YAPHANG 31

Jakob Labanni aroni khármani

1“Jakob chini aphani bebakno na bai kha; bini rang rírok bebakno chini aphani aroni máng se.” hwnwi Labanni bwslasong sa laiwi tongmano Jakob khna kha. 2Jakob naiwi nai ba Laban bono swkango bono nuk tẃi khe nuk li ya. 3Hakhe Subraiyung bono hai hwnwi sa kha, “Nwng nini nwphani tei nini sandai masarokni ha-o kiphilwi tháng di. Ang nwng bai baksa tongnai.”

4Hakhe Jakob Rahel bai Leano bini merarok tongmani a hapharo phai di hwnwi ring rw rohor kha tei 5bórokno hai hwnwi sa kha, “Nwpha swkango ang bai tongma tẃi khe tei tabuk tong li ya; tamo khe ani aphani Kaitor le ang bai’-no tongwi phai-o. 6Norok khoroknwi’-no si-o, ang nwphani bagwi bebak phan rwui samung tangwi phai kha; 7aile bo khe ano bandi kha tei uáichi ani dormaino slái kha, tamo khe Kaitor bono ani mungsa hamya khlai rw li ya. 8Bo ‘A merengrok nini manthai wngnai’ hwn khe bebakno mari gwnang máng bá kha, phiya ‘Brang brang bumul gwnangrok nini manthai wngnai’ hwn khe bebakno brang brang bumul gwnang mera bwsa bá kha. 9Omo hai kheno Kaitor nwphani pun merarokno naui ano rwui rw kha. 10Pun merarok ogo bwsa wng laima jora-o, ang imang kaisa nuk kha, punjuarok, pun-merajwkrokni saka-o kasanairok bebakno merengrok, metrengrok, brang brang marirok gwnang máng. 11Kaitorni suari imango ang bai nukjagwi ‘Jakob’ hwnwi ring khe ang ‘I’n ang orono!’ hwnwi sa kha, 12hakhe bo hai hwnwi sa kha ‘Khorok tisaui naisik di, bebak pun mera bodolni pun merajwkrokni saka kanai punjua merarok bebakno metrengrok, brang brang mari gwnangrok máng. Tamni hwn ba ang Laban nono bebak khlaimarokno nuk kha. 13#Yap 28.18-22.Ang wng kha Bethelni Kaitor, nwng holongni thongla káiwi thok lu-ui ani thani swmai tangma a Bethelo nwng bai nukjaknai a Kaitor. Hakhe tabuk nwng bachaui o hani nongkhorwi nini achaima ha-o kiphilwi tháng si di.’ ” 14Hakhe Rahel bai Lea bono hai hwnwi sa kha, “Chini aphani nogo chini bagwi aro mungsa phano mannani kwrwi kha da? 15Chwng bo bai buini hani borokrok hai khe se tonjago ahai ya diba? Bo chwngno phalwi rw kha, chwngno phalwi rang manma bebak rangrokbo swbaiwi tong kha. 16Kaitor chini aphani aroni tlangwi thángma rangrok bebakno chini tei chini bwsarokni máng se; hakhe tabuk Kaitor nono samani tẃi’-no khw se khlai si di.”

17Hakhe Jakob tiyar wngwi bwsarokno tei bihiksongno mangingang saka-o kasa rw bai kha; 18tei bo bini tong kwrwi pun-merarok mal-matarokno bebakno bo Padan-aramo yago chopma mal-matarokno béngkhlaiwi bupha Isakni Kanan ha-o thángna bagwi lam rw kha. 19Laban khe bini merarokni buikhumu rana bagwi thángo, aphuru khe Rahel buphani núkhungni mwtairokno khok kha. 20Jakob, Aramiasa Labanno bo khárna naimano si rw li ya. 21Bo bini tong kwrwi tẃi naui khár lang kha tei Uphratis twimano bárwi hachuk phaisingni ha Giliad bwkhak lam rw kha.

Laban Jakobno riphrik rwkmani

22Nokha salthamni ulo khe Jakob khár kha hwnwi Laban sajak kha. 23Laban bini borokrokno tẃiwi salsni romwi Jakobno hathái ha Giliad jora thángwi bono slap tẃi slap tẃi wngwi kha. 24A horo Kaitor Aramiasa Labanni thani phaiwi bo bai imango nukjagwi bono hai hwnwi sa kha, “Khna di, nwng Jakobno tháisa phano kaham hamya ta sa di.” 25Hakhe Laban Jakobno slabwi kha. Aphuru Jakob khe hachuk saka-o bini rí nok swngwi tong kha, hakhe Labanbo hachuk saka-o bini borokrok bai khe aro sók phai kha.

26Laban Jakobno hai hwnwi sa kha, “Nwng tamoni bagwi ano bandi lang tei ani sajwksongno choba-o romwi tlangjaknairok hai khe tubu-ui phai lang? 27Nwng ba tamo ano sa yaui sereksa khe bandiui ma khár lang? Ang ba bwkha srangwi’-no, rwchapma bai kham bai khum bai khe nono rohorwi man kha mun ya diba? 28Nwng ano tamoni angsukrokno tei sajwksongno motom su rwui nairwgwi rohorna rw li ya wng lang? Obo le nwng butuani samung tang kha. 29Nono dera rwnani ani phan tongo; tamo khe nwphani Kaitor ano miya horo nono ‘Mungsa kaham phano eba hamya phano ta sa di’ hwnwi sa kha. 30Ang saui mano nwng nwphani hano belai khe khátangjak kha, phiya ba nwng tamo ani nokni mwtairoknoba ma khok lang?”

31Jakob Labanno hai hwnwi sa kha, “Nwng nwsajwksongno ani aroni segwi na anw hwnwi khákaui ang kiri kha. 32Tamo khe nwng oro tongnairokni bere khoroksa swkni aro nini mwtairokno man khe bono butharwi páijaknai. Oro bebak ani borokrokni bwskango, oro nini mungsa swk da tong nai di, tong khe abono naui pái di.” Tamo khe Rahel Labanni núkhungni mwtairokno khokma khe Jakob saui man ya.

33Hakhe Laban Jakobni ríni nogo; Leani ríni nogo; tei khoroknwi selengjwkrokni ríni nogobo naitugwi kha, hai phano bo bini mwtairokno man li ya. Ulo khe Leani ríni nokni ongkhorwi Rahelni ríni nogo tháng kha. 34Rahel núkhungni a mwtairokno khogwi mangingang saka-o achukthai snamjak rí bisingo huiwi a saka-o achugwi tong kha. Laban ríni bebak nogono naituk kha, tamo khe man li ya. 35Rahel buphano hai hwnwi sa kha, “Nwng ano ta joli di, tamni hwn ba ang nini bwskango bachaui man glak kho, ang sak tangwi man ya wngwi tongo.” Hakhe bo naituk phano bini núkhungni mwtairokno man li ya.

36Hakhe Jakob jolijak kha tei Laban bai uálai kha; aphuru khe Jakob Labanno hai hwnwi hwn kha, “Ang tamo samung hamya tang kha ba? Bubo tẃi cha yani bagwi aswk joliui ano ma riphrigwi phai lang ba? 37Nwng tabuk ani nok gwnangwini bebak manwirogo naitugwi naiwi nini nokni tamo manwino man lang ba? Tabuk omono nini borok bai ani borokrokni bwskango ton si di, bórokno saboni cha cha ya chong si thung. 38O nokha bisik nwichi ang nwng bai se tongo; nini merarok tei punjwkrokni bwsabo chokhrai ya tei angbo nini mera bodolni mera masabo chá ya. 39Bolongni yabrwirok bai mera masa swk phano butharjak khe, ang abono nini thani tubu ya; tamo khe ang se baithang abono nono su-ui rw-o. Salo da khokjak horo da khokjak nwng abórokno ani thani kiphilwi na-o. 40Salo khe ang belai satung manjak kha tei hor kwbángma’-no kwchangma manjak kha, ang thu-ui man li ya. 41O nokha bisik nwichi ang nini nogo máng se; nwsajwk khoroknwini bagwi ang nono nokha bisi chibrwi mon kha tei nokha bisi dok nini mal-matarokno mwrwk kha, nwng ani mulani rang uáichi slái kha. 42Ani aphani Kaitor tei Abraham bai Isakni Kaitor ang bai kwrwi hwn khe nwng bu masíngo’-no ano yak bukcha khe rwkhlaiwi rohor kha mun. Tamo khe Kaitor ani tong kesepno tei ani samung tangmano nugwi thángnai horo nono khorai kha.”

Jakob bai Laban kók kha laimani

43Laban Jakobno hai hwnwi kiphilwi sa kha, “O bwrwimasong ani sajwksong máng; bórokni bwsarokbo ani’-no, o mal-matarokbo ani mángno, oro nukmani bebakno ani máng se. Tamo khe tinini salo ang o ani sajwksongno eba bórok bámani bwsarokno tamo khlaiwi man sinai? 44Phai di tabuk nwng bai ang kók khaui swmai tang sinai; abo nwng bai ani sakki wng si thung.”

45Hakhe Jakob holongdap kaisa naui thongla kái kha. 46Jakob bini sakni borokrokno “Holongrok thum di,” hwnwi sa khe bórok holong naui rúngwi chong chong khe tisa kha; tei bórok a holong burungni samo khe chá lai kha. 47Laban abono Jagar-Sahadutha#31.47: Jegar-sahadutha: O bumung Arami kók bai khe chwngno muitu wng rwnai hwnma se. hwnwi mung phar kha; tamo khe Jakob khe abono Galid hwnwi mung phar kha. 48Laban hai hwnwi sa kha, “O holongni burung’-no tini nwng bai ang swmai tangmani mari.” Aboni bagwino bo abono Galid#31.48: Galid: O bumung Hibru kók bai chwng muitu wng rwnai burung hwnma se. hwnwi mung phar kha. 49Hakhe bo holong káimano khe Mijpa#31.49: Mijpa: O bumung Hibru bai tongwi naichomthai hwnma se. hwnwi hwn kha; tamni hwn ba “Subraiyung se nwng bai ang kak laima yagulo chwngno nainaisa. 50Tumung nwng ani sajwksongno sátok khe eba ani sajwksong tong twtwi tei kubun bwrwirok na khe, muitu narwk di chwng bai tei kubun borok kwrwi phano, chwng khoroknwini bisingo Kaitor tongo.” 51Hakhe Laban Jakobno hai hwnwi sa kha, “Nini bai ani kwcharo o holong rúngjak bai thonglano naisik di. 52O rúngjak holong burung bai thongla wng kha chini bagwi kók sachu rwnai, ang o holong burung tei thonglano láiwi nini ayang tháng glak tei nwng’-bo o holong rúngjak bai thonglano basu-ui hamya samungni bagwi ani yang phai man glak. 53Abrahamni Kaitor, Nahorni#31.53: Abraham, Nahor: Abraham khe Jakobni búchu tei Nahor khe Labanni bupha. Kaitor chwng khoroknwino buj thumnai.” Hakhe Jakob bupha Isak khulumma Kaitorni mungwi o swmaino narwknai hwnwi kwrak khe swmai tang kha, 54hakhe Jakob mui masa ratharwi hathái-o barogwi bini borokrokno auang chánani kobok hor kha; bórok chá lai kha tei horo a hathái-o hopung tong lai kha. 55Teini phung aisirisiri Laban bacha kha tei thángwi busuksongno, bwsajwksongno motom su kha tei hamari rw kha; hakhe bo aroni lam rwui nogo kiphilwi phai kha.

Currently Selected:

YAPHANG 31: KOKBSI

Highlight

Copy