LUKE 11

Jesu Niu Kakheng Thiubo Lamga Katikhaibo

(Mt 6.9-13; 7.7-11)

1Naikhat Jesu niu pabam khatga kakhengthiu bamme. Paniu loimiboga, pakhommai khatniu pakhuga din-e, “Rapiu, John niu pakhommaidungtu katikhaibo kumjiu, aliutudi kakheng thiura katikhailo.”

2Jesu niu paliu khuga din-e, “Naliuniu kakheng thiubo tingga haichiu dinlo:

‘Apiu yo, nazan masanbo thiu milo;

nawang kadihse wangkiu sulo.

3Naimachang aliu tiubuibo pikhailo.

4Aliu nuan kuak khailo,

palamra aliu khuga maokhai maitu aliuniu kuak khai-e.

Aliutu tanjiu madiukhai tulo.’”

5Sichiujiu Jesu niu pakhommaidung khuga din-e, “Din champanjiu, naliu ruangga khang khatniu chundingga naliu kamai khangkhat kyga tadlujiu pakhuga dinlo, ‘Na-yo, atu taruak khuang sum apuk khai khelo. 6Palamra akamai khangkhat chabin kadiu lamsu tuhoiniu akyga wangjiu, paleng pikhaira akhuga wadi hamijiu-e!’ 7Siga nakabo siniu haichiu dinsaira, ‘Atu kam chariu tulo! Akhamse khamten mide, khatdi nahmai aliu mathiu jikam mide. Iniu sulujiu natu wakhatnadi pikhai ngamlak mide.’ 8Wide, sichiusai dechiu ralo? Iniu naliu khuga dinbo-e chiubora paniu naka thiubo donniu buangsu lujiu natu taruak pikhaimak tadi, nangniu mangam makjiu, khenglu khenglanjiu bambo donniu paniu sulujiu, nangniu lunibo hinase pikhai rabo-e.

9“Sichiujiu Iniu naliu khuga dinbo-e: khenglo, naliuleng pikhai bine; phiulo, naliuniu daolune; khatdi akham maganlo, naliuleng lekhai bine. 10Palamra kakhengmai hinaleng pikhaibi rabo-e, khatdi phiumai hinaniu daolu rabo-e, khatdi akham magan mai hinaleng lekhaibi rabo-e. 11Naliu papiumai khuga naliu nah siniu taruak khengsai, tatu pikhai rama? Maksai chakha khengsai kaniu pikhai rama? 12Maksai paniu maruibum khengboga charuimaigapui pikhai rama? 13Haijiukha naliu kasamai thiubam tadi, naliuniu naliu nahmaileng kawibo pikhaira si-e. Sichiusai, tinggen lam bambo Piu siniu khengmai hina khuga Masanbo Hiupuina se pikhaibi rabo-e!”

Jesu Nai Beelzebul

(Mt 12.22-30; Mk 3.20-27)

14Rasa phungjiu npao ngamlakbo piutu Jesu niu rasa situ hathonpad miboga sinapiuse npao sude. Siga maidungse paliu suang hamide. 15#Mt 9.34; 10.25.Chiudi maidung khangsianiu din-e, “Haise rasadung wangpiu, Beelzebul siniu, paliutu hapad ngambo pumtanse patu pikhaibo-e.”

16 # Mt 12.38; 16.1; Mk 8.11. Khangsianiu Jesu tu manlu nijiu, Tingwang niu patu suikhaibo-e chiubo lenra maisuang habo ngam kamra paliuniu pakhuga kheng-e. 17Chiudi paliuniu degu maning bamlo chiubo Jesu niu silujiu paniu paliu khuga din-e, “Kadih khatniu parup rup kamlujiu, khat khattu chari thiusai tingtheng lakge; kikhun khatniu njanpad lujiu chari thiusai hanuangmi rabo-e. 18Sichiujiu, Satan kadihse parup-parup thiumisai, haise dechiu tingtheng luralo? Naliuniu din-e chiubora Iniu rasadungtu hathonpad ngambose Beelzebul niu atu pumtanse pikhai bibo-e. 19Iniu haichiujiu paliutu hapad bamsai, naliu saisui maidung sira saogu pumtan gasu paliutu hathonpad jiulo? Naliu saisuimai siakniudi naliu hai mao mide chiubo lenrabo-e! 20Sichiu makge, Tingwang pumtan gasu Iniu rasadung haitu hapadbo-e, haisiniu Tingwang gu chawangdihse naliu khuga wangbam mide chiubo lenkhaibo-e.

21Katanbopiu siniu chaheng-changiu thinlujiu paky khuanbamsai, pagu maniase wadi halakge. 22Chiudi pasuang tanbibopiu siniu patu chonlujiu, patu ngammi sai, paniu mangiu khaijiu bambo heng-ngiu hinase sutlujiu tad mine sichiujiu paniu agalubo hinase njanmi rabo-e.

23 # Mk 9.40. “Aleng makbo maise pachang siakjiu atu atung bambo-e; khatdi atu nkhakhai makbo maise kam mara bambo-e.

Rasa Malan Wangbo

(Mt 12.43-45)

24“Rasa siniu mai khat khugasu padboga, mathak khaira pabam phiujiu kasangbo kadihga rontadle. Haisiniu wakhatnadi daomakboga paronna din-e, ‘Iniu akyga malanwang mine.’ 25Sichiujiu haisiniu wanglanboga, paky se kam masan lujiu kaden khaibam niubo daode. 26Siga rasa siniu tadpad lujiu pasuang kasabo rasa chinniatu maluang wangjiu siga lung mide. Sichiujiu, haise pad miboga, sibo piuse nda karaiga suang sa-nkiu mide.”

Palingjiu Sanwibo

27Haise Jesu niu dinboga, maidung ruang gasu maipui khatniu pakhuan tanjiu din-e, “Natu lungbopui khatdi akhibo puise dejiukha pasan wilo!”

28Siga Jesu niu paokakge, “Sisuang, Tingwang chamse chiulujiu majailu maise pasan wi-e!”

Tasibo Lenkhaira Khengbo

(Mt 12.38-42)

29 # Mt 16.4; Mk 8.12. Maidung siniu Jesu khuga wang aruang suboga, paniu haichiu dinsude, “Thaidao tingga lungmaidung hai dejiukha salo! Paliuniu tasibo lenkhaira kheng-e, chiudi Jonah khuga lenkhai mibo makjiu tasibo hai lenkhai lak mide. 30#Jon 3.4.Nineveh maidung khuga phaimiukakung Jonah tu tasibo pi thiukhaibo kumjiu, thaidao tingga lungmai lengdi Chamai Nahpiu siniu tasibo pi thiukhai rabo-e. 31#1 Chaw 10.1-10; 2 Char 9.1-12.Ladjan thiubo Naise Sheba mai Wangpuiniu chapsu lujiu thaidao tingga lungmaidungtu ladjan thiu sune, palamra paniu pagu kadih gasu Chawang Solomon gu ningting situ nkingra tadkhai kamigu-e; sichiujiu Iniu naliu khuga dinbo-e, haiga Solomon suang kadibo khat bamme. 32#Jon 3.5.Ladjan thiubo Naise Nineveh maidungniu chapsu lujiu naliutu ladjan thiusune, palamra Jonah niu dinron wangboga paliu nuan gasu lungli kamigu-e; sichiujiu Iniu naliu khuga pachang paling dinbo-e chiubora haiga Jonah suang kadibo khat bamme!

Chapum Gu Nbiu

(Mt 5.15; 6.22-23)

33 # Mt 5.15; Mk 4.21; Lk 8.16. “Mai khatniudi chamibung matao lujiu baimi makge, maksai takam hangga khaimi makge; chiudi paniu wadung riga khai-e, sichiujiu maidungniu kalungga ngutboga kabenbo nbiuse ngao-e. 34Naliu mikse naliu pumgu chamibung kumbo-e. Naliu mikse wibamsai, naliu pum pakhiangna kabenboniu phui bamme; chiudi naliu mikse wita misai, naliu pum pakhiangna tamiuboga bamrabo-e. 35Sichiusai naliu khuga bambo nbiuse tamiuboga bammi makra kamsiak lulo. 36Naliu pum pakhiangna kabenboniu phuibamsai, tamiuboga wakhatnadi bam maksai, haisiniu chamibung mataoboga pabiu nakhuga thaokhaibo kumjiu, pakhiangna benjiu bamrabo-e.”

Jesu Niu Pharisee Maidung Nai Tacheng Tajaigu Katipaodungtu Ladjan Thiubo

(Mt 23.1-36; Mk 12.38-40)

37Jesu niu tachamse dinloi miboga Pharisee mai khatniu patu katiu tiura ku-e, sijengniu paniu tadlujiu tiuraleng ntao kiu-e. 38Jesu niu katiu tiusu rabo suangga tacheng saisuijiu paben ntik makbo donniu, Pharisee maipiuse pasuang hamide. 39Siga Rapiu niu pakhuga din-e, “Phuilo, naliu Pharisee maidungra naliu kuang, naliu piang lenlamra khiu masan-e, chiudi naliu lung lamra kasabo nai taniaboniu phui bamme. 40Kapang maidung yo! Palenlam damkhaibo Tingwang niu palung lamdi damkhaibo makma? 41Sichiujiu naliu kuang-piangga bambose lung kasamaidung khuga pikhai bilo, sichiusai pakhiangnase naliuleng masanmi rabo-e.

42 # Lev 27.30. “Pharisee maidung yo, dejiukha naliu sansa gulo! Naliuniu pawan hinagu alin-tara, liangtu, nrahmen kumbo hinagu dam kariugu dam khatse Tingwang leng pi-e, chiudi majibo nai Tingwang tu lungsabose naliuniu wajeng simakge. Haidungtu naliuniu wajeng chakmakbo thiumakjiu kam rabo-e. 43“Pharisee maidung yo, dejiukha naliu sansa gulo! Naliuniu maduiky gase kadakhaibo bamga ntaora, khatdi senky gase mainiu naliutu chakhuang thiujiu kahumbo situ naliuniu masenne. 44Dejiukha naliu san kasa gulo! Naliu hai kam tasikhai makbo rawdung riga maidungniu simakjiu tadkhaibose kumbo-e.”

45Tacheng tajaigu katipao khatniu pakhuga din-e, “Katipao yo, nangniu haise dinboga, aliutudi din masa kabam gu-e.”

46Jesu niu paokakge, “Tacheng-tajaigu katipaodung yo, dejiukha naliu san sagulo! Naliuniu phungtad lulakbo bangse maidung riga thonkhai lujiu, naliu njung khatniudi kariopad sibo bangtu phungra nkha khaini makge. 47Dejiukha naliu san kasa gulo! Naliu pao-peh mainiu kamshat mibo phaimiukakungdung rawse naliuniu kam mawi khai-e. 48Siga naliuniu naliu ronna suikhai-e, chiubora naliu paopehniu kamshat mibo phaimiukakungdung lengse naliuniu paliu rawleng chukhai-e. 49Haijengniu Tingwang gu ningting siniu din-e, ‘Iniu paliuleng phaimiukakungdung nai walang tadmaidung tu langkhaine; siga paliuniu khangsiatu kamshat mine, khatdi khangsiatu kam mathad khaine.’ 50Sichiujiu kadihpiri damsubo gasu phaimiukakungdung tu kamshat mibose thaidao tingga lungmaidung riga mathad khai rabo-e, 51#Chab 4.8;2 Char 24.20,21.Abel tu kamshatbo gasuniu Zechariah tu rathakbam nai Masanbo Bam kakga kamshat mibo tangjiu, mathad khai rabo-e. Yo, Iniu naliu khuga dinbo-e, thaidao tingga lungmaidungtu paliu mathiu sung mathad khai rabo-e!

52“Tacheng tajaigu katipaodung yo, dejiukha naliu sansa gulo! Tasi ningtinggu khamtense naliuniu thinman lude; naliuniu, naliu ronna ngutkhai makge, khatdi siga ngutra matan bammai tudi naliuniu suikhai makge!”

53Jesu niu sibo bamtu phutkhai lujiu tadmiboga, Tacheng-tajaigu katipaodung nai Pharisee maidung-niu patuse khan-tiajiu dinsude, khatdi pakhuga wa kakengkha maniu sude, 54sichiujiu patu tathak thiujiu palad gasu kamaobo madamjiu patu minra kamsude.

Currently Selected:

LUKE 11: LIANBSI

Highlight

Copy