CHABANGCHAM 17

Ladriatgu Madan, Chagirombo

1Abram niu tingkum riakchakiu-je-chakiukiu tangmiboga, Rapiu niu patu ngaolenjiu pakhuga din-e, “I hai Ngamkambo Rawang si-e. Acham majai lulo, khatdi majibo ronna kamlo. 2Iniu natu ladriat thiu khaijiu, nakai-kik leng kengkha pikhai bine.” 3Abram niu kadihga makhumkiu kahum-e, siga Tingwang niu din-e, 4“Iniu haibo ladriat nakhuga thiu khai-e: nangniu jatdung kakeng paopeh thiurabo-e.

5 # Rom 4.17. Nazanse Abram kulak mide, chiudi Abraham#17.5: Abraham: parambaniu “Kakengbo jatdung paopeh” chiubo-e. chiujiu kumine, palamra Iniu natu jatdung kakeng paopeh pithiu khai bine. 6Iniu nakai-kik leng kengkha pikhai bine, khangsia mainiu chawang thiune. Nakai-kikdung hai kingpadjiu paliuniu jatdungse thiurabo-e.

7 # Lk 1.55. Iniu nakhuga ladriat khaibo hai natah-nanah ken tangbo tingtheng leng majai khai bine. Iniu na-Rawang khatdi nakai-kik Rawang thiune. 8#Tk 7.5.Tuhoi nang sangmai thiujiu bambo dihai naleng khatdi nakaikik leng pikhai bine. Canaan dih pakhiangna hai tingthengjiu nakai-kik gu thiurabo-e, khatdi Iniu paliu Rawang thiu rabo-e.”

9Tingwang niu Abraham khuga din-e, “Nangdi akhuga ladriat thiu khaibo hai pasai wanglan rabo chaken-ga nakai-kikdungdi tingthengjiu majai rabo-e. 10#Tk 7.8; Rom 4.11.Nangdi, nakai-kikdungdi npiumai hina chagirom rabo-e. 11-12Tuhoi gasu npiumai nah hina jeng tachat tangmibo hina, nakyga kavang tadi, sangmai khugasu kavang leng liumai tadi, chagi romrabo-e. 13Mai hina chagi-rom rabo-e, sichiujiu chapumga lenkhaibo madan hainiu agu ladriatse tingtheng leng-e chiubo lenrabo-e. 14Mai khat kumboniu pagi rom maksai, patu amai-e chiubo chakkhai silakge, palamra akhuga ladriat khaibo haitu paniu majai makge.”

15Tingwang niu Abraham khuga din-e, “Nangniu nanaotu Sarai chiujiu kuta milo, tuhoi gasu pazan Sarah#17.15: Sarah: parambaniu “chawangnahpui” chiubo-e. kumibo-e. 16Iniu patu thoikhai bine, sichiujiu paniu naleng npiumai khat lungne, Iniu patu thoikhaijiu, pahai jatdung pui thiurabo-e, sichiujiu pakai-kikdung khugasu chawangdung lungpad rabo-e.”

17Abraham pazu kadihga makhum kiujiu kahum-e, chiudi “Mai khatniu tingkum kai tangmiboga panah lunglu buima? Sarah tingkum riakchakiu tangmiboga panah lunglu buima?” chiubo paniu maning lujiu nuisude. 18Paniu Tingwang khuga maniu-e, “Dekamjiu Ishmael niu alek lumak ralo?”

19Chiudi Tingwang niu din-e, “Chiumakge. Nanao Sarah siniu panah piumai khat lungne, siga nangniu pazan Isaac#17.19: Isaac:parambaniu “nuibo” chiubo-e.kurabo-e. Iniu pakhuga khatdi pakai-kikdung khuga tingtheng majaikhai rabo ladriat si-e. Haise tingthenggu ladriat si-e. 20Nangniu Ishmael lamga khengbose Iniu chiukhaide, sichiujiu Iniu patu thoikhai bine khatdi pakai-kik kengkha Iniu pikhai bine. Pahai chawang nahdung khang kariu-je-niakiu piuse thiurabo-e, khatdi Iniu pakai-pakikdung situ kadibo jat khat pithiu khai bine. 21Chiudi haikumbo ting makumga Sarah niu lungrabo panah Isaac khuga Iniu aladriat hai majaikhai rabo-e.” 22Tingwang niu Abraham tu npao lubo sai, patu saodiak lujiu tadmide.

23Abraham niu Tingwang kadin piujiu, sibonai chawan panah Ishmael tu khatdi paky lungga bambo npiumai hina, pavangdungdi, paniu liuwangbo mai hina tudi paliu-gi rom khaide. 24Abraham hai tingkum riakchakiu-je-chakiubo kum tangmiboga pagi rom-e, 25siga panah Ishmael se tingkum kariu-je-sumkiu tangmide. 26Panai khang nia situ naikhat gasu panai-gi rom-e, 27sibo nai Abraham vangmai mathiu situ sibo paliu-gi rom kam-e.

Currently Selected:

CHABANGCHAM 17: LIANBSI

Highlight

Copy