MARK 9

Jisu Pu rhi thi küde küta

1Pu uko ce po die, I nekoce potü süto, Hice tha kübako humie Poo küde kuku süh küvori ngo kümothe küsa ngo lhozo, zita.

Jisu Pu rhi thi mükre küta

2Sülize zho shorüh sa Jisue Peter, jakob mu John uko züh die mükhrüh no kresü cejütu kürükrü püyo khota, sidie Pu süko mhuzü lüno Pu külhü thi küdeyi ta. 3Mu Pu khüneko vekrü mu müga püh makrekro bi die cejülü khümüne pühri thi kümüga püh süsü biyi külhopü thita. 4Mu puko Elijah Moses züh die Jisu puko kürüthi küba ngota. 5Süze Peter Jisu ce po die; Kümüthao uko hicehi ba lize uko la veto le. Mu uko pro süh thiyi khe; püh nla mu püh Moses mu püh Elijah la, zita. 6Kükrelamori, uko müprühri küta la pu dipüh poto sheli küti lüyi mo küta la. 7Sücesü kümhü püh vori die puko süh püyita. Mu kümhülüno mhakhü püh vori die, hihi anu a khrüo zo, Pu khü rünyiyite, zita. 8Mu süzi sü mütha pukoe lico hico pesü eli Jisu mu puko sa mi kükremi pühri ngo sa mota. 9Sidie puko cejütu yono ta kiri küzüce pue pukoce; Thümanuo rhülasü ta kümothe pukoe dipüh ngo sheli ti püh mipühceri pohi nota. 10Sidie pukoe rhülaküsü sü puco dipüh sheli küti puko tho puko dolü kütso küga bata. 11Sidie pukoe Pu kütso die; Elijah po vori müra mosü lie lüsiküsekoe pota mome? zita. 12Süsa Pue puko zü küla die po küti; Elijah vori die mha mütü thi nve lasü to lizi sü kütho; sülize dibi die thümanuo la; Pu po mha kükrolü kümüzhe mu mi po Putha to, zi küti thopüh müta la? 13Süri I nekoce po süto; Elijah ri vori vazo, sidie pu jüh thopüh kümüta bi die pukoe puyo dipüh püh thinyi sheli thive.

Jisu thürüküsü züh küta nu püh thi nve küsü

14Mu Pu müthaküyiko ce pheri tice thüma krode püh puko hu püba mu lüsiküsekoe püko züh kümüli küba ngoyi. 15Süze thüma kro süko mütü pungo sü mütha puko malhü thi die ta Puce vori Pu külu ta. 16Süsa Pu lüsiküseko kütso die sü; nekoe dipüh süh puko züh kümüli bala? 17Sücesü thüma kroo dolüno mipüh Pu khü küla die; Kümüthao I anu züpokütho rüpü püh po u kübü ta küta züh nce vori züle, kühopührari pu kübü vori lize pu nü kütu vava yo, sidie pu mhütsa rügwi rhührhüh die pu hu thüzheyi tayo, süsa pu rükhato die sü mama ta züle! 18I nsadziko po süo huva no die sho sü eli pukoe huyi mote, zita. 19Süsa Pu süko zü küla die Hu! Mülü kümo shuyeko; I zho didüpüh neko züh bata? Pu züh ace vorite, zita. 20Süze pukoe züh Puce vori, mu Pungo küsüce rüpüoe pu müthi shühta, sidie pu rütu cejü prü die pu mhütsa mülu mu rükhürüla züta. 21Mu Pu süo ce süsübi küta di tüthepüh teshi küti kütso, mu pue pu natsilü no süzi süri ta lizi sü. 22Sülize pub rü müsu va kütola tsükünu pu kügü püh melü ri sü mu zülü ri süyo, süla no mhahu thiyive lize ha phimüzhe die ha khrühi süte, zita. 23Süsa Jisu pu yisü; no mülüyi lize mülüküyimi la mha mütü thiyi ve zo, zisü. 24Süzi sü mütha nu süo poe kra pu mhüzü krüh zo die; sü Nyepoo iri mülü bazo, akümülü küthathi hi khrühi süyi, zita. 25Süsa thüma kroo ta kühu vori küzü ngo sü die, Jisue müsa kümo rüpüo küthi die sü; züpokütho mu niji rüpü, I nce po süyo, no pu yono ta prari tayi mu puyo lalü sahite, zita. 26Süsa rüpü süo müto mu pu müthi shüh sü die prarita. Sidie pu küsami bi pü züta; thüma kükroe pu yisü sazüte lizita. 27Süri Jisu pu be ceyi die pu phu müsü mu pu süthayi ta. 28Süze pu ceo lü, lü küyice müthaküyiko mükhrüh Pu kütso die sü; dipüh la hako tsüo huyi mota la? Zita. 29Pu puko yisü; küsho mu kümvo lüno zo kümosa mha hipühi prayi yomo, zita.

Jisu putho Pu süh jüh küpo

30Mu puko sülüno tasü Galilee cejü püthü vota, sülize Pu mipühri po süo senyi bamo. 31Sülize Pu Pu sadziko mütha die pukoce po küti; Thümanuo tüpüh mi belü sü die Pu dokhrito; mu Pu dokhri küvasa Pue zho süh nha rhüla sü tato. 32Süri pukoe zü süo seyi mota, eli Pu kütso müprüh ta. 33Süsa puko tasü Kapenamlü voriyi, sülize puko cepühlü lüri küyice; pue puko kütsodie sü; nekoe sholüno nekotho neko dolü dipüh po kümüli ta la? Zita. 34Eli pukoe zühta kükrelamori, puko huhu yisü sopüh-e küzhotho thito sheli kümüli ta küta la. 35Sübi ba die Pu müthaküyiko ci sü die puko yisü; mhaceno thüma kühopüri küra thoo thinyi lize pue mütüko dolü künuthoo thita to, mu mütüko cetao thita to. 36Sidie Pu natsimi püh züh vori puko dolü süyi; mu Pu süo rhapühyi die sü puko ce; 37Thüma kühopühri a zalüno natsimi hihi bi kütiko zühyiyo lize, azühri yiyo. Mu kühopühri a zühyi yo timi a züh küyi zo mori a kütsüh küsüo ri zühyiyo.

U phimu ta kümomi sü uceco zo

38Sücesü John Pu zü küla die sü; Kümüthao, humi n za lüno küsu rüpüko huta die hakoe ngo; eli pu u sa müdzi yomo; mu pue u samüdzi kümola hakoe pu khave; zisü. 39Süri Jisu sü; Pu khahite, kükrelamori, mipühri a zalüno kuku mhatho thita die rükri lasü athata yilho tila. 40Kükrelamori, u mütsuta kümoko sü uceco zo. 41Mu thüma kühopühri neko yi Khrista zü lie no a zalün züko hepühri püh neko po krayo lizo, I neko ce potü süto, mhapühceri pu zhokhro müdi vayi lhozo. 42Sülize thüma kühopühri a mülüyo küti künyi hikohi mipühri phe kümüsü thi süyo lize, mhakügütsü püh pu volü khüsü die pu kügü püh dzükütülü sü küva veku.

Küphoma dophiko

43Mhaceno nbe nthi müsü lize, süo dathü vate; kükrelamori, lalhe die kürhüthilü lü kütae nbe künanyi ba die tasü mezalü me mhapüceri mhü tayi külho; 44Mu me sülü ukhokori satayokümo mhü ri tayo kümo lü vo küta ceri veku zo tila. 45Mu n phe nthi müsü yo lize; süo da kügü vate, kükrelamori phelhe die kürhülü lü kütae n phe kenanyi ba die n kügü püh Gehenna me mhü tayo kümo mu 46sülü ukhokori satayo kümo mu mhü “tayo” kümomelü sü küvace veku zotila. 47Mhaceno nmhü nthi müsu yo lize; süo kürüla vate, kükrelamori n mhü künanyi ba die n kügü püh mezalü sü küva ceri nmhü püh libi die Poo küdeba lü vo küta veku ti la, n mhü küna khi pü meza lü lü küta ceri. 48Sülü sathi sa yomo me ri mhü tayo mo 49Kükrelamori me süh die thüma kühopüh yori mütsazü rüto; mu mütsazü süh die rüsu kühopühri rüto. 50Mütsae vezo, eli mütsari pu külhü dita lize no dipüh süh die süo thi mülhüyi ta? Mütsa po nelü bayi te, mu huhu züh küzühve bayite.

Currently Selected:

MARK 9: NAG5BSI

Highlight

Copy