ṬŌNTLOHEI 19

Ephesus khōa Paul

1Apollos kha Corinth a aleiom shunga, khava ramṭhen lailunga Paul in aheipetana Ephesus leikatlunga kae. Khava hmun a khan sonle ṭhahrep ale’ntōpui heia ader hei, 2“Nangni’n tak nansen pha Rathla Intheng nanlei chen mo?”

Anmani’n anmasôn, “Rathla Intheng ka-om ti kapha’m leithei phungmak ung.”

3“Achang inchu heikhong khova tui hlutna mo nantachen?” tia Paul in aleider hei.

Anmani’n anmasôn, “John tatlo tui hlutna kha kae.”

4Paul in ati, “John tui hlutna khachu ansetnaheia inphut ahe’nhesōt mihei sik kae; khana ama kahnunga akahong sik inkhat ti chu Jesu kha antaksenna sik a Israel mipuihei aleihri pek hei.”#Mt 3.11; Mk 1.4,7,8; Lk 3.4,16; Jn 1.26,27

5Anmani’n hiva ṭong hi anthei pha Rōngpu Jesu rahminga tui hlutna antlo jo. 6Anchunga Paul in akut aleida pek hei, khana Rathla Intheng kha anchunga kajōng jo; anmani ṭonghlop kaṭong jo hei khana Pathen ṭong um anphôngsōt jo. 7Anmani kha ankhenga mihring 12 kapō hei kae.

8Paul kha intûpna inna leikahlut a thla 3 shunga kangamtak a mipuihei hneng ṭong aleihri, houlim atlopui hei khana Pathen Rengram chungchânga anhnōm theina sik tak aleitloa kae. 9Tâk-kha ankâra ṭhahrep hei khachu anrahe kase khana leitaksen mak hei, khana rup pumpui ângkunga Rōngpu hlam chungchânga ṭhatmak ṭong anleihri. Khava jâra Paul in takkasenhei kha anṭhōi heia aleidahlon jo hei, khang’khan ani tina 11 a.m. a inphut 4 p.m. katlung Tyrannus inti ṭonghrina innden a houlim aleitlopui hei. 10Khava Asia ramṭhen shunga ka-om mi rakip, Jehudi leh Jât-hlop in Rōngpu ṭong antheisōna sik a kum 2 katlung khang’khan atlo manjôna kae.

Sceva Sapahei

11Pathen in Paul kha ahmanga akasōk phungmak ṭōn inlak-hei aleitlo. 12Ama tahmang pōn leh kut-hnipōn hei kapha akadam mak hei hneng anchoia annat ahnong sōt pek hei, khana anshunga inphut ṭai he’m leikasesōt hei. 13Ṭai kahnong sōt a kalônle Jehudi ṭhahrep inum Rōngpu Jesu rahming hi hmang sik a anleirei. Ṭai hnenga khan, “Paul taphôngsōt, Jesu rahminga ṭong kahei pek che kae,” anleiti. 14Sceva inti Jehudihei Thempu Kalen sapa, unai 7 hei khan hivahi anleitloa kae.

15Tâk-kha ṭaihei khan anhnenga, “Jesu’um kanmanhret, khana Paul um kanmanhret; tâk nangni chu, tu chei mo?” aleiti hei.

16Ṭai karônpa khan rahnaktak a a’nrepui heia atorpet jo hei. Anpōn ander inhler leh insuk inkhok heia an-ina inphut katlânsōt jo hei. 17Hivahi Ephesus ka-om Jehudi leh Jât-hlop rakip in anthei pha kaṭi jo hei, khana Rōngpu Jesu rahming hi kalen chet a kajana anpek jo. 18Takkasen katamtak kahong heia, inphôngtak a anṭōn leitlo hei anphôngsōt joa kae. 19Dôi kachoi katamtak in andôi rabuhei kha anheichoia mipui kâra anleiro jo. Khava andôi rabu man hei kha anmanchuna dangka 50,000 katluk a kae. 20Khana Rōngpu ṭong kha ratha kaneitak a inzersōt a kakhang jo.

Ephesus a Bōina

21Ṭōn hiseng asōksō pha Paul in Macedonia leh Achaia apetana Jerusalemting se sik a aleimandon jo. “Sova hmun a kase sō leh Rome um kavaphâk nger sik kae” tia aleihri. 22Khava jâra ama Asia ramṭhen shunga pha bongkhat a-om shunga ama inthōpui 2, Timothy leh Erastus hei kha Macedonia ting aleitir hei.

23Hiva laitak hin Rōngpu ṭōnhlam chungchânga Ephesus shunga bōina inhnaktak kasōk jo. 24Demetrius inti Artemis pathennu bek-inn sik a dangka vânga lim kakheng thei mi inkhat leika-om, khana khava a’nveina khan aṭōn katlohei rahnak a hnemna aleipek heia kae. 25Aṭōn katlohei leh alak-hei anmani tatlo leh in-anga ṭōnkatlo rakip abek mantûp heia ati, “Mihringhei, ninei nihaona rakip hi hiva ṭōna inphut aheikakōn kae ti hi nanmanhret. 26Tûnchu, hiva Paul intipa’n heimo atlo ti hi nantak khet in nanhmua nanthei jo. Mihring kut a a’nsyem pathenhei hi Pathen chang hêrmak atina hi Ephesus rōk changloa Asia ramṭhen pumpui katlungleoa mihring katamtak amanhnōm jo hei. 27Khana khan ṭit ka-om khachu ni-inveina hi rahming hong kaset sik jo. Hirōk changloa Asia leh vânhnōia mi rakip in antakamuk, pathennu Akalen Artemis bek-inn hi heite changmak jo ning, khana alenna rakip hi insuk inhmang sik jo!”

28Hiva ṭonghei hi mipui he’n anthei pha anhnuk leikana jo khana ông anleiphut a, “Ephesus a Arte-mis kalena kae!” anti. 29Mipui inhnur kha khōpui katlung sō jo. Mipuihei khan Paul leh khōhmea ahe’nṭhōisap Macedonia mi 2, Gaius leh Aristarchus hei kha ansur heia, rehōi tetlânga ankei jo hei. 30Paul inchu mipuihei hmaikunga vase sik aleimadu, tâk takkasen he’n leimanse mak jo hei. 31Khava ram a vaikarôn kâra aṭhōn ṭhahrep inum khava rehōi tetlânga ava’nlâr makna sik a ngekna ṭong anhei manrôna kae. 32Khanga achanglai khan a’ntûp mihei kha nurnur anleiti jo: mipui ṭhahrep in inkhat jâra ka-ông hei, alak he’n hei-inkhat nôk jâra ka-ông hei, ajârchu akatam lang in heisik pena mo khang’khan an-intûpnapen ajâr kha leimanhret mak hei. 33Jehudi he’n Alexander kha hmating anhei manhong jâra, mipui ṭhahrep in bōina insōkpa kae tia mo anleipek. Khava pha mipuihei kha sip antina sik a Alexander in akut ajâp a, a’nhrungna ṭonghri sik a le’ntluk. 34Tâk-kha Jehudi achang kha anhei manhret sōt pha, karesō inkhat rōk a; “Ephesus a Artemis kalena kae!” tia pung 2 katluk set leika-ông heia kae.

35Achaina chu khōpuia lekha inzetpa khan mipui rasa kha amandaitor jo. Ama’n ati, “Eh Ephesus ṭhōn leh re hei! Ephesus mi eini hi akalen Artemis bek-inn leh marvâna inphut hlung intheng ajōngkatla akahrung nichang hi mi rakip in antamanhret pet kae. 36Hivahei hi tûte’n emak titheimak hei ning. Khava jâra nanmalung mandai ruh, khana ṭōnse heite tlomak ruh. 37Bek-inn um akachom mak hei khana ni-pathen nu chunga’m akase heite akahrimak hei anchang inum, nangni’n hiva mihei hi hiva hmun a nanheiṭhōi hei. 38Demetrius leh aṭōn tlopui he’n tu mo inkhat chunga themmô anpek inchu, ṭongkatan ninei hei khana ani tina ṭong tanna inhlâng ṭhak, khava hmun a khan maherthei kae. 39Tâk-kha khava kanek a madusachet nannei tâk leh, ngai dungjuia ram a mihei intûpna shunga aṭong hi a’ntan sik kae. 40Ajârchu tuninga ṭōn asōksō kahnunga hinchu, inchokna insō hei kae tia nichunga themmô antapek sik me ṭit ka-om tak inkhat laka-om. Hiva inhângna chungchânga hin rangei mandam om mak ning khana eini’n ajâr kadik inkhat pek tor mak min.” 41Hivahi aleihrisō pha, intûpna kha aleimanṭhen jo hei.

Currently Selected:

ṬŌNTLOHEI 19: KOMRBSI

Highlight

Copy