YAPHANG 14
14
Abram Lotno phiyókmani
1Sinarni habugra, Armaphel, Ariok Elasarni habugra, Elamni habugra Khedorlaomer tei Goimni habugra Tidalsongni jora-o, 2o habugrarok Sodomni habugra Bera bai choba nang lai kha, Gomorani habugra Birsa, Adamani habugra Sinab, Jeboimni habugra Semeber tei Belani (abo Joar se) habugrarok bai khe choba nang lai kha. 3A bebak kwthajak phanrok Sidimni harungo (abo wng kha sómni twijlang) kuthum lai kha. 4Nokha bisi chiknwi bórok Khedorlaomerno monwi tong kha, tamo khe, nokha bisi chitham phuru khe bórok kebengwi bacha lai kha. 5Nokha bisi chibrwi phuru khe Khedorlaomer bai bini kwtha laijak habugrarok bórokni sengkrakrokno tubu-ui Asterot-Karnaimni Rephaimno, Jujimni Hamno, Sabe-kiriyathaimni Emimno 6tei Horsong tongmani hathái Seirni simi hasing panthorni páithak Elparan jorani hano mechen kha 7ulo khe bórok uphilwi Enmispato kiphilwi phai kha (abo wng kha Kades), bórok bebak Amaleksarokni hano segwi na kha tei Hajajon-tamaro tongnai Amorsaroknobo mechen kha.
8Hakhe Sodomni habugra, Gomorani habugra, Admani habugra, Jeboimni habugra tei Belani (abo wng kha Joar) habugrarok Sidimni harungo ongkhorwi thángwi 9Elamni habugra Khedorlaomer, Goimni habugra Tidal, Sinarni habugra Amraphel tei Elasarni habugra Arioksong bugra khorokba habugra bai nang lai kha. 10Hakhe Sidimni harung khe alkatrani hakhor bai máng se kupulung; Sodomni habugra bai Gomorani habugrasong chobani khárwi tháng phuru khe bórok baksa hakhoro klai kha, tamo khe tei baksa khe hathái-o khárwi yók kha. 11A kebengnairok Sodom bai Gomorani bebak manwirok na kha tei chámungrokbo tlangwi tháng bai kha; 12bórok Abramni takhukni bwsla Sodomo tongnai Lotno tei bini manwi-khwnwiroknobo tlangwi tháng lai kha.
13Tamo khe borok khoroksa yógwi phaiwi Hibrusa, Abramno bebakno sa phai kha, bo Amorsa Mamresongni Uk buphangrok tongma-o tongo; Mamre tei bini takhuk Eskol bai Anersong khe Abram bai kwthajak. 14Abram bini takhukni bwslano romwi tlangjak kha hwnwi khna kheno, bo bini núkhungni bebak choba kwrwngrokno kwrẃngsa-o khe ring kha, bórok bebagwi khorokthamra chichar ká-o, bórok bórokno riphrigwi Dan jora tháng lai kha. 15Aro bo bini borokrokno gut-gut khe khak kha, horo khe arirokno swpragwi mechen kha. Bo bai bini borokrok bórokno Damaskosni salgrabai Hoba jora riphrigwi rwi kha. 16Hakhe tlangwi thángjakmani manwirok kiphilwi na phi kha tei bo bini takhukni bwsla Lotno tei bini manwirokno, bwrwirokno tei bebak borokrokno kiphilwi tubu kha.
Melkisedek Abramno hamari rwmani
17Abram, Khedorlaomer bai bini pal habugrarokno mechenwi kiphilwi phai khe, Sodomni habugra Sabeni harungo bo bai malaina tháng kha (Abo habugrani harung). 18#Hib 7.1-10.Salemni habugra Melkisedek auang tei angur bwtwi tubu-ui phai kha; bo wng kha Kaitor Kotorni#14.18: Kaitor Kotor: Hibru kók bai “El Elyon”.Ochai. 19Bo bono hamari rwui hai hwnwi sa kha, “Nokha bai ha snamnaisa Kaitor Kotor, Abramno hamari rw thung; 20tei arirokno nini yago yapharwi mechen rwnai Kaitor Kotor lobjak thung!” Hakhe Abram bono bebakni chi-o kaisa khe rw kha.
21Sodomni habugra Abramno hai hwnwi sa kha, “ani borokrokno ano rwui rw di, tamo khe manwi-khwnwirokno khe nwng’-no na bai di.” 22Abram Sodomni habugrano hai hwnwi sa kha, “Nokha bai ha snamnaisa Kaitor Kotor Subraiyungni mungwi ang swmai tangwi sa-o, 23ang nini khutwng twngsa swk eba yaklap buduk twngsa phano narwk glak, omo hai khe nwng ‘ang se Abramno gwnang khlai rw-o’ hwnwi saui man glak. 24Ang ani bagwi mungsabo na glak. Ani siklarok chámarokno simi se ang nai-o, ang bai pal thángnairok; Aner, Eskol tei Mamresongno simi bórokni manthaino rwui rw di.”
Currently Selected:
YAPHANG 14: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
