LUKE 4

Khrista la medo kephi

1Jisu Kemesa Rüpü po püchu pü Jordan lü tala vorita, Kemesa Rüpü lüta rayholü vota. 2Zhoheda therükesu po pü kedo, tüsozho hidolü pü mhapüri timo; tüsozho süko tsü ketasa püvameri vorita. 3Therükesuo pücepoti, no mhace Jihova nu lize ketsü hiopü tsükhri thiyi no posüte. 4Jisu püfü kelakesü, thopü kemeta, thüma tsükhri lebi la hüyi yomo; vele Jihova jükolazo. 5Therükesuo püzü cejütu kerekrü püyo vode vapülü cejülü kedeko metü thapü pü mekasü. 6Side therükesu-o puce poti, keku metü I khapü ntsü süto, mu sülü zapozale metü sheri; kekrelamori süo pü atsü kevala, süo khapü a medomi tsüsü ketola. 7Mhace no süla a reshü va ketosa süko metü khapü nzhü thisü tato. 8Jisu püfü kelade po kesü, no Satan ta asaco votate, thopü kemeta, no Niepo N Rüo lebi reshüto, mu pü lebi choyi thito sizipü mezü. 9Püzüpü Jerusalem lü vori de kereshüce pilülü bayi, de pücepoti, no mhace Jihova nu lize retu süte tsüce; 10Kekrelamori thopü kemeta, pü tüyo choyimi ketsüpü nbuyi tato de npo krimo ketola. 11Nko belü nkekriyi tade npo ketsüyo nphe meshü mo ketola. 12Jisu püfü kelakesü, sülü thopü kemeta, “no n Niepo Rüo kedosu.” 13Therükesuo medokephi metü thitsü kevasa pücelü dopüla tata.

Jisu sala ta Galilee lü vori

14Jisu Kemesa Rüpü kekulü ta Galilee lü vori; pü kemele ukhü metülü vota, 15Pü kereshüce kolü mi metha mele ketabi.

Nazarerth kereshücelü kelü

16Pü Nazareth lüvo, sülü pü thekü vori tila, püzho cebi ta kereshücelü Sabbath nhalü, pü tosü thayi de lesiphri sü. 17Isaiah lesi khipü tsüsü, pü lesio hasü, hizi thopü metati ngoyi 18Niepoo Rüpü ayota, kekrelamori apo jüyikeve popü kedimikoce süno akenhüyi; pü a ketsüpü umelüpro ketako lü thomelu süno, mijükethiko phrüsüno, umhü keceko mhükhri sü, mipo uvü ketako hesü. 19Niepoo kenü tütse po mese kesü. 20Süsa pü lesio khava, khapü kemethao tsü sülava, de bayi kereshücelü kebako metü umhükhrüpü püpe bata, pe türüba. 21Pü uko shudü jüpo, thahi neko nilü jüthopü kemeta thitso süte. 22Uko metü süo zhopo, pütalü jü keve poprari tikola ungo bata, uko kepode, nu hio Joseph nuzo mome? 23Pü ukoce poti, neko ace hibiti potüzoto, “Darukeseo ntho nthi kesürhoyite, hako kesebi Capernaum lüri thisüte, n rüna lüri thisüte, sizito.” 24Püpo kesü, kethozo, I nekoce po süto, saju kepo mipüri utho ura yinyü yomo. 25I nekoce kethopo süto Elijah tüce thenosamepü kekro ba Isreal tütse sü mu tekhri shurü türü mota, kemekre cejü metülü bata. 26Elijah ketsüpü Zarephat Sidon nadelü leti kesüzo, theno samepü celü. 27Isreal lü lepra kethimi kekroba Elisha saju kepoo tüce, Naaman Syria mipü lebi thi kemenü kesüzo. 28Kereshücelü kebako mhasüko sekesü ce uko lü redata. 29Uko tosü pü hupü nade sa (cosa) süva, uko püpi mesode kelhupü thikha lüsü va keto rhüta (cosalü thikha kebala). 30Vele pü uko dolü ta pücholü vota.

Jisu Capernaum lü v otherürüpüko hu keva

31Püta Capernaum lü ki, Galilee lü nadeo Sabbath nha pü kereshücelü mi metha. 32Uko pükepo zhokola ungophita, püjü keku kenela. 33Kereshücelü thümapü rüpü mesakemo füphra se meto bayo. 34Poti, hako kebü hite, no hakozü kedipü thita, no Nazareth mi Jisu? No hako meka ketola vorime? I nseba no sopüsheri, Therü kemesao. 35Jisu pü lekhusü, de poti, no kemekre tate de püyo tapra tate. Kesu rüpü pü kegüdü pü ukodolü süva; püyo taprata, pü methi mota. 36Uko metü ungothita, de uko kerethi de poti, jühio dipü jüta! Pü keku kene ukopo tatano kesüce kesurüpüko ta pra ketahi. 37Pü kemelü chozucori sevota, pükhü kewhiko rüna metülü.

Jisu Peter cemizu thi kesürho kesü

38Pü kereshücelü tasüde ta Simon celü vota. Simon cemizu rüce shüshu ba. Uko püpo thi kesürho süno chota. 39Pü thenopü pice thayi, de kethio kethisü; süo pükhava tata; rekri thenopü tasü de uko reyi bata. 40Hitüce nace lütazü, kethi kekre kekrori zü puce vori; pübe chopü sükoyo süde thikesürho sü. 41Kesurüpüko sede taprata, poti “no Khrista zoti seba ketala.” 42Tüso vori ketace, püta cejü kesalü vota, thümako püphu, ukota puce vori, ta puce voride püzü bata, püpo tata hino pota. 43Pü ukoce poti, I thethi kekrerari vode Jihova kede popü mice sü mozesu; kekrelamori a ketsü kesü süo tila. 44Pü Galilee kereshüce kolü vo mi metha.

Currently Selected:

LUKE 4: NAG5BSI

Highlight

Copy