LUKE 23
23
Jesu Tu Pilate Masuangga Puiwangbo
(Mt 27.1-2,11-14; Mk 15.1-5; Jn 18.28-38)
1Maidung siniu sulujiu Jesu tu Pilate masuangga puiwangde, 2Paliuniu haichiujiu patu madam khaijiu din masa sude: “Haibo piuniu aliutu npui kamaklam jukhaijiu, Wangditu ramkha pimak rabo-e, khatdi pah papumsiak Messiah chawang si-e chiujiu dinbo don-ga aliuniu patu minlujiu puiwang kinbo-e.”
3Pilate niu pakhuga maniu-e, “Nang Jehudimai wangpiu sima?”
Jesu niu paokakge, “Nangniu dinbo si-e.”
4Siga Pilate niu singku paodung nai maidung khugase din-e, “Iniu haibo piutu ladjan thiura pamao wadi daomakge.”
5Chiudi paliuniu tanjiu din-e, “Paniu Judaea ramlung hinaga maidungtu katikhaijiu kam kabuaksu mibode. Paniu Galilee ga kamsu khaijiu tuhoi haiga wangbambo haide.”
Jesu Tu Herod Khuga Langkhaibo
6Pilate niu haise chiuboga, paniu maniu-e, “Hainapiu hai Galilee mai-e chiuma?” 7Pilate niu Jesu hai Herod niu mawang bambo luongriangga lungmai-e chiubo siluboga, khatdi Herod hai Jerusalem lungga bambo donniu pakhuga lang khaibo-e. 8Herod niu Jesu tu ngaoboga pachun wichang wide, palamra paniu palamga chiujiu bambo-e, khatdi pawan kathengkha patu ngaokhai nijiu bambo-e. Jesu niu maisuang kahabo ngam kamkhaibo situ phuikhai nijiu agun bambo-e. 9Sijengniu, Herod niu Jesu khuga wa kakengkha maniu sude, chiudi Jesu niu wadi paokak khaibi makge. 10Singku paodung nai Tacheng-tajaigu katipaodung siniu masuang tadpad lujiu Jesu tu katam-tambo lad dinjiu madam khai sude. 11Herod nai riphendung niudi Jesu tu wajeng simakjiu tanui thiujiu then khaide; sichiujiu paliuniu pariga fainoi khat benkhai lujiu Pilate khulam langkhai malan mide. 12Sibo nai gasu Herod nai Pilate hai chaka thiumide, sibo suanggara panaise mikremai thiujiu bamniubo-e.
Jesu Tu Kamshatra Chalad Tapkhaibo
(Mt 27.15-26; Mk 15.6-15; Jn 18.39—19.16)
13Pilate niu singku paodung, jupaodung, khatdi maidung mathiutu ku aruang lujiu paliu khuga din-e, 14“Haibo piu hainiu maidungtu npui kamaklam jukhai-e chiujiu patu naliuniu akhuga puiwangbo-e. Tuhoi Iniu naliu masuangga patu phuiboga, naliuniu patu madam khaibo kamaobodungse wadi daomakge. 15Herod niudi pamao wadi dao makbo donniu aliu khuga langwang lande. Haibopiu hai shai raleng wakhatnadi buimakge. 16Sijengniu Iniu patu dapkhai lujiu phutmi tane. 17(Kenpadbo Ngee machang Pilate niu paliuleng kavangkyga bambo mai khattu phutkhai khai-e).
18Maidung siniu senjiu din-e, “Patu kamshat milo! Barabbas tu aliuleng phut khailo!” 19(Barabbas haitu namdi gase chalad padjiu khatdi maitu kamshat mibo lam ganiu kavangkyga khai nbambo-e).
20Pilate niura Jesu tu phutkhai nibo-e, sijengniu patu phutkhai mira paniu maidung khuga dinlan-e. 21Chiudi paliuniu senjiu dinlan-e, “Patu ju maseng milo! Patuse ju maseng milo!”
22Pilate niu pasumbo thiujiu dinlan-e, “Paniu degu kamaobo kammi jiulo? Paniu shai buibo mao wadi kamkhaibo I daomakge! Iniu patu dapkhai lujiu phut khaimi tane.”
23Chiudi paliuniu, paliu laipadjiu Jesu haitu ju maseng rabo-e, chiu sensude. Sichiujiu kanambo gara paliu khuan siniu ngam lude. 24Sichiujiu paliuniu khengbose Pilate niu suikhai mide. 25Sichiujiu maitu kamshat mibo piu situ paliuniu lunibo donniu phutkhai mide. Khatdi Jesu tu paliu maning thiujiu kamra pikhai mide.
Jesu Tu Maseng Shatbo
(Mt 27.32-44; Mk 15.21-32; Jn 19.17-27)
26Riphendung siniu Jesu tu julujiu tadsude, sichiu paliuniu tadpadboga, Cyrene maipiu pazanniu Simon kubo siniu manam lamsu namdi gase ngutra chiujiu wangbo piu khattu adaode. Paliuniu patu minlujiu, Jesu gu singchaise piphung khaide.
27Chamai mendi khatniu pasai suikin-e, sibo ruangga maipuidung, khangsianiu padon jengniu kapjiu khatdi achungjiu kimme. 28Jesu niu paliu khulam mariwang lujiu din-e, “Jerusalem maipuidung yo, Adon jengniu kap mane, chiudi naliu donjengniu khatdi naliu nahdung donjengniu kap lulo. 29Palamra maidungniu haichiu dinrabo tingse wangkin-e, ‘Panah wadi kahamaidung, nakampuidung, wadao khatdi pontup khai kamakbo puidungse, dejiukha paliu san wilo!’ 30#Hos 10.8; Mad 6.16.Sibo tingga maidungniu maluong dibodung khuga dinsune, ‘Aliutu kiugom khailo!’ Khatdi luongbutdung khuga dinsune, ‘Aliutu baikhailo!’ 31Palamra madiakring bambo mariutudi haichiu bamsai, kimibo gara dechiu kadai ralo?”
32Jesu tu kamshat taman khaira, agatiumai khang niatu juwangde. 33Paliuniu “Tapee luong” kubo bam gase wangtangboga Jesu tu maseng khaide, khatdi agatiumai khangnia situ, khang khattu paben majadlam, khang khattu mawilam jumaseng khaide. 34#T.Lui 22.18.Jesu niu din-e, ‘Apiu yo, paliutu kuak khailo. Palamra paliuniu kam bambose paliuniu sitang makjiu-e.”
Paliuniu taden thonjiu pafai-panidungse paliuleng njan lude. 35#T.Lui 22.7.Jehudi maigu jupaodung siniu patu tanui thenjiu, “Paniu maidung tura rankhai-e, Tingwang niu kadakhaibo Messiah si-e chiusai paronna patudi ranlulo,” chiujiu dinbose maidungniu phuijiu chap bamme!
36 #
T.Lui 69.21. Riphendung niudi patu thenjiu nuimen bamme, paliuniu sak kasabo mumjawse pamunkiga monkhaijiu din-e, 37“Nang Jehudimai wang-e chiusai naronna natu ranlulo.”
38Papi riga haibo ladkengse raokhai bamme: “Haise Jehudimai wangpiu-e.” 39Patu maseng ncham bambo agatiubo piu khat siniudi patu wajeng simakjiu din-e, “Nang hai Messiah mak jiuma? Natudi, anaitudi rankhai sulo!”
40Chiudi khang khatpiu siniu patu kasanjiu din-e, “Nang, Tingwang tu pingmak jiuma? Pakumjiu nangdi dao ncham bambo-e. 41Chiudi anaira majijiu, chiubora anainiu kamkhai mibo saisuijiu anaileng kabuibose daobo-e; chiudi para wadi kamaobo ha-e.” 42Sichiujiu paniu Jesu khuga din-e, “Jesu yo, nagu chawang bamga wangbo naise atu maningtao khailo!”
43Jesu niu pakhuga din-e, “Iniu nakhuga ladriat thiu khaibo-e chiubora thainai gasu nangniu atu Paradise ga maluang bam ncham bammi rabo-e.”
Jesu Shaibo
(Mt 27.45-56; Mk 15.33-41; Jn 19.28-30)
44-45 #
Tad 26.31-33. N-nien wanchak kariu-je-niakiu wan gase naimikbiu padmakjiu kadihpiri pakhiangna wanchak sum tangbo tamiu wang mide; khatdi Charakyga lenkhai bambo zusungfaise n-gang gasu nia thiujiu kekreo mide. 46#T.Lui 31.5.Siga Jesu niu pakhuan tanjiu senne, “Apiu yo, ahiupuina naben-ga Iniu pikhaide!” Paniu haise dinkhai lujiu shaikiu mide.
47Riphendunggu chakampao siniu padbambo hina ngaoboga, paniu haichiu dinjiu Tingwang tu thuon sude, “Pachang siakjiu pahai kawibo mai-e!”
48Padbambo situ phuibammai hinaniu degu padmilo chiubo ngaolujiu, paliu lung makjiu, paliu gah jumjiu, paliu ky-ky lam malan kam mide. 49#Lk 8.2,3.Jesu tu kasimai hina, khatdi Galilee gasu pasai suikinbo maipuidung siniu kadiulam chaplujiu sise phui bamme.
Jesu Tu Baikhaibo
(Mt 27.57-61; Mk 15.42-47; Jn 19.38-42)
50Siga Judaea ramlungga bambo Arimathea kubo namdi gasu Joseph kubo piu khat bamme. Pase Tingwang gu Chawangdih wangrabotu khuanjiu bambo, tacheng matipbo piu-e. 51Para Apaimai khat thiujiu bamdi paliuniu suikhai mibo ladbam gase suimakbo piu-e. 52Paniu Pilate khuga tadlujiu Jesu pum situ khengde. 53Sichiujiu paniu papumse lukiu lujiu khatdi fainoi khatniu majiu lujiu, tatuniu bungkhaibo mai khattudi baikhai makhabo rao gase baikhai mide. 54Haise Masannai-e, sichiujiu Tabamnaise sumi lajiu bambo-e.
55Galilee gasu suikinbo maipuidung siniu Joseph tu maluang tadjiu, Jesu pumtu charao lungga baikhai mibose paliuniu ngaokhai mibo-e. 56#Tad 20.10; Taj 5.14.Sichiujiu paliuniu paliu ky ky lam malan mide, khatdi papumga parim wibo wasa nai manam wibose manuk khaira kaden lude.
Tacheng tajaigu chamtan saisuijiu, paliuniu Tabamnai sira mathak mide.
Currently Selected:
LUKE 23: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
