LOBMUNG 51
51
1 # 51.1. Kók bokhorok: 2Sa 12.1-15. O Kaitor nini pái phlai ya hamjakma bai,
ano khairok ja di;
nini khairokma kwbángma bai
ani samung cha yarokno hu-ui pái di.
2Ani samung cha yano sú-ui khibi di,
ani sumsokno súcha ja di.
3Tamoni hwn ba ang ani samung cha yarokno saui mano,
tei ani sumsokrok ani bwskango pháng pháng.
4 #
Rum 3.4. Nini thani, katswi nini thani ang sumsok khlai kha,
nini mokol bai sitrajakmano’-no khlai kha,
hakhe nwng majra sa khlaima le sói se
tei nini buj thummabo srai-srai.
5Ao, ang le cha ya khe se achai-o,
amani ogo chujak phuruno ang sumsok gwnang.
6Nwng le bwkha bisingo se kubuino ton rwna hamjago;
aboni bagwi ani bwkha bisingo simung phrwngja di.
7Hisop bai ano súcha di, hakhe ang kwthar wngnai;
ano sú di hakhe ang kothor kwsapni slái kuphur wngnai.
8Ano bwkha srangma bai tongthokni kók khna rw phi di;
nwng bai sukhrupjakma bekrengrok bwkha srang thung.
9Ani sumsokno ta naisik si di,
tei ani samung cha yarokno hu-ui pái si di.
10O Kaitor ani bisingo bwkha kuphur snam ja di,
tei ani bisingo kwtal tei sói bwkhano rw di.
11Ano nini bwskangni ta rwkhlai ja di,
tei nini phola kwtharno ani oroni tlangwi ta pái ja di.
12Nini mwthangmani tongthokno ano rw phi ja di,
tei nini muchung tẃi tongna muchungnai bwkhano rwui ano songcha di.
13Hakhe ang samung hamya tangnairokno nini lamano phrwngnai,
tei sumsok gwnangrok nini thani kiphilnai.
14O Kaitor, o ano mwthangnai Kaitor,
ang thẃi kochok rwmani ano phiyók si di,
hakhe ang khorang kotor khe nini phiyókmungno tẃi rwchapnai.
15O Subraiyung, búkhúk kiyok rw di,
hakhe ang nono lobwi mannai.
16Tamoni hwn ba nwng ratharwi yapharmarokno bwkha phurjak ya;
tumung ang sógwi yapharmung yaphar khebo
nwng bwkha phurjak glak.
17Bwkha kwbai bwkha bai yapharmarokno se Kaitor yachago;
o Kaitor nwng bwkha kwbai khairoksusuk bwkharokno khibi glak.
18Nwng Siyonno kaham muchungma bai bini kaham khlai di,
Jerusalemni chokdeualrokno tisa phi di,
19aphuru khe sói khe ratharwi barokmarokno,
sógwi yapharmano tei bebak sógwi yapharmarokno bwkha phurjaknai;
aphuru khe nini háyá-o musuk chwlarok barokjaknai.
Kaitorni buj thummani tei khairokmani
Idomsa Doeg Solno Daud Ahimelekni nogo tháng kha hwnwi saui phuruni: Daudni rwchapmung
Currently Selected:
LOBMUNG 51: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
