RUIHNGEI TULLU 8

1Mani na amota that ae ti hi Saul na dangpha so.

Khristen Abom Ngei Ta Saul Na Aol Ana pek

Hani nani rungnie mak hai thou wa Jerushalem ma am khristian abom ngei ta ehekta aol ana pe thou so. Ahalsa rouron ngei ah no wa ngoiring limna Judea akha chu Samaria ah adang danga hran hlak so. 2Chungthieng ta ati ayak spa ahre na Stephen taranga olla tappa mani na ui so. 3Chu phao sunga Saul na khristian abom ngeita mangpi ranga inn thong chang honna amo na lut weta khrista ta ngoiring snu spa ngei ta rui ah shuk weta aral inn sunga shi so ae.

Samaria Ramma Ahra Rou Samna

4Khrista ta ngoiring meelim na amunt aram chang honna thinghappa mani na rou hi ril, 5Philip na Samaria hupi ajai ah lutta malmashi ngei ta rouhi ril. 6Wairul riha na Philip rouril hrabak ta ngei ah angakpi eja kom mani na ri pha so. 7Hrano muihla na malmashi eja ngei am na hai thou wa au wa shukka thing hana pum ahui athi sa kaetik eja na dam ri so. 8Chuna pa chu na hupi sunga ehekta ariem ma am so ae.

9Amunt hana Simon tipa spa akha kom am phur ae mamitranga Samaria mee ngeina aengak phura ae apha akha ah, amo na mathei chakka ril keikom ane alok akha inge. 10Chuna hupi hana am asin alok nei no wa meelim na marou ngei ae “mani na ril,” amo hi Chungthieng hina matik am meh chuna “amo hi ehekta matik am mee akha ae.” 11Chuna mani na makolla marou hrabak ta ngeinum meh, rouram chu apha sotta angakpi mani karra ri pi am jarra chuti weta mani na Philip rouril akha chu routhar ahra trongsan. 12Chuti weta Philip na Chungthieng rengram ma akha chu Jisu khrista hina routhar ahra trongsan rouril mani na ngoiring jarra snu spa lim na baptias ae so. 13Simon matak makkom ngoiringa nutienga baptias ae pi weta Philip hitta am ha ah angakpi eja mani ripi hata leima angak shuk kae.

14Jerushalem ma ahalsa rouron ngei na Samaria mee ngei na Chungthieng rou hi la su weta theipha ah mani na Pitar lea Johon ta mani am na hla so. 15Manui na tungjuija manui na ngoiringsa mee ngei taranga nie, ha chu mani ha muihla athieng ha pha shu oh ta. 16Rouram chu muihla athieng ha mani am na tungno songe; mani ha Jisu Khrista ming hata baptias ae ah chakkae. 17Hana Pitar lea Johan na mani chunga kut shi ah nie ah mani na muihla athieng ha pha ae.

18Simon na ahalsa rui kut na mani chunga shi nutienga ngoiring ngeina muihla athieng pha ri ah Pitar lea Johon ta amo na sum katte. 19Akha chu rouril, “Keita kom hajong manae yaitha pe pi oh, chulea chu atu jung akha ta kakut shi jui amo na muihla athieng pha shu oh.”

20Chuti weta Pitar na sang makolla, “Natak lea nasum ha sarmei kum ma thingo de rouram chu Chungthieng pek khuthul ta summa lei ah ngei hek nahal sa rukka! 21Nang hi ani tullu hina na sharuk tol no ae rouram chu nalung hi Chungthieng adit na tienga am no ae. 22Nalung hlonga hijong hrano na lungrang hi, hana arengpu kolla nie oh chulea amona hijong nahal lungrang ha ngakpi ranga. 23Rouram chu keina nangta ripha nea inge nalung hi anar rat akha na shihakta pak aral inn sunga am che ae.”

24Simon na Pitar lea Johon ta ril, “Kataranga nie pi oh, chulea chu nanui ril makhai hajong lung hal no ranga, akha chu kakolla hajong shuk no ranga.”

25Manui ring na lam ril sa nutienga arengpu rourilla Pitar lea Johon Jerushalem ma lea na manui inn lam tienga Samaria hasunga lutta lutta ahra trongsan rouril phur ae.

Philip Akha Chu Ethiopian Offisar

26Arengpu wanrui na Philip kolla ril, “Jerushalem hai thou wa Gaza natak tieng lam ma thing ranga sem sa jou oh.” (Na lam hi atun apha chu thingna nei no ae.) 27-28Chuna hana taranga Philip na sem sha thou wa thingso. Ethiopiah ram sunga Rengnu halla shi Ethiopiah Eunuch affisar ram sunga Rengnu halla shi Ethiopiah spa ha chu Jerushalem hai thou wa Chungthieng ta mok thing shu ah inn na shakor gari chunga kae lam ma Isaiah na rilphur rou ha pa ah lea ae. 29Muihla athieng na Philip ta ril “Thing weta shakor gari ha nei ah wa oh.” 30Philip na shakor gari am na nei ah wak jui ja Rouphu Isaih na jiek sha rou pat ta am thei pha ah makolla sai, “Napat ta na am ha nang na lunghal thei cha meh?”

31Hana offisar na sang, “Alo ta kei na lunghal thei ang meh atu jong akha na takpi no wa chu?” Hana pa chu amo na Philip ta kok weta shakor gari chung nga ma am na ah ong pi sho. 32Jieksha rou mapat ta am chu hi ae:

“Kelmo ta that tang nga rui ah thing hekta

hana amul tan na ephao atara shuk

no hekta amo na rouram kom akha phao ril shuk no ae.

33Haja mahrat akha chu madong

thei lim ha makolla ngei num no ae

Atu akha na matu mate hana tarang

nga rouril nea ang no ae,

rouram chu aleiram hina maringchang

hi atreem na so ae.”

34Offisar na Philip ta sai, Rouphu pa na “Atu taranga rou hi rilla meh? Kakolla ril pi oh, Matarang nga mo ano lea atu jong akha tarang nga meh?” 35Hana Philip na rouril thou so mapat na amunt hai thou wa Jisu hina ahra trongsan makolla rouril sho. 36Mani na hata lampi ah thing nga, offisar na ri, “Tui ahre hina am meh, keita baptias ae pi ah e shukkang meh?” 37Chuna Philip na ril, “Ejonga nalung sunga nang na ngoiring ta lea chu ngai ae.” Hana amona sanga ril, “Keina Jisu khrista hi Chungthieng sanao pa ae ta ngoiring ing nge.”

38Chuna pa chu offisar hata shakor gari ha ham ma shi rang rourilla manui ani Philip lea offisar na turel am na tumma jung weta Philip na amota baptias ae pi sho. 39Manui na tui sung nga thou shukka hang jui ja. Arengpu muihla na Philip ta rui ah thing so, Hana offisar na chu amota ri pha nieo ae, chutihakom malampi ah malea na ah ariem na shihakti so. 40Azotus amunt na Philip na tung nga wa ah Kaisariya ram hatta samma thinga ahu, ahu chang honna ahra rou trong rourilla thing nge.

Currently Selected:

RUIHNGEI TULLU 8: CHOTBSI

Highlight

Copy