TIENKAM 1

1 # Lk 1.1-4. Lungsa-kakung Theophilus:

Agu ariakkhuang karaibo gase, Jesu niu patien thiusubo gasu patu tinggen lam lusu mibo tingmik tangbo lungga kamkhai mibo khatdi katikhai mibo hinase Iniu raokhai mibo-e. 2Patuse lusu makhabo suanggase, Masanbo Hiupuina pumtan pen gasu paniu pagu ladlangtad maileng kadakhai mibo maidung khuga katikhai-e. 3Pah shaimibo saiga jeng atai lungga pahai ringsulan mide chiubo malum masamak raleng paliu khuga pathak kengjiu madulen khai-e. Paliuniu patu ngao-e, khatdi Tingwang gu chawangdih lamga paniu paliu khuga dinkhaibi-e. 4#Lk 24.49.Sichiujiu paniu paliutu maluang tiu bamboga, paniu paliu khuga haibo chamtanse pikhai-e: “ Apiuniu ladriat khaibo kalen, Iniu naliu khuga dinmibo kalen situ Jerusalem phut makjiu khuanbamlo. 5#Mt 3.11; Mk 1.8; Lk 3.16; Jn 1.33.John niura tadui gasu nphumkhai-e chiudi pakak khat sailam naliutu Masanbo Hiupuina gasu nphumkhai bine.”

Jesu Tu Tinggen Lam Lukhang Mibo

6Khommaidung siniu Jesu khuga wang aruangboga, paliuniu pakhuga maniu-e, “Rapiu yo, tuhoira Israel mai wangdihse nang malan khaibi surama?”

7Jesu niu paliu khuga din-e, “Pating nai pawan sira Apiu gu pumtanne, sichiujiu sidungse dedao ralo chiubo naliuniu sitang lulakge. 8#Mt 28.19; Mk 16.15; Lk 24.47,48.Chiudi Masanbo Hiupuina siniu naliu riga kiukhai bisai, naliu khuga pumtanniu phuimi sune, sichiujiu ajeng gasu naliuniu Jerusalem ga Judaea ga khatdi Samaria ga khatdi kadihpiri pamalan tangbo lamchap thiurabo-e.” 9#Mk 16.19; Lk 24.50,51.Haichiu dinlubo saiga, paliuniu patu phuibambo gasu patuse tinggen lam lukhang mide khatdi kamuang siniu patuse paliu mikphui gasu baimide.

10Pah khangmibose paliuniu tingpuk lam phuijiu bamboga, kakabo pon piubo mai khangnianiu paliu ruangga wangnuang lujiu din-e, 11“Galilee maidung yo, dekamjiu naliu chaplujiu tingpuk lamse phui bamjiulo? Haibo Jesu, naliu khugasu tinggen lam lukhang mibo haitu paniu tinggen lam khangmibo naliuniu ngaobo kumgapjiu pah wanglan rabo-e.”

Juda Sung Malinbo

12Sichiujiu pakhommaidungse Olive Luong gasu mathakbam khat kumbo diubo Jerusalem namdi lamse malanwang mide. 13#Mt 10.2-4; Mk 3.16-19; Lk 6.14-16.Paliuniu namdi gase ngutlujiu paliuniu bambo kilung gase, Peter, John, Jacob nai Andrew, Philip nai Thomas, Bartholomew nai Matthew, Alphaeus nahpiu Jacob, palung thiubo Simon, Jacob nahpiu Juda, paliu ngut mide. 14Paliuniu kakheng thiura maipuidung nai Jesu pui Mary khatdi pasingna maidung paliu hai wang aruang tan-tan-e.

15Pakak khat saiga, malum maidung chamai kai-je-makai kumbo wang madui bamboga, Peter niu chapkhang lujiu dinsude. 16“ Asingna maidung yo, Masanbo ariakga dinkhaibose wangtang raleng, David khu gasu Masanbo Hiupuina siniu din masuang khaimibo, Jesu tu minbo maidungtu majang khaibo Juda lamga-e. 17Juda hai aliu ruanggasu khang khatle, palamra aliu tienkamga patudi jaora kadakhai mibo-e.”

18 # Mt 27.3-8. (Pagu tienkam kasabo gasu daolubo rangkang siniu paniu chalu khat liu khaide, siga tadlujiu pawon pangpadjiu khatdi pasin-parai padjiu shaikhai mibo-e. 19Jerusalem ga lungbambo mai hinaniu sise chiuboga khatdi sibo luzam situ paliu lad gasu “Akeldama,” parambaniu “Tazai luzam” chiujiu ku-e).

20 # T.Lui 69.25; T.Lui 109.8. “Palamra Tathoilui ariakkhuangga haichiujiu raokhai bamme,

‘Pakyse maruangbo thiu milo;

mai khatniudi siga lungta milo.’

Haichiudi raokhai bamme,

‘Pasung mai khatniu malinmi sulo.’

21 # Mt 3.16; Mk 1.9; Lk 3.21; Mk 16.19; Lk 24.51. “Sijengniu mai khat kumbo, Rapiu Jesu ringsulan mibo lamga jengdin thiura aliu ruangga jaosai pahai Rapiu Jesu niu aliutu maluang tadboga, 22John niu tadui nphumbo cham dinron subo gasu Jesu tu tinggen lam lukhang mibo tingmik tangbo jaobambo mai khat thiurabo-e.”

23Sijengniu paliuniu : Barsabbas kubo (Justus chiudi sibo) Joseph khatdi Matthias kubo mai khangniatu kada padde. 24Sichiujiu paliu kakheng thiu-e “Rapiu, mai hina lungchun nang sijiu bamme, sijengniu haina kania ruanggasu nangniu len khailo. 25Judas niu panuan jeng gasu tadrabo bamlam tadmibopiu malin ga ladlangtadbo tien thiura maitu lenkhailo.” 26Sichiujiu paliuniu panai khangnia ruanggasu taden matai sude, siga Matthias tu kadalude, sichiujiu patuse ladlangtadmai khang kariu-je-khatkiu ruangga lukhaide.

Currently Selected:

TIENKAM 1: LIANBSI

Highlight

Copy