LUK 18

Aniek Na Panteem

1Jisu na arui ngei ta nuleh no lutta akha chu apha chang honna nei rang panteem hi mani ta chupi ae. 2“Hulokka routreem akha Chungthieng ta kom ti lou akha chu mee ngei ta kom ajak ati am lou akha am meh. 3Hana huloka makka arongnu akha na makolla apha changhon na phao weta, ‘keita anda ngeita lamant dingpi oh ta makolla san ranga phao!’ 4Apha aja amatienga napana ngeinum no wa ephao ae no hal atreem na ah chu mathei chakka ril, ‘Keina Chungthieng ta ti nohal akha chu mee ngeita ajak ati no hal. 5Chutihal kom na arongnu na kakolla aol pek amhi, keina mapha phom shuk eheilim aun na tasinge. Keina na hi aepi noleh chu amona notichang hou wa ange, atreem na chu keita aol pe ange?’ ”

6Arengpu na manita rilla am song, “Ngei oh hrano routreem ae pa na alota ril sha. 7Atun chu Chungthieng na chu alo ta mamee ngei na makolla niesun janting nei no wa sanpi oh rilla am ngei ta routreem ae pi ang no wa meh? Hana amona mani tarang tai ah am mang meh? 8Keina nangei kolla rilla aminge amo na mamee ngei taranga eshot shot no ah masanao pa na simleichunga majung jui ja chu amonta ngoiringei ta tuk ange?”

Pharisis Lea Khasana Hrai Ngei Panteem

9Jisu na hikom mathei, mathei, chakka kei chu diekka ahra mee inge hana meelim pa chu ephao ushit no ngei kolla ril. 10“Apha akha ah spa anie na mokna inn na hangveta hita nie ae, akha chu Pharisis ae hana adang akha na khasana hrai mee ae.

11Pharisis na amunt akha ah mathei ah ngir weta nie so, ‘leima ariem minge Chungthieng ha chu kei chu sum di mee kom anonge lung thiengno kom anonge hana meenamei ta kom lal nonge mee ngei hekta hana ka riem akha na khasana hrai pa hek ti nonge. 12Rungnie nasari sunga rungnie nani bu hai ah nie inge hana kapha sum lim chang honna somma akha pe inge.’

13Chuti weta khasana hrai pa chu aram la takka ngirveta amai te phou wan tienga hai nea no wa atlanga bengveta ril, ‘Chungthieng keita jaishi akha ae ta ringrei ngei pi oh!’ 14Keina nangei kolla rillinge” Jisu na ril, “Chungthieng ningtienga chu khasana hrai pa na adiek mee ae hana Pharisis pa ta no ae. Chuna sarukka atujong na mathei chakka adiekke ta hal lea chu methui dong ang ae hana atujong mee na meethui dong amo chu alok changpi ange.”

Unga Angeita Jisu Na Jaihra Pe Na

(Mit. 19:13-15; Mak. 10:13-16)

15Malmashi ahre na mani unga ngei chunga Jisu kutta kut hangpi rang ruija wa ae. Arui ngei na ri ah mani lu tullu ha lungsha so. 16Chuti weta Jisu na unga ngeita ma am na ah kokveta ril. “Unga ngei ha hamma shino oh mani ha ka am na ah wa shu oh. Rouram chu Chungthieng rengram hi mangei ta ae. 17Ngaithei oh! Atujong akha na na unga hek ti no lea Chungthieng rengram ma lut nea ang no ae.”

Achong Spa

(Mit. 19:16-30; Mak. 10:17-31)

18Jiwish lamkai akha na Jisu ta sai, “Ahra arengpu oh, Alota keina ae weta samla ringchang pha nea ang meh?”

19“Alo sarukka keita ahra ta kokka che?” Jisu na sai makolla, “Chungthieng ano wa atu akha phao ahra mee am no ae. 20Nangna trongsan pek dang che, ‘mee namei lal no oh; meeta that no oh; meepot ru no oh; mee ta dieklou neinon pe no oh; nanu napa ta ejak ati oh.’ ”

21Spa hana sang, “Ka ungak lei thou wa natrongsan limpa juija hang inge.”

22Jisu na nahi mathei juija amo na makolla ril, “Chu phao sunga na ae ang tullu akha am songe, na am nadon limpa jurveta ring riengei ta napha sum ha pe oh chuna nangna wanramma tungne ang che; lea che weh weta kanutieng jui jo.” 23Chuti weta spa hana rou hi thei juija leima alung olla am so ae roulam chu amo ha leima achongpu ae.

24Jisu na malung ol ripha ah ril, “Eja ah aol pi sa achongpu na Chungthieng rengram lutrang hi? 25Achongpu pa na Chungthieng rengram luttang hi chu yangkoosa na ahrim na sunga lut pa na lei tekkae.”

26Hana thei mee ngei na makolla sai, “Atu ngei na sanpi pha ang meh?”

27Jisu na sange, “Malmashi kolla uithukno ha Chungthieng kolla uithukno ti am no ae.”

28Hana Pitar na ril, “Anno! Kani inn hou phur weta nanuting kani na jui unge.”

29“Oh weh,” Jisu na manita ril, “Keina nangei kolla diekka rillinge Chungthieng rengram taranga atu jong akhana ma inn hou phurra anoleh anamei ah-u-ah nao manu mapa asanao limpa kasarukka houphur mee ha. 30Amo na atun apha hina pha hella akha chu phao angpa samla ringchanga atreem nei no wa ring ange.”

Woithum Suna Mathit Rang Jisu Rouril Na

(Mit. 20:17-19; Mak. 10:32-34)

31Jisu arui asom anie ta ruija shukveta manikolla “Anno aniek na Jerushalem ma thing ange rouphu ngeina meesanaopa taranga jeik sha rou makhai ha diek takka shuk kange. 32Amo ta meejat adangei kolla pe ange, hana manina nuiso ah ajak tukpi ah chilshak naph then ange amota. 33Mani na leima phit raiveta amota that tange chuti weta rungnie nathum sunija amo ha ringthou ange.”

34Chuti weta arui ngeina eheilimpa hi lunghal thei nea no ae hina rilna rou hi mani kolla chu athim hekti so ae akha chu Jisu na tronga am hi mani na dangpha nea no ae.

Mitcho Bunie Ta Jisu Na Dampi Na

(Mit. 20:29-34; Mak. 10:46-52)

35Jisu na Jerikho neija wakjuija. Lampi ahou wa mitcho spa akha amunt hana onga am ma eyongpa nieja am. 36Wairul riha na amota hella thing matheijuija amo na sai, “Nahi alo wa meh?”

37Manina makolla ril, “Nazareth ta Jisu ha hella thinga ae.”

38Amo na tappa aou, David sanao pa, “Jisu! Keita ringrei ngei pi oh!”

39Maitienga am malmashi ngeina amata trongsi rilla dai dikta am mo, chuti weta amo na hata hella tieng aou tekso, “David sanaopa! Keita ringrei ngei pi oh!”

40Chuna pa chu Jisu na ngirveta mitcho pa ha makolla ruija wak ranga trongsan pe. Amo na nei ja wak juija Jisu na makolla sai. 41“Nangna keita nataranga ejongpa tullu lu pi num ma che?”

“Arengpa,” Amo na sang, “Keina woihapa kamit ri num minge.”

42Jisu na makolla ril, “Chuleh chu namit ha ri jou oh! Nangoiring jarra nangta ahra wulpi so ae.”

43Hana chakka amo na hra bakta ripha so, akha chu amo na Jisu nutieng juija Chungthieng ta riemma dom ma wahrul riha na kom amota ri juija mani na Chungthieng ta chungtekka dom.

Currently Selected:

LUK 18: CHOTBSI

Highlight

Copy