LUKE 8

Jesu Tu Maluong Tadbo Maipuidung

1Sibosai Jesu niu namdakdung khatdi nam-namga tadjiu Tingwang gu Chawangdih lamga Kawicham hai dinron tadle. Khommaidung khang kariu-je-niakiu sidi suitad kin-e. 2#Mt 27.55,56; Mk 15.40,41; Lk 23.49.Siga rasadung gasu wikhaibo puidung khatdi thiuniubo gasu wikhaibo puidung; khatdi rasa chinnia phungbo gasu hathonpad mibo pui, Mary (Magdalene chiu kubo pui); 3khatdi Herod gu chakampao, Chuza nao Joanna, khatdi Susanna khatdi Jesu nai pakhommaidungtu nkhajiu bambo maipuidung suitad kin-e.

Chalin Marukbo Piutu Din Champanbo

(Mt 13.1-9; Mk 4.1-9)

4Maidung siniu namdi katam tambo lamsuniu Jesu khuga wangsude, sichiujiu maidung kengsui wangboga, Jesu niu din champanbo hai dinkhaide:

5“Pawan khatga maipiu khatniu chalin marukra tadpadle. Sichiujiu paniu chalin marukboga kasianiu npuikiga taokhai mide, sise maidungniu taomalui mide khatdi thingnadungniu wangjiu khoitiu lude. 6Chalin kasianiu turaliga taokhaijiu puak khangboga kadihtam kaha donniu sise shainong mide. 7Chalin kasianiu tathuphe jiuga taokhaijiu puak khangboga, tathuphe siniu gomsin mibo jengniu sise shai mide. 8Khatdi chalin kasianiu kadihtam kawiboga taokhaijiu puakkhang pasy masijiu kai maside.”

Sichiujiu Jesu niu munkom khai-e, “Naliu pakuon bammai hina chiululo!”

Din Champan Khaibo Ramba

(Mt 13.10-17; Mk 4.10-12)

9Pakhommaidung siniu Jesu khuga, din champanbo rambase dechiulo chiu maniu-e, 10#Isa 6.9.Siga paniu paokakge, “Tingwang gu Chawangdih lamga mahinbo ningting tasise naliu khugara pikhai mibo-e chiudi kakimai khugara din champanbo thiujiu dinkhaibo-e, sichiujiu paliuniu phuibamdi ngaomakge, khatdi nkingbamdi simakbo-e.

Jesu Niu Chalin Marukbotu Din Champanbo Ramba

(Mt 13.18-23; Mk 4.13-20)

11“Din champanbo ramba sira: Chalin sira Tingwang gu ladkeng si-e. 12Puikiga taokhai mibo alinpumdung siniu chiukhai kamimai si-e; chiudi Satan siniu wangjiu paliu khuga dinkhai mibose lupad mijiu, pijiu malumkhai makbo, khatdi ranlu makbo si-e. 13Tatura liga taokhai mibo alinpumdung siniu chiukhaiboga chunwijiu lukhaibo-e. Chiudi sise pamen hajiu matipmak donniu pakak khat ronna malumkhai lujiu kahiambo wangboga kao kamibo si-e. 14Tathuphe jiuga taokhai mibo alinpumdung siniu chiukhai mibo si-e, chiudi magenthiu chariubo maksai chakhiu-chalan wang dasai kam maha mibo si-e, sichiujiu wadao khatdi pasyse minpad makbo si-e. 15Kawibo kadihga taokhai mibo alinpumdung siniu kawibo chamtu chiulujiu khatdi majailubo lungchun si-e, sichiujiu paliuniu khenglujiu pasy masilubo si-e.

Wabung Hangga Chamibung

(Mk 4.21-25)

16 # Mt 5.15; Lk 11.33. “Mai khatniu chamibung matao lujiu chakuangniu runmi makge, maksai tazi hangga khaimi makge. Sibosung, paniu wadung riga khailujiu maidungniu pabiuse ngaora kamme. 17#Mt 10.26; Lk 12.2.“Baikhai bambo hina madulen kamrabo-e, khatdi mahinbo hinase kabenboga lenkhai kamrabo-e.

18 # Mt 25.29; Lk 19.26. “Naliuniu nkingbo hina nking mawi lulo; palamra poinakha bambo paleng pikhai sanbine, chiudi wadi habo pakhu gasu poinakha bambo sidi lupadmi rabo-e.”

Jesu Pui Nai Pagu Singnamai

(Mt 12.46-50; Mk 3.31-35)

19Jesu pui nai pagu singnadung siniu pakhuga wang-e chiudi maidung jiuga bammibo donniu pakhuga wangtang lulak mide. 20Siga mai khatniu Jesu khuga din-e, “Napui nai nasingnamai natu adao khainijiu lenlam chap khuan bamme.”

21Jesu niu paliu mathiu khuga din-e, “Apui nai asingnamai sira Tingwang cham hai chiulujiu majai kalu mai si-e.”

Jesu Niu Tingthung-tingkaitu Pisao Khaibo

(Mt 8.23-27; Mk 4.35-41)

22Naikhat Jesu niu pakhommaidungtu maluang lujiu aliam khat lungga ngutlujiu paliu khuga din-e, “Aliuniu ajai uigen khatlamse tadkhe.” Sichiujiu paliu tadsude. 23Paliuniu aliam ramkinbo tingga, Jesu se jibing mide. Siga tingthung-tingkai bungjiu wangsude, sichiujiu aliamse taduiniu maliam phuimide, siga paliu manangchang manang mide. 24Siga pakhommaidung siniu Jesu khuga tadlujiu, khatdi patu makiangjiu haichiu din-e, “Paohubo yo, Paohubo yo! Aliu shailajiu bamme!”

Siga Jesu niu sulujiu tingthung-tingkai situ chamtan pikhaiboga sise manon kiujiu, saojing mide. 25Sichiujiu paniu pakhommaidung khuga din-e, “Naliugu malumse dega bamjiulo?”

Siga paliu suang hajiu khatdi pingjiu paliuniu khat-khat khuga din-e, “Haina hai saolo? Paniu tingthung-tingkai gu duiliutu chamtan pikhaiboga, paliuniu pagu kadin piu-e!”

Jesu Niu Rasa Phungbo Piutu Wikhaibo

(Mt 8.28-34; Mk 5.1-20)

26Jesu nai pakhommaidungniu Galilee ajai uigen khatlam, Gerasa#8.26: Gerasa; Kasia gara Gadara, maksai Gergesa chiu-e (Mt8:28 gadi phuilo). ramlamse aliam tuanglujiu tadmide. 27Sichiujiu Jesu niu ajai uigen lamsu padboga, sibo namdiga rasadung phungbo piu khattu adao-e. Pawan kathengga hainapiu hai pafai-pani khai makjiu, khatdi chaky gadi bammakjiu, charawlam bambo piu-e. 28Paniu Jesu tu ngaoboga, pakhuan tanjiu senne, khatdi paphibangga kaokiujiu din-e, “Kukachangbo Tingwang Nahpiu, Jesu yo! Nangniu atu dekam khai ralo? Atu sajai pikhai makra, Iniu nakhuga kheng-e!” 29Paniu haichiu dinbo lamra, sinapiu khugasu rasa situ tadmira chamtan pibo donniu-e. Haisiniu pawan kathengkha patu thinman lujiu, patu ratkhaibo chagiriang sidi kamtap-tap lujiu manamjiuga rontadjiu bambo-e. 30Jesu niu pakhuga maniu-e, “Nazan saolo?”

Paniu paokakge, “Azanra, ‘Maidung’ chiu-e.” Palamra rasadung kengkha pakhuga ngutmibo-e,” 31Sichiujiu rasadung siniu paliutu charui dihlam langkhaimi makra Jesu khuga kheng-e.

32Sibo mungga maluanggen khatga kavak-dungdi khat bamme. Sijengniu rasadung siniu kavak-dung ruanggase ngut khaira Jesu khuga kheng-e, sichiujiu paniu paliutu suikhai bide. 33Paliuniu sibo piu khugasu padlujiu kavak-dung ruanggase ngut mide. Siga kavak-dungdise chakhaoga jongkhaijiu ajaiga malinkam mide.

34Kavak khuanbam maidung siniu padmibose ngaolujiu, namdaklam khatdi luzamlam paktadjiu sibo chamse dinchia mide. 35Maidung siniu degu padmilo chiubo phuira padle, khatdi paliuniu Jesu khuga wangboga, rasadung phungbo piuse pafai-pani khai mawilujiu, palungchun majijiu Jesu phibangga ntaobam niubo ngaode, siga paliu mathiuse pingmide. 36Sibo piuse dechiu wimibo gulo chiubo ngaolu maidung siniu maidung khuga dinkhaide. 37Sichiujiu sibo luongriangga bammai hina pingju mibo donniu Jesu tu sibo bam gasu tadmira kheng-e. Siga Jesu niu aliam lungga ngutlujiu tadmide. 38Sichiujiu pakhu gasu rasadung padmibo piu siniu Jesu khuga kheng-e, “I nasai suitad khaine.”

Chiudi Jesu niu pakhuga din-e, 39“Chaky lam wanglujiu Tingwang niu naleng degu kamkhai bilo chiubo dinkhai bilo,” chiujiu langkhai mide.

Sibopiu siniu namdiga tadronjiu, Jesu niu paleng degu kamkhai bilo, chiubo dinron sude.

Jairus Nahpui Khatdi Jesu Fairi Niakhaibo Pui

(Mt 9.18-26; Mk 5.21-43)

40Jesu niu ajai uigen khatlam wangboga, maidungniu patu lukhai-e, palamra paliuniu patu khuanjiu bambo-e. 41Siga mai khat Jairus chiu kubo piuse wang-e; pahai parammaigu maduiky gu chakampao-e. Paniu Jesu phibangga makhum kiujiu paky lam wang khaira kheng-e, 42palamra panahpui khatnaga bambo, takum kariu-je-niakiu tangmibo nahse shaira kumjiu mara bamme.

Sichiujiu Jesu niu tadsuboga, maidung siniu patu khomphui lujiu tadkinne. 43Paliu ruangga takum kariu-je-niakiu tazai kinbo pui khat bamme; paniu pagu kabambo hina phaimiu khuga pikhaijiu mathan kamigu-e chiudi mai khatniudi patu wikhai ngamlakjiu bambo-e. 44Paniu maidung ruanggasu Jesu sailam wanglujiu pafairise niakhaiboga, paniu tazaijiu bambose sangnuang mide.

45Siga Jesu niu maniu-e, “Saolo atu niabose?”

Mai hinaniu simakge chiu dinsude, siga Peter niu din-e, “Paohubo, maidungniu natu haichiujiu khom maguithui lujiu khatdi chapphuiting lujiu bambo-e.”

46Chiudi Jesu niu din-e, “Mai khatniu atu niamide, palamra pumtanse akhugasu padmibo I si-e.” 47Maipui siniu patu silude chiubo ngao luboga, Jesu phibangga pacheng kaphik rai-raijiu makhum kiude. Sichiujiu mathiu suangga, paniu deleng patu niakhai jiulo khatdi pah dechiujiu winuangmi gulo chiubo pakhuga dinkhaide. 48Siga Jesu niu pakhuga din-e, “Anahpui yo, nagu malum siniu natu wikhai mide. Agi-manaijiu tadsulo.”

49Jesu niu haichiu dinbamga, chakampao ky gasu walang tadmai khattu langwangjiu Jairus khuga din-e, “Ngenase shai mide, Katipao situ kam chariu talo.”

50Sichiudi Jesu niu sise chiulujiu Jairus khuga din-e, “Manangmi tulo, malumjiu bamlo, sichiusai pah wimi rabo-e.”

51Paliuniu sibo kyga wangtangboga, paniu Peter, John khatdi Jacob sigasu ngena pui nai papiutu makjiu mai khattudi kalung lamse pi suingut makge. 52Mai hinase ngena donniu kapjiu khatdi huijiu bamme. Jesu niu din-e, “Kaptulo, ngena haise shai makge pahai jibambo-e!” 53Siga paliu mathiu patu nuisude, palamra pah shai mide chiubo paliuniu si-e. 54Sichiujiu Jesu niu paben julujiu haichiu din-e, “Ngena yo, Sumilo!” 55Siga pase ringjiu sunuang mide, siga Jesu niu ngena lengse wakhat tiura pikhailo chiujiu paliu khuga chamtan pikhaide. 56Sichiujiu papui nai papiudi panai suang hamide, chiudi padmibo lamga mai khat khugadi dinmakra Jesu niu chamtan pikhaide.

Currently Selected:

LUKE 8: LIANBSI

Highlight

Copy