MITHEW 25

Nangak Ashom Hina Roumushuk

1“Thangwan Rengram hi na hina apha hekti ange. Apha akha ah nangak ashom na mani dewankari choiweta thing so weh nu mou ruinu ta tuk hlak ranga. 2Ranga chu mani kara sing ae hana adang ranga chu pange ae. 3Apang ranga hakom dewankari chu choi weta alel thou tui chu choino weh. 4Hana a sing ranga chu thou thal na shihakta choi ae, 5mouruipa hi tai ah am ma namei ngei ha ennum ma wa ah jal so ae.

6“Janjai pha juija chu shanrol au wa, ‘wa so weh! nouruipa phao so weh, wa oh akha chu tukhlak jou oh!’ 7Namei ashom ha thouweta mani dewan kari hlan thou so. 8Hana lungmo ngei na lungsingei kolla ril, ‘kani ta thou ahre te pe pi oh, rouram chu kani dewankari hina thou thangso weh.’ 9Lungsingei na sang so weh, ‘kani taranga kom hoppang no weh nangei na nangei taranga ajurna thingweta lei thingo.’ 10Chuna pa chu lungmo mani ranga ha thou lei ranga thing so weh, hana mani thing lei apha makka mouruipa tung so weh. Chuna mani ranga chu amo hitta lut weta raengna bu bak lutta inkal ha kalso weh.

11“Anutienga chu adang namei ngei kom tungso weh. Mani na ril, ocha, ‘Ocha kani kom lut tuk kae!’ 12Hana mou rui pa na sange, ‘Nangei atu mo weh,’ keina dang nonge inkal hong nea ang nonge.”

13Nangei natak na natakta shong jella am mo maram chu marung nie ano lea apha ha nangei na dang no weh, Jisu na nahi ril weh ta atreem na chang so weh.

Suuk Inthum Hina Roumushuk

(Luk. 19:11-27)

14“Thangwan rengram hi na hi hek ti ange hana jui apha ah. Apha akha ah apa akha na tairam ma mathing ang tienga; amo na masuuk ngei ta madon manei lim pa shilna ah hou phur ae. 15Amona mani limta mant ae, mane rang an weh ta pe so weh. Akha tana sona sumnoi lising ranga pe so weh. Hana adang akha ta na lising ani pe so weh akha chu adang akha tana lising akha pe so weh hana chu amo na manita hou phurra malampi thingso. 16Hana chu sumnoi lising ranga pha pa na thingweta lising rang adang tukka phao weh. 17Chuna chu hekta lising ani pha pa nakom adang lising ani woihapa tokka phao so weh. 18Chutiweta adang suuk lising akha chak pha pa na chu thingweta alei hur shunga amitpu sum ha thup thingso weh.

19“Apha ashot nutienga chu suuk ngei hina mitpu lea ah mani hitta sum ha sam ha so. 20Lising ranga pha pa shuk amo na wa weta lising ranga ha pe so weh. Amo naril, ‘Nangna keita lising ranga na pekha! anno! hina adang lising ranga kom keina tukka phao inge.’ 21Amitpu na ril, ‘Ehekta hra so weh, nang chu ahra ngoiringei suuk kae.’ ‘Nang chu asinte shella kom hrabakta tonsin thei che ae chuna nangta keina alok tullu ma kom kahut shilpi ang shange, wa oh hina kariem hi riem ha ui oh!’

22Hana sum lising ani pha pa na kom wa weta hitta ril, ‘Mitpu nang na keita lising ani napek chunga keina adang lising ani kom tukka phao singe.’ 23Amitpu na makolla ril, ‘Ehekta hra so weh nangna ahra tullu ngoiringa ngei tullu lu so che ae, chuna nang hi asin te summa ahra ton sin thei na ah alok shelphom ma kom keina tonsin rang tullu hapsange, wa oh kariem na hi nangkom riem tollo!’

24“Lising akha pha pa suukna wa weta ril, ‘Mitpu, keina nangta dang inge nang chu nang na muchi worna na amunt na kom lukmee ae, akha chu muchibalna nathe no na munt na kom hom mee che ae. 25Kei chu atri ah nashel napekha choi ah thing ing weta alei hur shunga thuppa shi ah anno! hina am so weh na pekha.’ Amitpu naril,

26“ ‘Nang chu hrano akha chu adol suuk kae!’ ‘muchi kawor no na ah keina lukkae hana muchi kathe no na amunt na kom keina homma shi ae. Nangna alo ta naha dang ah che? 27Hra so weh, nangna sum sumpang na naha tha thing phur pa chu. Keina woiha pa kalea sier juija kashel ha athui tolla pha ange. 28Atun chu makol hai thou wa la weta sum lising ashom am pa kolla pe jou oh. 29Maram chu atom lea am meelim chang honna meelim lella lollange. Chu na amo na lella tamma am hom mange; chuti weta atu jong eko am no ngei kolla ma am atomte hako makol hai thou chu la ange. 30Chuna kanano suuk hitta chu athim thuija denga hou oh; hana amo ha trappa am mange akha chu aha riellange.’

Atreem na Routreem Na

31“Meesanaopa Reng changa majung juija chu wanrui ngei na kom tollange, hana amo na reng phomlu ah ong ange. 32Hana amo na jat chang honna malmashi lim ta rachun pi weh ta, hana chu amo na ani shukka hran weh ta abom, a bom ong pi ange, kelmopu na, kel ngei kar haithou kelmo ta hran hekta. 33Amo na dramochel mee ngei ta na atreem tienga shi ange hana adang ta chu ma-wuitienga shi ange. 34Hana Rengna machang tienga am ngei ta rillange, ‘kapa Pathieng na jaihra pek mee ngeioh wa oh hina! Shimlei shem hai thou wa rengram shemma shi hina am wa jou oh. 35Kawon tam lei kom nangei na bakpi chou ae katuiral lei kom nangei na en pi chou ae loi ram changa kaphao juija kom nangei inn na keita ruija lut ae. 36Kapun kani sum lei kom nangeina pe chau ae, kanat kashat lei kom nangei na keita lai an pi ae raen inn shunga ka am lei kom nangei na an phao pi ae.’

37“Hana juija dramochel ngei na rillange, Arengpu, kani na nawontam lei ah kani na ri ah bakpi enpi ah meh? 38Ejongpa apha ah nangna loiram mee hakta phao wa kani inn na nangta rui ah meh akha chu tuiral wantam juija enpi mee hana napun nani shallei ah peja meh? 39Ejongpa apha ah raen inn shunga am ma akha chu na ah na amlei kanina an phao wa meh? 40Hana chu Rengna sange, ‘keina nangei ta rilla am minge ha chu, nang na sintekti ka-a kanou akha ta chungtek ta nangei an ha akha kolla ha keita ae ah ae!’

41“Hana mawui tienga am ngeita amona rillange, ‘Nangei hi Chungthieng sharkou thuija am ngei ae thing jou oh Saitan lea marui ngei taranga semsha sarmei kum ma! 42Ka wontam lei kom nangei na bakpi no weh katuiral juija kom nangei na keita tui pe no weh. 43Loiram kachanglei ah keita rui ah nangei inn shunga lut pi no chou; kapun kani sum lei kom pun nie pe no chou, raen inn shunga akha chu na ah ka am lei kom an phao pi no chou.’

44“Hana mani na sange, ‘Arengpu kani na nangta etikka ri ah meh. Wontam tuiralla akha chu punshal nishal ah raen shunga, na om ah loiram naphao kani na nangta san no wa meh?’ 45Reng na sange, ‘keina nangeita rilla am minge ha chu asin te akha ta nangei na chungtek ata changpi no wa jullo nangei hla ha keita julla hla a ae.’ 46Hana chu nangei hi atreem nei no tanti pek ranga hla ange, chuti weta dramochel ngeita chu shamla ringchang pha ange.”

Currently Selected:

MITHEW 25: CHOTBSI

Highlight

Copy