MAK 7

Pi-Pu Ngei Chupi

(Mit. 15:1-9)

1Pharishi lea rouphun ocha ngeina Jerushalem hai thou wa phao weta rachunna Jisu ta hulla bom tul ae. 2Pharishi ngei na mee ngeita juipi num talit anu juija marui ngei na akut shiel no lutto budol bakkha.

3(Pharishi akha chu Jihudi ngei na ulien changei talit anu juija mani kut siel no wa chu bak in no ae. 4Chuna mani na ajien thingjui jakom mani kut siel no wa chu bakno ae. Chu chakno wa mani talit nujuija asielsha wonshang akha chu tapot tuidon kom.)

5Chuna Pharishi akha chu rouphun ocha ngei na Jisu ta sai, “Alo wa narui ngei na bakrang sharukka ulien changei talit nu juija asiellou kuta bakka meh?” 6Jisu na manita sange, “Ahra sangei oh, Isaiah na adiek rou maphukka nangei taranga rilla shi ha, hita jiekka shi ae:

‘malmashi ngei na keita mani murrachak ajak atri ae.

Chuti weta manilung chu kakolla hai thou aram la ah am meh.

7Chuna manina malmashi ngei talit hi,

dramo rou hekta chupi takpi ah

keita ariemsalla mokkae!’ ”

8“Nangei na Chungthieng trongshan ta hla ah houweta malmashi ngei talit ta ratta choi ae.”

9Akha chu manita amona rilleh, “Nangei talit ha hlano rang sharukka Chungthieng hina trongsan jui numno ae. 10Hina sarukka Moses na rilleh, ‘Nanu napa ta ajak atri oh hana atujongna manu mapa ta sarkou lea chu amo ha thi su oh.’ 11Chuti weta nangei na chupi chou ae, ejonga mee akha na manu mapa ta san nang ha, chuti weta rillea, ‘Nahi korban ae’ (nahi rilna chu, Chungthieng ta ae), 12chuna sarukka nangei na nanu napa taranga ephao ae num nijo weh. 13Hitta aeja nangeina mee dangta chupijui Chungthieng trongshan chu hla hou so chou ae. Hichak ano wa adang eja ko ae ja am chau ae.”

Mee Ta Thiengpi No Pot

(Mit. 15:10-20)

14Jisu na mani makhaita lea ah ma am na ah kok weta rilleh. “Karou hi thei oh akha chu nangei limpana dang au oh. 15Malmashi sunga lut hana amota thienglao changpi nea ang mo weh chuti weta malmashi sunga hai thou shuk hana chakna amota thienglao changpi ange. 16Atujong akur am mee na thei shu oh.”

17Hana meelim hlathou wa arengpu na innsung tienga lutjuija, marui ngei na akal ahe rilpi ranga sai ae. 18Chuna arengpu na manita sai ae nangei kom mani hekta lunghal thei no chau? “Nangna ri no the ah che awau hai thou wa malmashi sunga lut na malmashi ta thienglao chang pi nea no ae?” 19Ti chu nahana malmashi lungsunga lut no ae chuti weta won sunga ae, hati weta awao wa shukka thing sier ae. (Hi rilna chu, Jisu na bakka ngei eheilim pa ta thiengpi so ae.)

20Hana woihapa Arengpuna rilleh, “Malmashi lungsung hai thou shuk na amota theignlao changpi ae. 21Rouram chu lung sung hai thou shuk hrano lunghal chu, aruthei, meethat, akha chu meenamei ta shimshi boron mee ae. 22Hoplah pelah, hrano tullu lu murthei, namei apa hrano lunghal anar rat, hrano shukrang rou. Lokchokti mel akha chu lungmo. 23Hi hrano eheilimpa hi lungsung hai thou wa shuk weta malmashi ta ‘thienglao changpi ae.’ ”

Namei Akha Hina Ngoiring

(Mit. 15:21-28)

24Jisu na, na amunt hai thou wa houphurra Tur akha chu Sidon tienga thinga atu akha dangno lutta innsunga lutnum hal kom amona aruhanta ma amna ah am theino ae. 25Hrano muihla na ruija rol namei sanao akha hina manu na Jisu hina rouram ma mathei pha juija phao weta arengpu kae kunga mok so weh. 26Namei ha chu adang jati ae Syrian Phoniciah ram ah pok mee ae. Namei nu hana asanao nu kolla am hrano muihla julla houranga Jisu kolla nie ae. 27Chuti weta Jisu na sange, “Masha tekka unga ngeina awon hop masha shu oh. Rouram chu unga ngei bakrang budol ha ui ta pe no ae.”

28Namei nu na sange, “Oh weh arengpu” “Chuti weta unga ngei bakna maicham thuija tul bak na in na alim ngei chu ui na kom bak no meh.”

29Hana arengpu na namei nu ta ril, “Narou hina sarukka nang thingjou oh nasanao nu kolla hrano muihla shukka thingso ae!”

30Namei nu na ma inn tienga maleh ah asanao nu ha kut chunga jalla am ripha so; hana hrano muihla na shukka thing so.

Kurshet Atrong Shukno Ta Hrapi Na

31Jisuna Tur akha chu Sidon ram hla ah hou phur weta Galily tuipi thui tieng tumma jung weta Dekapolis ramtieng thingso ae. 32Hana mee ahre ngeina akurko set atrong lah apa akha Jisu am na ruija phao weta Jisu na ma chunga akut te shi ranga nie ae. 33Chuna wairul rija ngei karra hai thou wa adanga ruija shuk weta Jisu na makur ani makka akut chal soun na, achil shak weta akha chu apa hana alei ah tongpi ae. 34Amona wan ram tienga mai hai weta asorpi holla makolla rilleh. “Ephphatha!” hina rilna chu “hong jou oh!”

35Hana pachu spa kur kom hongpiso akha chu alei rui suikom hla pa chu hrabak ta trong thou so.

36Hana Jisu na mani ta atu akha kolla rou hi rilno oh ta trongsan pe ae. Chuti weta arengpu na hija ril halkom malmashi ngei na chu lella thangpi ae. 37Chuna na rou thei meelim na ashi angak shukkae. “Amohi ehai limpa hrabakta ae nea ae,” mani na rilleh, “Akur set meekom thei pi nea ae hana atrong lah kom trongpi nea ae.”

Currently Selected:

MAK 7: CHOTBSI

Highlight

Copy