MITHEW 21

Jerushalem Ma Jisu Na Thang Shukka Lutna

(Mak. 11:1-11; Luk. 19:28-40; Jhn. 12:12-19)

1Olives mulbung Jerushalem Betphage amunt nei ah Jisu akha chu arui ngei na wakjui ja 2Jisu na marui ani ta masha ah rourilla hla ae. “Nangei maiah am hu shunga thingo hana nangei na kormoh asonao ren na am tuk hlak kange. Naha nangei na ruit hla weta ka am no ah rui ah wa oh. 3Chuna ejonga atu jong akha na hana taranga rou sai lea chu makolla hitta rillo. ‘mitpu na danunrkar akha am meh, hana narou chakna amo na nangta thing jou oh ta hla ange.”

4Na shukka am limpa hi amatienga rouphupa rilphur lim ha adiekka shukso weh:

5“Zion hupi ah rourillo,

Anno na rengpu ha na am na ah phao so weh.

Amo chu alung nem meh,

hana kurmoh sanao chunga wa ange.”

6Chuna arui ngeina maril nu juija thingweta Jisu ril makha ae so. 7Mani na kurmoh api ate rui ah wa ah kurmoh sanao chunga mani pun pha pi ah Jisu na achunga ong kal so. 8Hana ehekta atam wairul rija na mani punchoi lim lampi ah dokka pha ah, adang ahre na chu anobak hrim ma lampi ah pha pi ae. 9Ehekta tam wairul rija na Jisu maitinga thinge hana anung tieng juija wa ngei na hitta au thou weh. “David sanao pa ta dommunge! Arengpa minga wa mee amo ha Chungthieng na jaihra machunga pe ange. Chungthiengta dom munge!” 10Jisu na Jerushalem ma lut juija hupi shunga am meelim pa na rashao ae, “Amo hi atu meh?” mee ngeina sai ae. 11Hana wairul rijana hitta sange Nahi ae Galily Nazaretta phao rouphupa Jisu ae.

Mokna Inn Na Jisu Thing

(Mak. 11:15-19; Luk. 19:45-48; Jhn. 2:13-22)

12Jisu na mokna inn shunga lut weta pot jurra am ngei lea leija am mee ngeita julla hla so weh hana sum noi sella am ngei doukang kom achung athui wulpi so, hana paipi jurra am ngei ta kom. 13Hana amo na mani ta ril, hitta, “Jieksha rou wa Chungthieng na hitta rillea, ‘Ka inn hi amokna inn ae ta keina kokkange,’ chuti weta nangei na chu aru thei ngei bik na changpi chou ae!”

14Mokna inn na lut mitcho kaehar kut hor ngei ta Jisu na manita dampi. 15Jisu na mokna inn shunga angakpi tullu lu ah am akha chu unga ngei na David sanao pa ta domma am hi, chungtekti thiempu ngei lea rouphun ocha ngei na rijuija ehekta alungsha thou so. 16Chuna mani na Jisu ta sai, “Mani ril hlak lim hi nang chu thei ah che?”

Jisu na sange, “Oh weh, kei thei inge jieksha rou ha nang pa pha no songa che?” “Nangei na rakitpha ah dom thei ranga unga naopongei ta chupi ha!”

17Jisu na manita houphur weta Bethany hupi ah thingweta amona nani jantieng ha am so weh.

Theichang Kungta Jisu Na Sarkou

(Mak. 11:12-14,20-24)

18Nani mathangpa chama hupi tieng malampi malea jui ja Jisu hi won tram so weh. 19Lam hou wa Jisu na theichang kung ripha ah amunt hana thingso. Chuti weta theichang abuna ano wa chu ephao am no weh. Chuna amo na thingkung hata ril, “Nang hi woiha lea ah naira ra no sha oh!” Chu enlen theichang kungha charra thingso.

20Arui ngei na na hi rijuija alou shukso. Chuna mani na ril, “Alo ta theichang kung hi hija ranga charra meh?

21Jisu na sange, “Keina nangei ta rilla am minge, ejonga elog am no lutta ngoiring ta lea chu, keina theichang kungta ka ae hekta nangei kom ae nea ange. Akha chu chuna chak no wa kom na mullon ta kom rilne ange ‘thou jou oh nathei chakka hana tuipi ah thingo’ hata thing ange. 22Ejonga nang na ngoiringa naniek lim ha nangna pha ang che ae.”

Jisu Hina Mane Mating Maram Ma Rou Sai

(Mak. 11:27-33; Luk. 20:1-8)

23Jisu na mokna inn na lea weta; amo na chupi takpi ae hana chungtekti thiempu akha chu ulien changei na makolla wa weta sai, “Ejongpa nane am ma na hi nang na ae ah am che? Atuna nangta na ae nea na pe ah meh?”

24Jisu na manita sang, “Keina nangeita rou akha sai ange ejonga nangei na sangne lea chu keina kom kane na tullu hi atu pek moti ha keina rillange. 25Johon na baptias ae pina hi hoitienga phao mo weh, na hi Chungthieng ning tienga mo, ano lea malmashi ning tienga mo weh?”

Mani sunga rou vuk hlak thou so, “Anina alota rillang meh? Ejonga anina Chungthieng kol hai thou ae sang lea chu amo na hitta rillange, chulea chu nangei na alowa Johon ta ngoiring no chou?” 26Chutiweta ejonga ani na malmashi kolla thou ae ta rillea chu mee ngei na anita alo ae ah wa ang sha, rouram chu manina Johon hi thiempu ae ta ngoiringe.” 27Chunapa chu mani na Jisu ta sang. “Kani na dang nonge.” hana Jisu na manita ril, “Keina karillang dang nonge ka lu tullu hi hoitienga phao moti ha.

Asanao Ani Hina Roumushuk

28Nangna alota halla che? Apha akha ah apapah akhana asanao ani am phurre. Hana amo na asanao ulienpa kolla thing weta angur mahunna thing weta tullu lu thingo ta ril. 29Asanaopa na sange, ‘Kei thing ang nonge.’ Chutiweta anutienga chu alung hlonga amona thing so weh. 30Chuna hekta mapa na asanao akha kolla thing weta hata ril so, hana amo na sange, ‘Oh weh kei na thing ange.’ Chuti weta amo na thing chu thing nijowe. 31Na asanao ani shunga mapa na atuta lung tin tek kang sha?” Mani na sange, ‘asanao ulien pa tah.’ Chunapa chu Jisu na manita ril, “Keina nangeita rilla am minge ha chu salhraipa lea honrei namei nu na nangei matienga Chungthieng rengram thing mee sha ange.” 32Chuna taranga Johon Baptias na nangei am na ah adiek lam ri pi rang junge chuti weta nangei na chu amota ngoiring no weh, chuti weta sumhrai rol mee lea honrei nameinu na chu amota ngoiringe. Nangei na ri shu nutieng phao nangei lung hlonga amota ngoiring no weh.

Angkur Mahun Ram Don Spa Akha Hina Roumushuk

(Mak. 12:1-12; Luk. 20:9-19)

33Jisu na ril, “Anno adang rou mushuk akha hi.” Apha akha aram mitpu akha am meh, amo na chu angur mahun tamma ling phurra ahul tunga pal harra angur tui lak rangkom semma rungang ngei am rang kom teiten sha ah, amo na mee ngeita an na hakranga rou rille, amo chu ram akha ah thing so weh. 34Angkur ara lairang apha wakjuija amo na mapha phung shuk lak ranga makor ngei ta hla so weh. 35Hana mashi mee ngei na makor ngeita phitta that so weh adang akha tachu alung a deng so. 36Woihapa makor masha ta tam tek hla so weh, manina masha mee ngei hekta ae sin so weh. 37Atreem na ah chu asanao pa ta hla sierso. mahal chu asanao pa ta chu mani na ajak atri ange ta. 38Chutiweta manina asanaopa ta ri juija mani yeye ril hlak so, “Nahi ram mitpu pa sanao ae anina amota that weta maram hi ani na chang ei oh! 39Chuna mani na amota man na that weta angkur mahun hai thou denga hou so weh.

40Jisu na manita sai, “Atun chu ram mitpu pana angur enkulla wakjuija chu ramshal la ah am ngei ha alo ta ae ang sha?”

41Mani na sange, “Amona hrano mee ngeita suino wa that tange” akha chu “atu motieng apha cha ah ramshal pe ang mee amota angkur mahun ha pe ange.”

42Jisu na manita ril, “Jiekka shi sha rou ha nangei na pa no songa chou?

‘Inn sha pa na denga housa alung ha anutienga

chu amo na tieng lella kana tekti change.

Na hi arengpu tullu lu sha ae;

eja ah angakpi no meh!’

43Jisu na woiha kom rille “Keina nangei ta rilla am minge, Chungthieng rengram hi nangei kol hai thou la ing weta atu jong apha cha ah ara ra pine mee kolla pe ange.” 44Atu yongna hi alung chunga tulta lea chu amoha matup, matup tan ange; chuti weta alungna atuyong chunga tul lea chu, alungha vokphul oul makhei thugai ange.

45Chungtekti thiempu ngei lea Pharisis ngei na Jisu hina roumushuk hi mani ta rilla am meh ti hi dang pha so. 46Chunapa chu manina amota mant rang ae weta bom tulla am wairul rija ta tri so, rouram chu mani na Jisu hi rouphun thiempu ae ta ngoiringe.

Currently Selected:

MITHEW 21: CHOTBSI

Highlight

Copy