YAPHANG 29

Jakob Labanni nogo sógwimani

1Hakhe Jakob thángte thángte salkabaini borokrok tongmani ha-o sók phai kha. 2Bo aro hapharo twikhor khorsa nuk kha, abono kiting laiwi mera bodol kwthamrok roko laijak; aroni’-no merarokno twi khanjago. Twikhor khe holong bai khe kholopjak, 3bebak mera bodolrok aro sók phai khe mera mwrwknairok o holongno norwi merarokno twi khano; aboni ulo khe abono kholobwi ton phiro.

4Jakob mera mwrwknairokno hai hwnwi sẃng kha, “Takhukrok norok buroni wng bai kha?”

Hakhe bórok “Chwng Haranni se” hwnwi sa kha.

5Bo bórokno hai hwnwi sẃng kha, “Norok Nahorni bwsla Labanno si da sini?”

Hakhe bórok “I’n chwng sini-o” hwnwi sa lai kha.

6Bo bórokno hai hwnwi sa kha,

“Bo kaham kwrwngda tong?” Bórok sa kha, “I’n bo kaham kwrwngno tongo; iko naisik di bwsajwk Rahel merarok bai baksa phaiwi tongo!”

7Bo hai hwnwi sa kha, “Nai di tabukbo sal kolokma tong kho, tabuk merarokno thumna jora wng ya kho; merarokno twi khanwi mwrwgwi phi di.”

8Tamo khe bórok hai hwnwi sa kha, “Mera bodolrok bebakno kwrẃngsa khe kuthum khe se chwng twikhor kholopma holongno noro; hai khe se merarokno twi khano.”

9Bo bórok bai kók sa laiwi tong phuru Rahel buphani merarokno tubu-ui phai kha; tamni hwn ba bo buphani merarokno mwrwgo. 10Aphuru khe Jakob bini bumani takhuk Labanni bwsajwk Rahelno nuk khe, bo bumani takhuk Labanni merarokno tubu-ui phai kha, hakhe Jakob thángwi a twikhorni kholopma holongno norwi bumani takhuk Labanni merarokno twi khan kha. 11Hakhe Jakob Rahelno motom su-ui khorang kotor khe kap kha. 12Jakob Rahelno bo bini buphani jaiti, Rebekani bwsla se hwnwi sa kha; hakhe bo khachigwi thángwi buphano saui kha.

13Laban bini bukhukni bwsla Jakobni kókno khna kheno bo bo bai malaina khachigwi tháng kha, hakhe malaiwi kwbagwi motom su kha tei nogo tubu-ui phai kha. Jakob Labanno bebak kókrokno sa bai khe, 14Laban bono hai hwnwi sa kha, “Nwng sói ani bahan-bwthẃi se!” Hakhe bo bo bai talsa tong kha.

Jakob Rahel tei Leani bagwi Labanno monmani

15Aphuru khe Laban Jakobno hai hwnwi sa kha, “Nwng ani sandai ba, nwng ano hai’-no da monthai klai ba? Sa di nini mula bwswk wngnai?” 16Labanni bwsajwksong khoroknwi tongo; okrani mung khe Lea tei kusuni mung khe Rahel. 17Leani khe mokol naithok ya tamo khe Rahel khe sakduk tei bwrwibo naithok.

18Jakob khe Rahelno hamjago; hakhe bo hai hwnwi sa kha, “Ang nwsajwk kusu Rahelni bagwi nokha bisi sni nono monwi tongnai.”

19Hakhe, Laban hai hwnwi sa kha “Kubun chwlano rwmani slái nono rwmani’-no ham kugo; ang bai’-no tong di.” 20Hakhe, Jakob nokha bisi sni Rahelni bagwi monwi tong kha, bo bono aswk hamjakmani bagwi aswk salno sal kisicha se wngjak si-o.

21Hakhe Jakob Labanno hai hwnwi sa kha, “Ani bwrwino ano rw si di, ang bono tẃiwi tong sinai, ang kók khamani jora pái kha.” 22Hakhe Laban aroni bebak borokrokno thum kha tei chámung panda kaisa khlai kha. 23Tamo khe Laban sal tháng khe Leano Jakobni thani tubu-ui rw phai kha; tei Jakob bo bai thu kha. 24(Laban Jilpano bwsajwk Leani selengjwk wngna bagwi rw kha.) 25Phung ai khe nuk kha abo Lea se; aphuru khe Jakob Labanno sa kha, “Nwng omo ano tamo khlai lang? Nwng tamo ano bandi lang? ang Rahelni bagwi monma ya diba?”

26Laban sa kha, “Chini o ha-o okrano kái yaui kusuno káiwi man ya. 27Omo bai nokha salsni pung gra di, ano tei nokha bisisni mon khe ang nono tei khoroksanobo rwnai.”

28Jakobbo ahai’-no khlai kha, bini salsnino supung khe, Laban bono bwsajwk Rahelno kái rw kha. 29(Laban Bilhano bwsajwk Rahelni bagwi selengjwk rw kha.) 30Hakhe Jakob Rahel baibo thu kha, bo Rahelno Leani slái hamjak kuk kha, phiya Labanno tei nokha bisi sni monwi tong kha.

Jakobni núkhungo chwrai achaimani

31Subraiyung Leano norjagwi tongma nuk kha, hakhe Bo bono bwsa man rw kha. Rahel khe banji wng kha. 32Lea sakderiya wngwi chwla bwsa khoroksa bá kha tei bo bono Ruben#29.32. Ruben: O mung khe Hibru kók bai “bwsla khoroksano nai di” tei “jwngjal kwbángma nuk kha” hwnma bai baksa. hwnwi mung phar kha; tamni hwn ba Lea sa kha, “Subraiyung ang sátokjakmano nuk kha; tabuk le ani angsai sói khe ano hamjaknai.” 33Bo hai’-no hai sakderiya wngwi tei khoroksa chwla bwsa bá khua; hakhe bo hai hwnwi sa kha, “Ang norjakmano Subraiyung khna kha, bo ano o bwsanobo rw kha”; tei bo bini mung Simion#29.33: Simion: Omo Hibru kók bai “Khna-o” hwnma bai baksa. hwnwi phar kha. 34Haino hai bo sakderiya wngwi tei khoroksa chwla bwsa bá phi kha; hakhe bo hai hwnwi sa kha, “Tabuk le ani angsai ang bai tong sinai, tamni hwn ba ang bini bagwi chwla bwsa khoroktham bá kha”; aboni bagwi bini mung Lebi#29.34: Lebi: Hibru kók bai omo swrabwi tongnai hwnma bai baksa. wngnai. 35Haino hai bo sakderiya wngwi chwla bwsa khoroksa bá phi kha, hakhe hai hwnwi sa kha, “Tabuk le ang Subraiyungno lob sinai”, aboni bagwi bo bono Juda#29.35: Juda: Hibru kók bai o mung khe “Lobsa-o” hwnma bai baksa. hwnwi mung phar kha; hakhe bo bwsa thak kha.

Currently Selected:

YAPHANG 29: KOKBSI

Highlight

Copy