MITHEW 28

Ringa Thou Na

(Mak. 16:1-10; Luk. 24:1-12; Jhn. 20:1-10)

1Sabbath nutienga ahal parungni hu wardu du ah Mary Madalini akha chu adang Mary ngeina hlan hana anthinge. 2Edang dang nowa lingnu nukka ae; thangwan haithou wanrui akha na jungweta hlan mai kunga lungpak ha letta hla weta manina alung chunga ong so weh. 3Maisoun ha chu, champlak hek ta warpi ae akha chu mapun mani kom awur hek ta ngou ae. 4Hlan hakka am ngei ha leima atri ah ahir akha phao so weh hana mani ha athi sha hek ti so weh.

5Wanrui na namei nu ngei ta ril so weh. “Nangei na atri rang ekom am no weh,” maram chu “Keina dang inge ha chu khross chunga aban jamma that Jisu nangei na jonge tiha. 6Maril, houphur anu juija amo chu ringthou shu sho weh, amo ha chu hina am nijo weh; majal phur na hi nangei na wa weta an wa oh. 7Atun hi nangei na harra thingweta arui ngei ta rilpi oh. ‘Amo ha athi haithou ringso weh, akha chu atun amo hi Galily ah thingsho weh; nangei matienga hana amo ta ripha ang chau ae!’ makno oh nangei kolla karilphur ha.”

8Chunapa chu mani na hlan kungha hou phurra ranga thing so weh mani atri lim ha ariemna shi hakti so weh akha chu mani na tanna thing weta arui ngei kolla ril so weh.

9Edang dang no wa Jisu na mani ta tuk hlakka ril, “Nangei chunga adai am shu oh.” Manina Jisu am na nei ah wa weta akha chu akae oh weta makolla mok so weh. 10Jisu na manita ril, “Atri no oh.” “Nangei na ka-u-kanao ngei kolla thingweta takpi oh Galily ah thingo hana mani na kei ta ri ang ae.”

Ahak Ngei Na Thangkou

11Namei ngei na mani lampi ah mani lea lei ah hlan hakka am ralmee ngei na hupi ah lea ah chungtekti thiempu ngei maikunga shukka am eheilimpa ha thangkou pi ae. 12Thiempulel ngei na ulien changei hitta tuk hlakka halhlak so. Hana mani na ralmee ngei ta ehekta tam sum pe ae. 13Hana hitta rillea, “Nangei na hitta rilpi oh. Ha chu jantieng nangei jallei ah arui ngei na phao weta apum ha ru wa thing so weh. 14Akha chu rouphom hi Arengpa na theipha halkom nangei lung ol rang ekom am no weh kani na amo ta hrabak ta ril weta nangei hi maral am no weta rilpi ange.”

15Ralmee ngeina sum ha la weh ta mani ta ae oh ril ha hatta mani na ae so weh. Hana pa chu hani rungnie hai thou atun phao wa Jihudi ngei am na ram lim ma ah rou hi thanga am meh.

Jisu Na Marui Ngei Maikunga Mel Muh

(Mak. 16:14-18; Luk. 24:36-39; Jhn. 20:19-23; Rui. 1:6-8)

16Jisu na manita thingo rilna Galily mullon na arui ashom akha na thing so weh. 17Mani na amota rijuija amota mok so weh chu phao shunga ahre chu ngoiring tak no wa am shonge. 18Jisu na mani am na neiah wa weta ril. Keina thang wanram akha chu shimlei ram ma ane ha nangei kolla pe hap singe. 19Nangei na amunt chang honna mee ngei am na thing weta karui semmo. Pathieng, asanaopa akha chu muihla athiengpa minga baptias ae pi oh. 20Keina nangei ta rou kapeklim hi meelim na jui ranga chupi oh. Anno, keina nangei ta simlei atreem ni phao nangei hitta apha chang honna am ha ange.

Currently Selected:

MITHEW 28: CHOTBSI

Highlight

Copy