CHABANGCHAM 20

Abraham Nai Abimelech

1Abraham niu Mamre gasu tadlujiu Canaan gu tingrun lam khatdi Kadesh nai Shur kakga lungsude. Pasai, paniu Gerar ga lungbambo tingga, 2#Chab 12.13; 26.7.panao Sarah situ patanpui-e chiujiu paniu din-e. Sijengniu Gerar gu chawangpiu Abimelech niu Sarah tu puiwang mide. 3Naikhat nchun Tingwang niu pamanglam madukhaijiu pakhuga din-e, “Palamra nangniu chamithiu mibopui haitu lubo jengniu nang shairabo mide.”

4Chiudi Abimelech niu pakhuga wang mana makge, sichiujiu paniu din-e, “Rapiu yo, Ira amao ha-e! Nangniu atu khatdi amaidungtu kam mahami rama? 5Abraham papumsiakniu pahai patanpui-e chiujiu din-e, sise kumgapjiu padi dinlan-e. Haise Iniu masansiakbo lungchunniu kambo-e, Ira kamaobo wadi kam makge.”

6Pamang lamsu Tingwang niu paokakge, “Yo, nangniu masansiakjiu kambo jengniu, akhuga maomi makra, Iniu natu pijiu patu piditao khai makbo-e. 7Chiudi tuhoira, hainapuitu pakina khuga pikhailan milo. Pahai phaimiukakung khatle, paniu naleng kakheng thiukhai saira nang shai lakge. Chiudi nangniu patu pikhailan maksai nang khatdi namai hina shaikam mirabo-e chiubo hai Iniu natu kachan khaibo-e.”

8Pasaibo nai nsuan kalu Abimelech niu pagu chakampaodungtu kulujiu degu padmilo chiubo dinkhaide, siga paliu kapingboniu phuimide. 9Siga Abimelech niu Abraham tu kulujiu maniu-e, “Nangniu aliu khuga degu kamgulo? Iniu nariga degu kamaobo kamkhai mibo bamjiu haikumbo chariu magenthiubo hai ariga khatdi amaidung riga dekamjiu phungwang gulo? Nangniu kamkhaibo kumbo hai mai khatnadi akhuga kamkhai makha-e. 10Dekamjiu haise nang kamjiulo?

11Abraham niu paokakge, “Haiga mai khatnadi Tingwang tu kapingbo habo jengniu anaotu lura paliuniu atu kamshatmi suma chiujiu I maningbo jengniu-e. 12Pahai pachangjiu atanpui-e. Pahai apiu nahpui-e, chiudi apuiniu ponbo makge, siniu I patu majang lungbo-e. 13Sijengniu apiu ky gasu Tingwang niu atu sangmai dihga langkhaibo tingga, Iniu pakhuga din-e, “I hai napiubo-e chiujiu mai hina khuga dinbo jengniu nang akadin wajiukha sui-e chiubo lenra-e.”

14Siga Abimelech niu Abraham khuga Sarah tu pikhailan mide, sichiujiu paniu paleng milydung, matom-kabuidung, khatdi kavangdungdi pikhaide. 15Paniu Abraham khuga din-e, “Haiga agu kadih pakhiangna bam-e, nangniu lungnibo bamga lunglo.” 16Paniu Sarah khugadi din-e, “Namao wakhatdi ha-e chiubo lenra, Iniu nachileng rangkang sang khat pikhaibo-e, nang kamaobo kammakge chiubo hai mai hinaniu sirabo-e.”

17-18Abraham nao Sarah jengniu Abimelech gu chawangkiningga bambo maipui hinatu pijiu tanah lungmakra Tingwang niu kham mibo-e. Sijengniu Abimelech leng Abraham niu kakheng thiukhaiboga Tingwang niu patu wikhai bide. Paniu panaotudi, pavangpuidung tudi wikhai bide, sichiujiu paliu mathiu tanah lunglan lura wikhai bide.

Currently Selected:

CHABANGCHAM 20: LIANBSI

Highlight

Copy