae.
53Ama’n von kaṭâm hei kha akaṭha neinâk vâng anvon amankhop pek hei,
khana akahaohei kha kut karōk a atirsōt hei.
54Ama’n nipu nipi sōnhei leh aṭong intepna kha ajui,
khana asōk Israelhei inthōpui sik a kajōng.
55Maritna kha Abraham#Aph 17.7 hnenga leh
asōn rakip hnenga ahei tik a malâr sik kha amandonsōt a kae!”
56Mary kha thla 3 kapō Elizabeth leh ka-omsap a khava sō leh a-innting inle jo.
Tui Inhlutpa John Intet
57Elizabeth nainei sik pha hong katlung jo, amanu’n sapase inkhat amatet jo. 58Akhō-aven leh a-innkō he’n Rōngpu kha heituk-hrep a amanu sik a akaṭha jo mo ti kha antheia, ankhenga amanu leh inpâksap jo hei.
59Naite kha kani vekhat atluk pha avun tan sik a kahong hei, khana anmani’n arahming kha apa rahming anloa Zechariah phō sik a anmandon.#Lev 12.3 60Tâk-kha anu’n, “Changmak, arahming kha John a’nti sik kae,” ati.
61Anmani’n ahnenga, “Tâk-kha khava rahming kha nanphung mi tûte’n leirôn mak chei,” anti. 62Khava pha apa hneng naite kha heirahming mo arôn sik a namadu tia anvader.
63Zechariah khan mazet theina hlungpek inkhat ader hei khana “Ama rahming John kae” tia amazetsōt a kae. Anmani’n heituk a inlak antasak jo mo! 64Khava phatak a khan Zechariah kaṭongsōt thei jo, khana ama’n Pathen amanpâk manphut jo. 65Khō leh ven hei seng kaṭisō jo hei, Judea tlângram senga hiva ṭong hi inthangsō jo. 66Aṭong kathei rakip in, “Hiva naite hi heitâk mo ahong kachang sik?” antia anmandon et a indertō hei. Ajârchu Rōngpu rathla hrâtna khan a’nthōpui kha inchêna anleihmua kae.
Zechariah in Asânsōt
67John pa Zechariah kha Rathla Intheng kasip phet a Pathen ṭong aleihri:
68“Eini’n Israel Pathen Rōngpu kha choi ka-ân rih!
Ama amihei inthōpui sik a kajōnga khana amasō jo hei.
69Ama’n eini torna kanei huksōtpa inkhat apek jo me,
asōk David sōn kae.
70Ama’n hmalaia a’ntheng sânkathemhei hnenga ale’ntep
71khachu eini inrepui heia inphut,
eini kahōt hei ratha hratna inphut ahuk sik me.
72Ama’n nipu-nipa sōnhei hneng maritna amanhmu sik,
khana aṭongtep intheng kha amandonsōt sik aleiti.
73-74Nipa-nipuhei sōn Abraham hneng ṭong hing’hin aleitep,
ani-inrepui heia inphut ahuksōt sik me kha le’ntep
khana ṭitna kasea ama nirazen sik kha ahnōm pek me
75hivahi nihring lai seng
ahmai kunga a’ntheng leh akadik nichangna sik a kae.
76“Kasa, nang, A’nshângpen Pathen sânkathem a’nti sik che kae.#Mal 3.1
Ahlam hro inhlengsōt sik a
Rōngpu hma akase sik che kae,
77amihei kha ansetna inphut rangei mandam heia
huk sik hei kae ti hi navahri pek sik hei kae.
78Ni-Pathen hi lungset kasip leh malung innem kae.
Ama’n eini chunga hukmanhringna khō ajōng manvâr sik
79khana thina daihlim thōia ka-om rakip hei chunga marvâna inphut ajōngsat manvâr sik,#Is 9.2
lung mōngna hlam a nikethon ensuina atlo sik.”
80Naite kha taksa leh rathla hong kakhanga hong kangar jo, ama Israel mipuihei hneng a’nlârmak kârseng nêrdiram thōia leika-oma kae.
Currently Selected:
LUKE 1: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
