ṬŌNTLOHEI 16

Timothy in Paul leh Silas A’nṭhōipui hei

1Paul kha abân bâna kasea Derbe leh Lystra katlung jo, khava hmun a khan Timothy inti Christian inkhat leika-om. Anu kha’m Jehudi Christian inkhat kae, tâk apa khachu Greek mi kae. 2Lystra leh Iconiuma ka-om takkasen rakip in Timothy kha anleihri manṭhat. 3Paul in Timothy kha a’nthōipui hnōm jâra avun aleitanpek. Aleitlo pekna ajârchu khava hmun a ka-om rakip in Timothy apa kha Greek mi achang anleimanhret pet a kae. 4Khōpuihei khanga anleihrona Jerusalema ka-om Sonle leh upahe’n an-inhnōmna jo chôndânhei kha takkasenhei hneng anpek heia, khana chôndânhei kha anjuina sik a anleihri pek hei. 5Khang’khan Bekrup-hei kha taksenna langting kangar chet-chet heia anmija um ani tina inbesa chet-chet jo hei.

Troas a Paul Hmangtalâr Hmu

6Asia ram rajeia ṭong anphôngna sik a Rathla Intheng in aphemak jâr heia Phrigia leh Galatia ramṭhen anhroa leikase jo hei. 7Anmani Mysia ramri anphak pha, Bithynia ramṭhen shunga hlut sik anleirei, tâk Jesu Rathla khan hnōmpek mak jo hei. 8Khava pha Mysia kha anpetana Troas ting leikase hei. 9Khava ning jân khan Paul in Macedonia mi inkhat kangira, “Macedonia ting hong inna ahong inthōpui roh!” tia ngekna aleinei kha hmangtalâra aleihmua kae. 10Khava hmangtalâr kha Paul in aneisō sōa, Macedonia kajōna akase sik a intluk jo ung, ajârchu khava hmun a ka-om mihei hnenga Ṭong kaṭha kaphông sik a Pathen in abek ung kae ti kha leikahnōm unga kae.

Philippia Lidya Malung thleng

11Samothrace kajōn sik a Troas a inphut intlunhrek a rakōnga le’ntôrsōt ung, khana ajîng kania Neapolis kanleijōn nôk. 12Khana inphut Macedonia ram a hmakakei ramṭhen khōpui Philippia shunga leikahlut ung; khavakha Romanhei anramhōm inkhat um leikachang. Khava hmun a khan kanikhō ṭhahrep leika-om ung. 13Derna sik a Jehudihei inkhômna derna hmun leika-om nger sik ti mandon jâra Châmhngat kani ning khōpui vâng intong tuidung panga leikase ung. In-ong unga khava hmun a a’ntûp nuhmeihei kha leh le’nbek ung. 14Khava kanṭong hri kathei kâra inkhat kha Thyatira a inphut vapuirei pōna inveina katlo Lidya kae. Amanu kha Pathen inmuk nuhmei inkhat kae, khana Paul ṭonghri kha kaṭhatak a arangeina sik a Rōngpu’n amalung aleimahlang pek a kae. 15Ama leh a-innshung mi rakip tuihlut anchensōa ama’n, “Kei hi Rōngpu kataksen kadiktak inkhat jo kae tia nanlo eng inchu ka-inna hong una hong om ruh,” tia aleibek ung. Khana akase sik a ajôr manhnōm jo ung.

Philippia Kurkhum Shunga

16Ni khat derna hmun kajōna kansena, rathla-ravai tathlop, hnungṭong kaphôngsōt tor sōk nuhmei inkhat leh le’ntō ung. Amanu khan rathla sânsōt theina vâng akapuhei sik sêr hingjaja ahlōsōt pek ri hei. 17Amanu khan Paul leh keini kahnung ajuia, “Hiva mihei hi A’nshângpen Pathen sōk-hei kae! Anmani’n heikhong mo huksōt akachang sik chei tia antaphông kae!” tia ka-ông. 18Kanikhō katamtak khang’khan aleitlo, Paul in ahōtrak joa, inhea khava rathla-ravai hnenga, “Jesu Christa rahminga ṭong kapek che kae, amanua inphut sōksōt roh!” ati. Khava phatak a khan amanua inphut rathla-ravai kha leikasōk jo. 19Akapuhei khan ansêr hmutheina kha kabâng jo ti kha anmanhret pha, Paul leh Silas kha ansur heia tlângpui intûpna hmun a vaikarônhei hneng ankei jo hei. 20Rome vaikarônhei ângkunga anṭhōi heia, “Hiva Jehudihei hin kankhōpui shunga bōina anmasō jo. 21Keini dân leh a’ntōkmak dân, mi anmanthei hei; keini chu Rome mi ung kae, keini’n hiva chôndân leh tlongai hei hi hnōm tor mak ung,” anti. 22Khana mipuihei kha’num Paul leh Silas dōina kâra he’nveisa jo hei.

Khan chu ṭōnkarônhei khan Paul leh Silas pōn leh derhei kha ankeihler pek heia khana vōkna sik a ṭong anpek jo hei. 23Inhnaktak a anvōksō heia kurkhum shunga anleithōn jo hei, khana kahnettak a kot rakesina sik a kur kahngâkpa kha ṭong anleipek. 24Hiva ṭongpek hi kur kahngâkpa’n athei jo pha shung katong den a akhum heia thing kahriktak rakea anke hei kha aleikhit mansurtlit pek heia kae.

25Jân ṭhangṭim vena Paul leh Silas khan derna anneia Pathen manpâkna hla anleisak, khana alak khum mihei khan anleirangei hei. 26Sōkphutrōia lingnu inhnaktak hong innok a, khava kurkhum innhmun katlunga aleikanok jo. Khava phatak a kot rakip inhlâng jo, khana khum mihei khitna thirhrui rakip leikatla sōa kae. 27Kur kahngâkpa kha he’nṭhanga, kur kot rakip a’nhlang sōpet jo kha ahmu pha, khum mi rakip akatlânsōt sō jo hei kachang sik tia amandon jâra, achemjâm aradok a abinga inthat sik le’nrei. 28Tâk-kha Paul in akare nei rakip vâng leika-ông, “Nabinga insuset mak roh! Kankhenga ka-om pet ung!”

29Kur kahngâkpa khan hmeiser ader heia, kahlut loia, Paul leh Silas ke kunga innok pum a leikatlua kae. 30Khava sōa aṭhōisōt heia ader hei, “Ojahei, heimo katlo’nchu hukmanhringna kachen sik?”

31Anmani’n anmasôn, “Rōngpu Jesu taksen roh, kha achang inchu nang leh na-innshung hukmanhring nanchen sik.” 32Khang’khan ama leh alak a-innshunga ka-om rakip hneng Rōngpu ṭong kha anleiphông jo. 33Khava jântak a khan khava kur kahngâkpa khan aṭhōi heia anjemna bihei kha aleisôp manthengpek heia; khana ama leh a-innshung mi rakip tuimanhlut anleichen jo. 34Khang’khan Paul leh Silas kha a-inna aṭhōi heia sâk sik, in sik aleipek hei. Ama leh a-innshung pumpui inpâkna leikasip hei, ajârchu tûn Pathen antaksen jo.

35Ajîng jîngkâra Rome vaikarôn he’n police hei hneng ṭong anleipek hei, “Khava mihei kha masō jo hei ruh,” anti.

36Khang’khan kur ka-ensuipa’n Paul hneng amanthei, “Ṭōnpui karôn he’n Silas leh nang masōna sik a ṭong anjōngtir jo. Khava jâra malung kamōng tak a kasethei sik jo chei.”

37Tâk-kha Paul khan police ṭōnpui karônpa hneng, “Ṭōnse kantlona inkhatbek inhmu mak, kha’num mipui kâra anijem ung, keini chu Rome mi ung kae! Khava sōa kurkhum a anithōn nôk ung. Khana tûnhin marûk a tirsōt sik a anmadu ung. Tlongai changmak! Rome ṭōnkarônhei kha antakkhet hong hei sona ahong masō hei rasoh,” aleitipek.

38Police hlamkakeipa khan khava ṭong kha Rome ṭōnkarônhei hneng aleimathlung; khana anmani’n Paul leh Silas hei kha Rome mi anchang kha anmanhret pha, kaṭi jo hei. 39Khava pha ankhenga kase heia rangei mandam anva inder jo; khava sōa kurkhum a inphut anmasō heia khana khava khōpui kha andahlonna sik a anleingek hei. 40Paul leh Silas in kurkhum kha andahlona Lidya innting anjōn jo. Khava hmun a khan takkasenhei leh inhmutō heia, mathokna ṭong anhri pek heia, andahlon jo hei.

Currently Selected:

ṬŌNTLOHEI 16: KOMRBSI

Highlight

Copy