LUK 6

Doonu Aalwg Pagoqkam Toxnam

(Mt 12:1-8; Mk 2:23-28)

1Doonu dvk aal golo Jisu am rongo rwqtag rwqra jaqb wdul doonum. Mwwg buu tulungv am vmlywngam cwqbnv bulug alaqho keexaq banv ham dvl wnum. 2Parisi nyi ata gon benum, “Doonu dvk aalam pvvblo nyingam maanam bonam nulv hoggub nyidu dvn?” 3Jisu bulam birwqbanv benum, “Debid la mwwg nyi tulungv kano yukho hog bvxeq nyinum ham nulv poory maad nvi yv? 4Mwv Pwnbog nammwb haabnv mwv Pwnboam aky jinam wtwngam naabnv dvtwl hoo mwwg nyi tulungam kam jinum. Hvbmab, hiyvkam dvngam maadnvk hvl bedwn, hvbmab nyub arongv dvdwb nyidwn?” 5Hoqgv Jisu hvlakam bulam benum, “Nyia Ko Tuupv Doonu aal gvkam At Swb nyidwn.”

Alaq Laqyabo Nyi Ak

(Mt 12:9-14; Mk 3:1-6)

6Kokw so Doonu dvk aal golo Jisu Sinagog nam urab haabnv tomswrnum. Uraho alaq lvqbwqkv singtw talol laqyabo nyi ak doonum. 7Ho Pvvb tomswrbo tulungv la Parisi tulungv mwam kaagab jinjinum, mwv Doonu aalam mwpnam mam kaadwb, ho bulv mwwg pagoq nyixiaqkam kaapal yolu bigw naadwb. 8Hvbmabde Jisu bulug mwwsnam mam cengtvl alaq laqyabo nyi ak ham benum, “No gorab gvdwl lvpajaqso daqto” Hoo nyi akv gorab banv hoqho daqnum. 9Ho Jisu bulam benum, “Ngo nulam toxdvn, Doonu dvk aalam hog nvkamxeq nyitwk hvl ngulug Pvvblo bedwn? Svka tvk hvla yv ma un mvg tvk hvl yv? Nyi akwg swwgam ywwlin tvk hvl yv ma ham twrm tvk hvl yv?” 10Ho mwv nywkur banv bulam kaatwl, hoq nyi akam benum, “Noqg alaqngam ilinto.” Hoo mwv alaqngam ilin yin mwwg alaqkv lokta al kunum. 11Ho bulv hang lingtwr banv Jisun hoggub mvbnyiloqkam altayin ham bulug pengko ho hwwrab nyanum.

Jisu Buu Wyw leq Vnyi go Xuqnum

(Mt 10:1-4; Mk 3:13-19)

12Hoq mood ho Jisu xumtab puutu golo caabnv hoq ai yupwho Pwnboam swgw gwwl doodunum. 13Huto yukam mwwg buu tulungam goqanum hoo bulug pengko hoqgv wyw leq vnyi gon xuqlinl ham mwv kanamnam tulungv hvl goqnum: 14Simon (hiyam mwv Pitor hvlakam eminum) hoo mwwg bor Andriyo, Jems Jon, Pilip ho Bartolomiyu, 15Metiyu la Tomas Alpiyus gv ko Jems, Simon (Mwam at gvdangam hang cinbo hvl benum.) 16Jemsig ko Judas, nyepinbo Judas Iskeriot.

Jisug Tomswrnam hoo Mwpnam

(Mt 4:23-25)

17Yorn hoqgv bulug lvgab ipoq laikul Jisu mwwg buu acam gv lvgab haapa golo daqgnum. Judiya gvla Jerusalem gvda mwlw hoqgv la Taiyar gvla Sidon swnyiq bviywr hoqgvkam; 18bulv mwwg tomswrnam mam tata bvla bulug vc apy mwlwngam mwp kodwb nyiv vijaqg hoqho haal doonum. Ig oram nootunam nyi mwlwngv vijaqg haabnv mwp konum. 19Mwwg galo atorv lengl bulam mwlwngam mwp jigam gab nyi mwlwngv mwam gvbw tvnam gob nyinum.

Mwwngamnam la Muurnam

(Mt 5:1-12)

20Kokw so Jisu mwwg buu tulungam kaanv benum,

“Jwwgw nyi tulu nulv jaqmolo hemp ponam jaqkv, hoggab Pwnbog lvpwngv nulug gab doodwn!

21“Sijag kano bo nyi tulu nulv jaqmolo hemp ponam jaqkv, hoggab nulug ayeqngv bwwtayin!

“Sijag xabn bo nyi tulu nulv jaqmolo hemp ponam jaqkv, hoggab nulv nyirtayin!

22Nyia Ko Tuup gabnvl nyi tulug oyumnam, haqpaqnam, tob-tainam, ho almak hvl benam nyi tulu nulv jaqmolo hemp ponam jaqkv! 23Hoq hvb nyiyi nyiloqkam nulv hemp pogdvl hwnyir-hvmar gob soomin to, hoggab nulgab ao gvda tv soq sib jis koi albo ak ap pan. Hoqgab bulug ab ann tulu ngvkam soq nyinam akin sam nyiqry benbo tulungam kam nyinum.

24“Hvbmabde sijag nyet tvnbo nyi tulu nul gabnvl hvkam bvxeq hentwr-kaas jaqkv; hoqgab nulv hemp pomin banv swwnyia nukun.

25Sijag dvmin twwmin doonbo nyi tulu nul gabnvl hvkam bvxeq hentwr-kaas jaqkv! Hoggab nulv kano nootayin!

26“Nyi tulungv aljaq pak hvl benyanam nyi tulu nul gabnvl hvkam bvxeq hentwr kaasngv hog gabnvl nyi tulu ngamkam soq luukin sam nyijnum.

Ceebiob Hang Baqnboam Abynam

(Mt 5:38-48; 7:12)

27“Hvbmabde ngoqg benam mam tanbo nyi tulungam ngo nulam bekin dvn, nulam ceebio baqnbo nyi tulungam aby boto. Nulam oyum bo nyi tulungam anyab nyijto, 28Nulam beenbo tulungam lvqc cito hoqgv nulam nyic nyia nyinbo nyi tulug gabnvl xumj to. 29Hiyv akgon nam nyuqm mam pitaql mvbnyiloqkam taqgin hamrub mwam pitaq mvto, hiyv lajaqkam noqg kamtam naareq yinyiloqkam mwam noqg lvlwq ngamkam naamto. 30Ho nam nyi ak hog koi nyiloqkam bulam mwlwngam jito, hoqgv hiyv akgon noqg dvrab-pacab pam naai nyiloqkam, hoqham akvkam jikurtuk bvk hvl komab. 31Nyiv hogbvxeq nyiyam nulv hang hinglwqdvn hoq hvbkalam nulv bulam nyilwq kalam to. 32Nulam aby bonbo nyi tulungam xeq nulv aby bolwq kalam twqbnyiloqkam, hoggab yu nulv lvqc cinam loqmai yv mwwkin dvn? Nyic nyia nyinbo nyi tulu ngvkam aby bon boamkalam bulv aby bolwq kalam dvn! 33Hoqgv nulam alwb nyijbo nyi tulungam xeq nulv alwb nyitwq bvnyiloqkam hog gab yu nulv lvqc cinam loqmai yv mwwkin dvn? Nyic-nyia nyinbo nyi tulu ngvkam hoq hvkam nyiaq dvn lak! 34Hoqgv ceetwl jikur nyokin sudbo nulug mwwnam nyi tulungam xeq nulv cwwrwqtwqb nyiloqkam hog gabyu nulv lvqc cinam loqmai yv mwwkin dvn? Nyic nyia nyinbo nyi tulu ngvkam ceenam mam nookur dukub hvnv nyic nyia nyinbo kalam mam cwwrwq haqd nvlak! 35Hvbmabde nulam ceebio hang baqnboam nulv abyto hoo bulam alwb anyab nyito, cwwrwqto hvbmabde hog gokam nookur tuknvp mwwma bvka. Nulug lvqc naasv xitor jaqgo doodwn. Ho nulv mwlwjaqkam koi Yaanbo Pwnbog koob nyitayin. Hoggab mwv koam aya mwwpa dvn. 36Nulug Abwg anyanam hvbkalam nulvkam anyato.

Asaqkam Pw-hwwnam

(Mt 7:1-7)

37“Nyiam pw-hwwma bvka, hoo nulamkam Pwnbov pw-hwwram, Nyiam bepaq-taiyaq maabka, hoo Pwnbov kam nulam bepaq-taiyaqram, Nyiam axia jilaka, hoo Pwnbov nulam axia jitayin. 38Nyiam jito hoo Pwnbov nulam jitayin nulam laleq dvb nulug jinam hwdkalam go nulug alaqho gvqlwq tayin. Nulv hognvkam nyiam xil jin pan hoqho Pwnbov kam nulam xil jintayin.”

39Ho Jisu bulam soq doocnam sam doocil benum, “Nyiqca bo nyiv nyi nyiqca bo akwn bool wg nyoma dvn, mwv bool wg bvnyiloqkam bulv vnyi vnyiv ung golo yoqlwq tayin. 40Tomswrnamv Tomswr boam koi yaama dvn hvbmabde tomswrnam vcw atv hog mwlwngam cingyum yukam bulv tomswrbo hvbkalam nyitayin. 41Hvbmabde atwg vnyiq uralo doonbo nyiqwr cwrt alboam kaaxaq tvs mwwma jaqb, hoggab no noqg bor vnyiq uralo doonbo nyiqwram kaadwn? 42Noqg vnyiq uraho nyiqwr cwrt alboam kaapa maapel no hoggub bela dvn borv, noqg vnyiq nyiqwram kaatws hvl benyi tayin? Gwwnbo no! Otuqcob no noqg vnyiq nyiqwr koi alboam naalinto hoomo lo no dardarjaqb kaal noqg borwg vnyiq uraho doonbo nyiqwr cinyio boam naalin tayin.

Svvn la Svvn hoq Aaxy

(Mt 7:16-20; 12:33-35)

43“Albo svvnv aaxy almanbo xeema dvn, ho almab svvnv albo aaxy xeema dvn. 44Svvn nwwcw nwtam mwwg aaxy xeenam hoqgv sulak cengsdvn, nulv taoq svvn hoqgv taa aaxiam puma dvn hoq maabnyiloqkam roo liinam aaxiam taa svvn hoqgv puma dvn. 45Albo nyiv atwg hang uralo doonbo albo noosu hoqgv alboam naalin dvn, almab nyiv kalam atwg hang uraho doonbo almab noosu hoqgv almabam naalin dvn. Hoq gabnvl atwg hang uraho hog nvkvxeq doodwn ham sulak nyig agam ho bedwn.

Nam Mvnbo Nyi Vnyi

(Mt 7:24-27)

46“Ngo nulam hog hvla xeq bedwn ham tama peel hog gabyu nulv ngam, At Sw, At Sw,’ hvl goqdwn? 47Hiyv lajaqkam ngoqg dookub haal ngoqg benam agam tulungam tatwl ham bugil swwn boam mwv hvbjaq nyidwn ngo nulam kaakin dumtayin. 48Mwv nam mvnbo nyi hvbjaq nyidwn mwv ura jaqb dulwq banv lwwn aolo nammam mvnum. Pobungv diidwr wbnv nammam tubsbakam diidwr issiv ham biidbvkam mvnyi maanum. 49Hvbmabde ngoqg benam agam tulungam tatwl ham bugi maab nyi akv mwwg nammam xuqx aoho mvnbo jaq hvb nyidwn diidwr issiv tobnv nammam todaq yukam vnwq alwb tabdwn. Hoq namhv vcjaqb yal dul tabto kunum!”

Currently Selected:

LUK 6: NISS

Highlight

Copy