YAPHANG 11
11
Babelni nok kuchuk
1Yaphango ha gwnangwi’-no borokrokni kókmung-kókrok thansa se tei kóktháirokbo kisa. 2Borokrok salkabaini thángwi bórok Babilonni hapharno nuk kha tei aro’-no kami kha ka. 3Bórok khoroksa tei khoroksano hai hwnwi sa lai kha, “Phai di chwng it tagwi sógwi rak rw lai anw.” Hakhe bórok nok tangna bagwi it tei abono chwrap rwna bagwi belengtwi man kha. 4Hakhe bórok hai hwnwi sa lai kha, “Phai di chwng chini bagwi kamiyung tang lai anw tei nokha jora kuchuk khe nok kuchuk khungsa tisa lai anw tei chini mung rw lai anw, omo hai khe chwng ha gwnangwi pisa-piring wng ya tẃi kurum-kuthum khe tongwi man lai anw.”
5Hakhe, Subraiyung borokrok tang laimani u kamiyungno tei a nok kuchukno naina bagwi nongkhorwi phai kha. 6Subraiyung hai hwnwi sa kha, “Nai di bórok borok kaisa se tei bórokni kókmungbo kaisa; tei omono bórok tamo khlaino aboni cheng grama se, phiya bórok khlaina hwnwi chap laimano tei samung cha rwui man glak kha. 7Phai di, chwng nongkhorwi thángwi bórokni kókno gothok lai ya khlaiwi rwui khoroksa bai tei khoroksano tamo sa kha romwi man lai ya khlai rw lai anw.” 8Omo hai khe Subraiyung bórokno ha gwnangwi’-no pisarwi rw kha tei bórok o kamiyung tisama yakarwi tháng lai kha. 9Aboni bagwi’-no abono Babel#11.9: Babel: O mung khe Hibru kók bai “Sabul-nabul” hwnma hai. hwnwi mung pharjago, tamni hwn ba Subraiyung aro’-no ha gwnangwini borokrokno kók gothok lai ya khlaiwi rw-o tei Subraiyung aroni’-no bórokno ha gwnangwi koproi rwui rw-o.
Semni bosongrok
(1Bo 1.24-27)
10Omorok wng kha Semni bosongrok: twi kotorni nokha bisik nwini ulo Semni umor nokha bisi sara phuru bo Arpaksad hwnwi bwsa chwla khoroksano man kha; 11tei Sembo Arpaksad achaimani ulo nokha bisik bara thangwi tongwi tei kubun chwla tei bwrwi bwsarokno man lang kha.
12Arpaksadni umor nokha bisi thamchiba phuru khe bo bwsa chwla Selano man kha; 13aboni ulo bo tei nokha bisik brwithamra thangwi tongwi tei kubun bwsarokno man kha.
14Selani umor nokha bisik thamchi phuru bo bwsa chwla Eberno man kha, 15aboni ulo Eber achaimani nokha bisi brwiratham kwthang tongwi Sela teibo kubun bwsarokno man kha.
16Eberni umor nokha bisi thamchibrwi phuru bo bwsa chwla Pelegno man kha; 17aboni ulo bo teibo nokha bisik brwirathamchi thangwi tongwi tei kubun bwsarokno man kha.
18Pelegni umor nokha bisi thamchi phuru bo bwsa chwla Reuno man kha, 19aboni ulo bo teibo nokha bisik nwirachuku thangwi tongwi tei kubun bwsarokno man kha.
20Reuni umor nokha bisi thamchinwi phuru, bo bwsa chwla Serugno man kha; 21aboni ulo bo tei nokha bisik nwirasni thangwi tongwi tei kubun bwsarokno man kha.
22Serugni umor nokha bisi thamchi phuru bo bwsa chwla Nahorno man kha; 23aboni ulo tei nokha bisi nwira thangwi tongwi tei kubun bwsarokno man kha.
24Nahorni umor nokha bisi nwichichuku phuru, bo bwsa chwla Terano man kha; 25aboni ulo bo tei nokha bisi sarachichuku thangwi tongwi tei kubun bwsarokno man kha.
26Terani umor nokha bisi snichi phuru khe bo Abram, Nahor tei Haranni bupha wng kha.
Terani bosongrok
27Omorok wng kha Terani bosongrok. Tera wng kha Abram, Nahor tei Haranni bupha; tei Haran khe Lotni bupha. 28Haran bupha kwthang tongsani’-no bini achaima ha Kolodiarokni Ur kamiyungo thwi kha. 29Abram Saraino káijak kha tei Nahor khe Haranni bwsajwk Milkano káijak kha, bo wng kha Iskanibo bupha. 30Sarai khe banji; bwsa man ya.
31Tera, bwsla Abram tei busuk Haranni bwsla Lotno tei bahamjwk Sarai Abramni bihikno tẃiwi Kolodiarokni hani Ur kamiyungni nongkhorwi Kanan ha-o thángna bagwi lam rwui tháng kha. Bórok kwchalma Haran jora tháng kha tei aro kami khaui lai kha. 32Tera aro nokha bisik nwiraba wng khe Harano thwi kha.
Currently Selected:
YAPHANG 11: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
