MARK 8

Jisu mi nyeda vathi küsü

1Sü tüso ce kosü thüma kro müzürita, mu ukoe mhapühri ti küto ta mota, süla Pu sadziko cipüh Puce süyi die puko yisü. 2I thüma kroo phimüzhete, kükrelamori puko tha zhotü süh a züh bate, mu puko mhapüri ti küto bamo. 3Mu I puko po tükhü thi die kütsüh püh puko celü sü lize uko sholü phesa tato, kükrelamori puko humie kümüprüh shüh lüno vori tina, zita. 4Süsa Pu sadzikoe pu zü küla die; kühopühn sheri dibi die rayhothi hilühi no tsükhrüda ngo püh vagu thiyi veta? Zita. 5Süsa Pu süko kütso die; nieko tsükhrüda ditsu pü ta la? Sisü, mu pukoe thüna, sidie küla sü. 6Süsa Pu thüma kroo po ki cejü bayi nosü, süze Pu tsükhrüda thünako pühyi die küsho thisü die cethi püh Pu sadziko po püh zasü nosü, mu pukoe püh zasü. 7Pukoe khu hu püta, mu Pue galiphi sü die puko po süo ri püh zasü 8Pukoe süko ti püh u küphru küle thiyi, mu tishoko becerha thüna küngu layi. 9Mu ti küyiko mütü küsa thüma nyeda müsüh. 10Süsa Pu süko kütsüh süva, sidie rükri Pu sadziko züh die püzu lü lüyi die Dalmanutha cejübüh co vorita.

Jisue Phariseeko kümütha zü küthi küsü

11Mu Phariseekoe tapra die Pu müdephi küzwü Pu celüno tüyo küvori zasi phu die Pu züh kümülita. 12Sücesü pue Pu rüpülüno mühi die sü; dipühla tsüdonumiko zasi püh phuyo la? I nekoce potü süto; zasi pühri püh tsüdonumi prü sü lhote; zita. 13Sidie Pu süko khava die püzu pühlü lü die ta kükreco kuta. 14Sülize müthaküyikoe tsükhrüda püta rükra mota, püzu püh libi pü küta zota. 15Mu Jisu puko tarho die sü; Hei! Neko Phariseeko khreo mu Herod khreo no münu yite; zisü. 16Süsa puko tho kürüthi die sü; ukoe tsükhrüda bamoe; zita. 17Hio sesü die Jisu puko yisü; nekoe dipüh la tsükhrüda ba kümo küpo ba la? Nekoe se kükreyi mori ne salüyi mo zo lu me? Nekoe tsüri neko lü rüh ba zo me? 18Neko mhü ba zori nekoe ngo mome? Neko ni ba zori nekoe mha khü seyo mome? 19Mu Ie tsükhrüda pühngu püh mi nye pühngu prü küsü mu becerha didüpüh shi küngu layi sü küti rükra mo te me? Zita. Pukoe sü Pu ce; küriküna; zisü. 20Sülize thünako püh mi nyeda vathi küsüce ti kümüshoko püh becerha didüpüh phru layia? zita, Pukoe sü; thüna; zisü. 21Süsa Pu süko yisü; nekoe tsüri seyi molu me? Zita.

Mhücemi püh thi nve küsü

22Süsa pu Bethsaidalü voriyi, mu mi mhücemi püh rhapüh Puce vori die Pupo nyi sü no die mülo ta. 23Mu Pu mhüce süo beceyi die züh rüna shi prata. Sidie pu mhütsapüh pu mhülü sü die Pu be püh puyo südie pue mhapühri ngo ba me moshi küti kütso. 24Pue mha pe sü die poti; I thümako ngopüh sühboko ta küba bite; zisü. 25Süsa pue Pu be püh pu mhü nyilasü die pupo müsozu pe sü nosü, sücesü pu vetsühyi ta die mha mütü ngo mütsüce ta. 26Süsa Pu süo kütsüh püh pu celü süva, mu pu yisü, no ta rünalü vohi mori püh rünalü mipüh ceri pohite; ziva.

Mi Jisu yisü sopüh liyo shi küti kütso küta

27Mu Jisu mu müthaküyikoe tasü Kaisaria Philppi lü Prata, süze Pu sholüno Pu sadziko kütsodie; mi a kha sopüh liyoa? zita. 28Mu pukoe küla die; John mi dzülu khaküsüo zi, humi Elijah li, mu kükre koe sadzüküsemi, pühli ziyo; zisü. 29Mu Pue puko yisü; sülize nekoe a yisü sopüh lizu yoa? zisü. Süce Peter sü ‘No Khristao zo;’ zisü. 30Mu Pue puko küthi die puko po püh mipüh ceri pohi nota.

Jisu Putho Pu süh jüh küpo

31Silize pue Pu sadzikoce thümanuoe mha kükrolü kümüzhe küto, pethiko, sekrüko, mu lüsiküseko po Pu müla die Pudokhri va küto, sidie zho süh nha rhühlasüta küto jühko püh puko mütha sü ta. 32Mu Pu zü hio po müle mülu zota. Süsa Peter Pu züh kre phe die Pu kütüta. 33Süri pu erürüh vo müthaküyiko ngo küyice Pu Peter küthi die sü; Thürüküsüo Satan no ta asaco vo tayi, kükrelamori, no Poo ceco lü moli thümao ceco lüyo tila; zita. 34Sidie Jisue thüma kroo mu Pu sadziko ci püh puce süyi die pukoce; Thüma kühopühri a sa müdzi künyimi putho pu müla va die pu cross püh die asa müdziyite. 35Kükrelamori, thüma kühopühri putho pu kürhühro mükrüyi nyisa yo kütimi pu süo müdi vato, eli thüma kühopühri ala mu züyiküeo la pu kürhühro müka küsümi pu süo külayito. 36Kükrelamori, mipüh-e cejü mütü prapüh pu zü thiyi zori pu kürhühro müka va lize pu dipüh küpra ngoyi ta? 37Mori thüma püh-e dipüh püh pu kürhühro züh küleyi veta? 38Thüma kühopühri kürüzü mu küphoma phru küpü nulhü hio mhuzülü aza mu a züko püh po münga ta lize; thümanuo rio Pu Poo zapo zale lüno tüyoshoyi kümüsakozüh küvori nha pu za po münga tato.

Currently Selected:

MARK 8: NAG5BSI

Highlight

Copy