ṬŌNTLOHEI 7

Stephen Ṭonghri

1Thempu Kalen khan Stephen hneng, “Hi akadik mo?” tia aleider.

2Stephen in hing’hin aleimasôn: “Kapa dôrhei leh kasōpuihei, rangei ruh! Nikachoi Abraham kha Harana avaka-om sik a aleise mak hma Mesopotamia hmun a khan ahnenga akalûr Pathen kha le’nlâra,#Aph 12.1 3‘Na-innkōhei leh naram hi dahlon ina ke’n kamanhmu sik che ram kajōna se roh,’ aleitipek. 4Khava jâra a-omna ram kha adahlona Harana avaka-om sik a leikase. Apa athisō kahnunga Pathen in Abraham kha tuna nan-omna ram a hin aleithon hei.#Aph 11.31; Aph 12.4 5Tâk-kha khava laitak khan chu ram ahar kahlekbek um Pathen in Abraham kha leipek mak, achang ravâng ama leh asōnhei sik a ram kapek sik hei tia Pathen kha le’ntep. Khanga Pathen in intepna aleineilai khan Abraham in sa inkhatbek leinei mak.#Aph 12.7; 13.15; 15.18; 17.8 6Ahnenga Pathen taleihri kha hivahi kae: ‘Nasōnhei kha miram a vaka-om sik hei, khava hmun a khan sōk kachang sik heia kha, kum 400 êngset a antatlo sik hei kae.#Aph 15.13,14 7Tâk-kha khava antarazen mihei chunga ṭong tanna ke’n kanei sik, khana khava ram a inphut heikasōk sik heia kha hiva hmun a hin antakamuk sik eng kae.’#Sōk 3.12 8Khava sōa khava aṭongkam mêrchîkna sik a Pathen in Abraham kha vuntan rōi aleimantlo. Khang’khan Abraham khan Isaac a’ntetsō, kani vekhat atluk a avun aleitanpek; Isaac inum asapa Jacob aleitlo pek nôk, khana Jacob inum mi inthang nikachoi, asa pase 12 hei kha anvun aleitanpek hei.#Aph 17.10-14; Aph 21.2-4; Aph 25.26; Aph 29.31—35.18

9“Jacob sahei khan ansōpuipa, Joseph chunga thangsetna anhongneia Egypt ram a sōk kachang sik a anleijōr. Tâk-kha Pathen in aleiompui#Aph 37.11; Aph 37.28; Aph 39.2,21 10khana akhōdeng theina rakip a inphut kadam senga aleiṭhōisōt. Egypt rengpa hnenga Joseph a’nlâr pha malung tlaina nunchen leh singna kha Pathen in aleipek a, rengpa khan Joseph kha areng innshung leh arengrama sik vai karôna aleimanṭang.#Aph 41.39-41 11Khava sōa Egypt leh Canaan ram a ṭâmpui aleitlâk jâra châmna inhnaktak leikasōk. Khava laia nipi leh nipuhei khan sâk sik leihmu tor mak hei.#Aph 42.1,2 12Egypt ram a chu sâk sik sâng ka-om ti ṭong Jacob in athei pha nikachoi asahei kha aleitir hei, khavakha khava hmun a sik a ahma inkeipen anvasena kae. 13Vōi 2 tlukna anvasea khan chu Joseph kha asōpuihei hneng le’nphông jo, khana Egypt rengpa’num Joseph innshung chungchânga aleimanhret jo.#Aph 45.1; Aph 45.16 14Khava jâra Joseph in apa Jacob hneng an-innshung pumpui, 75 hei Egypt a anhongna sik ṭong aleimanrôn.#Aph 45.9,10,17,18; Aph 46.27 15Khava pha Jacob kha Egypt a leikase, khava hmun khan ama leh asahei leikathi jo hei.#Aph 46.1-7; Aph 49.33 16Ankalōng hei kha anrôn heia Hamor phung heia inphut Abraham in sêr vânga aleirachôksa, Shechem inti hmun a anleivûm hei.#Aph 23.3-16; 33.19; 50.7-13; Jos 24.32

17“Pathen in Abraham hnenga aṭong le’ntepna amathlungna sik phat ajōng hnai jo pha Egypt a ka-om nimipuihei aleimanpung hêr jo hei.#Sōk 1.7,8 18A’nchaina ting jo khan chu Joseph chungchânga a’nhret mak, reng inkhat in Egypt a reng ajōng rôn manphut jo. 19Nikachoi hei kha akanimak a aleihōn heia anchunga a-êng leikase, khana ansa naidônghei kha anthina sik a an-innheia inphut rumhrat a amanhlonsōt hei.#Sōk 1.10,11; Sōk 1.22 20Hiva pha shunga hin marit ka-om tak naidông inkhat, Moses kha lei-injōra kae. Khang’khan thla 3 katlung chu inna anleivei.#Sōk 2.2 21Khana inna inphut anthaksōt a khan rengpa sanu’n a’nhrut a, asapa khet kapōa ale’nvei.#Sōk 2.3-10 22Egypt a themna-singna rakip aleimanchua, ṭōntlo leh ṭonghri, hlasak langa rahming inthang, mikalen hongkachang jo.

23“Moses kha kum 40 ahongtluk jo pha, ami Israel changpui hei kha heikhonga antarazen hei mo ti manhret hnōmna ajōngnei jo.#Sōk 2.11-15 24Egypt mi inkhat in anmi inkhat kha êng kasetak a aleitloset kha avasena ahmu pha, Egypt mipa chunga hnuknat a phu aleihlōa aleithat jo. ( 25An-insō sik a Pathen in ama hi ahmang sik kha ami he’n manhret hei rasoh tia ama’n chu aleimandon, tâk ami he’nchu manhret pek mak hei.) 26Ajîng kania Israel mi 2 ale’nse hei ahmu nôk a mancham sik a aleirei hei. ‘Mihei rangei ruh, Israel sōpui rekhat kachang cheia, heisik a mo hinghina a’nse chei?’ aleiti hei. 27Tâk-kha hnōise-êsetak a akatloset inkhatpa khan Moses kha ahei namsōt a, ‘Nang hi tu’n mo kanchunga ṭongkatan leh vai karôn sik a amatung che?’ tia aleirakôk. 28‘Egypt mipa jâninga nathat kapōa, ke’m eithat rong mo nati?’ aleiti. 29Hivahi Moses’n athei pha, Egypt ram a inphut katlâna Midian ram a vaka-om jo. Khava hmun a khan sapa 2 aleinei hei.#Sōk 18.3,4

30“Kum 40 athlengsō kahnunga Sinai Tlâng hnenga nêrdiram a thing bur chunga hmeimalea Pathen ngeva inkhat Moses hneng le’nlâr.#Sōk 3.1-10 31Khava ahmu kha Moses’n inlak aleisak hêra, a’nchêndetna sik a thing bur kha avahnai. Khana Rōngpu kare kha hing’hin aleithei: 32‘Kei hi Abraham, Isaac khana Jacob Pathen leh nanpi nanpuhei Pathen eng kae.’ Khavakha athei pha aṭit reia Moses kha innok jo khana en sik lei-en ngammak jo. 33Khava pha Rōngpu’n ‘Nakekōk kha sōt roh, ajârchu nangirna hmun hi hmun intheng kae! 34Egypt ram a kamipuihei enhla ka-om tak a ankhōdengthei hi kahmu jo. An-inkōi rasa kathei jo, khava jâra an-insō sik a aheikaṭum jo eng kae. Tûn nang hong roh; Egypt a katir sik che kae,’ aleitipek.

35“Moses hi Israel mipuihei talei rahlâng mak inkhat kae. ‘Kanchunga vaikarôn leh ṭong katan sik a nang hi tu’n mo amanṭang che?’ tia anlei rakôk. Ama khet kha thing bur chunga hmeimalea ajōng inlâr, ngeva inthōpuina jâra mipuihei chunga vai karôn sik leh an-insōsōt sik a Pathen in ajōng tirpa kha kae.#Sōk 2.14 36Mipuihei Egypt ram a inphut aleiṭhōisōt hei, Egypt ram shunga leh Tuipui Kasen chunga khana nêrdiram a kum 40 shunga det-hla leh ṭōn-inlak hingja aleitlo.#Sōk 7.3; Sōk 14.21; Mj 14.33 37Israel mipuihei hnenga, ‘Pathen in kei ajōngtir eng kapōa, nanmikhet shunga inphut Sânkathem inkhat ajōngtir pek sik chei,’ aleikatipa kha Moses hi kae.#Dân 18.15,18 38Nêrdiram a Israel mipuihei inkhômna kâra ale’nveipa kha ama hi kae; ama hi nipi leh nipuhei leh aleika-omsap khana Sinai Tlâng chunga ngeva’n ṭong aleihri pekpa leh eini hnenga pek manjôn sik a akahring ṭhak Pathen ṭong alei inhlângpa kha kae.#Sōk 19.1—20.17; Dân 5.1-33

39“Tâk-kha nipi leh nipuhei khan aṭong jui sik leikada hei; ama anlei hnengsōt khana khava kanek a Egypt a inle nôk sik macheng anleimadu. 40Khava jâra Aaron hneng, ‘Ani kaṭhōi sik Pathen ṭhahrep asyempek roh. Egypt a inphut anijōng kathōisōtpa Moses chunga hei kachang manhret mak jo me anti.’#Sōk 32.1 41Khava sōa Sehratche lim inkhat ansyema, khava kamukna sik inthoina anleitōk, khana khava anbinga anta’nsyem lim kajana revei anleitloa kae.#Sōk 32.2-6 42Khava jâra Pathen kha anhnenga inphut inhesōt jo, sânkathem lekharabu hinga ale’nzet kapōa marvân ârsihei kha antakamuk sik a aleipek sōt jo hei:#Am 5.25-27

‘Israel mipuihei! Nêrdiram a kum 40 ran nantathat a inthoina nantatōk kha

kei hnenga nantatlo changmak.

43Nanta’nrôn kha Molech pathen pōn-inn kae,

khana nan-ârsi Pathen Rephan ralim kha kae;

kamuk sik a nantasyem limhei kha kae.

Khava jâra nangni hi Babylon kakhea miram a katir sik chei kae.’

44“Nipusōnhei khan nêrdiram a Pathen omna rabuk kha anleiompui. Khavakha Moses hnenga Pathen taleihri pek dungjuia, alim kha Moses hneng aleimanhmu kapōa ale’nsyem kae.#Sōk 25.9,40 45Hnunga khan, anpahei hnenga inphut anta leirahlâng rabuk kha nipi leh nipu he’n Joshua leh inṭhōia hmating annama Pathen in ahnong sōt jât-hei ram anlo pha khavakha anlei inrôn ṭhak a kae. Khana David khang katlunga khava hmun a khan leika-om heia kae.#Jos 3.14-17 46Ama Pathen malung leikatluk khana Pathen hneng Jacob Pathen omna hmun syemna sik hnōm pekna aleider.#2 Sa 7.1-16; 1 Th 17.1-14 47Tâk-kha Pathen inn alei kasaksōtpa khachu Solomon kae.#1 Rn 6.1-38; 2 Th 3.1-17

48“Amirōkchu Chunghnung Pathen hichu mihring tasak inna hin om mak tia Sânkathem in hing’hin aleihri:

49Rōngpu’n ati, ‘Marvân kalen in-ongna,#Is 66.1,2

ralei kake chōnna.

Khong khava inn mo kei sik a nantasak pek sik eng?

Ka-omna sik hmun kha khon mo?

50Hihei rakip hi kei tasyem changmak hei mo?’

51“Heituk a rahe kase jo chei mo!” Stephen in abân ahri manjōm nôk. “Nanmalung hi heituk a a’nthengmak mo, nankōr hi Pathen ṭong rangeina sik a heituk-hrep akaset jo mo! Nangni nanpi leh nanpuhei kapō chei kae: Rathla Intheng hi nangni’n nanlating ṭhak a kae!#Is 63.10 52Sânkathem inkhatbek nanpi leh nanpuhei tasuk manrim mak aleika-om hei mo? Amak hma pek a Asōk kadik ajōng sik aleikaphông, Pathen ṭongkarônhei kha anleithat hei. Khana tûn nangni’n ama khet kha nanpek sōt a nanleithat a kae. 53Ngeva inphut ahe’npek, Pathen dân inhlâng kha nangni chei kae, achang ravâng jui chu juimak chei!”

Stephen Antadeng hlon

54Intûpna inna a’ntûp mihei khan Stephen ṭonghri kha anrangeia anhnuk kanahêr joa anha ankarôt jo. 55Tâk-kha Stephen kha Rathla Intheng kasip phet a, marvânting a-enna, Pathen lûrna leh Jesu kha Pathen changting angir kha ahmua kae. 56Ama’n, “Enruh! Ke’n marvân kot a’nhlânga, Mihring sapa kha Pathen changtinga angir kahmu!” aleiti.

57Intûpna mihei khan ông pum a ankut vâng ankōr ansinga khang’khan ama langa vōi khat nam a annam jo. 58Khōpui vângting annamsōt a, hlung vâng andeng jo. Akadeng he’n anpōnhei kha rether inkhat, arahming Saul intipa hneng, alei-enpek sik heia anleidahlon. 59Khanga andenglai Stephen khan Rōngpu hneng, “O Rōngpu Jesu, karathla arahlâng pek roh!” tia leika-ông. 60Amarkhup athlep a rasa inhnaktak a ka-ônga, “O Rōngpu! hiva setna hi anchunga mathlung pek mak hei roh!” atia leikathi jo.

Currently Selected:

ṬŌNTLOHEI 7: KOMRBSI

Highlight

Copy