ṬŌNTLOHEI 9

Saul Malung Thlengna

(Ṭōn 22.6–16; 26.12–18)

1Khava laitak nôk khan Rōngpu kajuihei kha Saul in that manram sik a rahnak a aleimaṭhit hei. Thempu Kalen hneng kasea 2Rōngpu Chônhlam kajuihei ahmu pou he’nchu, nuhmei-pase ṭhenloa asur heia Jerusalemting aheikei male theina sik, Damascus a intûpna innpuia hnōm pekna lekha amazet pek roh tia avader.

3Saul in Damascus khōpui kha aheiphâk tingvet, manhret manloa thangvâna inphut vâr inkhat in akimve kha aheikakho jo. 4Khava pha raleia katlua, rasa inkhat in, “Saul, Saul! Heisa mo nasuk manrim eng,” tia ahri kha aleithei.

5Ama’n, “Tu che mo, Rōngpu?” tia aleider.

Rasa khan, “Nasuk manrim Jesu eng kha kae, 6tâk thōi roh khana khōpui shunga son se roh, sova hmun a son heimo natlo sik kha anhri pek sik jo che,” tia aleihri pek.

7Saul ta’nṭhōipui mihei kha ṭongtet loa leikangir hei, anmani’n rasa chu anthei, tâk tûte chu leihmu mak hei. 8Saul kha raleia inphut hongkathōia ahmit ahei mahlâng pha, khō heite leihmu mak jo! Khava jâra Damascus shung katlung kha akut a anleikei jo. 9Ni 3 kha khō heite leihmu mak, khana khava pha shung senga khan heite leisâk lei-in mak.

10Damascus a khan arahming, Ananias inti taksenna kanei inkhat leika-om. Ama’n hmangtalâr inkhat aleinei, khava hmangtalâra khan Rōngpu’n, “Ananias!” tia aleibek.

Ama’n, “Hin ka-om eng, Rōngpu,” tia aleimasôn.

11Rōngpu’n ahnenga, “Intluk inna Hlam Intlunting se roh, khana Judah intipa inn naphâk pha leh Tarsus a inphut arahming, Saul intipa kha aka-om mo tia der roh. Ama derna aneia ka-om, 12khana ama’n Ananias inti pase inkhat aheikahlut a khō ahmu thei nôkna sik a achunga akut adapek kha hmangtalâra ahmudek jo,” aleitipek.

13Ananias in amasôn, “Rōngpu, hiva mipa chungchâng leh Jerusalema namipuihei chunga ṭit ka-om tak aṭōnse tlohei chungchânga mi katamtak in anhri pek jo eng. 14Khana Thempu Kalen hnenga inphut, na’nmuk hei surna sik ratha neina ahe’nchoia Damascus a akahong kae.”

15Rōngpu’n ahnenga, “Se roh, ajârchu ama hi Jât-hlop hei leh renghei khana Israel mipui he’n karahming anmanhretna sik, kei inzen sik a kakadeisōt jo kae. 16Khana kei khet in kei sik jâra khōdeng theina athōk sik rakip hei hi kamanhmu sik kae,” aleiti.

17Khava pha Ananias kasea, Saul omna inna khan leikahlut, khana achunga akut aleidapek. “Sōpui Saul, najōngna hlam a nahnenga ajo’nlâr, Jesu ama khet in, Rōngpu khan ajōngtir eng kae. Avea khō nahmu nôkna sik leh Rathla Intheng nasipna sik a ama’n nahnenga ajōngtir eng kae,” atipek. 18Khava phatak a khan Saul hmit a inphut ngahlip kapō heimo khat heikatla a, khō ahmu nôk jo. Jōng kangirsōt a tui hlutna achen jo; 19khana thlai leh tui ahei sâk sō pha aratha hong kangar nôk jo.

Damascus a Saul ṭonghri

Saul kha takkasenhei kâra kanikhō ṭhahrep leika-om. 20Ama intûpna innpuia kasehrek a Jesu hi Pathen sapa kae ti hi aphông manphut jo.

21Aṭong hri kathei rakip in det-hlatak a, “Jerusalema Jesu intipa inmuk hei kathatpa kha ama hi changmak mo? Khang khava mihei kha sura thempu kalenhei hneng ṭhōimale nôk sik hei kae tia ama hiva hmun a akajōng changmak mo?” tia le’nder hei.

22Tâk-kha Saul ṭonghrile kha ratha leikahrat chet jo, khana Jesu hi Messiah kae tia manchênna aleipekna kha amanhnōm heia Damascus a ka-om Jehudi he’n leimasôn tor mak jo hei.

23Kanikhō hingja athlengsōa, Jehudihei intûp heia Saul thatna sik ṭōn mantlukna anleinei jo,#2 Cor 11.32-33 24amirōkchu khava anṭōn mantluk kha mihe’n anleihri pek a kae. Ama thatna sik a sûn leh jân khōpui sōngkot heia anleihlō. 25Tâk-kha jân khat, akahnung kajui he’n Saul kha anṭhōia hraithuk vâng bang kave inkhat a anleimakhei mathlâk jo.

Jerusalema Saul

26Jerusalema Saul kasea sonlehei kâra vatlâk sik a aleirei. Tâk-kha sonle inkhat achang jo kha anleitaksen mak jâra anleiṭit. 27Khava pha a’nthōpui Barnabas kahonga sonlehei hneng aleiṭhōi manhlut jo. Saul in Rōngpu kha hlamlena aleihmu khana Rōngpu’n heimo aleihri pek tihei kha aleimanthei hei. Khana Damascus a Saul in heituk kangamtak a Jesu rahminga mihei mantheina aleinei hei mo ti kha’m aleihri pek hei. 28Khang’khan Saul kha anmani leh ka-oma, Jerusalem pumpuia kaselea, kangamtak a Rōngpu rahminga ṭong aleiphông jo. 29Khana Greek ṭong kajôm Jehudihei kha’m a’nbekpui heia ale’nkhepui hei, tâk anmani’n that sik macheng anleirei. 30Takkasen he’n hivahi anhmusōt pha, Saul kha Caesarea ting anṭhōia Tarsusting anleitirsōt jo.

31Khang’khan Judea, Galilee khana Samaria pumpuia bekrup-hei chunga mōngna leikaleng. Rōngpu kajana’n vai arôn leh inṭhōia Rathla Intheng inthōpuina jâra anratha leikahrat khana anja um leikapung jo.

Lydda leh Joppa a Peter Om

32Hmun rakip a Peter in aleichōn, khana phat inkhat a khan Lydda a ka-om Pathen mihei kaphâk sik a leikase. 33Khava hmun a khan lang kathi kum 8 arakhuma inphut ale’nṭhang tor mak, Aeneas inti mipa inkhat leh le’nhmu hei. 34Peter in ahnenga, “Aeneas, Jesu Christa’n amandam jo che. Thōi inna narakhum inhre jo roh” aleiti. Khava phatak a Aeneas kha kathōi jo. 35Lydda leh Sharona ka-om mi rakip in ama anhmu pha, Rōngpu langa he’nhe jo hei.

36Joppa hmun a khan Tabitha inti, takkasen nuhmei inkhat leika-om. (Greek ṭonga arahming hi Dorcas kae, “Shakhi” tina kae). Amanu’n aphat nei rakip hi ṭōn kaṭha tlona leh sara khōdeng katheihei inthōpuina aleihmang. 37Khava phatak a khan hongkana joa, leikathi jo. Akalōng kha anleirasia inn chungden a anleimanje. 38Joppa kha Lydda a inphut hlarei mak, khana takkasen he’n Peter kha Lydda a ka-om ti ṭong anthei pha, pase 2 ahnenga antir heia, “Lungset a kanhnenga heihongloi roh” anva manti hei. 39Khava jâra Peter kha intluk a anmani leh he’nṭhōi thang jo hei. Aheitlung pha inn chung denting anleiṭhōi, khava hmun a khan, renghmeinu he’n anṭap pum a ama kha anhei ûma Dorcas in ahring laia zakkō leh zakkō kalen aleisyem hei kha anleimalârpek. 40Peter in innden shunga inphut ankhenga aleitirsōt hei, khana amarkhup athlep a derna aleinei; khava sōa akalōng langting khan inheia, “Tabitha, thōi roh!” ati. Ahmit ahei mahlânga, Peter kha ahmu pha, hong in-ong jo. 41Peter in arahlânga akei manngir jo. Khava sōa renghmeihei inveina takkasen rakip abek heia, amanu kha kahringa apek jo hei. 42Hiva ṭong hi Joppa pumpuia inthang joa, mi katamtak in Rōngpu antaksen jo. 43Joppa a shavun inṭhui, Simon intipa inna khan Peter kha kanikhō ṭhahrep leika-om.

Currently Selected:

ṬŌNTLOHEI 9: KOMRBSI

Highlight

Copy