ṬŌNTLOHEI 2

Rathla Intheng Ajōng

1Pentecost kani ajōng tluk jo pha, akataksenhei seng hmun khat a le’ntûp hei.#Lev 23.15-21; Dân 16.9-11 2Manhret manloa marvâna inphut thli kahrâng inhnaktak rasa kapō’n an-omna innshung kha jōng kasip phet jo. 3Khava sōa, anmani’n hmeimale kapōa a’nsemṭhen heikhat in anchung et a aleisit hei kha anleihmu. 4Anmani Rathla Intheng kasip phet jo hei, khana Rathla khan ṭong theina apek hei jâra, ṭong hlop-hlop a kaṭong inphut jo hei.

5Jerusalema vânhnōi hmun hlop-hlop a inphut akajōng taksenna kanei Jehudi leika-om hei. 6Anmani’n khava rasa kha anthei pha mipui hong intûp jo hei. Khana mi rakip in khava akataksenhei ṭonghri kha ama ama ṭong et a anthei jâra inlak anleisak hêr jo. 7Mandonhla leh inlaktak a anmani’n, “Hinga akaṭonghei hi Galilee mihei changmak hei mo! 8A-enchu heikhong dân mo ni-omna ramṭong et a nithei jo? 9Eini seng me hi leh kha Parthia, Media khana Elam; Mesopotamia, Judea, khana Kappadokia; Pontus leh Asia inphut, 10Phrygia leh Pamphylia, khana Egypt leh Cyrene hnenga Libya ramtlâk a mi me kae. Ṭhahrep in Rome a inphut, 11Jehudi leh Jât-hlop Jehudi Beklang tinga ahong kahlut ther me kha kae; ṭhahrep nôk in Crete leh Arabia inphut me kae, kha’num Pathen ṭōn kalen tlo antahrisōt hichu nibing ṭong et a nithei phâk a kae!” anti. 12Mandonhla leh malung inhmak pum a, “Hivahi-e heitina jo mo?” tia khat leh khat le’nder hei.

13Tâk-kha her khat inchu takkasenhei kha, “Hiva mihei hi ju inrui jo hei” tia anleimanuisō hei!

Peter Ṭonghri

14Khava pha Sonle 11 hei leh inṭhōia Peter kangirsōt a rasa inhnaktak a mipuihei hneng hing’hin ṭong aleihri: “Ka-Jehudi changpui hei leh Jerusalema ka-om hei, hivahi heitina mo hripek chei rong rangei ruh. 15Tûn hi jîngkâr pungkō hrep lakae; nangni tamandon kapōa, hiva mihei hi ju inrui changmak hei. 16Tâk-kha hivahi sânkathem Joel taleihrisōt kha kae:

17‘Kani hnung intonga katlo sik kha hivahi kae, Pathen in ati:#Jl 2.28-32

Mi rakip chunga Karathla kajōng bun mathlâk sik.

Nansanu leh nansapa he’n kaṭong anphông sik;

Nankhangdông he’n hmangtalâr anhmu sik,

khana nan-upahe’n rahmanghei annei sik.

18Kadik, kasōknu, kasōkpa hei chung katlunga

khava kanikhō hei khan chu, Karathla kajōng bun mathlâk sik,

khana kaṭong hi anphôngsōt sik.

19Marvân chunga ṭōn-inlak katlosōt sik

khana raleichunga’m a’nlak heikatlosōt sik.

Thisen, hmei, khana hmeikhu kadup kasōk sik;

20Rōngpu kani kalûr leh kalenpen ajōng tlung mak hma

kani inthim sik,

khana thla’m thisen kapōa kasen sik.

21Khava pha leh tûtû achang inum inṭangpui sik a Rōngpu rahming kabek rakip hukmanhring kachang sik.’

22“Ka-Israel changpui hei, hiva ṭong hi rangei ruh! Pathen in ama a inphut nankâra a’nlak ka-om leh ṭōn-inlak aleitlo rakip khana inphut Nazareth Jesu kha ratha neina inpek ti kha inchên jo. Hivahi nantak khet a nanmanhret, ajârchu hinahin nankâra akasōk kae. 23Aṭōn mantluk dungjuia Pathen in Jesu kha nankut chunga pek sōt sik a ṭong mathlâkna aleinei; khana makhei hlon sik a set kaneihei kut a nanphesōt a nanleithat jo.#Mt 27.35; Mk 15.24; Lk 23.33; Jn 19.18 24Tâk-kha Pathen in ama kha thina inphut akei mathōi jo, khava ratha neina inphut a amasō jo; ajârchu ama kha thina khan akhum tor sik leichang mak.#Mt 28.5,6; Mk 16.6; Lk 24.5 25Ajârchu ama chungchânga David in hing’hin aleihri:#Hl 16.8-11

‘Pha rakip a Rōngpu hi kahmai kunga kahmu ṭhak;

Ama kahnenga ka-om, khana kei bōina neimak ning.

26Khava jâra inpâkna kasip eng,

khana kaṭongsō rakip inpâkna kasip.

Khana kei hi, akathithei kachang inum

châmhngatna kachen sik hi inhōrna vâng kamanchên,

27ajârchu nang in thina raleichunga hin adahlon mak tin che;

Nahlamrin nasōk hi thlân shunga aṭop inhmang sik phemak tin che.

28Hringna hlam namanthei jo eng,

khana na-omna khan inpâkna amansipphet sik eng.’

29“Kasōpui Israelhei, nikachoi rahming inthang Reng David chungchâng hi inlârtak a kahri pek nger sik chei kae. Ama kha kathia anleivûm jo, khana athlân hi tuning katlung nikâra laka-om. 30Ama kha sânkathem kae, khana Pathen in heiṭong mo atep pek ti kha amanhret: David sōna inphut mi inkhat, David kapōa reng manchang sik a Pathen in ṭong intepna aleinei.#Hl 132.11; 2 Sa 7.12,13 31Pathen in heimo ajōng tlo sik kha David in aleihmu, khava jâra thia inphut Messiah athōisōt sik chungchânga hing’hin aleihri,

‘Ama kha thina raleichunga leidahlon mak;

ataksa kha’m thlâna leiṭop inhmang mak.’

32Hiva Jesu khet hi Pathen in thina inphut amathōi jo, khana hiva omchen kasōk khet sâkhi hi keini kankhenga ung kae. 33Ama hi Apa, Pathen kut changting matungsōt a ka-om jo, aṭong leitepna dungjuia ahnenga inphut Rathla Intheng achen jo. Tûntûna nantahmu leh nantathei rakip hi kanchunga aheibun mathlâk kutchoi kha kae. 34Marvâna aleikake khachu David changmak, ama khet in hing’hin aleihri,#Hl 110.1

‘Rōngpu khan ka-Rōngpu hneng:

Na’nrepuihei kha

35nake chōnpha a kada mak lai seng, kachangting in-ong roh.’

36“Khava jâra Israel mipui rakip in, inchêntak a nantamanhret sik hichu, nantalei makhei hlon hiva Jesu hi Pathen in Rōngpu leh Messiah amanchangpa kha kae!”

37Mipuihei khan hivahi anthei pha, anmalung leikadong hêr jo, khana Peter leh sonle lak-hei hneng, “Heimo kantatlo sik, sōpuihei?” anleiti!

38Khava pha Peter in hing’hin aleihri pek hei: “Nansetna rakip a inphut rangei mandam nanchena, Pathen kutchoi pek Rathla Intheng nanchenna sik; nansetna heia inphut nanbing et a he’nhesōt ruh, khana Jesu Christa rahminga tui kahlut chang ruh. 39Ajârchu hivahi Rōngpu ni-Pathen in ama sik a abeksōt nangni leh nansahei khana hmun kahlatak a alaka-om hei hnenga Pathen ṭong intepna kha kae.”

40Anhnenga ngekna leh inṭhōia Peter in ṭong katamtak vâng hing’hin aleimathok hei, “Hiva mikaṭhamak-hei chunga akatlung sik karâkna inphut nanbinga inhuksōt ruh!” 41Mi katamtak in aṭong hri kha antaksena tuihlut anchen jo; khava ning khan anrup shunga mija 3,000 kapō besa leikachang heia kae. 42Khang’khan sonle heia inphut them inchuna, inloikhômna khana thlaithleng o-sōmna leh derna neisōmna anpha anleihmang joa kae.

Akataksenhei Kâra Hringkhō

43Sonle heia inphut ṭōn-inlak leh mandon hlana hingja le’ntloa mi rakip, kajana leh ṭitna leikasip hei. 44Khana takkasen rakip kha malung khat a le’nloikhôm injôn hei khana antanei rakip kha’m khat leh khat le’nsem sōm hei.#Ṭōn 4.32-35 45Annei leh ankarōihei kha anjōra, ansêr rakip kha ankhôkna dungjuia le’nsem hei. 46Ani tina arup-rup a Bek-inna le’nhmu hei, khana katlai leh insinsak tak a an-innheia thlai anleisâksap, 47Pathen manpâkna leh inṭhōia mi rakip hri manṭhatna kha anleichen. Khang’khan hukmanhringna kachen jo hei rup kha ani tina Rōngpu’n abesapek ṭhak heia kae.

Currently Selected:

ṬŌNTLOHEI 2: KOMRBSI

Highlight

Copy