MITHEW 23

Jisu Na Rouphun Ocha Lea Pharisis Ngeita Tri Rang Rou Ril

(Mak. 12:38-39; Luk. 11:43,46; 20:45-46)

1Jisu na marui ngei lea wairul riha ta rouril ae. 2“Rouphun ocha ngei lea Pharisis ngei hi chak Moses rouphun trong let ranga angai pe ae. 3Chuna sharukka mani rilha nangei na jui ja tullu lu anga ae; chuti chun mani ae na tullu hekta ae nou oh, rouram chu mani ha murra chak rilla lu tullu chu tol no ngei ae. 4Manina malmashi ngei lin nga kalla renna shi ae mee na ronne no pot rit hana mani kutchalte phao na potrit ha san nea no weh. 5Manina mani tullu lu hi mee ngei na ri rang chak tullu lu, mani chalpanga, akha chu aban na Khrista trongsan jiekka shi ae. Hana mani linglut achulpa ha weta. 6Mani dit chu Synagoge shunga kom mani ong rang amunt kalla shi, hana bu bak na amunt kom hra tekti amunt ae. 7Mani dit chu, pot jurna amunt na kom mee ngei na ariem ma riemtuk pe weta “ocha” ta kokpi num meh. 8Nangei atu akha na “Ocha” kokpi no, rouram chu nangei limpa uleanao rukkae hana nangei “Ocha” chu akha chak am meh. 9Hana, nangei na aleiram ma atu akha ta “Apa” kok no oh, rouram chu nangei apa chu wanram ma am akha chakkae. 10Hana atu akha ta kom “lamkai pa” kok no oh, rouram chu nangei lam kaipu chu Messiya amo chakkae. 11Nangei karra lok tek ti amo na nangei kor chang ange. 12Atu jongpa akha na lokkinge ti lea chu sinpi ange. Hana atu jong akha matakta a sin inge ti lea amota lokpi ange.

Ahra Sha Ngei ta Jisu Na Neinunpek

(Mak. 12:40; Luk. 11:39-42,44,52; 20:47)

13“Eja ah atrih pi meh rouphun ocha lea Pharisis ngei hi! nangei hi ahra sa ngei ae thangwan Rengram innhar hi nangei na chu, kalla shi chou ae. Nangei na nangei tak chu inn shunga lut num no weh!” 14Pharisis, ahra shangei akha chu jiek sha rou ocha ngei nangei chunga aol ana am meh. Nangei na niek juija kom innhar hongweta ashotta niek sha lakkae, chuna nangei chunga hella aol ana pha ange.

15“Eja ah atrih pi meh, rouphun ocha lea Pharisis nangei hi! ahra shangei oh! nangei na tuipi len na kom ramkanga kom thing, thing weta mee ngei ta namee chang weta nangei ta lella sarmei kumma thing ranga sharuk ani lella olpi ae.

16“Eja ah atri pi meh mitcho lamkai nangei hi! nangei na mee ta chupi takpi chau ae, mokna inn an weta rouraen mee chu eko no weh; chuti weta mokna inn na am sona ming ril weta rouraen mee chu aol akha ae. 17Mitcho lamkai ngei oh, hoipa na hella chung tekmo weh sona lea mokna inn, sona ta thiengpi nea inn ha mo ae? 18Hana nangei na hita kom chu pi chau ae, ejong atu jong akha na shaiphung ta rouraen lea chu eko no weh, chuti weta shaiphung chunga don na shi kutthul ming rillea chu aol pi ae. 19Eja mitcho ngei oh, hoipa na hella chung tek mo weh shaiphung lea shaiphung chunga don na shi pot hata thiengpi shaiphung ha? 20Chuna mee na shaiphung ta rouraen lea chu amo na shaiphung chunga am lim pa tolla rouraen na ae; 21akha chu mokna inn ta rouraen lea chu amona Chungthieng hana am ha ta rouraen na ae. 22Hana atu jong akha na thangwan an na rouraen lea chu Chungthieng phomlu ma ong na ta rouraen na ae.

23“Eja ah atri aol ana mo weh rouphun ocha ngei lea Pharisis nangei hi! Ahra sha ngei! nangei na Chungthieng kolla som sunga akha nathing theipar phao apha nu juija pe weh ta chung oitek ti rouphun na jiekka shi adiek rou lungshi thei shilung athieng ta pa na jui no weh hana nangei na na hi adang adang rouphun hon atal adol am lutta jui anga ae. 24Mitcho lamkai ngei oh! nangei enrang tuidon na thouwaibi ta julla hou weta yangkoosa ta na volthen ae!

25“Eja ah atri pi meh rouphun ocha lea Pharisis ahra sha ngei! nangei na tuidon awao wa shilweta ashunga ashihmalom lea matarang chak halla am ta chu shi am meh. 26Mitcho Pharisis! tuidon shunga am hrano ha masha ah tlengo, hana awao kom hata thieng ange!

27“Eja ah atri pi meh rouphun ocha lea Pharisis nangei hi! ahra sangei! nangei devir ti ae shilsha hlan bung hekti ae ashunga na athi sha sharu na shihak ti ae. 28Chuna chu hekta nangei na meelim maikunga chu ehekta ahra muh shuk kae, chuti weta ashunga chu pak lea ahra no na shihakti ae.

Mani Aol Ana Taranga Roumu Jisu Ril Rou

(Luk. 11:47-51)

29“Ahra shangei! eja ah atri pi meh rouphun ocha lea Pharisis nangei hi! rouphu pa ngei hlan bunga akha chu thilrou phun ah ahra reipar em ma shi chau ae mani ringlai ah ahra tullu lu ngei taranga. 30Hana nangei na ril chau ae ejonga napi napu ngei apha ah ring phur ta lou chu, mani na rouphupa ngeita that tullu lu hi ae phur ang nonge. 31Chuna nangei hi routakka chu mani rou phupa ta mee that ngei hina atu ate ngei ae. 32Thing jou oh hana napi napu ngei thou ah hou phur tullu ha shu thingo! 33Arul sanao ngei oh, akha chu nangei chu arul chou ae! alo ta nangei na sarmei hai thou hlan na thinge ta halla am ma che? 34Chuna kei na nangei ta rilla am minge kei na rouphupa ngei lea athei ashing ocha hla ange, hana nangei na manita aban jam ma that oh, adang ahre tana Synagoge shunga mantna aol ana pe weta nangei husin akha hai thou hulokka jullang chou ae. 35Hina sharukka aral am no eja ta nangei that na amant aol ha nangei chunga dollange, aral amno Abel ta that hai thou Berakiah sanou Zachariah mokna inn hai thou wa shaiphung karrakka nangei that. 36Kei na nangei ta rilla am minge, nameethat lim hina aol dandi hi awoni ah mee ngei chunga shur ange.

Jerushalem Taranga Jisu Lungshit

(Luk. 13:34-35)

37“Jerushalem, Jrushalem! nangei na Chungthieng rouron ngei ta akha chu rouphun ngei ta alung denga that chao ae! arpinu na ate majam ta ahla thu shunga shi hekta keina woi eja nangei ta kaban jam ang shong anga meh nangei na ephao kei ta chuti weta nanyei na chu keita ngei chou ae. 38Chuna nangei mokna inn kom mee na hla how inn ruk chang sajo weh. 39Chuna atun hai thou wa nangei na keita ri ang ni jo weh, ‘Arengpu minga phao meeta Chungthieng na jaihra pe pi oh’ ta nangei ril ma lim ma.

Currently Selected:

MITHEW 23: CHOTBSI

Highlight

Copy