MITHEW 9
9
Pum Ahui Athisa Jisu Na Dampi
(Mak. 2:1-12; Luk. 5:17-26)
1Jisu na kung chung weta maram mak hulok tienga phao ae. 2Hana Anno malmashi ngeina pum ahui athisa akha ta makut chunga jalpi weta ma am na ah rui ah phao Jisu na riweta pum ahui athi sa pata ril. “Kasanao oh riem jou oh; napak kom shil pi sange nangoiring jarra.”
3Hina sarukka rouphun ocha ahre na manithei chakka rilleh, “Amo jong pana Chungthieng ta khrarim elshel ae!”
4Jisu na mani lunghal dangpha ah ril, “Eje ranga nangei lungsunga hrano lunghal hal then ah chau? 5Napak shilpi sange, ta ril pa lea anoleh ‘thou weta thing jou oh rilpa hi hoipa na lok tek kang meh.’ 6Chuna nangei na meesanaopa na alei rama malmashi pak shilpi nea ae ti hi dang ranga ae hana amo na pum ahui athisa ta rilleh, “thou jou oh hana nakut kang choi weta na inn lam ma thing jou oh.”
7Hana amo na thou weta ma inn tienga lea so ae. 8Amota ri wairul riha na atri ae chuti weta hijongpa ane hina taranga manina Chungthieng ta dom so weh.
Mithew Ta Kok Na
(Mak. 2:13-17; Luk. 5:27-32)
9Jisu na hana haithou mathing juija apa Mithew ta ri so sum thit na munt ofis hana onga am. Amo na rilleh “kanutieng juijo” hana Mithew na thou weta manutieng jui so.
10Jisu na Mithew inn sunga bu bakha ah amlei ah sum hrai ngei lea pakchel ngei eja akha chu marui ngei kom makolla bakha ae. 11Pharisies ngei na nahi rijuija marui ngei ta mani na sai, “Alo sarukka nangei ocha na sum hrai ngei lea pak chel ngei hitta bakha ah meh?”
12Rouhi Jisu na theijuija rilleh, “Pum ahra ngei taranga thiempu kanano ae chuti weta rai am ngei taranga ae. 13Chuti weta thing weta rou hi chu thingo alo tina pa mo nu ta kadit chu ringrei thei ha ae rithoi ha no ae, rou ram chu hina kaphao hi athieng ngei ta kok nonge, pak chel ngei taranga ae.”
Bu Haina Rou Ramma Sai
(Mak. 2:18-22; Luk. 5:33-39)
14Johon rui ngeina phao weta Jisu kolla sai, “Pharisies ngei lea kani na bu hai weta alo sarukka narui ngei chu hai no ah meh?”
15Jisu na sange, “Taichang ang pa na am lei ah aphao atonpi ngeina alota ningshi them am manga meh? Mani karra matol lei ah! Chuna apha ha phao ange taichang ang pa ha mani kar hai thou rui ange; hana jui ja mani ha bu hai ange.
16Chuna atu akha na pun alui ah punthar bal no ae rouram chu abal pun hana pun hata takkin pi ah atit na amunt ha hella tieng tit na change. 17Malmashi ngeina darkha tui ha tui-oium alui ah thal no ae, ejonga thal lea chu kui ah darkha tui sarange chuchak no wa tuium ngei kom amang change. Chuna sarukka manina darkha tui ha athar tuium ma thalla ani makha hrabakta doi ah shi ae.”
Athisa Nangak Akha Chu Rai Am Namei
(Mak. 5:21-43; Luk. 8:40-56)
18Amona manita tronga am leija, Jihudi rourilpa na ahuk hrun weta ril, “Kasanao nu akha atun makka thi so ae. Chuna nangna wa weta machunga nakut shipi lea chu amoha ringthou ange.”
19Jisu na thou wa manutieng juija thing jui ah arui ngei na kom anu yuiye.
20Hana nameinu akha akum asom ani athee tulla na am nu na Jisu linglut achul pa akienga tham so. 21Namei nu na athei chakka ril, “Ejonga keina malinglut akieng te chak halkom tham pha lea kei hi dam mange.”
22Jisu na anungtienga hai lea ah nameinu ta ripha ah rille, “Kasanao nu oh riem jou oh” “nangoiring jarra hana dam pha so che,” hana mak apha hana namei nu ha dam so ae.
23Jisu na Jihudi rourilpa inn sunga lut juija wairul riha na toutri hung-dar reiya trappa am ripha ah. 24Amo na ril, “Shukka thingo nangak sanao hi thi no ae jalla am ma sa ae” chuti weta mani na amo ta nuiso weh. 25Wairul riha na awaou ah shuk nutienga amo na lutveta nangak sanao kutta kai ah thouso oh-inlen ring thou so weh. 26Routhar hi hatieng ram lim thangso weh.
Jisu Na Mitcho Anita Dampi Na
27Jisu na amunt lha houwa wakyuiya mitcho ani na manutieng jui weta aowa rille, “David sanao pa kanuita ringrei ngei pi oh.”
28Chuna amo na inn sunga malutjuija mitcho ani kom makolla luttolla amona manuita sai. “Keina nanuita dampi nea ae ti hi chu nanui na ngoiring ah chau?”
“Oh weh, Arengpa” manui na sang. 29Hana amona manui mit tong weta ril, “Ngoiring anujuija nanui kolla shuk shu oh.” 30Chuna manui mitha ripha nea ah Jisu na manui ta rou arit dolla shi, “Anno atu akha na kom na hi dangno shu oh.”
31Chuti weta manuina mani ram tienga thing weta routhar hi thangpi so weh.
Jisu Na Atrong Thukno Spa Ta Dampi Na
32Hana haithou wa mani shukka thinga sharuina na ruija rol spa akha atrong shukno wa Jisu kolla ruija phao ae. 33Hana dijabol na makolhai thou julla hla nutienga atrong shukno spa ha tronga wairul rihana angak shukka ril, “Israel sunga hihakti mee sup ri-ya rino songe.”
34Chuti weta Pharisies na ril, “Dijabol ngei jaitha jarra amona dijabol ta julla hla ae.”
Jisu Na Mee Ngei Ta Lungshit Na
35Jisu na hulokka akha chu husung chang honna thing weta mani synagoge sunga chupi takpi ah ana eja ta dampi ah reng param hina taranga routhar hi takpi. 36Hana amona wairul riha ta mari juija lungshi ngei ae, rouram chu mani aol ana ha sanrang am no ah kelmo rungpa am no kelmo ngei hekti ae. 37Marui ngei ta amo na ril, sang pottang chu am hom meh chuti weta tullu lu mee chu atom te ae 38chuna sarukka arengpa kolla niyo oh, amo na sang pottang mee ha hla ange.
Currently Selected:
MITHEW 9: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
