CHABANGCHAM 25

Abraham Kaikik Kakimai

(1 Char 1.32,33)

1Abraham niu katambo puitu maluang lunglan-e, pazan niu Keturah ku-e. 2Paniu Zimran, Jokshan, Medan, Midian, Ishbak khatdi Shuah tu paleng lungkhai-e. 3Jokshan hai Sheba nai Dedan piu-e, khatdi Dedan kaikikdungniu Asshurim, Letushim khatdi Leummim paliu-e. 4Midia nahdungniu Ephah, Epher, Honokh, Abida khatdi Eldaah-e. Paliu mathiu hai Keturah kaikikdung-e.

5Abraham niu pagu hinase Isaac leng pikhai diakge; 6chiudi panao katam maidungniu lungbo nahdung lengra paniu ringbam khaga kalen pikhai-e. Sichiujiu haibo nahdungtu paniu panah Isaac khugasu Tingbanglam langkhai mibo-e.

Abraham shaibo khatdi baikhaibo

7-8Abraham hai tanpao suijiu, takum kai khat-je-riakchinnia-je-mangiukiu ga shai mide. 9Panah Isaac nai Ishmael niu patu Hitt maipiu Zohar nah Ephron gu luzam, Mamre gu tingbanglam bambo Machpelah Tulimki gase baikhaide. 10#Chab 23.3-16.Haise Abraham niu Hitt maipiu khugasu liulubo luzam si-e, siga Abraham nai panao Sarah tu baikhai mibo-e. 11Abraham shai mibo saiga, “Ringbambo Khatniu Atu Ngaobambo Ajai” mungga lungbambo tingga panah Isaac tu Tingwang niu thoikhai bide.

Ishmael Kaikikdung

(1 Char 1.28-31)

12Sarah vangpui, Egypt mai liupui Hagar siniu Ishmael nahdung lungbo riak tingthubo gasu: 13Nebaioth, Kedar, Adbeel, Mibsam. 14Mishma, Dumah, Massa. 15Hadad, Tema, Jetur, Naphish khatdi Kedemah paliu-e. 16Paliu hai chaphiu kariu-je-niakiu gu paopeh maidung-e, sichiujiu paliu zanthen hai paliu namdungga khatdi paliu mathak khai bamga pikhai-e. 17Ishmael hai shaibo tingga, tingkum kai khat-je-samriu chinniakiu mide. 18Ishmael kaikikdung hainiu Egypt gu tingbanglam. Assyria npuikiga, Havilah nai Shur kadih kakga lung-e. Paliu hai Abraham kaikikdung kakimai khugasu lungtam mibo-e.

Esau Nai Jacob Tu Manabo

19Haise Abraham nahpiu Isaac racham-e. 20Paniu (Mesopotamia ga bambo Aramea maipiu) Bethuel nahpui khatdi Laban tanpui Rebecca tu maluang lungbo tingga Isaac hai tingkum atai tangmide. 21Rebecca niu panah lungmakbo jengniu Rapiu khuga Isaac niu paleng kakheng thiukhaide. Paniu khengbo rathoise Rapiu niu paokak khaijiu Rebecca pawon phungmide. 22Pah ngena taphin manarabo jengniu pawon lung gasu panaise khat-khattu n-gi sude. Siga paniu din-e, “Dekamjiu haikumbo akhuga padjiulo?” Sichiujiu Rapiu khuga maniura pah tadsude.

23 # Rom 9.12. Rapiu niu pakhuga din-e,

“Nalung gahai chamai jat nia bamme; akad silakbo khangniatu nangniu lungne.

Khangkhatniu khangkhat suang tan nkiune; katingbopiu siniu nabopiutu macha rabo-e.”

24Pawanse wangtang miboga, paniu khangniatu taphin manade. 25Katingpiuse hengmaren-e, khatdi pagi hai pagiu thiubo chariang kum-e, sijengniu pazan hai Esau#25.25: Esau: Parambaniu “pagiu thiubo” chiubo-e. chiu kukhaide. 26Niabopiu siniu Esau phimik jammanting lujiu mana kiu-e, sijengniu pazan hai Jacob#25.26: Jacob: parambaniu “paphimik” chiubo-e. chiu kukhaide. Panaitu lungbo tingga Isaac hai tingkum riak-charuk tangmide.

Esau Niu Pagu Nahraibo Kalekdam Jonbo

27Ngena kaniase dikhang sude, siga Esau hai tathiu hasibo, nkanlam lungbotu masenbo mai-e, chiudi Jacob ra chakyga maliu makjiu bambo mai-e. 28Isaac niu Esau tu lungsa-e, palamra paniu kamwangbo wakhao janse pah tiuni-e, chiudi Rebecca ra Jacob tu lungsa-e.

29Naikhat Jacob niu chara gandui langbamga, Esau hai tathiu habo gasu wangde. Pahai mariu mide. 30Sichiujiu Jacob khuga din-e, “I kami mira kum mide, sibo kahengbo ganduise aleng janno.” (Sijengniu patu Edom#25.30: Edom: parambaniu “kahengbo” chiubo-e. chiujiu ku-e).

31Jacob niu paokakge, “Nangniu nagu naraibo kalekdamse aleng pine chiusai, Iniu haise naleng pine.”

32Esau niu din-e, “Wide, I shailaje bamme, sichiusai agu kalekdam siniu aleng degu pageng bamralo?”

33 # Heb 12.16. Jacob niu paokakge, “Nangniu nagu kalekdamse pine chiubogu tasiang siang railo.”

Esau niu pagu kalekdamse Jacob leng pine chiubogu tasiangse siangkhai mide. 34Siga Jacob niu paleng taruak nai chaganduise tam-tamna pikhaide. Paniu tiulujiu khatdi saklujiu tadmide. Esau niu naraibo thiujiu manangbo sira pawonleng ronna-e.

Currently Selected:

CHABANGCHAM 25: LIANBSI

Highlight

Copy